ಶ್ರೀಲೀಲಾ ನಟಿಸಬೇಕಿದ್ದ ಆಫರ್ ರಶ್ಮಿಕಾ ಮಂದಣ್ಣ ಕೈ ಸೇರಿತ್ತು; ಸೂಪರ್ ಹಿಟ್ ಚಿತ್ರದ ಹಿಂದಿನ ಕಥೆ ಇದು

ಶ್ರೀಲೀಲಾ (Sreeleela) ಸದ್ಯ ಟಾಲಿವುಡ್ ಇಂಡಸ್ಟ್ರಿಯಲ್ಲಿ ಹೆಚ್ಚು ಬೇಡಿಕೆ ಹೊಂದಿರುವ ನಟಿ. ಅವರ ಕೈಯಲ್ಲಿ ಅರ್ಧ ಡಜನ್​ಗೂ ಹೆಚ್ಚು ಚಿತ್ರಗಳಿವೆ. ‘ಪೆಳ್ಳಿ ಸಂದಡಿ’ ಚಿತ್ರದ ಮೂಲಕ ಟಾಲಿವುಡ್​ಗೆ ಪರಿಚಯಗೊಂಡ ಈ ನಟಿ ಎಲ್ಲರ ಗಮನ ಸೆಳೆಯುತ್ತಿದ್ದಾರೆ. ರವಿತೇಜ ಜೊತೆ ‘ಧಮಾಕ’ (Dhamaka Movie) ಚಿತ್ರದಲ್ಲಿ ನಟಿಸಿ ಬ್ಲಾಕ್​​ಬಸ್ಟರ್ ಹಿಟ್ ಪಡೆದರು. ಅವರಿಗೆ ಆಫರ್‌ಗಳು ಸಾಲು ಸಾಲುಗಟ್ಟಿ ನಿಂತಿವೆ. ಪವನ್​ ಕಲ್ಯಾಣ್, ರಾಮ್ ಪೋತಿನೇನಿ, ಬಾಲಕೃಷ್ಣ, ಮಹೇಶ್ ಬಾಬು ಮುಂತಾದ ಸ್ಟಾರ್ ಹೀರೋಗಳ ಚಿತ್ರಗಳಲ್ಲಿ ಅವರು ನಟಿಸುತ್ತಿದ್ದಾರೆ. ಈಗ ಒಂದು ಅಚ್ಚರಿಯ ವಿಚಾರ ಹೊರಬಿದ್ದಿದೆ. ಶ್ರೀಲೀಲಾಗೆ ಬಂದಿದ್ದ ಆಫರ್ ರಶ್ಮಿಕಾ ಕೈ ಸೇರಿತ್ತು. ಆ ಚಿತ್ರ ಹಿಟ್ ಆಗಿತ್ತು ಎನ್ನುವ ವಿಚಾರ ಈಗ ರಿವೀಲ್ ಆಗಿದೆ.

ಶ್ರೀಲೀಲಾ ಅವರು ಕನ್ನಡ ಚಿತ್ರರಂಗಕ್ಕೆ ಕಾಲಿಟ್ಟಿದ್ದು ‘ಕಿಸ್’ ಚಿತ್ರದ ಮೂಲಕ. ಇದಕ್ಕೂ ಒಂದು ವರ್ಷ ಮೊದಲೇ ತೆಲುಗಿನಲ್ಲಿ ‘ಚಲೋ’ ಸಿನಿಮಾ ರಿಲೀಸ್ ಆಗಿ ಯಶಸ್ಸು ಕಂಡಿತ್ತು. ಈ ಚಿತ್ರಕ್ಕೆ ರಶ್ಮಿಕಾ ನಾಯಕಿ ಆಗಿದ್ದರು. ಅವರಿಗೆ ಟಾಲಿವುಡ್​ನಲ್ಲಿ ಜನಪ್ರಿಯತೆ ಪಡೆಯಲು ಈ ಸಿನಿಮಾ ಸಹಕಾರಿ ಆಗಿತ್ತು. ಈ ಚಿತ್ರದ ಆಫರ್ ಮೊದಲ ಬಂದಿದ್ದು ಶ್ರೀಲೀಲಾಗೆ. ಆದರೆ, ಅವರು ಈ ಆಫರ್​ನ ರಿಜೆಕ್ಟ್ ಮಾಡಿದ್ದರು. ಈ ವಿಷಯವನ್ನು ಸ್ವತಃ ‘ಚಲೋ’ ಚಿತ್ರದ ನಾಯಕ ನಾಗಶೌರ್ಯ ಹೇಳಿದ್ದಾರೆ.

