Vidura Niti : ಮನುಷ್ಯನ ಈ ಕೆಟ್ಟ ಗುಣಗಳೇ ದುಃಖಕ್ಕೆ ಮೂಲ ಕಾರಣ ಎನ್ನುತ್ತಾನೆ ವಿದುರ

ಸಂತೋಷ ಯಾರಿಗೆ ತಾನೇ ಬೇಡ ಹೇಳಿ. ಪ್ರತಿಯೊಬ್ಬನು ಕೂಡ ತನ್ನ ಜೀವನಮಾನವಿಡಿ ಖುಷಿ, ನೆಮ್ಮದಿ ಹಾಗೂ ಸಂತೋಷಕ್ಕಾಗಿ ಒದ್ದಾಡುತ್ತಾನೆ. ಆದರೆ ಈ ದುಃಖವೆನ್ನುವುದು ಹೇಳದೇನೇ ಬರುತ್ತದೆ. ಕೆಲವೊಮ್ಮೆ ಮನುಷ್ಯನ ಈ ಕೆಲವು ಗುಣಗಳು ದುಃಖಕ್ಕೆ ಕಾರಣವಾಗುತ್ತದೆ ಎನ್ನುತ್ತಾನೆ ವಿದುರ. ತನ್ನ ನೀತಿಯಲ್ಲಿ ಮನುಷ್ಯನು ಈ ಗುಣಗಳನ್ನು ತನ್ನ ಬದುಕಿನಲ್ಲಿ ಅಳವಡಿಸಿಕೊಂಡರೆ ಖುಷಿಗಿಂತ ದುಃಖವೇ ತುಂಬಿರುತ್ತದೆ. ಅದರಲ್ಲೇ ಕೊನೆಯವರೆಗೂ ಜೀವಿಸಬೇಕಾಗುತ್ತದೆ. ಹೀಗಾಗಿ ಈ ಕೆಟ್ಟ ಗುಣಗಳನ್ನು ತ್ಯಜಿಸುವುದೇ ಉತ್ತಮ ಎನ್ನುವ ಸಲಹೆಯನ್ನು ನೀಡಿದ್ದಾನೆ ವಿದುರ.

ಅಸೂಯೆ ಪಡುವವರು:

ಯಾವಾಗಲೂ ಇತರರನ್ನು ಕಂಡು ಅಸೂಯೆಪಡುವ ವ್ಯಕ್ತಿಯೂ ಜೀವನದಲ್ಲಿ ದುಃಖವನ್ನು ಅನುಭವಿಸುತ್ತಾನೆ. ಆತನಿಗೆ ಇನ್ನೊಬ್ಬರ ಸಂತೋಷವನ್ನು ಸಹಿಸಿಕೊಳ್ಳಲು ಆಗುವುದಿಲ್ಲ. ಹೀಗಾಗಿ ಆತನು ತನ್ನನ್ನು ಅವರಿಗಿಂತ ಕೀಳು ಎಂದು ಭಾವಿಸಿ ಅದರಲ್ಲೇ ಕೊರಗುತ್ತಾನೆ. ಆದರೆ ಎಲ್ಲರ ಮುಂದೆ ತಾನು ಕೂಡ ಯಾರಿಗೂ ಕಡಿಮೆಯಿಲ್ಲ ಇಲ್ಲ ಎಂದು ನಟಿಸುತ್ತಾನೆ, ಮನಸ್ಸಿನೊಳಗೆ ಸದಾ ನೋವನ್ನು ಪಟ್ಟುಕೊಳ್ಳುತ್ತಾನೆ.

ಇತರರ ಮೇಲೆ ಅವಲಂಬಿತನಾಗಿರುವವನು:

