Nokia new phones launch: ಎಚ್​ಎಂಡಿ ಗ್ಲೋಬಲ್​ನಿಂದ 10,000 ರೂ. ಒಳಗಿನ ನೋಕಿಯಾ C20 ಸ್ಮಾರ್ಟ್​ಫೋನ್ ಬಿಡುಗಡೆ!

ಎಚ್​ಎಂಡಿ ಗ್ಲೋಬಲ್​ನಿಂದ ನೋಕಿಯಾ ಸಿ20 ಹೊಸ ಸ್ಮಾರ್ಟ್​​ಫೋನ್ ಗುರುವಾರ ಭಾರತದಲ್ಲಿ ಬಿಡುಗಡೆ ಆಗುತ್ತಿದೆ. ಈ ಫೋನ್​ನ ವೈಶಿಷ್ಟ್ಯ, ಬಣ್ಣ, ಬೆಲೆ ಮತ್ತಿತರ ವಿವರಗಳು ಇಲ್ಲಿವೆ.

  • TV9 Web Team
  • Published On - 16:18 PM, 8 Apr 2021
Nokia new phones launch: ಎಚ್​ಎಂಡಿ ಗ್ಲೋಬಲ್​ನಿಂದ 10,000 ರೂ. ಒಳಗಿನ ನೋಕಿಯಾ C20 ಸ್ಮಾರ್ಟ್​ಫೋನ್ ಬಿಡುಗಡೆ!
ಪ್ರಾತಿನಿಧಿಕ ಚಿತ್ರ

ಎಚ್​ಎಂಡಿ ಗ್ಲೋಬಲ್​​ನ ಹೊಸ ಸ್ಮಾರ್ಟ್​​ಫೋನ್ ಗುರುವಾರದಂದು ಭಾರತದಲ್ಲಿ ಮಾರಾಟ ಆರಂಭಿಸಲಿದೆ. ಮಾಧ್ಯಮಗಳ ವರದಿ ಪ್ರಕಾರ, ಅದು ಹೊಸ ನೋಕಿಯಾ ಸಿ20 ಎನ್ನಲಾಗುತ್ತಿದೆ. ಈ ಸ್ಮಾರ್ಟ್​​ಫೋನ್ ಬಗ್ಗೆ ಕಂಪೆನಿಯು ಹೆಚ್ಚಿನ ಮಾಹಿತಿಯನ್ನು ಬಹಿರಂಗ ಮಾಡಿಲ್ಲ. ನೋಕಿಯಾ C20 ಹಲವು ಸರ್ಟಿಫಿಕೇಷನ್ ವೆಬ್​ಸೈಟ್​​ಗಳಲ್ಲಿ ಕಂಡುಬಂದಿದೆ. ಈ ಆರಂಭಿಕ ಹಂತದ ಸ್ಮಾರ್ಟ್​​ಫೋನ್ ನೋಕಿಯಾ 1.X ಸರಣಿಗೆ ಪರ್ಯಾಯ ಆಗಲಿದೆ. ಸಂಗ್ರಹ ಸಾಮರ್ಥ್ಯದ ಆಧಾರದ ಮೇಲೆ ನಾಲ್ಕು ವೇರಿಯಂಟ್ ಹೊಂದಿರುವ ಸಾಧ್ಯತೆ ಇದೆ. ಇದಕ್ಕೆ ಬ್ಲ್ಯೂಟೂಥ್ SIG ಪ್ರಮಾಣಪತ್ರ ಸಿಕ್ಕಿದ್ದು, ಇದರರ್ಥ ಏನೆಂದರೆ ಈ ಫೋನ್ ಯುನಿಸಾಕ್ ಪ್ರೊಸೆಸರ್ ಜತೆಗೆ ಬರಲಿದೆ.

ನೋಕಿಯಾ ಸಿ20 ವೈಶಿಷ್ಟ್ಯಗಳು
ಎಚ್​ಎಂಡಿ ಗ್ಲೋಬಲ್​ನಿಂದ ಫೋನ್ ಬಗ್ಗೆ ಹೆಚ್ಚಿನ ಮಾಹಿತಿ ಬಹಿರಂಗ ಮಾಡಿಲ್ಲ. ಆದರೆ ಸೋರಿಕೆಯಾಗಿರುವ ಮಾಹಿತಿ ಪ್ರಕಾರ, ಫೋನ್ 5.99 ಇಂಚಿನ ಎಲ್​ಸಿಡಿ ಐಪಿಎಸ್ ಡಿಸ್​ಪ್ಲೇ ಜತೆಗೆ ಪಿಕ್ಸೆಲ್ ಡೆನ್ಸಿಟಿ 269 ಪಿಪಿಐ ಹೊಂದಿರಲಿದೆ. ಇನ್ನು ಎರಡು ಸಿಮ್ (ನ್ಯಾನೋ) ಇರುವ ಸ್ಮಾರ್ಟ್​​ಫೋನ್ ಇದಾಗಿರಲಿದ್ದು, 4G ಸಪೋರ್ಟ್ ಮಾಡಲಿದೆ. ಆಂಡ್ರಾಯಿಡ್ 10ರಲ್ಲಿ ಕಾರ್ಯ ನಿರ್ವಹಿಸುವ ಈ ಫೋನ್​ನಲ್ಲಿ ಯುನಿಸಾಕ್ SC9863A ಪ್ರೊಸೆಸರ್ ಇರಲಿದೆ. ಇನ್ನು 1 GB RAM ಮತ್ತು ಆಂತರಿಕ ಸಂಗ್ರಹ ಸಾಮರ್ಥ್ಯ 16 GBಯನ್ನು ಹೊಂದಿದ್ದು, 128 GB ತನಕ ಹೆಚ್ಚಿಸಿಕೊಳ್ಳಬಹುದು.

