ಬಾಳೆಕುದ್ರು ಮಠದಲ್ಲಿ ವಿಗ್ರಹಗಳ ನಾಪತ್ತೆ ಪ್ರಕರಣ: ನಾಪತ್ತೆಯಾಗಿರುವ ಸ್ವಾಮೀಜಿ ಪತ್ತೆಗೆ ವಿಶೇಷ ಪೊಲೀಸ್ ಟೀಂ

ಉಡುಪಿ, (ನವೆಂಬರ್ 06): ಬಾಳೆಕುದ್ರು ಮಠದಲ್ಲಿ ವಿಗ್ರಹಗಳ ನಾಪತ್ತೆ ಆರೋಪ ಸಂಬಂಧ ಬೆಂಗಳೂರಿನ ಬಸವೇಶ್ವರನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಆದ್ರೆ, ಪ್ರಕರಣ ದಾಖಲಾಗುತ್ತಿದ್ದಂತೆಯೇ ಉಡುಪಿ ಜಿಲ್ಲೆ ಬ್ರಹ್ಮಾವರ ತಾಲೂಕಿನ ಬಾಳೆಕುದ್ರು ಮಠದ ವಾಸುದೇವ ಸದಾಶಿವಾಶ್ರಮ ಸ್ವಾಮೀಜಿ ನಾಪತ್ತೆಯಾಗಿದ್ದಾರೆ. ಹೀಗಾಗಿ ಪೊಲಿಸರು ನೋಟಿಸ್ ನೀಡಲು ವಾಸುದೇವ ಸದಾಶಿವಾಶ್ರಮಶ್ರೀ ಹುಡುಕಾಟಕ್ಕಾಗಿ ವಿಶೇಷ ತಂಡ ರಚನೆ ಮಾಡಿದ್ದಾರೆ. ಉಡುಪಿ, ಮಂಗಳೂರಿನ ಪೊಳಲಿ ದೇವರಗುಡ್ಡೆ, ಚಿಕ್ಕಮಗಳೂರಿನ ಕೊಪ್ಪ ಹರಿಹರಪುರ, ಬೆಂಗಳೂರಿನ ರಾಜರಾಜೇಶ್ವರಿನಗರದಲ್ಲಿ ಅಡಗಿರುವ ಸಾಧ್ಯತೆ ಇದೆ ಎಂದು ಮಠದ ಶಿಷ್ಯರು ತಿಳಿಸಿದ್ದು, ಈ ಸಂಬಂಧ ಪೊಲೀಸರು ಹುಡುಕಾಟ ನಡೆಸಿದ್ದಾರೆ.

ಈಗಾಗಲೇ ಪಂಚಲೋಹ, ತಾಮ್ರ,ಬೆಳ್ಳಿ, ಹಿತ್ತಾಳೆ ವಿಗ್ರಹ ಕಳ್ಳತನವಾಗಿದ್ದು, ನಕಲಿ ವಿಗ್ರಹಗಳನ್ನು ಇಟ್ಟಿರುವ ಶಂಕೆ ಇದೆ. ಹೀಗಾಗಿ ಮಠದಲ್ಲಿ ವಿಗ್ರಹಗಳ ಪರಿಶೀಲನೆ ನಡೆಸುವಂತೆ ಒತ್ತಾಯಿಸಲಾಗಿದ್ದು, ಇದರ ಮೇರೆಗೆ ಶೀಘ್ರದಲ್ಲೇ ಬೆಂಗಳೂರು ಬಸವೇಶ್ವರ ನಗರ ಹಾಗೂ ಕೋಟ ಠಾಣೆ ಪೊಲೀಸರು ಮಠಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಅಲ್ಲದೇ ಕಳವು ಮಾಡರುವ ಮೂರ್ತಿಗಳನ್ನು ಬೆಂಗಳೂರಿನ ನಾಗೇಂದ್ರ ಪ್ರಸಾದ್ ಗೆ ಸೇರಿದ ಏಳೆಂಟು ವೆಬ್ ಸೈಟ್ ಗಳಲ್ಲಿ ಮಾರಾಟಕಿಡಲಾಗಿದೆ.ಇದರಿಂದ ನಾಗೇಂದ್ರ ಪ್ರಸಾದ್ ಅವರನ್ನು ತನಿಖೆಗೆ ಒಳಪಡಿಸುವಂತೆ ಮಠದ ಶಿಷ್ಯರು ಒತ್ತಾಯಿಸಿದ್ದಾರೆ.