ಜೀವನದಲ್ಲಿ ಒಂಟಿಯಾಗಿ ಬದುಕಲು ಸಾಧ್ಯವಿಲ್ಲ. ಹೀಗಾಗಿ ಪ್ರತಿಯೊಬ್ಬರು ಒಂದಲ್ಲ ಒಂದು ಸಂದರ್ಭದಲ್ಲಿ ತನ್ನ ಮನೆಯ ಸದಸ್ಯರನ್ನು ಅವಲಂಬಿಸಿರುತ್ತಾರೆ. ಆದರೆ ವಿದುರನು ಹೇಳುವಂತೆ ಇತರರಿಗೆ ಸಂಪೂರ್ಣವಾಗಿ ಅಧೀನವಾಗಿರುವ ವ್ಯಕ್ತಿ ಅಥವಾ ಸದಾ ಇತರರ ಮೇಲೆ ಅವಲಂಬಿತನಾಗಿರುವ ವ್ಯಕ್ತಿಯೂ ತನ್ನ ಅಸ್ತಿತ್ವವನ್ನೇ ಕಳೆದುಕೊಂಡಿರುತ್ತಾರೆ. ಆತನು ತಾನೇ ಸ್ವಂತ ನಿರ್ಧಾರವನ್ನು ತೆಗೆದುಕೊಂಡು ಕೆಲಸ ಮಾಡಲು ಸಾಧ್ಯವಿಲ್ಲ. ಎಲ್ಲದಕ್ಕೂ ಇತರರ ಮೇಲೆ ಅವಲಂಬಿತನಾಗಿರುತ್ತಾನೆ. ತನ್ನ ಆತ್ಮೀಯರು ನಿರ್ಲಕ್ಷ್ಯ ವಹಿಸಿದರೆ ದುಃಖದಲ್ಲೇ ಮುಳುಗುತ್ತಾನೆ. ಹೀಗಾಗಿ ಈ ಗುಣವುಳ್ಳ ವ್ಯಕ್ತಿಯೂ ಜೀವನದಲ್ಲಿ ಖುಷಿಯ ಬದಲು ದುಃಖವನ್ನೇ ಅನುಭವಿಸುತ್ತಾನಂತೆ.

ಇತರರನ್ನು ದ್ವೇಷಿಸುವವನು:

ಈಗಿನ ಕಾಲದಲ್ಲಿ ಒಬ್ಬರನ್ನು ಕಂಡರೆ ಮತ್ತೊಬ್ಬರಿಗೆ ಆಗುವುದಿಲ್ಲ. ಕೆಲವರು ದ್ವೇಷವನ್ನೇ ಜೀವನದ ಭಾಗವಾಗಿಕೊಂಡು ಬಿಟ್ಟಿರುತ್ತಾರೆ. ಇತರರನ್ನು ದ್ವೇಷಿಸುವ ತನ್ನ ಸುತ್ತ ಮುತ್ತಲಿನವರ ಜೊತೆಗೆ ಕುಳಿತುಕೊಳ್ಳಲು ಹಾಗೂ ಅವರೊಂದಿಗೆ ಬೆರೆಯಲು ಇಷ್ಟ ಪಡುವುದಿಲ್ಲ. ಎಲ್ಲರನ್ನು ತನಗಿಂತ ಕೀಳು ಹಾಗೂ ತಾನು ಮಾತ್ರ ಮೇಲು ಎನ್ನುವ ಭಾವನೆಯಿರುತ್ತದೆ. ಈ ವ್ಯಕ್ತಿಯೂ ತನ್ನ ಜೀವನದಲ್ಲಿ ಖುಷಿಯನ್ನು ಕಾಣುವುದಿಲ್ಲ, ಸದಾ ದುಃಖದಲ್ಲೇ ಮುಳುಗಿರುತ್ತಾನೆ.

ಅತೃಪ್ತನಾಗಿರುವವನು:

ಜೀವನದಲ್ಲಿ ತೃಪ್ತಿ ಎನ್ನುವುದು ಬಹಳ ಮುಖ್ಯ. ಆದರೆ ಕೆಲ ಜನರು ಜೀವನದಲ್ಲಿ ಎಷ್ಟೇ ಸಂಪಾದನೆ ಮಾಡಿದರೂ, ಎಲ್ಲಾ ಸಿಕ್ಕಿದರೂ ಕೂಡ ತೃಪ್ತಿ ಅನ್ನೋದೇ ಇರಲ್ಲ. ಕೆಲ ವ್ಯಕ್ತಿಗಳಲ್ಲಿ ಅತೃಪ್ತ ಭಾವನೆಯಿರುತ್ತದೆ. ತನ್ನ ಸುತ್ತಲಿನ ವ್ಯಕ್ತಿಗಳು ತನ್ನ ಬಳಿ ಎಲ್ಲಾ ಇದ್ದರೂ ಕೂಡ ಬೇರೆಯವರನ್ನು ನೋಡಿ ದುಃಖಿಸುತ್ತಾನೆ. ಇಂತಹ ವ್ಯಕ್ತಿಗಳು ಜೀವನದಲ್ಲಿ ಎಷ್ಟೇ ಇದ್ದರೂ ಸಂತೋಷವಾಗಿರಲು ಸಾಧ್ಯವಿಲ್ಲ. ಅತೃಪ್ತ ಭಾವನೆಯಿಂದ ದುಃಖ ನೋವಿನಿಂದಲೇ ಜೀವನ ಕಳೆಯುತ್ತಾರೆ ಎಂದು ಹೇಳುತ್ತಾನೆ ವಿದುರ.

