Rakshith Shetty: ಮೊದಲ ಬಾರಿ ಕೋರ್ಟ್ ಒಳಗೆ ಕಾಲಿಟ್ಟ ರಕ್ಷಿತ್ ಶೆಟ್ಟಿಗೆ ಇಂಥ ಅನುಭವ! ಇನ್ನೂ ಮುಗಿದಿಲ್ಲ ಕಿರಿಕ್ ಪಾರ್ಟಿ ಕಿರಿಕ್
ವಿಚಾರಣೆ ಸಲುವಾಗಿ ಇದೇ ಮೊದಲ ಬಾರಿಗೆ ರಕ್ಷಿತ್ ಶೆಟ್ಟಿ ಕೋರ್ಟ್ ಒಳಗೆ ಹೋಗಿ ಬಂದಿದ್ದಾರೆ. ಇದು ಅವರಿಗೆ ಮೊದಲ ಅನುಭವ. ಆ ಬಗ್ಗೆ ‘ಸಿಂಪಲ್ ಸ್ಟಾರ್’ ಪ್ರತಿಕ್ರಿಯೆ ನೀಡಿದ್ದಾರೆ.
‘ಕಿರಿಕ್ ಪಾರ್ಟಿ’ ಸಿನಿಮಾದ ಹಾಡೊಂದರ ಕಾಪಿರೈಟ್ ಕೇಸ್ಗೆ ಸಂಬಂಧಿಸಿದ ಕಿರಿಕ್ ಇನ್ನೂ ಬಗೆಹರಿದಿಲ್ಲ. ಲಹರಿ ಮ್ಯೂಸಿಕ್ ಆಡಿಯೋ ಕಂಪನಿ ಮತ್ತು ರಕ್ಷಿತ್ ಶೆಟ್ಟಿ ಅವರ ಪರಮ್ವಾ ಸ್ಟುಡಿಯೋ ನಡುವೆ ಇನ್ನೂ ಜಟಾಪಟಿ ಮುಂದುವರಿದಿದೆ. ಈ ಪ್ರಕರಣದ ವಿಚಾರಣೆ ಸಲುವಾಗಿ ಸೋಮವಾರ (ಏ.12) ರಕ್ಷಿತ್ ಶೆಟ್ಟಿ ಕೋರ್ಟ್ಗೆ ಹಾಜರಾಗಿದ್ದರು. ವಿಚಾರಣೆ ಮುಗಿಸಿ ಹೊರಬಂದ ಅವರು ಮಾಧ್ಯಮಗಳಿಗೆ ಪ್ರತಿಕ್ರಿಯೆ ನೀಡಿದ್ದಾರೆ.
‘ಸಿನಿಮಾ ರಿಲೀಸ್ ಆಗುವಾಗ ಬೇಕಂತಲೇ ಈ ರೀತಿ ಮಾಡುತ್ತಾರೆ. ತುಂಬ ಸಿನಿಮಾಗಳಿಗೆ ಹೀಗೆ ಮಾಡಲಾಗಿದೆ. ಚಿತ್ರದ ಬಿಡುಗಡೆಗಿಂತ ಒಂದು ದಿನ ಮುಂಚೆ ಬಂತು ಕೇಸ್ ಹಾಕಿ ತೊಂದರೆ ಕೊಡುತ್ತಾರೆ. ಆಗ ನಾವು ಚೆನ್ನೈಗೆ ಹೋಗಿ ಸಾಂಗ್ ಕಟ್ ಮಾಡಿ, 3 ದಿನ ಸಾಂಗ್ ರಿಲೀಸ್ ಮಾಡಿರಲಿಲ್ಲ. ನಂತರ ಕೋರ್ಟ್ ಆರ್ಡರ್ ಸಿಕ್ಕ ಬಳಿಕ ರಿಲೀಸ್ ಮಾಡಿದ್ದೆವು. ನಾವು ಆ ಕೇಸ್ ಕೂಡ ಗೆದ್ದೆವು. ಮತ್ತೆ ಮೂರು ವರ್ಷದ ನಂತರ ಇನ್ನೊಂದು ಕೇಸ್ ಹಾಕಿದ್ದಾರೆ’ ಎಂದು ರಕ್ಷಿತ್ ಮಾಹಿತಿ ನೀಡಿದ್ದಾರೆ.
‘ಮತ್ತೆ ಕೇಸ್ ಹಾಕಿದ್ದು ನಮ್ಮ ಗಮನಕ್ಕೆ ಬಂದಿರಲಿಲ್ಲ. ಯಾಕೆಂದರೆ, ನಾನು ಆಗ ಮನೆ ಬದಲಾಯಿಸಿದ್ದೆ. ನನ್ನ ಮೇಲೆ, ಪರಮ್ವಾ ಸ್ಡುಡಿಯೋ ಮೇಲೆ ಹಾಗೂ ಸಂಗೀತ ನಿರ್ದೇಶಕ ಅಜನೀಶ್ ಲೋಕನಾಥ್ ಮೇಲೆ ಕೇಸ್ ಹಾಕಿದ್ದಾರೆ. ಅದರ ನೋಟಿಸ್ ಹಳೇ ಮನೆಗೆ ಹೋಗಿದೆ. ಅಜನೀಶ್ ಅವರಿಗೆ ಸೇರಬೇಕಿದ್ದ ನೋಟಿಸ್ ಕೂಡ ನನ್ನ ಹಳೇ ಮನೆಗೆ ಹೋಗಿದೆ. ನಮಗೆ ಇದು ಗೊತ್ತಿಲ್ಲದೇ ಇರುವುದರಿಂದ ಕೋರ್ಟ್ನಿಂದ ವಾರಂಟ್ ಜಾರಿ ಆಗಿತ್ತು. ನಮ್ಮ ಕೈಗೆ ನೋಟಿಸ್ ತಲುಪಬಾರದು ಎಂಬುದೇ ಅವರ ಉದ್ದೇಶ ಆಗಿತ್ತು ಎನಿಸುತ್ತದೆ‘ ಎಂದು ರಕ್ಷಿತ್ ಶೆಟ್ಟಿ ಅಭಿಪ್ರಾಯಪಟ್ಟಿದ್ದಾರೆ.
