ಆ್ಯಕ್ಷನ್-ಕಟ್ ಹೇಳಿ ಗೆದ್ದ ಕನ್ನಡ ಚಿತ್ರರಂಗದ ಸ್ಟಾರ್ ಹೀರೋಗಳಿವರು

ಸಾಮಾನ್ಯವಾಗಿ ಬೆಳ್ಳಿಪರದೆಯ ಮೇಲೆ ನಟನಾಗಿ ಪ್ರೇಕ್ಷಕರನ್ನು ನಗಿಸಿ, ಅಳಿಸಿ, ರೋಮಾಂಚನಗೊಳಿಸುವುದೇ ಒಂದು ದೊಡ್ಡ ಸವಾಲು. ಆದರೆ ಅದೇ ಕ್ಯಾಮೆರಾದ ಹಿಂಭಾಗದಲ್ಲಿ ನಿಂತು ‘ಆಕ್ಷನ್-ಕಟ್’ ಹೇಳುತ್ತಾ, ಅತ್ತ ನಟನೆಯಲ್ಲೂ ಕಲಾಭಿಮಾನಿಗಳನ್ನು ರಂಜಿಸುವುದು ಸಾಮಾನ್ಯದ ಮಾತಲ್ಲ. ಅದು ಕೇವಲ ಕಲೆಯಷ್ಟೇ ಅಲ್ಲ, ಅಪಾರ ಸಮರ್ಪಣೆ, ಸೃಜನಶೀಲತೆ ಮತ್ತು ಅಸಾಧಾರಣ ಪ್ರತಿಭೆಯ ಸಂಕೇತ. ಕನ್ನಡ ಚಿತ್ರರಂಗದ ಇತಿಹಾಸವನ್ನು ತಿರುವಿಹಾಕಿದರೆ, ನಟನೆಯ ಮೂಲಕ ಪ್ರೇಕ್ಷಕರ ಹೃದಯ ಗೆದ್ದು, ನಿರ್ದೇಶನದ ಮೂಲಕ ರಂಗಕ್ಕೆ ಹೊಸ ದಿಕ್ಕು ತೋರಿಸಿದ ಹಲವು ಅಭಿನಯ ರತ್ನಗಳು ನಮಗೆ ಸಿಗುತ್ತಾರೆ.

ತಾಂತ್ರಿಕ ಕ್ರಾಂತಿ ಎಬ್ಬಿಸಿದ್ದ ಶಂಕರ್ ನಾಗ್ ಸಾಹಸ

ಕನ್ನಡ ಚಿತ್ರರಂಗದಲ್ಲಿ ತಾಂತ್ರಿಕ ಕ್ರಾಂತಿ ಹಾಗೂ ಹೊಸ ಅಲೆ ಎಬ್ಬಿಸಿದ ಶ್ರೇಯಸ್ಸು ಶಂಕರ್ ನಾಗ್ ಅವರಿಗೆ ಸಲ್ಲುತ್ತದೆ. ‘ಆಟೋ ರಾಜ’ ಶಂಕರ್ ನಾಗ್ ನಟನಾಗಿ ಸೃಷ್ಟಿಸಿದ ಆವೇಗ ಒಂದೆಡೆಯಾದರೆ, ನಿರ್ದೇಶಕನಾಗಿ ಅವರು ತೋರಿದ ತಾಂತ್ರಿಕ ಪಕ್ವತೆ ಭಾರತೀಯ ಚಿತ್ರರಂಗವೇ ತಿರುಗಿ ನೋಡುವಂತೆ ಮಾಡಿತ್ತು. ‘ಮಿಂಚಿನ ಓಟ’, ‘ಜನ್ಮ ಜನ್ಮದ ಅನುಬಂಧ’, ‘ಆ್ಯಕ್ಸಿಡೆಂಟ್’ ಹಾಗೂ ‘ಗೀತಾ’ ಅಂತಹ ಸಾರ್ವಕಾಲಿಕ ಹಿಟ್ ಚಿತ್ರಗಳನ್ನು ನೀಡಿದ ಶಂಕರ್ ನಾಗ್, ಡಾ. ರಾಜ್‌ಕುಮಾರ್ ಅಭಿನಯದ ‘ಒಂದು ಮುತ್ತಿನ ಕಥೆ’ ಚಿತ್ರದಲ್ಲಿ ಅಂದಿನ ಕಾಲಕ್ಕೇ ನೀರಿನ ಅಡಿಯಲ್ಲಿ ಶೂಟಿಂಗ್ ನಡೆಸಿ ಸೈ ಎನಿಸಿಕೊಂಡಿದ್ದರು. ಜೊತೆಗೆ ‘ಮಾಲ್ಗುಡಿ ಡೇಸ್’ ಧಾರಾವಾಹಿ ನಿರ್ದೇಶಿಸಿ ಜಾಗತಿಕ ಮಟ್ಟದಲ್ಲಿ ಕನ್ನಡದ ಕೀರ್ತಿಪತಾಕೆ ಹಾರಿಸಿದ್ದರು.

