Divya Uruduga: ‘ನಿಮ್ಮ ಮಧ್ಯೆ ಮುಟ್ಟಾಳ ಆಗಿದ್ದು ನಾನು’; ದಿವ್ಯಾ ಉರುಡುಗಗೆ ನೇರವಾಗಿ ಹೇಳಿದ ಸುದೀಪ್

‘ಬಿಗ್ ಬಾಸ್​ ಕನ್ನಡ ಸೀಸನ್​ 9’ರ (BBK 9) ಫಿನಾಲೆಯ ಮೊದಲ ಹಂತ ಶನಿವಾರ (ಡಿಸೆಂಬರ್ 30) ನಡೆದಿದೆ. ದೀಪಿಕಾ ದಾಸ್, ದಿವ್ಯಾ ಉರುಡುಗ, ರಾಕೇಶ್ ಅಡಿಗ, ರೂಪೇಶ್ ಶೆಟ್ಟಿ, ರಾಕೇಶ್ ಅಡಿಗ ಫಿನಾಲೆ ರೇಸ್​ನಲ್ಲಿದ್ದರು. ಆ ಪೈಕಿ ದಿವ್ಯಾ ಉರುಡುಗ (Divya Uruduga) ಬಿಗ್ ಬಾಸ್​​​ನಿಂದ ಮೊದಲು ಔಟ್ ಆದರು. ವೇದಿಕೆ ಮೇಲೆ ದಿವ್ಯಾ ಉರುಡುಗ ಹಾಗೂ ಪ್ರಶಾಂತ್​ ಸಂಬರ್ಗಿ ಮಧ್ಯೆ ಮಾತಿನ ವಾರ್ ನಡೆಯಿತು. ಕೊನೆಯಲ್ಲಿ ಅವರಿಬ್ಬರೂ ಒಂದಾಗಿಬಿಟ್ಟರು! ಇದನ್ನು ನೋಡಿ ಸುದೀಪ್​ ಅಚ್ಚರಿಗೊಂಡರು.

‘ಬಿಗ್​ ಬಾಸ್ ಫಿನಾಲೆಯಿಂದ ಮೊದಲು ಔಟ್ ಆಗುವ ಸ್ಪರ್ಧಿ ಯಾರು’ ಎಂದು ಕೇಳಲಾಯಿತು. ಇದಕ್ಕೆ ಉತ್ತರಿಸಿದ ಪ್ರಶಾಂತ್ ಸಂಬರ್ಗಿ ‘ದಿವ್ಯಾ ಅವರು ಈ ಬಾರಿ ಉತ್ತಮ ಪರ್ಫಾರ್ಮೆನ್ಸ್ ನೀಡಿಲ್ಲ. ಅದೃಷ್ಟದ ಮೇಲೆ ಅವರು ಇಲ್ಲಿಗೆ ಬಂದಿದ್ದಾರೆ. ಅವರ ಈ ಜರ್ನಿಯಲ್ಲಿ ಖಾಲಿ ಹಾಳೆಯೇ ಹೆಚ್ಚಿದೆ. ಅವರೇ ಮೊದಲು ಔಟ್ ಆಗುತ್ತಾರೆ’ ಎಂದು ಹೇಳಿದರು. ಇದಕ್ಕೆ ದಿವ್ಯಾ ಸಿಟ್ಟಾಗಿದ್ದಾರೆ.

‘ನಾನು ನನ್ನ ಶ್ರಮದಲ್ಲೇ ಇಲ್ಲಿವರೆಗೆ ಬಂದಿದ್ದೇನೆ. ನೀವು ನನಗಿಂತ ಮೊದಲೇ ಔಟ್ ಆಗಿದ್ದೀರಿ. ಪ್ರಶಾಂತ್ ಸಂಬರ್ಗಿಗೆ ನನ್ನ ಮೇಲೆ ಯಾವುದೋ ದ್ವೇಷ ಇದೆ. ಈ ಕಾರಣಕ್ಕೆ ಅವರು ಈ ರೀತಿ ಹೇಳುತ್ತಿದ್ದಾರೆ’ ಎಂದರು ದಿವ್ಯಾ. ಪ್ರಶಾಂತ್ ಸಂಬರ್ಗಿ ಅವರು ‘ನನ್ನ ಹೃದಯದಿಂದ ಬಂದ ಮಾತನ್ನು ನಾನು ಹೇಳಿದ್ದೇನೆ’ ಎಂದು ಉತ್ತರ ಕೊಟ್ಟರು. ಇಬ್ಬರ ಮಧ್ಯೆ ಚರ್ಚೆ ನಡೆದೇ ಇತ್ತು. ಇಬ್ಬರ ಮಧ್ಯೆಯ ಮಾತುಕತೆಗೆ ಸುದೀಪ್​ ಅವರು ನೇತೃತ್ವ ವಹಿಸಿದ್ದರು.

ಇದನ್ನೂ ಓದಿ: ‘ಕ್ಯಾರೆಕ್ಟರ್ ಹಾಳಾಗುತ್ತೆ ಅಂತ ಹೆದರಿಸಿದ್ರು’; ಎಚ್ಚರಿಕೆ ಬಗ್ಗೆ ಸುದೀಪ್ ಎದುರು ಹೇಳಿಕೊಂಡ ರೂಪೇಶ್ ಶೆಟ್ಟಿ

ಕೊನೆಯಲ್ಲಿ ದಿವ್ಯಾ ಉರುಡುಗ ಅವರು ಪ್ರಶಾಂತ್ ಸಂಬರ್ಗಿ ಬಗ್ಗೆ ಒಳ್ಳೆಯ ಮಾತನ್ನು ಹೇಳಿದರು. ‘ಪ್ರಶಾಂತ್ ಸಂಬರ್ಗಿಗೆ ಮೈಕ್​ ಸಿಕ್ಕರಷ್ಟೇ ಅವರು ಈ ರೀತಿ ಆಡುತ್ತಾರೆ. ಬಿಗ್ ಬಾಸ್​ನಿಂದ ಹೊರಗೆ ಇದ್ದಾಗ ಅವರು ಒಳ್ಳೆಯ ರೀತಿಯಲ್ಲೇ ಇರುತ್ತಾರೆ. ಸಿನಿಮಾದ ಪ್ರೀಮಿಯರ್ ಶೋ ಇದೆ ಬನ್ನಿ ಎಂದು ಆಹ್ವಾನ ಕೊಟ್ಟಾಗ ಅವರು ಬರುತ್ತಾರೆ. ಬಂದು ಖುಷಿಯಿಂದ ಮಾತನಾಡುತ್ತಾರೆ’ ಎಂದರು. ದಿವ್ಯಾ ಏಕಾಏಕಿ ಪ್ಲೇಟ್ ಬದಲಿಸಿದ್ದನ್ನು ನೋಡಿ ಸುದೀಪ್​ಗೆ ಬೇಸರ ಆಯಿತು. ‘ಇವರ ಮಧ್ಯೆ ಮುಟ್ಟಾಳ ಆಗಿದ್ದು ನಾನು’ ಎಂದು ಹಾಸ್ಯರೂಪದಲ್ಲೇ ಹೇಳಿದರು. ಈ ಮಾತನ್ನು ಕೇಳಿ ಮನೆ ಮಂದಿ ನಕ್ಕಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