‘ನಾವು ಕಾನೂನಿನ ಹೋರಾಟ ಮುಂದುವರಿಸುತ್ತೇವೆ. ಯಾವುದೇ ಹಾಡಿನ ನೋಟ್ಸ್ ಮತ್ತು ಸಾಹಿತ್ಯವನ್ನು ನಾವು ಕಾಪಿ ಮಾಡಿಲ್ಲ. ಹಂಸಲೇಖ ಅವರು 80ರ ದಶಕದಲ್ಲಿ ಬಳಸಿದ ರಿದಂ ನಾವು ಫಾಲೋ ಮಾಡಿದ್ದೇವೆ. ಮ್ಯೂಸಿಕ್ ಕಾಪಿರೈಟ್ ಕಾನೂನಿನ ಪ್ರಕಾರ ಅದು ತಪ್ಪಲ್ಲ. 11 ಸೆಕೆಂಡ್ಗಳಷ್ಟು ಕಾಪಿ ಮಾಡಿದರೂ ತಪ್ಪಲ್ಲ. ಆದರೆ ಈ ಎರಡು ಹಾಡನ್ನು ಪಕ್ಕದಲ್ಲಿ ಇಟ್ಟುಕೊಂಡು ನೋಡಿ. ಕನಿಷ್ಠ 5 ಸೆಕೆಂಡ್ಗಳಾದರೂ ನೋಟ್ಸ್ ಕಾಪಿ ಆಗಿದೆ ಎಂಬುದನ್ನು ತೋರಿಸಿ. ಆಗ ನಾನು ಒಪ್ಪಿಕೊಳ್ಳುತ್ತೇನೆ. ಅಹಂ ಸಲುವಾಗಿ ಇದೆಲ್ಲ ಮಾಡುತ್ತಿದ್ದಾರೆ’ ಎಂದು ರಕ್ಷಿತ್ ಪ್ರತಿಕ್ರಿಯೆ ನೀಡಿದ್ದಾರೆ.
ವಿಚಾರಣೆ ಸಲುವಾಗಿ ಇದೇ ಮೊದಲ ಬಾರಿಗೆ ರಕ್ಷಿತ್ ಶೆಟ್ಟಿ ಕೋರ್ಟ್ ಒಳಗೆ ಹೋಗಿ ಬಂದಿದ್ದಾರೆ. ಇದು ಅವರಿಗೆ ಮೊದಲ ಅನುಭವ. ಆ ಬಗ್ಗೆ ಪ್ರತಿಕ್ರಿಯೆ ನೀಡಿದ್ದಾರೆ. ‘ನಾನು ಇದುವರೆಗೆ ಯಾವತ್ತೂ ಕೋರ್ಟ್ಗೆ ಬಂದಿರಲಿಲ್ಲ. ಇದು ನನಗೆ ಒಳ್ಳೆಯ ಅನುಭವ. ವಿಚಾರಣೆ ಪ್ರಕ್ರಿಯೆ ಹೇಗೆ ನಡೆಯುತ್ತದೆ ಎಂಬುದು ಗೊತ್ತಾಯಿತು. ಒಂದು ವೇಳೆ ನನ್ನ ಮುಂದಿನ ಸಿನಿಮಾದಲ್ಲಿ ಕೋರ್ಟ್ ದೃಶ್ಯಗಳನ್ನು ಬರೆಯುವ ಸಂದರ್ಭ ಬಂದರೆ ಈ ಅನುಭವ ಉಪಯೋಗಕ್ಕೆ ಬರಲಿದೆ. ಇದುವರೆಗೂ ಸಿನಿಮಾಗಳಲ್ಲಿ ದೊಡ್ಡ ದೊಡ್ಡ ಕೋರ್ಟ್ ನೋಡಿದ್ದೆ ಅಷ್ಟೇ’ ಎಂದು ರಕ್ಷಿತ್ ಶೆಟ್ಟಿ ಹೇಳಿದ್ದಾರೆ.
ಇದನ್ನೂ ಓದಿ: Kirik Party: ರಕ್ಷಿತ್ ಶೆಟ್ಟಿಯ ಕಿರಿಕ್ ಪಾರ್ಟಿಗೆ ಸಂಕಷ್ಟ; ಚಿತ್ರತಂಡದ ವಿರುದ್ಧ ಜಾಮೀನು ರಹಿತ ವಾರಂಟ್ ಜಾರಿ
Published On - 8:38 am, Tue, 13 April 21
