ರಾಯಚೂರು: ತುಂಗಭದ್ರಾ ಎಡದಂಡೆ ಕಾಲುವೆ ಕಾರ್ಮಿಕರಿಗೆ ಸೇರಬೇಕಿದ್ದ 1 ಕೋಟಿಗೂ ಅಧಿಕ ಕೂಲಿ ಹಣ ಗುಳುಂ!

ರಾಯಚೂರು, ಅಕ್ಟೋಬರ್ 16: ಜಿಲ್ಲೆಯಲ್ಲಿ ತುಂಗಭದ್ರಾ ಎಡದಂಡೆ ಕಾಲುವೆ ನಿರ್ವಹಣೆ ಮಾಡುವ ಗ್ಯಾಂಗ್‌ಮ್ಯಾನ್ ಕಾರ್ಮಿಕರ ಕೂಲಿ ಹಣವನ್ನು ನೀರಾವರಿ ಇಲಾಖೆಯ ಕೆಲ ಇಂಜಿನಿಯರ್‌ಗಳು ಲಪಟಾಯಿಸಿರುವ ಗಂಭೀರ ಪ್ರಕರಣ ಬೆಳಕಿಗೆ ಬಂದಿದೆ. ಜಿಲ್ಲೆಯ 222 ಕಾರ್ಮಿಕರ 80 ದಿನಗಳ ಕೂಲಿ ಹಣವನ್ನು ಅಕ್ರಮವಾಗಿ ಬೇರೆಡೆಗೆ ವರ್ಗಾಯಿಸಿ ವಂಚಿಸಿರುವುದು ತನಿಖೆಯಿಂದ ಬಹಿರಂಗಗೊಂಡಿದೆ.

ಕಲಬುರಗಿ ಕಾರ್ಮಿಕ ಪ್ರಾಧಿಕಾರಕ್ಕೆ ದೂರು ನೀಡಿದ ಕಾರ್ಮಿಕರು

2025ರ ಏಪ್ರಿಲ್‌ನಿಂದ ಜೂನ್ ತಿಂಗಳವರೆಗೆ ಕಾಲುವೆ ನಿರ್ವಹಣೆಯಲ್ಲಿ ತೊಡಗಿದ್ದ 222 ಕಾರ್ಮಿಕರಿಗೆ ಸೇರಬೇಕಿದ್ದ ಒಟ್ಟು 1,01,01,000 ರೂ. ಕೂಲಿ ಹಣವನ್ನು ನೀರಾವರಿ ಇಲಾಖೆಯ ಇಂಜಿನಿಯರ್‌ಗಳು ಕಳ್ಳತನ ಮಾಡಿದ್ದಾರೆ. ಈ ಬಗ್ಗೆ ಕಾರ್ಮಿಕರು ಪ್ರಶ್ನಿಸಿದಾಗ ಇಂಜಿನಿಯರ್‌ಗಳು ಹಾರಿಕೆ ಉತ್ತರಗಳನ್ನು ನೀಡಿ ಸಬೂಬು ಹೇಳುತ್ತಾ ಬಂದಿದ್ದರು. ಇದರಿಂದ ನೊಂದ ಕಾರ್ಮಿಕರು ಕಲಬುರಗಿ ಕಾರ್ಮಿಕ ಪ್ರಾಧಿಕಾರಕ್ಕೆ ದೂರು ದಾಖಲಿಸಿದ್ದರು.

ದೂರಿನ ಆಧಾರದ ಮೇಲೆ ಪ್ರಾಧಿಕಾರವು ತನಿಖೆ ಕೈಗೊಂಡಾಗ ಅಕ್ರಮ ಎಸಗಿರುವ ಸತ್ಯ ಹೊರಬಂದಿದೆ. ಪ್ರತಿಯೊಬ್ಬ ಕಾರ್ಮಿಕರ 40,000 ರೂ. ಕೂಲಿ ಹಣವನ್ನು ಇಂಜಿನಿಯರ್‌ಗಳು ಲೂಟಿ ಮಾಡಿರುವುದು ವಿಚಾರಣೆ ವೇಳೆ ಸಾಬೀತಾಗಿದೆ.

ಅಕ್ಟೋಬರ್ 22 ರವರೆಗೆ ಗಡುವು

ಈ ವಂಚನೆ ಗಂಭೀರವಾಗಿ ಪರಿಗಣಿಸಿರುವ ಕಲಬುರಗಿ ಕಾರ್ಮಿಕ ಪ್ರಾಧಿಕಾರವು ಮೂವರು ಇಂಜಿನಿಯರ್‌ಗಳಿಗೆ ಬಿಸಿ ಮುಟ್ಟಿಸಿದ್ದು, ಕೂಡಲೇ ಕಾರ್ಮಿಕರಿಗೆ ಹಣ ಮರುಪಾವತಿಸುವಂತೆ ಕಟ್ಟುನಿಟ್ಟಿನ ಆದೇಶ ಹೊರಡಿಸಿದೆ. 222 ಕಾರ್ಮಿಕರಿಗೆ ತಲಾ 40,000 ರೂ. ವೇತನ ಹಾಗೂ ಪರಿಹಾರದ ಮೊತ್ತವಾಗಿ 5,500 ರೂ. ಸೇರಿಸಿ ಪಾವತಿಸಲು ಸೂಚಿಸಲಾಗಿದೆ. ಒಟ್ಟು 1,01,01,000 ರೂ. ಮೊತ್ತವನ್ನು ಒಂದು ತಿಂಗಳ ಒಳಗೆ ಕಾರ್ಮಿಕರಿಗೆ ಪಾವತಿಸುವಂತೆ ಆದೇಶಿಸಲಾಗಿದ್ದು, ಅಕ್ಟೋಬರ್ 22 ರವರೆಗೆ ಗಡುವು ನೀಡಲಾಗಿದೆ.

ಕರ್ನಾಟಕದ ಇನ್ನಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