ರಾಜ್​ಕುಮಾರ್ ಮೊದಲ ಆಡಿಷನ್ ಹೇಗಿತ್ತು? ವಿವರಿಸಿದ್ದ ಅಣ್ಣಾವ್ರು

ರಾಜ್​ಕುಮಾರ್ (Rajkumar) ಅವರಿಗೆ ಇಂದು (ಏಪ್ರಿಲ್ 24) ಜನ್ಮದಿನ. ಅವರು ಇಂದು ನಮ್ಮ ಜೊತೆಗೆ ಇದ್ದಿದ್ದರೆ 96ನೇ ವರ್ಷದ ಹುಟ್ಟು ಹಬ್ಬ ಆಚರಿಸಿಕೊಳ್ಳುತ್ತಿದ್ದರು. ರಾಜ್​ಕುಮಾರ್ ಅವರು ನಿಧನ ಹೊಂದುವಾಗ ಅವರಿಗೆ 76 ವರ್ಷ ವಯಸ್ಸು. ರಾಜ್​ಕುಮಾರ್ ಅವರು ನಿಧನ ಹೊಂದಿದರೂ ಅವರ ಆದರ್ಶಗಳು ಇಂದಿಗೂ ಪಾಲಿಸ್ಪಡುತ್ತಿವೆ. ರಾಜ್​ಕುಮಾರ್ ಅವರ ಅಪರೂಪದ ಸಂದರ್ಶನಗಳು ಈಗಲೂ ಲಭ್ಯ. ಅವರು ಹೇಳಿದ ಒಂದು ಅಪರೂಪದ ವಿಚಾರ ಇದೆ.

ರಾಜ್​ಕುಮಾರ್ ನಟಿಸಿದ ಮೊದಲ ಸಿನಿಮಾ ‘ಬೇಡರ ಕಣ್ಣಪ್ಪ’. ಈ ಚಿತ್ರವು 1954ರ ಮೇ 7ರಂದು ತೆರೆಗೆ ಬಂತು. ಅಂದರೆ, ಈ ಸಿನಿಮಾ ರಿಲೀಸ್ ಆಗಿ 70 ವರ್ಷಗಳು ಕಳೆದು ಹೋಗಿವೆ. ಈ ಸಿನಿಮಾದಲ್ಲಿ ನಟಿಸೋ ಮೊದಲು ರಾಜ್​ಕುಮಾರ್ ಅವರು ‘ಗುಬ್ಬಿ ವೀರಣ್ಣ’ ನಾಟಕ ಕಂಪನಿಯಲ್ಲಿ ಬಣ್ಣ ಹಚ್ಚುತ್ತಿದ್ದರು.

ರಾಜ್​ಕುಮಾರ್ ಅವರು ಕಣ್ಣಪ್ಪನಾಗಿ ನಟಿಸಿದರು. ಈ ಸಿನಿಮಾದ ಶೂಟ್​ಗೂ ಮೊದಲು ರಾಜ್​ಕುಮಾರ್​ಗೆ ಆಡಿಷನ್ ಮಾಡಲಾಯಿತು. ಅವರು ನಟಿಸಿ ತೋರಿಸಿದ್ದರು. ನಾಟಕದಲ್ಲಿ ಪಳಗಿದ್ದರಿಂದ ರಾಜ್​ಕುಮಾರ್​ಗೆ ಇದು ಕಷ್ಟ ಎನಿಸಲೇ ಇಲ್ಲ. ಆದರೆ, ನಾಟಕದಲ್ಲಿ ಕೈಗಳನ್ನು ಬೀಸಿಕೊಂಡು ಅವರು ನಟಿಸುತ್ತಿದ್ದರು. ಆದರೆ, ಇಲ್ಲಿ ಆ ರೀತಿ ಆಗೋದಿಲ್ಲ ಎಂಬುದು ರಾಜ್​ಕುಮಾರ್ ಅವರ ಅಭಿಪ್ರಾಯ ಆಗಿತ್ತು.

ಆಡಿಷನ್ ಕೊಟ್ಟು ಹಲವು ದಿನ ಕಳೆದರೂ ಅವರಿಗೆ ಯಾವುದೇ ಪ್ರತಿಕ್ರಿಯೆ ಸಿಗಲಿಲ್ಲ. ಕೊನೆಗೆ ನಿರ್ದೇಶಕ ಎಚ್​.ಎಲ್​.ಎನ್ ಸಿಂಹ ಅವರು ಪತ್ರ ಕಳುಹಿಸಿದರು. ನೀವು ಪಾತ್ರಕ್ಕೆ ಆಯ್ಕೆ ಆದಿರಿ ಎಂದು ರಾಜ್​ಕುಮಾರ್​ಗೆ ಪತ್ರ ಬಂದೇ ಬಿಡ್ತು. ಇದನ್ನು ಕೇಳಿ ರಾಜ್​ಕುಮಾರ್ ಖುಷಿ ಆದ್ರು. ಅಲ್ಲಿಂದ ಅವರ ಸಿನಿ ಪಯಣ ಶುರು ಆಯ್ತು ಎನ್ನಬಹುದು.

ಇದನ್ನೂ ಓದಿ: ರಾಜ್​ಕುಮಾರ್ ಜನ್ಮದಿನಕ್ಕೆ ಶಿವಣ್ಣನ ಹೊಸ ಸಿನಿಮಾ ಘೋಷಣೆ; ಟೈಟಲ್​ನ ಅಭಿಮಾನಿಗಳೇ ಊಹಿಸಬೇಕು

ರಾಜ್​ಕುಮಾರ್ ಎಲ್ಲ ಬಗೆಯ ಪಾತ್ರಗಳನ್ನು ಮಾಡಿದ್ದಾರೆ. ಆದರೆ, ಪೌರಾಣಿಕ/ ಭಕ್ತಿ ಪ್ರಧಾನ ಪಾತ್ರಗಳಿಗೆ ಹೆಚ್ಚು ಒಲವು ಇತ್ತು. ಅವರು ನಟಿಸಿದ ಮೊದಲ 100 ಸಿನಿಮಾಗಳ ಪೈಕಿ ಬಹುತೇಕವು ಪೌರಾಣಿಕ ಪಾತ್ರಗಳೇ ಅನ್ನೋದು ವಿಶೇಷ. ಅವರ ಅಭಿನಯಕ್ಕೆ ಮರುಳಾಗದವರೇ ಇಲ್ಲ. ರಾಜ್​ಕುಮಾರ್ ಸಿನಿಮಾ ಮಾಡಿದರೆ ಯಶಸ್ಸು ಗ್ಯಾರಂಟಿ ಆಗಿತ್ತು.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.