‘ದೇಸಾಯಿ’ ಟೀಸರ್​ಗೆ ಲಕ್ಷ್ಮಣ ಸವದಿ ಹಾರೈಕೆ; ‘ಲವ್​ 360’ ಹುಡುಗನ ಹೊಸ ಸಿನಿಮಾ

‘ಲವ್ 360’ ಖ್ಯಾತಿಯ ನಟ ಪ್ರವೀಣ್ ಕುಮಾರ್ (Praveen Kumar) ಅವರು ಹೀರೋ ಆಗಿ ನಟಿಸಿರುವ ‘ದೇಸಾಯಿ’ (Desai) ಸಿನಿಮಾದ ಟೀಸರ್ ಇತ್ತೀಚಿಗೆ ಬಿಡುಗಡೆ ಆಯಿತು. ‘ಶ್ರೀ ವೀರಭದ್ರೇಶ್ವರ ಕ್ರಿಯೇಟಿವ್ ಫಿಲ್ಮ್ಸ್​’ ಲಾಂಛನದಲ್ಲಿ ಈ ಸಿನಿಮಾ ನಿರ್ಮಾಣ ಆಗಿದೆ. ಮಹಾಂತೇಶ ವಿ. ಚೋಳಚಗುಡ್ಡ ಅವರು ನಿರ್ಮಾಣ ಮಾಡುವುದರ ಜೊತೆಗೆ ಕಥೆ ಬರೆದಿದ್ದಾರೆ. ನಾಗಿರೆಡ್ಡಿ ಭಡ ಅವರು ‘ದೇಸಾಯಿ’ ಚಿತ್ರಕ್ಕೆ ನಿರ್ದೇಶನ ಮಾಡಿದ್ದಾರೆ. ಮಾಜಿ ಉಪ ಮುಖ್ಯಮಂತ್ರಿ ಹಾಗೂ ಶಾಸಕ ಲಕ್ಷ್ಮಣ್ ಸವದಿ (Laxman Savadi) ಅವರು ಈ ಸಿನಿಮಾದ ಟೀಸರ್ ರಿಲೀಸ್​ ಮಾಡಿದ್ದಾರೆ. ಬಳಿಕ ಅವರು ಚಿತ್ರತಂಡಕ್ಕೆ ಶುಭ ಹಾರೈಸಿದರು.

ಸುದ್ದಿಗೋಷ್ಠಿಯಲ್ಲಿ ನಿರ್ಮಾಪಕ ಮಹಂತೇಶ ವಿ. ಚೋಳಚಗುಡ್ಡ ಮಾತನಾಡಿದರು. ‘ಸಿನಿಮಾ ನಿರ್ಮಾಣ ಎಂಬುದು ನನ್ನ ಕನಸು. ಚಿತ್ರತಂಡದ ಸಹಕಾರದಿಂದ ಆ ಕನಸು ಇಂದು ನನಸಾಗಿದೆ. ಲಕ್ಷ್ಮಣ ಸವದಿ ಅವರು ನನ್ನ ಬೆನ್ನ ಹಿಂದೆ ನಿಂತು ಪ್ರೋತ್ಸಾಹಿಸಿದ್ದಾರೆ. ಈಗ ಟೀಸರ್ ಬಿಡುಗಡೆ ಮಾಡಿಕೊಟ್ಟ ಅವರಿಗೆ ಧನ್ಯವಾದಗಳು. ಇದು ಕೌಟುಂಬಿಕ ಕಥೆ ಇರುವ ಸಿನಿಮಾ. ಬಹುತೇಕ ಶೂಟಿಂಗ್​ ಬಾಗಲಕೋಟೆಯಲ್ಲಿ ಮಾಡಿದ್ದೇವೆ. ಅಲ್ಲಿನ ಜನರ ಸಹಕಾರವನ್ನು ನಾನು ಸ್ಮರಿಸಿಕೊಳ್ಳುವೆ’ ಎಂದಿರುವ ನಿರ್ಮಾಪಕರು ಆದಷ್ಟು ಬೇಗ ಈ ಸಿನಿಮಾವನ್ನು ಬಿಡುಗಡೆ ಮಾಡುವ ಗುರಿ ಇಟ್ಟುಕೊಂಡಿದ್ದಾರೆ.

