200 ಕೋಟಿ ರೂಪಾಯಿ ಕ್ಲಬ್ ಸೇರಿದ ‘ಟಾಕ್ಸಿಕ್’; ಮುಂದೆ ದೊಡ್ಡ ಪರೀಕ್ಷೆ

ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ‘ಟಾಕ್ಸಿಕ್’ ಸಿನಿಮಾ (Toxic Movie) ಭಾರತದ ಜೊತೆ ವಿದೇಶದಲ್ಲೂ ಉತ್ತಮ ಪ್ರದರ್ಶನ ಕಾಣುತ್ತಿದೆ. ಮೂರನೇ ದಿನ ಭಾರತದಲ್ಲಿ 19,390 ಶೋಗಳಿಂದ 26.60 ಕೋಟಿ ನೆಟ್ ಕಲೆಕ್ಷನ್ ಆಗಿದೆ. ಈ ಮೂಲಕ ಬಾಕ್ಸ್ ಆಫೀಸ್‌ನಲ್ಲಿ ತನ್ನ ಓಟವನ್ನು ಮುಂದುವರಿಸಿದೆ. ಇದರೊಂದಿಗೆ ಭಾರತದಲ್ಲಷ್ಟೇ ಚಿತ್ರದ ಒಟ್ಟು ಗ್ರಾಸ್ ಗಳಿಕೆ 197.70 ಕೋಟಿ ರೂಪಾಯಿ ಆಗಿದೆ. ಇನ್ನು ನೆಟ್ ಕಲೆಕ್ಷನ್ 165.35 ಕೋಟಿ ತಲುಪಿದೆ.

ವಿದೇಶಿ ಮಾರುಕಟ್ಟೆಯಲ್ಲೂ ಮೂರನೇ ದಿನ 4.00 ಕೋಟಿ ರೂಪಾಯಿ ಗಳಿಸುವುದರೊಂದಿಗೆ ಓವರ್‌ಸೀಸ್ ಒಟ್ಟು ಗ್ರಾಸ್ 23.75 ಕೋಟಿಗೇರಿದೆ. ಹೀಗಾಗಿ ಚಿತ್ರವು ಕೇವಲ ಮೂರೇ ದಿನಗಳಲ್ಲಿ ಜಾಗತಿಕವಾಗಿ 221.45 ಕೋಟಿ ರೂಪಾಯಿ ಬೃಹತ್ ಗ್ರಾಸ್ ಸಂಗ್ರಹಿಸಿದೆ. ಚಿತ್ರದ ಬಿಡುಗಡೆಯ ಮೊದಲ ದಿನದ ಬೃಹತ್ ಗಳಿಕೆ 101.10 ಕೋಟಿ ರೂಪಾಯಿ ಹಾಗೂ ಎರಡನೇ ದಿನದ 37.65 ಕೋಟಿ ರೂಪಾಯಿ ಗಳಿಸಿತ್ತು. ಇದಕ್ಕೆ ಹೋಲಿಸಿದರೆ ಮೂರನೇ ದಿನ ಶೋಗಳ ಸಂಖ್ಯೆ ಮತ್ತು ಕಲೆಕ್ಷನ್‌ನಲ್ಲಿ ಸ್ವಲ್ಪ ಇಳಿಕೆ ಕಂಡುಬಂದಿದೆ. ಪ್ರೇಕ್ಷಕರಿಂದ ಲಭಿಸಿರುವ ಮಿಶ್ರ ಪ್ರತಿಕ್ರಿಯೆಗಳು ಹಾಗೂ ವಾರದ ಕೆಲಸದ ದಿನದ ಕಾರಣದಿಂದಾಗಿ ಈ ತಾತ್ಕಾಲಿಕ ಇಳಿಕೆ ಉಂಟಾಗಿರುವ ಸಾಧ್ಯತೆಯಿದೆ.

ಆದರೆ ಈ ಆರಂಭಿಕ ವ್ಯತ್ಯಾಸದ ಹೊರತಾಗಿಯೂ ಚಿತ್ರವು ಗಲ್ಲಾಪೆಟ್ಟಿಗೆಯಲ್ಲಿ ತನ್ನ ದೃಢವಾದ ನೆಲೆಯನ್ನು ಕಾಯ್ದುಕೊಂಡಿದೆ. ಶನಿವಾರ ಮತ್ತು ಭಾನುವಾರದ ವಾರಾಂತ್ಯದ ದಿನಗಳಲ್ಲಿ ಪ್ರೇಕ್ಷಕರ ಸಂಖ್ಯೆ ಚಿತ್ರಮಂದಿರಗಳಲ್ಲಿ ಗಣನೀಯವಾಗಿ ಹೆಚ್ಚಾಗಲಿದ್ದು, ‘ಟಾಕ್ಸಿಕ್’ ಗಳಿಕೆಯಲ್ಲಿ ಮತ್ತೆ ಭಾರಿ ಏರಿಕೆ ಮತ್ತು ಹೊಸ ದಾಖಲೆಗಳನ್ನು ಕಾಣುವ ನಿರೀಕ್ಷೆಯಿದೆ.

ಇದನ್ನೂ ಓದಿ: ‘ಟಾಕ್ಸಿಕ್’ ಸಿನಿಮಾ ನೋಡಿ ಮೆಚ್ಚಿಕೊಂಡ ಸುದೀಪ್; ಕಿಚ್ಚನ ಚಪ್ಪಾಳೆ ಪಡೆದ ಯಶ್

ಟ್ರೇಲರ್​ನಲ್ಲಿ ಇದೊಂದು ಅಪ್ಪ-ಮಗನ ಕಿತ್ತಾಟದಂತೆ ಕಂಡರೂ ಇದು ಭಿನ್ನ ಕಥಾ ಹಂದರವನ್ನೇ ಹೊಂದಿದೆ. ‘ಟಾಕ್ಸಿಕ್’ ಸಿನಿಮಾ ಸೈಕಲಾಜಿಕಲ್ ಥ್ರಿಲ್ಲರ್ ಶೈಲಿಯಲ್ಲಿ ಮೂಡಿ ಬಂದಿದೆ. ಹಣ, ಕೀರ್ತಿ ಹಾಗೂ ಹೆಣ್ಣಿನ ಆಸೆಗೆ ಬೀಳುವ ವ್ಯಕ್ತಿಯ ಸ್ಥಿತಿ ಕೊನೆಗೆ ಎಲ್ಲಿಗೆ ತಲುಪುತ್ತದೆ ಎಂಬುದನ್ನು ಸಿನಿಮಾದಲ್ಲಿ ತೋರಿಸಲಾಗಿದೆ. ಈ ಚಿತ್ರ ನೋಡಿದ ಸುದೀಪ್ ಸೇರಿದಂತೆ ಅನೇಕರು ಮೆಚ್ಚುಗೆ ಸೂಚಿಸಿದ್ದಾರೆ. ಮುಂದಿನ ದಿನಗಳಲ್ಲಿ ಸಿನಿಮಾಗೆ ದೊಡ್ಡ ಪರೀಕ್ಷೆ ಎದುರಾಗಲಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.