ಮೋಬಿಫೈ ಹಾಗೂ ಸಿಇಐಆರ್ ತಂತ್ರಜ್ಞಾನದಿಂದ 2 ತಿಂಗಳಲ್ಲಿ ಬರೋಬ್ಬರಿ 40 ಲಕ್ಷ ಮೌಲ್ಯದ 360 ಮೊಬೈಲ್ ಪತ್ತೆ ಮಾಡಿದ ಗದಗ ಪೊಲೀಸರು

ಗದಗ: ಜಿಲ್ಲಾ ಪೋಲಿಸರಿಂದ ಭರ್ಜರಿ ಕಾರ್ಯಾಚರಣೆ ಮಾಡಲಾಗಿದ್ದು, ಹೊಸ ಮೋಬಿಫೈ(MobiFi) ಹಾಗೂ ಸಿಇಐಆರ್​(CEIR) ತಂತ್ರಜ್ಞಾನ ಅಳವಡಿಸಿ ಕಳ್ಳತನ ಅಥವಾ ಕಳೆದುಕೊಂಡ ಮೊಬೈಲ್​ಗಳ ಪತ್ತೆ ಮಾಡಲಾಗಿದ್ದು, ಕಳೆದ ಎರಡ್ಮೂರು ತಿಂಗಳಲ್ಲಿ ಬರೊಬ್ಬರಿ 40 ಲಕ್ಷ ಮೌಲ್ಯದ 360 ಮೊಬೈಲ್ ಪತ್ತೆ ಮಾಡಿ, ಅದರ ಮಾಲೀಕರಿಗೆ ಹಸ್ತಾಂತರಿಸಲಾಗಿದೆ. ಅದರಲ್ಲಿ ಮುಖ್ಯವಾಗಿ ಮೋಬಿಫೈ ತಂತ್ರಜ್ಞಾನದಲ್ಲಿ 92 ಮೊಬೈಲ್ ಹಾಗೂ ಸಿಇಐಆರ್ ತಂತ್ರಜ್ಞಾನದಿಂದ 24 ಮೊಬೈಲ್​ ಪತ್ತೆ ಹಚ್ಚಲಾಗಿದೆ ಎಂದು ಗದಗ ಎಸ್ಪಿ ಬಿ.ಎಸ್​.ನೇಮಗೌಡ ಸುದ್ದಿಗೋಷ್ಠಿಯಲ್ಲಿ ಹೇಳಿದ್ದಾರೆ.

 ಮೋಬಿಫೈ(MobiFi) 

ಕಂಪ್ಲೆಂಟ್, ಟ್ರಾಕಿಂಗ್, ಬ್ಲಾಕಿಂಗ್ ಎಂಬ ಮೂರು ಅಂಶಗಳನ್ನಿಟ್ಟುಕೊಂಡು ಕಳೆದ ಹೋದ ಮೊಬೈಲ್​ಗಳ ಪತ್ತೆ ಮಾಡಲು ಮೋಬಿಫೈ ( MobiFI) ಎಂಬ ವಿನೂತನ ತಂತ್ರಾಂಶದ ಕೇಂದ್ರಿಕೃತ ವ್ಯವಸ್ಥೆಯನ್ನ ಪ್ರಾರಂಭಿಸಲಾಗಿದೆ. ಈ ತಂತ್ರಾಂಶದ ಮೂಲಕ ಕಳೆದು ಹೋದ ಮೊಬೈಲ್​ಗಳನ್ನ ಹುಡುಕಲು ಬೆರಳ ತುದಿಯಲ್ಲೆ ದೂರನ್ನ ನೀಡಬಹುದಾಗಿದೆ. 8277969900 ಸಂಖ್ಯೆಗೆ Hi ಅಂತಾ ಸಂದೇಶ ಕಳಿಸುವ ಮೂಲಕ ಅಥವಾ ಕ್ಯೂ ಆರ್ ಕೋಡ್ ಸ್ಕ್ಯಾನ್ ಮಾಡುವ ಮೂಲಕ ಮೋಬಿಫೈ( MobiFi) ಬಳಕೆ ಮಾಡಬಹುದು. ಈ ಮೂಲಕ ತಮ್ಮ ಮಾಹಿತಿಯನ್ನ ದಾಖಲಿಸುವ ಮೂಲಕ ಮೊಬೈಲ್ ಕಳೆದು ಹೋದ ಬಗ್ಗೆ ದೂರು ನೀಡಬಹುದಾಗಿದೆ. ಈ ತಂತ್ರಜ್ಞಾನದ ಮೂಲಕ ಸುಲಭವಾಗಿ ಕಳೆದು ಹೋದ ಮೊಬೈಲ್​ನ್ನು ಪತ್ತೆ ಮಾಡಬಹುದಾಗಿದೆ. ಒಂದು ವೇಳೆ ಮೊಬೈಲ್ ಸಿಗದಿದ್ದರೆ ಶಾಶ್ವತವಾಗಿ ಬ್ಲಾಕ್ ಮಾಡುವ ವ್ಯವಸ್ಥೆಯನ್ನ ಸಹ ಮಾಡಲಾಗಿದೆ.

