‘ದಿ ಫ್ಯಾಮಿಲಿ ಮ್ಯಾನ್​ 3’ ಕಥೆ ಬಹಿರಂಗ; ನಿರ್ದೇಶಕರು ಬಾಯ್ಬಿಟ್ಟ ಸೀಕ್ರೆಟ್​ ಇಲ್ಲಿದೆ

‘ದಿ ಫ್ಯಾಮಿಲಿ ಮ್ಯಾನ್​ 2’ ವೆಬ್​ ಸಿರೀಸ್​ ಬಿಡುಗಡೆಯಾಗಿ ಸೂಪರ್​ ಹಿಟ್​ ಆಗಿದೆ. ಇನ್ನೂ ಅನೇಕರು ಈ ಸೀರಿಸ್​ ನೋಡಿಲ್ಲ. ಅಷ್ಟರಲ್ಲಾಗಲೇ 3ನೇ ಸೀಸನ್​ ಬಗ್ಗೆ ಚರ್ಚೆ ಶುರುವಾಗಿದೆ. ಅದಕ್ಕೆ ಕಾರಣ ಆಗಿರುವುದು 2ನೇ ಸೀಸನ್​ನ ಕ್ಲೈಮ್ಯಾಕ್ಸ್​​. ಎರಡನೇ ಸೀಸನ್​ ಮುಗಿಯುವಾಗ ಸಂಬಂಧವೇ ಇಲ್ಲದ ಒಂದು ದೃಶ್ಯವನ್ನು ತೋರಿಸಲಾಗಿದೆ. ಅದರ ಅರ್ಥ ಏನು? ಯಾಕೆ ಆ ದೃಶ್ಯವನ್ನು ಸೇರಿಸಲಾಗಿದೆ ಎಂಬುದನ್ನು ನಿರ್ದೇಶಕರಾದ ರಾಜ್​ ಮತ್ತು ಡಿಕೆ ವಿವರಿಸಿದ್ದಾರೆ.

ಆ ದೃಶ್ಯದಲ್ಲಿ ಏನಿದೆ?

ಅಪರಿಚಿತ ವ್ಯಕ್ತಿಯೊಬ್ಬ ಮಾಸ್ಕ್​ ಧರಿಸಿ, ಕೊಲ್ಕತ್ತಾದ ನಿಗೂಢ ಸ್ಥಳಕ್ಕೆ ಬರುತ್ತಾನೆ. ತನ್ನ ಲ್ಯಾಪ್​ಟಾಪ್ ತೆರೆದು ಚೈನೀಸ್​ ಭಾಷೆಯಲ್ಲಿ ಮೆಸೇಜ್​ ಕಳಿಸಲು ಶುರುಮಾಡುತ್ತಾನೆ. ಆತ ಒಂದು ಹೊಸ ಅವಘಡ ಮಾಡಲು ಭಾರತಕ್ಕೆ ಬಂದಿದ್ದಾನೆ ಎಂಬುದರ ಸುಳಿವು ಕೊಡಲಾಗಿದೆ. ಅಷ್ಟಕ್ಕೂ ಈ ದೃಶ್ಯ ಯಾಕೆ ಇದೆ ಎಂಬ ಪ್ರಶ್ನೆ ಅನೇಕರ ಮನದಲ್ಲಿ ಮೂಡಿದೆ.

