‘ಯಾಕಿಂಗೆ 2’ ಹಾಡು ಸೂಪರ್ ಹಿಟ್; 2 ಮಿಲಿಯನ್ ಸನಿಹಕ್ಕೆ ಅಲೋಕ್ ಹೊಸ ಸಾಂಗ್
ಈ ಹಾಡಿನಲ್ಲಿ ಪುನೀತ್ ರಾಜ್ಕುಮಾರ್, ಸಂಚಾರಿ ವಿಜಯ್, ಚಿರಂಜೀವಿ ಸರ್ಜಾ ಅವರಿಗೆ ನಮನ ಸಲ್ಲಿಸಲಾಗಿದೆ. ಹಾಗಾಗಿ ಅವರ ಅಭಿಮಾನಿಗಳು ಕೂಡ ಈ ಗೀತೆಯನ್ನು ಇಷ್ಟಪಟ್ಟಿದ್ದಾರೆ.
ಬೇರೆ ಭಾಷೆಗಳಿಗೆ ಹೋಲಿಸಿದರೆ ಕನ್ನಡದಲ್ಲಿ ಮ್ಯೂಸಿಕ್ ವಿಡಿಯೋಗಳ (Music Video) ಸಂಖ್ಯೆ ಕಡಿಮೆ. ಕೆಲವೇ ಕೆಲವು ಗಾಯಕರು ಮತ್ತು ಸಂಗೀತ ನಿರ್ದೇಶಕರು ಈ ಕ್ಷೇತ್ರದಲ್ಲಿ ಖ್ಯಾತಿ ಗಳಿಸಿದ್ದಾರೆ. ಆ ಪೈಕಿ ಅಲೋಕ್ ಕೂಡ ತುಂಬ ಫೇಮಸ್. ಆಲ್ ಓಕೆ (All OK) ಎಂಬ ಹೆಸರಿನಿಂದಲೇ ಜನಪ್ರಿಯತೆ ಪಡೆದುಕೊಂಡಿರುವ ಅವರು ಈಗಾಗಲೇ ಅನೇಕ ಹಿಟ್ ಹಾಡುಗಳನ್ನು ನೀಡಿದ್ದಾರೆ. ‘ಡೋಂಟ್ ವರಿ’, ‘ಹ್ಯಾಪಿ ಆಗಿದೆ’, ‘ಮಾರಮ್ಮನ ಡಿಸ್ಕೋ’, ‘ಯಾಕಿಂಗೆ ಮಗಾ ಹಾಕಿಂಗೆ’ ಮುಂತಾದ ಹಾಡುಗಳು ಜನಮೆಚ್ಚುಗೆ ಗಳಿಸಿವೆ. ಅದರಿಂದಾಗಿ ಆಲ್ ಓಕೆ ಯಶಸ್ಸು ಪಡೆದುಕೊಂಡರು. ಈಗ ‘ಯಾಕಿಂಗೆ 2’ (Yaakinge 2) ಹಾಡು ಮಾಡಿ ಮತ್ತೆ ಸೈ ಎನಿಸಿಕೊಂಡಿದ್ದಾರೆ. ಯೂಟ್ಯೂಬ್ನಲ್ಲಿ ಬಿಡುಗಡೆಯಾದ ಒಂದೇ ದಿನಕ್ಕೆ ಈ ಹಾಡು ಒಂದು ಮಿಲಿಯನ್ ವೀವ್ಸ್ ಪಡೆದುಕೊಂಡಿತು. ಈಗ 2 ಮಿಲಿಯನ್ ಕಡೆಗೆ ಮುನ್ನುಗ್ಗುತ್ತಿದೆ. ಈ ಪರಿ ರೆಸ್ಪಾನ್ಸ್ ಸಿಗುತ್ತಿರುವುದಕ್ಕೆ ಅಲೋಕ್ ಖುಷಿ ಆಗಿದ್ದಾರೆ.