ಕ್ಯಾಮೆರಾ ಬಗ್ಗೆ ಹೇಳುವುದಾದರೆ, ಈ ಸ್ಮಾರ್ಟ್​ಫೋನ್​ನಲ್ಲಿ 8ಎಂಪಿ ಪ್ರಾಥಮಿಕ ಕ್ಯಾಮೆರಾ ಇರಲಿದ್ದು, ಜತೆಗೆ ಎಲ್​ಇಡಿ ಫ್ಲ್ಯಾಷ್ ಮತ್ತು ಮುಂಭಾಗದಲ್ಲಿ 5ಎಂಪಿಯ ಸೆಲ್ಫಿ ಕ್ಯಾಮೆರಾ ಇರಲಿದೆ. ಈ ಫೋನ್​ನಲ್ಲಿ 3040 mAh ಬ್ಯಾಟರಿ ಇರಲಿದೆ. ಇದರ ಜತೆಗೆ ಮೈಕ್ರೋ- ಯುಎಸ್​ಬಿ ಪೋರ್ಟ್ ಹೊಂದಿರಲಿದೆ. ಎರಡು ಬಣ್ಣಗಳಲ್ಲಿ, ಕಪ್ಪು ಮತ್ತು ಚಿನ್ನದ ಬಣ್ಣದಲ್ಲಿ ಈ ಫೋನ್ ಬರಲಿದೆ. ಕನೆಕ್ಟಿವಿಟಿ ವಿಚಾರಕ್ಕೆ ಬಂದರೆ, ಯುಎಸ್​ಬಿ ಚಾರ್ಜಿಂಗ್, ಮೈಕ್ರೋ ಯುಎಸ್​ಬಿ 2.0, ಬ್ಲ್ಯೂಟೂಥ್ 4.2, ವೈಫೈ 802.11 ಇರಲಿದೆ. ಇವೆಲ್ಲದರ ಜತೆಗೆ 3.5 ಎಂಎಂ ಆಡಿಯೋ ಜಾಕ್ ಇರಲಿದೆ.

ಬೆಲೆ ಎಷ್ಟಿರಬಹುದು?
ನೋಕಿಯಾ ಸಿ20 ಆರಂಭಿಕ ಹಂತದ ಫೋನ್ ಆಗಿದ್ದು, ಬೆಲೆ ರೂ. 8000ಕ್ಕಿಂತ ಕಡಿಮೆ ಇರುವ ನಿರೀಕ್ಷೆ ಇದೆ. ನೋಕಿಯಾ ಸಿ20 ಹೊರತುಪಡಿಸಿ ಎಚ್​ಎಂಡಿ ಗ್ಲೋಬಲ್​ನಿಂದ ಇನ್ನಷ್ಟು ಫೋನ್​ಗಳನ್ನು ಘೊಷಣೆ ಮಾಡುವ ಸಾಧ್ಯತೆ ಇದೆ. ಹೊಸ ಸ್ಮಾರ್ಟ್​ಫೋನ್​ಗಳು ಎಕ್ಸ್- ಸರಣಿ ಮತ್ತು ಜಿ- ಸರಣಿಯದ್ದಾಗಿರಲಿದೆ. ಮುಂಬರುವ ಕಾರ್ಯಕ್ರಮದಲ್ಲಿ ನೋಕಿಯಾದಿಂದ ಜಿ10, ಜಿ20, ಎಕ್ಸ್​20 ಮತ್ತು ಎಕ್ಸ್​10 ಬಿಡುಗಡೆ ಆಗುವ ಸಾಧ್ಯತೆ ಇದೆ. ನೋಕಿಯಾ ಜಿ10ಗೆ ಮೀಡಿಯಾಟೆಕ್ ಹೀಲಿಯೋ ಪಿ22 ಪ್ರೊಸೆಸರ್ ಹೊಂದಿರುವ ಸಾಧ್ಯತೆ ಇದೆ.

ಈ ಎರಡು ಸ್ಮಾರ್ಟ್​ಫೋನ್​ಗಳು 3ಜಿಬಿ/4ಜಿಬಿ ಮತ್ತು 32ಜಿಬಿ/64ಜಿಬಿ RAM ಸಂಗ್ರಹದೊಂದಿಗೆ ಬರುವ ಸಾಧ್ಯತೆ ಇದೆ. ಈ ಫೋನ್​ಗಳಲ್ಲಿ ಆಂಡ್ರಾಯಿಡ್ 11 ಇರುವ ನಿರೀಕ್ಷೆ ಇದ್ದು, ಗೂಗಲ್ ಅಸಿಸ್ಟೆಂಟ್​ಗೆ ಬಟನ್ ಇರುವ ಮಾಹಿತಿ ಇದೆ.

ಇದನ್ನೂ ಓದಿ: Partnered: ರೂ. 10 ಸಾವಿರದೊಳಗೆ ಸ್ಯಾಮ್ಸಂಗ್ ಗ್ಯಾಲಕ್ಸಿ ಎಫ್​12 ಟ್ರೂ 48MP ಕ್ವಾಡ್ ಕ್ಯಾಮೆರಾ ಸ್ಮಾರ್ಟ್ ಫೋನ್

(HMD global will launch Nokia C20 entry-level smartphone in India on Thursday.)