ಬೆಳ್ಳಿಪರದೆಗೆ ಬಣ್ಣ-ಬೆಳಕಿನ ವೈಭವ ತಂದ ವಿ. ರವಿಚಂದ್ರನ್

ಇನ್ನೊಂದೆಡೆ ಸ್ಯಾಂಡಲ್‌ವುಡ್‌ನಲ್ಲಿ ಬಣ್ಣ, ಬೆಳಕು ಹಾಗೂ ರೊಮ್ಯಾನ್ಸ್ ಮನೆಮಾಡಲು ಕಾರಣಕರ್ತರಾದವರು ‘ಕ್ರೇಜಿ ಸ್ಟಾರ್’ ವಿ. ರವಿಚಂದ್ರನ್. ನಟನಾಗಿ ಮಾಸ್ ಮತ್ತು ಕ್ಲಾಸ್ ಪ್ರೇಕ್ಷಕರನ್ನು ಸೆಳೆದ ರವಿಚಂದ್ರನ್, ನಿರ್ದೇಶಕರಾಗಿ ತೆರೆಯ ಮೇಲೆ ದೃಶ್ಯ ವೈಭವವನ್ನೇ ಸೃಷ್ಟಿಸಿದರು. 1987ರಲ್ಲಿ ಬಂದ ‘ಪ್ರೇಮಲೋಕ’ ಚಿತ್ರ ಕನ್ನಡ ಚಿತ್ರರಂಗದ ಭವಿಷ್ಯವನ್ನೇ ಬದಲಿಸಿತು. ‘ರಣಧೀರ’, ‘ಅಂಜದ ಗಂಡು’, ‘ಏಕಾಂಗಿ’ಯಂತಹ ಚಿತ್ರಗಳ ಮೂಲಕ ದೃಶ್ಯಕಾವ್ಯ ಬರೆದ ಅವರು, ‘ಶಾಂತಿ ಕ್ರಾಂತಿ’ ಚಿತ್ರವನ್ನು ಒಂದೇ ಬಾರಿಗೆ ನಾಲ್ಕು ಭಾಷೆಗಳಲ್ಲಿ ನಿರ್ಮಿಸಿ, ನಿರ್ದೇಶಿಸಿ ಸಾಹಸ ಮೆರೆದಿದ್ದರು. ಅದೇ ರೀತಿ ನಟನಾಗಿ ಪ್ರೇಕ್ಷಕರನ್ನು ಸೆಳೆದ ರಮೇಶ್ ಅರವಿಂದ್ ಕೂಡ ‘ರಾಮ ಶಾಮ ಭಾಮ’, ‘ಆಕ್ಸಿಡೆಂಟ್’ ನಂತಹ ಸಿನಿಮಾಗಳ ಮೂಲಕ ಪ್ರಬುದ್ಧ ನಿರ್ದೇಶಕ ಎನಿಸಿಕೊಂಡರು.