‘ದೇಸಾಯಿ’ ಸಿನಿಮಾದ ಟೀಸರ್:

ವಿಜಯಕುಮಾರ್ ಪಿ.ಜಿ, ಮಲ್ಲಿಕಾರ್ಜುನ ಲೋನಿ ಮುಂತಾದ ಗಣ್ಯರು ಕೂಡ ಟೀಸರ್​ ಬಿಡುಗಡೆ ಸಮಾರಂಭದಲ್ಲಿ ಹಾಜರಿದ್ದರು. ತಾವು ಅಂದುಕೊಂಡ ರೀತಿಯೇ ಈ ಸಿನಿಮಾ ಮೂಡಿಬಂದಿದೆ ಎಂದು ನಿರ್ದೇಶಕ ನಾಗಿರೆಡ್ಡಿ ಭಡ ಅವರು ಹೇಳಿದರು. ಈ ಸಿನಿಮಾದಲ್ಲಿ ಪ್ರವೀಣ್​ ಅವರಿಗೆ ಜೋಡಿಯಾಗಿ ನಟಿ ರಾಧ್ಯಾ ಅಭಿನಯಿಸಿದ್ದಾರೆ. ‘ಒರಟ’ ಪ್ರಶಾಂತ್, ಮಧುಸೂದನ್ ರಾವ್, ಚೆಲುವರಾಜು, ಕಲ್ಯಾಣಿ, ನಟನ ಪ್ರಶಾಂತ್, ಹರಿಣಿ, ಸೀತಾ ಬೆನಕ, ಆರತಿ ಕುಲಕರ್ಣಿ, ಸೃಷ್ಟಿ, ಮಂಜುನಾಥ್ ಹೆಗಡೆ ಮುಂತಾದವರು ಈ ಚಿತ್ರದಲ್ಲಿ ನಟಿಸಿದ್ದಾರೆ.

ಇದನ್ನೂ ಓದಿ: ವಿಯೆಟ್ನಾಂನಲ್ಲಿ ಶೂಟಿಂಗ್ ಪೂರ್ಣಗೊಳಿಸಿದ ಗೋಲ್ಡನ್ ಸ್ಟಾರ್ ಗಣೇಶ್ ನಟನೆಯ ‘ಕೃಷ್ಣಂ ಪ್ರಣಯ ಸಖಿ’ ತಂಡ

ಮ್ಯೂಸಿಕಲ್​ ಹಿಟ್​ ಆಗಿದ್ದ ‘ಲವ್​ 360’ ಸಿನಿಮಾದ ಮೂಲಕ ಪ್ರವೀಣ್​ ಅವರು ಸ್ಯಾಂಡಲ್​ವುಡ್​ಗೆ ಎಂಟ್ರಿ ನೀಡಿದ್ದರು. ಈಗ ಅವರು ‘ದೇಸಾಯಿ’ ಚಿತ್ರದಲ್ಲಿ ಬೇರೆ ರೀತಿಯ ಪಾತ್ರ ಮಾಡಿದ್ದಾರೆ. ‘ಈ ಮೊದಲು ನಾನು ನಟಿಸಿದ್ದ ‘ಲವ್ 360’ ಸಿನಿಮಾ ಪಾತ್ರವೇ ಬೇರೆ. ಈಗ ಈ ಸಿನಿಮಾ ಪಾತ್ರವೇ ಬೇರೆ. ನಾನು ಈ ಸಿನಿಮಾಗಾಗಿ ಬಹಳ ತಯಾರಿ ಮಾಡಿಕೊಂಡಿದ್ದೇನೆ. ಸಿನಿಮಾದಲ್ಲಿ ಪ್ರವೀಣ್ ದೇಸಾಯಿ ಎಂಬುದು ನನ್ನ ಪಾತ್ರದ ಹೆಸರು’ ಎಂದು ಅವರು ಹೇಳಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.