ಇದನ್ನೂ ಓದಿ:ಗದಗ: ಬೇಕಾಬಿಟ್ಟಿ ಲೆಕ್ಕ ಬರೆದು ಲಕ್ಷ ಲಕ್ಷ ಹಣ ಲೂಟಿ; ಅಧಿಕಾರಿಯನ್ನ ಕಚೇರಿ ಒಳಗಡೆ ಬಿಡದೇ ವಾಪಸ್ ಕಳುಹಿಸಿದ ಜನ

ಸಿಇಐಆರ್​(CEIR)

ಕಳೆದು ಹೋದ ಮೊಬೈಲ್‌ನ ಐಎಂಇಐ(IMEI) ನಂಬರ್‌ ಆಧರಿಸಿ ಮೊಬೈಲ್‌ ಪತ್ತೆ ಹಚ್ಚುವ, ಮೊಬೈಲ್‌ ಬಳಕೆ ಆಗದಂತೆ ಬ್ಲಾಕ್‌ ಮಾಡುವ ತಂತ್ರಜ್ಞಾನದ ಅವಕಾಶವನ್ನು ಸಿಇಐಆರ್‌ ಯೋಜನೆ ಒಳಗೊಂಡಿದೆ. ಕೇಂದ್ರ ಮಾಹಿತಿ ತಂತ್ರಜ್ಞಾನ ಇಲಾಖೆ ಸಿಇಐಆರ್​ನ್ನು ಅಭಿವೃದ್ಧಿಪಡಿಸಿದೆ. ಮೊಬೈಲ್‌ ಕಳ್ಳತನವಾದರೆ ಐಎಂಇಐ ನಂಬರ್‌ ಸಹಿತ ಪೊಲೀಸ್‌ ಠಾಣೆಯಲ್ಲಿ ದಾಖಲಿಸಿರುವ ಎಫ್‌ಐಆರ್‌ ಅಥವಾ ಇ-ಲಾಸ್ಟ್‌ ರಿಪೋರ್ಟ್‌ ಪ್ರತಿಯನ್ನು ಸಲ್ಲಿಸಿದರೆ ಅದನ್ನು ಪಡೆದು ಕಮಾಂಡ್‌ ಸೆಂಟರ್‌ನಿಂದ ಸಿಇಐಆರ್‌ ವೆಬ್‌ಸೈಟ್‌ನಲ್ಲಿ ಮೊಬೈಲ್‌ ಬ್ಲಾಕ್‌ ಮಾಡಲಾಗುತ್ತದೆ. ಒಮ್ಮೆ ಮೊಬೈಲ್‌ ಬ್ಲಾಕ್‌ ಮಾಡಿದ ಬಳಿಕ ಅದನ್ನು ಬಳಸಲು ಸಾಧ್ಯವಾಗುವುದಿಲ್ಲ. ಹೊಸ ಸಿಮ್‌ ಹಾಕಿದ ಕೂಡಲೇ ಪೊಲೀಸರಿಗೆ ಅಲರ್ಟ್‌ ಮೆಸೇಜ್‌ ಸಿಗಲಿದೆ. ಇದರಿಂದ ಕಳವು ಮಾಡಿದವರನ್ನು ಪತ್ತೆ ಹಚ್ಚಲು ಸಹಕಾರಿಯಾಗಲಿದೆ.

ಇನ್ನಷ್ಟು ರಾಜ್ಯಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ

Published On - 2:03 pm, Mon, 6 March 23