ಚಿತ್ರರಂಗದ ಚೌಕಟ್ಟು ಮುರಿದ ‘ಬುದ್ಧಿವಂತ’ ಉಪೇಂದ್ರ

ಚಿತ್ರರಂಗದ ಸಾಂಪ್ರದಾಯಿಕ ಚೌಕಟ್ಟನ್ನು ಮುರಿದು ಹೊಸ ಆಲೋಚನೆಯ ಅಲೆ ಸೃಷ್ಟಿಸಿದವರು ‘ರಿಯಲ್ ಸ್ಟಾರ್’ ಉಪೇಂದ್ರ. ನಿರ್ದೇಶಕನಾಗಿ ವೃತ್ತಿಜೀವನ ಆರಂಭಿಸಿ, ನಂತರ ನಟನಾಗಿ ಸ್ಯಾಂಡಲ್‌ವುಡ್‌ನ ಅಧಿಪತಿಯಾದ ಅಪರೂಪದ ಪ್ರತಿಭೆ ಇವರು. ಶಿವರಾಜ್‌ಕುಮಾರ್ ಅಭಿನಯದ ‘ಓಂ’ ಚಿತ್ರದ ಮೂಲಕ ರೌಡಿಸಂ ಕಥೆಗೆ ಹೊಸ ಆಯಾಮ ನೀಡಿದ ಉಪ್ಪಿ, ಸ್ವತಃ ನಟಿಸಿ ನಿರ್ದೇಶಿಸಿದ ‘ಎ’, ‘ಉಪೇಂದ್ರ’, ‘ಸೂಪರ್’ ಚಿತ್ರಗಳ ಮೂಲಕ ಭಾರತೀಯ ಚಿತ್ರರಂಗದಲ್ಲೇ ಸಂಚಲನ ಮೂಡಿಸಿದರು. ಮಾನವನ ಅಹಂ ಮತ್ತು ಸಮಾಜದ ಮುಖವಾಡಗಳನ್ನು ತಮ್ಮ ವಿಶಿಷ್ಟ ನಿರೂಪಣೆಯ ಮೂಲಕ ತೆರೆದಿಡುವಲ್ಲಿ ಉಪೇಂದ್ರ ಸಿದ್ಧಹಸ್ತರು.

ತಾಂತ್ರಿಕ ಪ್ರಬುದ್ಧತೆ ಮೆರೆದ ‘ಅಭಿನಯ ಚಕ್ರವರ್ತಿ’ ಕಿಚ್ಚ ಸುದೀಪ್

ಈ ಹಿರಿಯ ದಿಗ್ಗಜರ ಹಾದಿಯಲ್ಲೇ ಸಾಗಿ ಬಂದ ‘ಅಭಿನಯ ಚಕ್ರವರ್ತಿ’ ಕಿಚ್ಚ ಸುದೀಪ್ ಕೂಡ ತಾಂತ್ರಿಕವಾಗಿ ಅತ್ಯಂತ ಪ್ರಬುದ್ಧ ನಿರ್ದೇಶಕ ಎನಿಸಿಕೊಂಡರು. ತಮ್ಮ ಗಂಭೀರ ನಟನೆಯ ಜೊತೆಗೆ ‘ಮೈ ಆಟೋಗ್ರಾಫ್’, ‘ನಂ 73 ಶಾಂತಿ ನಿವಾಸ’, ‘ವೀರ ಮದಕರಿ’ ಹಾಗೂ ‘ಮಾಣಿಕ್ಯ’ ಮುಂತಾದ ಸೂಪರ್ ಹಿಟ್ ಸಿನಿಮಾಗಳನ್ನು ನಿರ್ದೇಶಿಸಿದರು. ಸ್ವಂತ ಕಥೆಯಾಗಲಿ ಅಥವಾ ರೀಮೇಕ್ ಇರಲಿ, ತಮ್ಮದೇ ಶೈಲಿಯ ಭಾವನಾತ್ಮಕ ನಿರೂಪಣೆಯಿಂದ ಪ್ರೇಕ್ಷಕರನ್ನು ಚಿತ್ರಮಂದಿರಕ್ಕೆ ತರುವಲ್ಲಿ ಸುದೀಪ್ ಯಶಸ್ವಿಯಾದರು.