ನಾಗಶೌರ್ಯ ‘ರಂಗಬಲಿ’ ಚಿತ್ರದ ಮೂಲಕ ಪ್ರೇಕ್ಷಕರ ಎದುರು ಬರಲು ರೆಡಿ ಆಗಿದ್ದಾರೆ. ಈ ಚಿತ್ರದ ಪ್ರಚಾರದಲ್ಲಿ ಭಾಗಿ ಆಗುತ್ತಿದ್ದಾರೆ. ಇತ್ತೀಚೆಗೆ ಸಂದರ್ಶನವೊಂದರಲ್ಲಿ ಶ್ರೀಲೀಲಾ ಬಗ್ಗೆ ಅವರು ಮಾತನಾಡಿದ್ದಾರೆ. ‘ಶ್ರೀಲೀಲಾ ಅವರನ್ನು ‘ಚಲೋ’ಕ್ಕೆ ನಾಯಕಿ ಆಗಿ ಪರಿಗಣಿಸಲಾಗಿತ್ತು. ಅವರು ಗ್ರೀನ್ ಸಿಗ್ನಲ್ ಕೊಟ್ಟಿದ್ದರು. ಆದರೆ ಕೊನೆಯ ಕ್ಷಣದಲ್ಲಿ ನೋ ಎಂದರು. ಆ ಬಳಿಕ ರಶ್ಮಿಕಾ ಅವರನ್ನು ಕರೆತರಲಾಯಿತು’ ಎಂದಿದ್ದಾರೆ ನಾಗಶೌರ್ಯ.

ಇದನ್ನೂ ಓದಿ: ಮಹೇಶ್ ಬಾಬು ಸಿನಿಮಾದಿಂದ ಪೂಜಾ ಹೆಗ್ಡೆ ಹೊರಕ್ಕೆ: ಶ್ರೀಲೀಲಾ ಕಾರಣವೇ?

ನಾಗಶೌರ್ಯ ಅಭಿನಯದ ‘ಚಲೋ’ ಸಿನಿಮಾ ಮೂಲಕ ರಶ್ಮಿಕಾ ಮಂದಣ್ಣ ತೆಲುಗು ಚಿತ್ರರಂಗಕ್ಕೆ ಪರಿಚಯಗೊಂಡರು. ಆ ಸಮಯದಲ್ಲಿ ಈ ಸಿನಿಮಾ ದೊಡ್ಡ ಯಶಸ್ಸು ಕಂಡಿತ್ತು. ಆ ನಂತರ ‘ಗೀತ ಗೋವಿಂದಂ’ ಚಿತ್ರದಲ್ಲಿ ನಟಿಸಿ ಫೇಮಸ್ ಆದರು. ಈ ಚಿತ್ರದಿಂದ ರಶ್ಮಿಕಾಗೆ ಟಾಲಿವುಡ್ ಇಂಡಸ್ಟ್ರಿಯಲ್ಲಿ ಬೇಡಿಕೆ ಹೆಚ್ಚಿತು. ಈಗ ರಶ್ಮಿಕಾಗೆ ಟಾಲಿವುಡ್​ನಲ್ಲಿ ಶ್ರೀಲೀಲಾ ಪ್ರತಿಸ್ಪರ್ಧಿ ಎಂದು ಪರಿಗಣಿಸಲಾಗಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