ಇದನ್ನೂ ಓದಿ: ಶತಮಾನದ ಮೂರ್ತಿಗಳನ್ನು ಆನ್‌ಲೈನ್‌ನಲ್ಲಿ ಮಾರಾಟಕ್ಕಿಟ್ಟಿದ್ದ ಸ್ವಾಮೀಜಿ: ಬೆಂಗಳೂರು ಪೊಲೀಸರ ತನಿಖೆಯಲ್ಲಿ ಸತ್ಯ ಬಯಲು, ಬಾಳೆಕುದ್ರು ಶ್ರೀ ನಾಪತ್ತೆ

ವಿಗ್ರಹ ಕಳವು ಆರೋಪ ಸತ್ಯಕ್ಕೆ ದೂರ ಎಂದ ಆಡಳಿತಾಧಿಕಾರಿ

ಬಾಳೆಕುದ್ರು ಮಠದ ವಿಗ್ರಹ ಕಳವು ಸಂಬಂಧ ಈಗಾಗಲೇ ಬೆಂಗಳೂರಿನಲ್ಲಿ ದೂರು ದಾಖಲಾಗಿದ್ದು, ನಾಪತ್ತೆಯಾಗಿರುವ ಸ್ವಾಮೀಜಿ ಪತ್ತೆಗೆ ಪೊಲೀಸರು ವಿಶೇಷ ತಂಡ ರಚನೆ ಮಾಡಿದ್ದಾರೆ. ಆದ್ರೆ, ಇದೀಗ ಈ ಪ್ರಕರಣಕ್ಕೆ ಟ್ವಿಸ್ಟ್ ಸಿಕ್ಕಿದ್ದು, ಬಾಳೆಕುದ್ರು ಮಠದ ವಿಗ್ರಹ ಕಳವು ಆರೋಪ ಸತ್ಯಕ್ಕೆ ದೂರವಾಗಿದೆ ಎಂದು ಆಡಳಿತಾಧಿಕಾರಿ ಸ್ಪಷ್ಟನೆ ನೀಡಿದ್ದಾರೆ.

ಬಾಳೆಕುದ್ರು ಮಠದ ಆಡಳಿತಾಧಿಕಾರಿ ಅನಿಲ್ ಕುಮಾರ್ ಈ ಬಗ್ಗೆ ಸ್ಪಷ್ಟನೆ ನೀಡಿದ್ದು, ನವೆಂಬರ್ 4ರಂದು ಕೆಲವು ಹಳೆಯ ಶಿಷ್ಯವರ್ಗದವರು ಎಂದು ಹೇಳಿಕೊಂಡವರು ವಾಸುದೇವ ಸದಾಶಿವ ಶಿವಸ್ವಾಮಿಗಳು, ಆಡಳಿತಾಧಿಕಾರಿ ಎ. ಅನಿಲ್ ಕುಮಾರ್, ಸಿಬ್ಬಂದಿ ಜಯಲಕ್ಷ್ಮಿ ಹಾಗೂ ಪುರೋಹಿತ ಶ್ರೇಯಸ್ ಸೇರಿದಂತೆ ನಾಲ್ವರು ಮಠದ ಹಳೆಯ ವಿಗ್ರಹಗಳನ್ನು ಬೆಂಗಳೂರಿನ ಪ್ರತಿಷ್ಠಿತ ‘ಪ್ರಸಿದ್ಧಿ ಐಡಲ್ಸ್’ ಸಂಸ್ಥೆಗೆ ಕಳವು ಮಾಡಿ ಮಾರಾಟ ಮಾಡುತ್ತಿದ್ದಾರೆ ಎಂದು ಬಸವೇಶ್ವರ ನಗರ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಈ ದೂರಿನ ಆಧಾರದಲ್ಲಿ ಎಫ್‌ಐಆರ್ ದಾಖಲಾಗಿದ್ದು, ಆರೋಪಗಳು ಸಂಪೂರ್ಣ ಸುಳ್ಳು ಎಂದು ಅನಿಲ್ ಕುಮಾರ್ ತಿಳಿಸಿದ್ದಾರೆ.

