‘ಮಾರ್ಕ್​’ಗೆ ಸಂಕಷ್ಟ; ಟೈಟಲ್ ವಿಚಾರದಲ್ಲಿ ಭುಗಿಲೆದ್ದ ವಿವಾದ

ಕಿಚ್ಚ ಸುದೀಪ್ (Kichcha Sudeep) ಬರ್ತ್​ಡೇ ಪ್ರಯುಕ್ತ ‘ಮಾರ್ಕ್’ ಸಿನಿಮಾ ಟೈಟಲ್ ರಿವೀಲ್ ಆಯಿತು. ಇದು ಅವರ ನಟನೆಯ 47ನೇ ಸಿನಿಮಾ. ಈ ಮೊದಲು ಸುದೀಪ್ ಅವರು ಮ್ಯಾಕ್ಸ್ ಆಗಿ ಎಲ್ಲರ ಗಮನ ಸೆಳೆದಿದ್ದರು. ಈಗ ಅವರು ‘ಮಾರ್ಕ್’ ಸಿನಿಮಾ ಮೂಲಕ ಎಂಟ್ರಿ ಕೊಡಲು ರೆಡಿ ಆಗಿದ್ದಾರೆ. ಈಗಾಗಲೇ ಸಿನಿಮಾದ ಶೂಟ್ ಕೂಡ ಅರ್ಧಕ್ಕಿಂತ ಹೆಚ್ಚು ಪೂರ್ಣಗೊಂಡಿದೆ. ಹೀಗಿರುವಾಗ ಸಿನಿಮಾದ ಟೈಟಲ್ ವಿವಾದ ಭುಗಿಲೆದ್ದಿದೆ.

‘ಮಾರ್ಕ್’ ಸಿನಿಮಾ ಟೈಟಲ್ ಕರ್ನಾಟಕ ಫಿಲ್ಮ್  ಚೇಂಬರ್​ನಲ್ಲಿ ರಿಜಿಸ್ಟರ್ ಆಗಿದೆ. ಈ ಟೈಟಲ್ ನೋಂದಣಿ ಮಾಡಿಸಿದ್ದು ಕೆಆರ್​ಜಿ ಸ್ಟುಡಿಯೋದವರು. ಎರಡು ವರ್ಷಗಳ ಹಿಂದೆ ಟೈಟಲ್ ಪಡೆದುಕೊಂಡಿದ್ದರು. ಆದರೆ, ಸುದೀಪ್​ಗಾಗಿ ಶೀರ್ಷಿಕೆಯನ್ನು ಅವರು ಬಿಟ್ಟುಕೊಟ್ಟಿದ್ದರು. ಈಗ ಈ ಟೈಟಲ್ ‘ಸತ್ಯ ಜ್ಯೋತಿ ಫಿಲ್ಮ್ಸ್’ಗೆ ಹಸ್ತಾಂತರ ಆಗಿದೆ. ಇದೇ ಸಂಸ್ಥೆಯ ಜೊತೆ ಸುದೀಪ್ ‘ಮಾರ್ಕ್’ ಮಾಡುತ್ತಿದ್ದಾರೆ.

ಆದರೆ, ಈಗ ‘ಕನ್ನಡ ಚಲನಚಿತ್ರ ವಾಣಿಜ್ಯ ಮಂಡಳಿ’ಯಲ್ಲೂ ‘ಮಾರ್ಕ್’ ಟೈಟಲ್ ನೋಂದಣಿ ಆಗಿದೆ. ಇದೇ ವರ್ಷದ ಮೇ 19ರಂದು ಈ ಸಿನಿಮಾ ಹೆಸರಲ್ಲಿ ಟೈಟಲ್ ನೋಂದಣಿ ಆಗಿದೆ. ‘ಗೌರವ್ ಫಿಲ್ಮ್ಸ್’ ಹೆಸರಿನ ಸಂಸ್ಥೆ ಈ ಟೈಟಲ್ ರಿಜಿಸ್ಟರ್ ಮಾಡಿಸಿದೆ. ಹೀಗಾಗಿ  ಈ ಟೈಟಲ್ ನಮ್ಮದು ಎಂದು ಗೌರವ್ ಫಿಲ್ಮ್ಸ್ ಹೇಳುತ್ತಿದೆ.

ಯಾರ ಪಾಲಾಗಲಿದೆ?

ಈ ರೀತಿಯ ಟೈಟಲ್ ಗೊಂದಲ ಮೂಡುತ್ತಿರುವುದು ಸ್ಯಾಂಡಲ್​ವುಡ್​ನಲ್ಲಿ ಇದೇ ಮೊದಲೇನು ಅಲ್ಲ. ಈ ಮೊದಲು ಕೂಡ ಈ ರೀತಿಯ ಹಲವು ವಿವಾದಗಳು ಭುಗಿಲೆದ್ದಿದ್ದವು. ಈಗ ಕೆಆರ್​ಜಿ ಅವರೇ ಈ ಟೈಟಲ್​ನ ಮೊದಲು ನೋಂದಣಿ ಮಾಡಿಸಿರುವುದರಿಂದ ‘ಮಾರ್ಕ್​’ ಟೈಟಲ್ ಸುದೀಪ್​ಗೆ ಸಿಗೋ ಸಾಧ್ಯತೆ ದಟ್ಟವಾಗಿದೆ.

ಇದನ್ನೂ ಓದಿ: ಸುದೀಪ್ 47ನೇ ಸಿನಿಮಾ ಹೆಸರು ‘ಮಾರ್ಕ್’: ಸಖತ್ ಮಾಸ್ ಆಗಿದೆ ಟೈಟಲ್ ಟೀಸರ್

ಡಿಸೆಂಬರ್​ಗೆ ರಿಲೀಸ್

ಕಿಚ್ಚ ಸುದೀಪ್ ಅವರು ಜುಲೈನಲ್ಲಿ ಈ ಸಿನಿಮಾ ಘೋಷಣೆ ಮಾಡಿದರು. ನಂತರ ಸಿನಿಮಾ ಶೂಟ್ ಕೂಡ ಆರಂಭಿಸಿದರು. ಈಗಾಗಲೇ ಸಿನಿಮಾದ ಶೇ.60ರಷ್ಟು ಶೂಟ್ ಪೂರ್ಣಗೊಂಡಿದೆ. ಡಿಸೆಂಬರ್​​ 25ರಂದು ಸಿನಿಮಾನ ರಿಲೀಸ್ ಮಾಡುವ ಆಲೋಚನೆ ತಂಡಕ್ಕೆ ಇದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.