‘ಪುಷ್ಪ 2’ ರಿಲೀಸ್​ ದಿನಾಂಕ ಬದಲಾಗತ್ತಾ? ಅನುಮಾನಕ್ಕೆ ಕಾರಣವಾದ ಎರಡು ಅಂಶಗಳು

ಈ ವರ್ಷದ ಬಹುನಿರೀಕ್ಷಿತ ಸಿನಿಮಾಗಳಲ್ಲಿ ಒಂದಾಗಿರುವ ‘ಪುಷ್ಪ 2’ (Pushpa 2) ಬಿಡುಗಡೆ ದಿನಾಂಕದ ಬಗ್ಗೆ ಆಗಾಗ ಗಾಸಿಪ್​ ಕೇಳಿಬರುತ್ತಲೇ ಇದೆ. ಕೆಲವೇ ತಿಂಗಳ ಹಿಂದೆ ಈ ಸಿನಿಮಾದ ರಿಲೀಸ್​ ಡೇಟ್​ ಬಗ್ಗೆ ವದಂತಿ ಹಬ್ಬಿತ್ತು. ಬಳಿಕ ಅದನ್ನು ಚಿತ್ರತಂಡ ತಳ್ಳಿಹಾಕಿತ್ತು. ಈಗ ಮತ್ತೆ ‘ಪುಷ್ಪ 2’ ಸಿನಿಮಾದ ಬಿಡುಗಡೆ ಡೇಟ್​ (Pushpa 2 Release Date) ಮುಂದೂಡಿಕೆ ಬಗ್ಗೆ ಗಾಸಿಪ್​ ಹರಿದಾಡಲು ಆರಂಭಿಸಿದೆ. ಅದಕ್ಕೆ ಎರಡು ಅಂಶಗಳು ಕಾರಣ ಆಗಿವೆ. ಹಾಗಾಗಿ ಅಲ್ಲು ಅರ್ಜುನ್​ (Allu Arjun) ಅಭಿಮಾನಿಗಳು ತಲೆ ಕೆಡಿಸಿಕೊಂಡಿದ್ದಾರೆ.

‘ಪುಷ್ಪ 2’ ಸಿನಿಮಾ ಆಗಸ್ಟ್ 15ರಂದು ಬಿಡುಗಡೆ ಆಗಲಿದೆ ಎಂದು ಅಭಿಮಾನಿಗಳು ಕಾದಿದ್ದಾರೆ. ಚಿತ್ರತಂಡ ಕೂಡ ಆ ದಿನಾಂಕವನ್ನು ಹೊರತುಪಡಿಸಿ ಬೇರೆ ದಿನಾಂಕದ ಬಗ್ಗೆ ಮಾತನಾಡಿಲ್ಲ. ಆದರೆ ಇತ್ತೀಚಿನ ಬೆಳವಣಿಗೆಗಳನ್ನು ಗಮನಿಸಿದ ಕೆಲವರು ಅನುಮಾನ ವ್ಯಕ್ತಪಡಿಸುತ್ತಿದ್ದಾರೆ. ಈ ಸಿನಿಮಾದ ಸಂಕಲನಕಾರರ ಬದಲಾವಣೆ ಆಗಿದೆ ಎಂದು ಸುದ್ದಿ ಹರಿಡಿದೆ. ರಿಲೀಸ್​ ಡೇಟ್​ ಮುಂದೂಡಿಕೆ ಬಗ್ಗೆ ಅನುಮಾನ ಮೂಡಲು ಇದು ಮೊದಲ ಕಾರಣ.

ಎರಡನೇ ಕಾರಣ ಏನೆಂದರೆ, ‘ಪುಷ್ಪ 2’ ಸಿನಿಮಾಗೆ ಇನ್ನೂ ಶೂಟಿಂಗ್​ ಮುಗಿದಿಲ್ಲ. ವರದಿಗಳ ಪ್ರಕಾರ, ಅಲ್ಲು ಅರ್ಜುನ್​ ಅವರು ಮೇ ತಿಂಗಳ ಪೂರ್ತಿ ಈ ಸಿನಿಮಾಗೆ ಚಿತ್ರೀಕರಣ ಮಾಡಲಿದ್ದಾರೆ. ಇನ್ನುಳಿದ ದೃಶ್ಯಗಳನ್ನು ಜೂನ್​ ತಿಂಗಳಲ್ಲೂ ಚಿತ್ರೀಕರಿಸಲಾಗುವುದು ಎಂದು ಕೆಲವೆಡೆ ವರದಿ ಆಗಿದೆ. ಹಾಗಾದರೆ ಆಗಸ್ಟ್​ 15ರೊಳಗೆ ಸಿನಿಮಾ ಸಿದ್ಧವಾಗತ್ತೋ ಇಲ್ಲವೋ ಎಂದು ಕೆಲವರು ಅನುಮಾನ ವ್ಯಕ್ತಪಡಿಸಿದ್ದಾರೆ.

ಇದನ್ನೂ ಓದಿ: 19 ವರ್ಷಗಳ ಹಿಂದೆ ಶಿವಣ್ಣ ಸೃಷ್ಟಿಸಿದ್ದ ಟ್ರೆಂಡ್​ ಈಗ ‘ಪುಷ್ಪ 2’ ಚಿತ್ರದಲ್ಲಿ ಮರುಬಳಕೆ

ಇದು ಬಹುನಿರೀಕ್ಷಿತ ಸಿನಿಮಾ. ಈ ಚಿತ್ರದಲ್ಲಿ ಅಲ್ಲು ಅರ್ಜುನ್​, ರಶ್ಮಿಕಾ ಮಂದಣ್ಣ ಜೋಡಿಯಾಗಿ ನಟಿಸಿದ್ದಾರೆ. ‘ಮೈತ್ರಿ ಮೂವೀ ಮೇಕರ್ಸ್​’ ಸಂಸ್ಥೆಯು ಅದ್ದೂರಿ ಬಜೆಟ್​ನಲ್ಲಿ ನಿರ್ಮಾಣ ಮಾಡಿದೆ. ಸುಕುಮಾರ್​ ಅವರು ನಿರ್ದೇಶನ ಮಾಡುತ್ತಿದ್ದಾರೆ. ಈ ವರ್ಷ ಲೋಕಸಭಾ ಚುನಾವಣೆಯ ಎಲೆಕ್ಷನ್​ ಸಲುವಾಗಿ ಅನೇಕ ಸಿನಿಮಾಗಳ ರಿಲೀಸ್​ ಡೇಟ್​ ಬದಲಾವಣೆ ಆಗಿದೆ. ಎಲ್ಲರೂ ಹೊಸ ಹೊಸ ಡೇಟ್​ಗಾಗಿ ಕಾದಿದ್ದಾರೆ. ಪರಿಸ್ಥಿತಿ ಹೀಗಿರುವಾಗ ‘ಪುಷ್ಪ 2’ ಚಿತ್ರತಂಡದವರು ಆಗಸ್ಟ್​ 15ರ ದಿನಾಂಕವನ್ನು ಬಿಟ್ಟುಕೊಡುವ ಪ್ರಮೇಯವೇ ಇಲ್ಲ ಎನ್ನಲಾಗಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.