ಎಫ್‌ಐಆರ್ ದಾಖಲಾದ ಹಿನ್ನೆಲೆಯಲ್ಲಿ ಸ್ವಾಮೀಜಿಯವರು ಕಾನೂನು ಪ್ರಕ್ರಿಯೆಗಾಗಿ ಬೆಂಗಳೂರಿಗೆ ತೆರಳಿದ್ದಾರೆ. ಆದರೆ, ಸ್ವಾಮೀಜಿಯವರು ಮಠ ಬಿಟ್ಟು ಓಡಿಹೋಗಿದ್ದಾರೆ. ಸಿಬ್ಬಂದಿ ವರ್ಗವೂ ಮಠದಿಂದ ತೆರಳಿದೆ ಹಾಗೂ ಮಠಕ್ಕೆ ಬೀಗ ಹಾಕಲಾಗಿದೆ ಎಂಬ ಆರೋಪಗಳು ಕೆಲವರಿಂದ ಹರಿದಾಡುತ್ತಿವೆ ಇವುಗಳಲ್ಲಿಯೂ ಯಾವುದೇ ಸತ್ಯಾಂಶವಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.

ಮಠದಲ್ಲಿ ನಿತ್ಯದ ಪೂಜಾ ಕೈಂಕರ್ಯಗಳಿಗೆ ಯಾವುದೇ ಚ್ಯುತಿ ಉಂಟಾಗದಂತೆ ಪುರೋಹಿತರನ್ನು ನಿಯೋಜಿಸಲಾಗಿದೆ ಧಾರ್ಮಿಕ ಕಾರ್ಯಗಳು ನಿರಂತರವಾಗಿ ನಡೆಯುತ್ತಿವೆ. ಮಠದ ಎಲ್ಲಾ ವಿಗ್ರಹಗಳು ಪರಮಪೂಜ್ಯ ಸ್ವಾಮೀಜಿಯವರ ಬಳಿ ಸುರಕ್ಷಿತವಾಗಿವೆ. ತಾವು ಯಾವುದೇ ಅನಾಚಾರ ಅಥವಾ ಅಪಚಾರ ಎಸಗಿಲ್ಲ. ಕಾನೂನು ತಜ್ಞರನ್ನು ಭೇಟಿಯಾಗಿ ಅಗತ್ಯ ಪ್ರಕ್ರಿಯೆಗಳನ್ನು ಪೂರ್ಣಗೊಳಿಸಿದ ಬಳಿಕ ಸದ್ಭಕ್ತರ ಮುಂದೆ ಸತ್ಯಾಂಶಗಳನ್ನು ವಿವರಿಸುತ್ತೆನೆ. ಅಲ್ಲಿಯವರೆಗೆ ಭಕ್ತರು ಹಾಗೂ ಸಾರ್ವಜನಿಕರು ಆತುರದ ನಿರ್ಧಾರಕ್ಕೆ ಬರದೆ ಸಹಕರಿಸಬೇಕೆಂದು ಮನವಿ ಮಾಡಿದ್ದಾರೆ.

ಒಟ್ಟಿನಲ್ಲಿ ಈ ಪ್ರಕರಣ ಗೊಂದಲಮಯವಾಗಿದ್ದು, ಪೊಲೀಸರು ಸೂಕ್ತ ತನಿಖೆ ನಡೆಸಿ ಸತ್ಯಾಸತ್ಯತೆಯನ್ನು ಕಂಡು ಹಿಡಿಯಬೇಕಿದೆ.

ಕರ್ನಾಟಕದ ಮತ್ತಷ್ಟು ಸುದ್ದಿಗಾಗಿ ಇಲ್ಲಿ ಕ್ಲಿಕ್ ಮಾಡಿ