ಇದನ್ನೂ ಓದಿ: ಟೂತ್ ಪೇಸ್ಟ್ ಟ್ಯೂಬ್ ಹಿಂಡುವ ರೀತಿಯೇ ನಿಮ್ಮ ವ್ಯಕ್ತಿತ್ವ ಬಿಚ್ಚಿಡುತ್ತೆ

ಕೋಪಿಸಿಕೊಳ್ಳುವ ವ್ಯಕ್ತಿ:

ಕೋಪ ಯಾರಿಗೆ ತಾನೇ ಬರಲ್ಲ ಹೇಳಿ. ಆದರೆ ತನ್ನ ಜೀವನದಲ್ಲಿ ನಕಾರಾತ್ಮಕ ಭಾವನೆಗಳನ್ನು ಹೊಂದಿರುವ ವ್ಯಕ್ತಿಯೂ ಯಾವ ಕೆಲಸದಲ್ಲಿಯೂ ಕೂಡ ತೃಪ್ತನಾಗುವುದಿಲ್ಲ. ಹೀಗಾಗಿ ಚಿಕ್ಕ ಚಿಕ್ಕ ವಿಷಯಗಳಿಗೂ ಕೋಪಿಸಿಕೊಳ್ಳುತ್ತಾ ತನ್ನ ಮನಸ್ಸನ್ನೇ ಹಾಳು ಮಾಡಿಕೊಳ್ಳುತ್ತಾನೆ. ಈ ವ್ಯಕ್ತಿಯೂ ಜೀವನದಲ್ಲಿ ಖುಷಿಯನ್ನು ಕಾಣೋದು ಕಡಿಮೆ. ಕೋಪದ ಗುಣದಿಂದ ಜೀವನದಲ್ಲಿ ದುಃಖವೇ ತುಂಬಿರುತ್ತದೆ.

ಅನುಮಾನಿಸುವ ವ್ಯಕ್ತಿ:

ಕೆಲ ವ್ಯಕ್ತಿಗಳು ಜೀವನದಲ್ಲಿ ಇತರರನ್ನು ಅನುಮಾನಿಸುತ್ತಲೇ ಇರುತ್ತಾರೆ. ತನ್ನ ಜೊತೆಗೆ ಇರುವ ವ್ಯಕ್ತಿಯೂ ಏನು ಕೆಲಸ ಮಾಡಿದರೂ ಕೂಡ ಸಮಾಧಾನವಿರುವುದಿಲ್ಲ. ಅದರಲ್ಲೇ ತಪ್ಪು ಕಂಡು ಹಿಡಿಯುವುದು, ಚುಚ್ಚಿ ಮಾತನಾಡುವ ಮೂಲಕ ಅವಮಾನಿಸುವುದನ್ನೇ ಪ್ರವೃತ್ತಿಯಾಗಿ ಮಾಡಿಕೊಂಡಿರುತ್ತಾರೆ. ಈ ಗುಣವಿರುವ ವ್ಯಕ್ತಿಗಳು ಜೀವನದಲ್ಲಿ ಎಂದಿಗೂ ಖುಷಿಯಾಗಿರಲ್ಲ, ಇವರ ಜೀವನದಲ್ಲಿ ಸದಾ ದುಃಖವೇ ತುಂಬಿರುತ್ತದೆ ಎಂದಿದ್ದಾನೆ ವಿದುರ.

ಜೀವನಶೈಲಿ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ

Published On - 9:44 am, Sat, 18 January 25