ಕಿಚ್ಚನ ಚಪ್ಪಾಳೆ ಪಡೆದ ಭವ್ಯಾ; ಮತ್ತೆ ಬದಲಾವಣೆ ತಂದ ಸುದೀಪ್

ಬಿಗ್ ಬಾಸ್​ ಸ್ಪರ್ಧಿಗಳಿಗೆ ‘ಕಿಚ್ಚನ ಚಪ್ಪಾಳೆ’ ಸಿಕ್ಕರೆ ಸಿಕ್ಕಾಪಟ್ಟೆ ಖುಷಿ ಆಗುತ್ತದೆ. ಆದರೆ ಕಳೆದ ಕೆಲವು ವಾರಗಳಿಂದ ಸುದೀಪ್ ಅವರು ಚಪ್ಪಾಳೆ ನೀಡುತ್ತಿರಲಿಲ್ಲ. ಈ ಸೀಸನ್​ನಲ್ಲಿ ಕೆಲವು ಸ್ಪರ್ಧಿಗಳು ನಡೆದುಕೊಂಡ ರೀತಿ ಸುದೀಪ್ ಅವರಿಗೆ ಇಷ್ಟ ಆಗಿರಲಿಲ್ಲ. ಆ ಕಾರಣದಿಂದಲೇ ಅವರು ಚಪ್ಪಾಳೆ ನೀಡುವುದನ್ನು ನಿಲ್ಲಿಸಿದ್ದರು. ಆದರೆ ಕಳೆದ ವಾರ ಭವ್ಯಾ ಗೌಡ ಒಂದು ಮನವಿ ಮಾಡಿದ್ದರು. ದಯವಿಟ್ಟು ಕಿಚ್ಚನ ಚಪ್ಪಾಳೆ ನೀಡಿ ಎಂದು ಅವರು ಕೋರಿಕೊಂಡಿದ್ದರು. ಹಾಗಾಗಿ, ಮತ್ತೆ ಈ ವಾರದಿಂದ ಸುದೀಪ್ ಅವರು ಚಪ್ಪಾಳೆ ನೀಡಲು ಆರಂಭಿಸಿದ್ದಾರೆ. ಈ ವಾರ ಭವ್ಯಾ ಗೌಡ ಅವರಿಗೆ ಕಿಚ್ಚನ ಚಪ್ಪಾಳೆ ಸಿಕ್ಕಿದೆ.

ಭವ್ಯಾ ಗೌಡ ಅವರು ಬಿಗ್ ಬಾಸ್ ಮನೆಯಲ್ಲಿ ಎರಡನೇ ಬಾರಿ ಕ್ಯಾಪ್ಟನ್ ಆಗಿದ್ದಾರೆ. ಈ ಸರಿ ಅವರು ಯಾರದ್ದೇ ಬೆಂಬಲ ಪಡೆಯದೇ, ಸ್ವಂತ ಶ್ರಮದಿಂದ ಕ್ಯಾಪ್ಟನ್ ಪಟ್ಟವನ್ನು ಪಡೆದುಕೊಂಡಿದ್ದಾರೆ. ಅಲ್ಲದೇ, ಇಡೀ ವಾರ ಗಟ್ಟಿಯಾಗಿ ತಮ್ಮ ನಿಲುವು ಏನು ಎಂಬುದನ್ನು ಸಾಬೀತು ಮಾಡಿದ್ದಾರೆ. ಈ ಎಲ್ಲ ಕಾರಣಗಳಿಂದಾಗಿ ಅವರ ಆಟವನ್ನು ಸುದೀಪ್ ಮೆಚ್ಚಿಕೊಂಡು ಚಪ್ಪಾಳೆ ನೀಡಿದ್ದಾರೆ.

ಹಾಗಂತ ಈ ವಾರದಲ್ಲಿ ಭವ್ಯಾ ಅವರ ಆಟ ಶೇ.100ರಷ್ಟು ಚೆನ್ನಾಗಿತ್ತು ಎಂದು ಅರ್ಥವಲ್ಲ. ತಕ್ಕಮಟ್ಟಿಗೆ ಅವರು ಸುಧಾರಿಸಿಕೊಂಡಿದ್ದಾರೆ ಎಂಬ ಕಾರಣವನ್ನು ಕೊಟ್ಟು ಸುದೀಪ್ ಅವರು ಮೆಚ್ಚುಗೆ ಸೂಚಿಸಿದ್ದಾರೆ. ‘ಚಪ್ಪಾಳೆ ಕೊಡಲು ಮತ್ತೆ ಆರಂಭಿಸಿ ಅಂತ ನಾನು ಕಳೆದ ವಾರ ರಿಕ್ವೆಸ್ಟ್​ ಮಾಡಿದ್ದೆ. ಅದು ನನಗೇ ಸಿಕ್ಕಿದ್ದಕ್ಕೆ ಖುಷಿ ಆಗಿದೆ’ ಎಂದು ಭವ್ಯಾ ಗೌಡ ಅವರು ಬಿಗ್ ಬಾಸ್​ ಮನೆಯ ಒಳಗಿರುವ ಟಿವಿ ಬಳಿ ಬಂದು ಸುದೀಪ್​ ಅವರ ಫ್ರೇಮ್​ ಪಕ್ಕದಲ್ಲಿ ಫೋಟೋ ಕ್ಲಿಕ್ಕಿಸಿಕೊಂಡರು.

ಇದನ್ನೂ ಓದಿ: ‘ಈ ಗಾಂಚಲಿ ನಮ್ಮತ್ರ ಬೇಡಮ್ಮ’: ಹನುಮಂತಗೆ ಮೊದಲ ಬಾರಿ ಸುದೀಪ್ ಕ್ಲಾಸ್

ಈ ವಾರ ತ್ರಿವಿಕ್ರಮ್ ಅವರಿಗೆ ಕಿಚ್ಚನ ಚಪ್ಪಾಳೆ ಸಿಗಬಹುದು ಎಂದು ಕೆಲವರು ಭಾವಿಸಿದ್ದರು. ಅಲ್ಲದೇ ಮೋಕ್ಷಿತಾಗೆ ಕೂಡ ಚಪ್ಪಾಳೆ ಸಿಗಬಹುದು ಎಂದು ಊಹಿಸಲಾಗಿತ್ತು. ಆದರೆ ಅಂತಿಮವಾಗಿ ಭವ್ಯಾ ಗೌಡ ಅವರು ಈ ಮೆಚ್ಚುಗೆಗೆ ಪಾತ್ರರಾದರು. ಭಾನುವಾರದ (ಡಿ.22) ಶೋನಲ್ಲಿ ಸುದೀಪ್ ಅವರು ತುಂಬ ಲವಲವಿಕೆಯಿಂದ ಎಲ್ಲರನ್ನೂ ನಗಿಸಿದರು. ಒಟ್ಟಾರೆ ಎಪಿಸೋಡ್​ನಲ್ಲಿ ಸಾಕಷ್ಟು ಫನ್​ ತುಂಬಿತ್ತು.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.