3ನೇ ಸೀಸನ್​ನಲ್ಲಿ ಕೊವಿಡ್​ ಕಥೆ

‘ಎಲ್ಲ ಮುಗಿದ ನಂತರದಲ್ಲಿ ನಾವು ಈ ದೃಶ್ಯವನ್ನು ಚಿತ್ರೀಕರಿಸಿದೆವು. ಕೊವಿಡ್​ನಿಂದಾಗಿ ಮುಂದೆ ನಾವು ಯಾವ ಪರಿಸ್ಥಿತಿಗೆ ಹೋಗಬಹುದು ಎಂಬುದನ್ನು ಆ ದೃಶ್ಯ ಪ್ರತಿನಿಧಿಸುತ್ತದೆ. ಜನರಲ್ಲಿ ಕುತೂಹಲ ಮೂಡಿಸಬೇಕು ಎಂಬ ಉದ್ದೇಶದಿಂದಲೇ ಆ ದೃಶ್ಯ ಸೇರಿಸಿದ್ದೇವೆ. ಕೊವಿಡ್​ಗೆ ಸಂಬಂಧಿಸಿದ ಕತೆಯನ್ನು ನಾವು ಖಂಡಿತವಾಗಿ ಮೂರನೇ ಎಪಿಸೋಡ್​ನಲ್ಲಿ ತೋರಿಸುತ್ತೇವೆ. ಆದರೆ ಅದರ ಪ್ರಮಾಣ ಎಷ್ಟು ಇರಲಿದೆ ಎಂಬುದನ್ನು ಕಥೆ ಬರೆಯಲು ಕುಳಿತಾಗ ನಿರ್ಧರಿಸಲಿದ್ದೇವೆ’ ಎಂದು ರಾಜ್​ ವಿವರಿಸಿದ್ದಾರೆ.

ಬದಲಾಗಿದೆ ಶ್ರೀಕಾಂತ್​-ಸುಚಿ ಸಂಸಾರ

ಈ ವೆಬ್​ ಸರಣಿಯಲ್ಲಿ ಶ್ರೀಕಾಂತ್​ ತಿವಾರಿ (ಮನೋಜ್​ ಬಾಯಪೇಯಿ) ಮತ್ತು ಸುಚಿ (ಪ್ರಿಯಾಮಣಿ) ಸಂಸಾರದ ಕಥೆ ಕೂಡ ಇಂಟರೆಸ್ಟಿಂಗ್​ ಆಗಿದೆ. ಆದರೆ ಎರಡನೇ ಸೀಸನ್​ನ ಕೊನೆಯಲ್ಲಿ ತನ್ನ ಒಂದು ಸೀಕ್ರೆಟ್​ ಅನ್ನು ಗಂಡನ ಎದುರು ಸುಚಿ ರಿವೀಲ್​ ಮಾಡಿದ್ದಾಳೆ. ಹಾಗಾಗಿ ಅವರ ಫ್ಯಾಮಿಲಿ ಕಥೆ ಕೂಡ 3ನೇ ಸೀಸನ್​ನಲ್ಲಿ ಬೇರೆ ಸ್ವರೂಪ ಪಡೆದುಕೊಳ್ಳಲಿದೆ.

ಈ ವೆಬ್​ ಸರಣಿಗೆ ನಟಿ ಸಮಂತಾ ಅಕ್ಕಿನೇನಿ ಹೊಸದಾಗಿ ಸೇರ್ಪಡೆ ಆಗಿದ್ದರು. ರಾಜಿ ಎಂಬ ರಗಡ್​ ಯುವತಿಯ ಪಾತ್ರದಲ್ಲಿ ಅವರು ಕಾಣಿಸಿಕೊಂಡ ಅವರಿಗೆ ಎಲ್ಲರಿಂದ ಮೆಚ್ಚುಗೆ ವ್ಯಕ್ತವಾಗಿದೆ. ರಶ್ಮಿಕಾ ಮಂದಣ್ಣ ಸೇರಿದಂತೆ ಅನೇಕ ನಟಿಯರು ಸುಮಂತಾ ಅವರ ಆ್ಯಕ್ಷನ್​ ನೋಡಿ ಫಿದಾ ಆಗಿದ್ದಾರೆ.

ಇದನ್ನೂ ಓದಿ:

‘ದಿ ಫ್ಯಾಮಿಲಿ ಮ್ಯಾನ್​ 2’ ವೆಬ್​ ಸಿರೀಸ್​ನ ಮುಖ್ಯವಾದ ಸೀಕ್ರೆಟ್​ ಬಗ್ಗೆ ಮನೋಜ್​ ಬಾಜಪೇಯ್​ ಹೇಳಿದ್ದೇನು?

ಫ್ಯಾಮಿಲಿ ಮ್ಯಾನ್ ಹೀರೋಗೋಸ್ಕರ ಓಪನ್​ ಆಗಿಯೇ ಕಾಲೆಳೆದುಕೊಂಡ ಅಮೇಜಾನ್​-ನೆಟ್​ಫ್ಲಿಕ್ಸ್​