ಅಲೋಕ್ ಅಭಿಮಾನಿಗಳು ಈ ಹಾಡನ್ನು ಇಷ್ಟಪಟ್ಟಿದ್ದಾರೆ. ಈ ಗೀತೆಯ ಇನ್ನೊಂದು ವಿಶೇಷ ಏನೆಂದರೆ ಬಿಗ್ ಬಾಸ್ ಖ್ಯಾತಿ ಹಲವು ಸೆಲೆಬ್ರಿಟಿಗಳು ಇದರಲ್ಲಿ ಕಾಣಿಸಿಕೊಂಡಿದ್ದಾರೆ. ಅಲೋಕ್ ಅವರ ಈ ಹಿಂದಿನ ಹಾಡುಗಳಲ್ಲಿ ಕೂಡ ಚಿತ್ರರಂಗದ ಅನೇಕರು ಅತಿಥಿಗಳಾಗಿ ಕಾಣಿಸಿಕೊಂಡಿದ್ದರು. ‘ಯಾಕಿಂಗೆ 2’ ಸಾಂಗ್ನಲ್ಲೂ ಟ್ರೆಂಡ್ ಮುಂದುವರಿದಿದೆ. ‘ಬಿಗ್ ಬಾಸ್ ಕನ್ನಡ 8’ರಲ್ಲಿ ಮಿಂಚಿದ ವೈಷ್ಣವಿ, ಅರವಿಂದ್ ಕೆ.ಪಿ., ದಿವ್ಯಾ ಉರುಡುಗ, ರಘು ಗೌಡ ಸಹ ಅಲೋಕ್ ಜೊತೆ ಡ್ಯಾನ್ಸ್ ಮಾಡಿದ್ದಾರೆ.
ಈ ಹಾಡಿನಲ್ಲಿ ಪುನೀತ್ ರಾಜ್ಕುಮಾರ್, ಸಂಚಾರಿ ವಿಜಯ್, ಚಿರಂಜೀವಿ ಸರ್ಜಾ ಅವರಿಗೆ ನಮನ ಸಲ್ಲಿಸಲಾಗಿದೆ. ಹಾಗಾಗಿ ಅವರ ಅಭಿಮಾನಿಗಳು ಕೂಡ ಈ ಗೀತೆಯನ್ನು ಇಷ್ಟಪಟ್ಟಿದ್ದಾರೆ. ಅಶೋಕ್ ಜೋಷಿ ಛಾಯಾಗ್ರಹಣ, ಲೋಟು ಲೋಹರ್ ನೃತ್ಯ ನಿರ್ದೇಶನ ಮಾಡಿದ್ದಾರೆ. ಸಾಹಿತ್ಯ, ಸಂಗೀತ ಮತ್ತು ನಿರ್ದೇಶನದ ಜವಾಬ್ದಾರಿಯನ್ನು ಅಲೋಕ್ ನಿಭಾಯಿಸಿದ್ದಾರೆ.
2018ರಲ್ಲಿ ರಿಲೀಸ್ ಆಗಿದ್ದ ‘ಯಾಕಿಂಗೆ’ ಹಾಡು ಈವರೆಗೆ 12 ಮಿಲಿಯನ್ ವೀವ್ಸ್ ಪಡೆದುಕೊಂಡಿದೆ. ಈಗ ‘ಯಾಕಿಂಗೆ ಪಾರ್ಟ್ 2’ ಹಾಡಿಗೆ ಎಷ್ಟು ವೀವ್ಸ್ ಆಗಲಿದೆ ಎಂಬ ಕುತೂಹಲ ನಿರ್ಮಾಣ ಆಗಿದೆ. ಸೋಶಿಯಲ್ ಮೀಡಿಯಾದಲ್ಲೂ ಈ ಸಾಂಗ್ ವೈರಲ್ ಆಗ್ತಿದೆ.
ಇದನ್ನೂ ಓದಿ:
‘ಹ್ಯಾಪಿ ಆಗಿದೆ..’ ಎಂದು ಕನ್ನಡ ಹಾಡಿಗೆ ತಲೆದೂಗಿದ ಕೊವಿಡ್ ಸೋಂಕಿತರು; ಕಡುಕಷ್ಟದಲ್ಲೂ ಆಲ್ ಓಕೆ