ಕಾಂತಾರದಿಂದ ಕನ್ನಡಿಗರ ಗರ್ಜನೆ ಮುಟ್ಟಿಸಿದ ರಿಷಬ್ ಶೆಟ್ಟಿ

ಪ್ರಸ್ತುತ ಪೀಳಿಗೆಯಲ್ಲಿ ಜಾಗತಿಕ ಮಟ್ಟದಲ್ಲಿ ಕನ್ನಡದ ಗರ್ಜನೆ ಕೇಳಿಸುವಂತೆ ಮಾಡಿದವರು ರಿಷಬ್ ಶೆಟ್ಟಿ. ‘ಕಿರಿಕ್ ಪಾರ್ಟಿ’, ‘ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆ ಕಾಸರಗೂಡು’ ಚಿತ್ರಗಳ ಮೂಲಕ ಗಮನಸೆಳೆದ ರಿಷಬ್, ‘ಕಾಂತಾರ’ ಸಿನಿಮಾದ ಮೂಲಕ ಇತಿಹಾಸ ನಿರ್ಮಿಸಿದರು. ಕರಾವಳಿಯ ಜಾನಪದ ಸಂಸ್ಕೃತಿ ಮತ್ತು ದೈವಾರಾಧನೆಯನ್ನು ವಿಶ್ವಮಟ್ಟಕ್ಕೆ ಕೊಂಡೊಯ್ದು, ಸ್ವತಃ ನಟಿಸಿ, ನಿರ್ದೇಶಿಸಿ ರಾಷ್ಟ್ರಪ್ರಶಸ್ತಿಯ ಗೌರವಕ್ಕೆ ಪಾತ್ರರಾದರು.

ಇದನ್ನೂ ಓದಿ: ರಿಚರ್ಡ್ ಆಂಟನಿ ಅಪ್ಡೇಟ್; ಕೊನೆಗೂ ರಕ್ಷಿತ್ ಶೆಟ್ಟಿ ಎಲ್ಲಿದ್ದಾರೆ ಎಂಬುದನ್ನು ಹೇಳಿದ ಹೇಮಂತ್ ರಾವ್

ಹೊಸ ಆಲೆಯ ನಟ-ನಿರ್ದೇಶಕ ಸ್ಯಾಂಡ್‌ವುಡ್ ನಾಯಕರು

ಇವರ ಜೊತೆಗೆ ದುನಿಯಾ ವಿಜಯ್ ‘ಭೀಮ’ ಮೊದಲಾದ ಚಿತ್ರಗಳ ಮೂಲಕ ನಿರ್ದೇಶನದಲ್ಲಿ ಸೈ ಎನಿಸಿಕೊಂಡರು. ರಾಜ್ ಬಿ. ಶೆಟ್ಟಿ ‘ಒಂದು ಮೊಟ್ಟೆಯ ಕಥೆ’, ‘ಗರುಡ ಗಮನ ವೃಷಭ ವಾಹನ’ ಮೂಲಕ ನಟ-ನಿರ್ದೇಶಕರಾಗಿ ಯಶಸ್ಸಿನ ಅಲೆಯಲ್ಲಿ ತೇಲುತ್ತಿದ್ದಾರೆ. ರಕ್ಷಿತ್ ಶೆಟ್ಟಿ ಕೂಡ ‘ಉಳಿದವರು ಕಂಡಂತೆ’ ಸಿನಿಮಾ ನಿರ್ದೇಶನ ಮಾಡಿ ಭೇಷ್ ಎನಿಸಿಕೊಂಡಿದ್ದಾರೆ. ಅವರು ನಟನೆಯಲ್ಲೂ ಸೈ ಎನಿಸಿಕೊಂಡಿದ್ದಾರೆ. ಅವರ ನಿರ್ದೇಶನದ ‘ರಿಚರ್ಡ್​ ಆ್ಯಂಟನಿ’ ಸಿನಿಮಾ ಸೆಟ್ಟೇರಲಿ ಎಂದು ಫ್ಯಾನ್ಸ್ ಕಾಯುತ್ತಿದ್ದಾರೆ. ಡಾರ್ಲಿಂಗ್​ ಕೃಷ್ಣ, ಜೋಗಿ ಪ್ರೇಮ್, ಕಾಶಿನಾಥ್, ಎಸ್​. ನಾರಾಯಣ್ ಸೇರಿದಂತೆ ಅನೇಕರು ಈ ಸಾಲಿನಲ್ಲಿ ನಿಲ್ಲುತ್ತಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.