ತಮಿಳುನಾಡು ಸೇನಾ ಕಾಪ್ಟರ್​ ದುರಂತದಲ್ಲಿ ಮೃತಪಟ್ಟ ಬ್ರಿಗೇಡಿಯರ್​ ಲಿಡ್ಡರ್​ ಕುಟುಂಬಕ್ಕೆ 50 ಲಕ್ಷ ರೂ.ನೆರವು; ಮನೆಯಲ್ಲಿ ಒಬ್ಬರಿಗೆ ಸರ್ಕಾರಿ ಉದ್ಯೋಗ

ತಮಿಳುನಾಡು ಸೇನಾ ಕಾಪ್ಟರ್​ ದುರಂತದಲ್ಲಿ ಮೃತಪಟ್ಟ ಬ್ರಿಗೇಡಿಯರ್​ ಲಿಡ್ಡರ್​ ಕುಟುಂಬಕ್ಕೆ 50 ಲಕ್ಷ ರೂ.ನೆರವು; ಮನೆಯಲ್ಲಿ ಒಬ್ಬರಿಗೆ ಸರ್ಕಾರಿ ಉದ್ಯೋಗ
ಬ್ರಿಗೇಡಿಯರ್​ ಲಿಡ್ಡರ್​ ಕುಟುಂಬ

ಡಿಸೆಂಬರ್​ ತಿಂಗಳಲ್ಲಿ ತಮಿಳುನಾಡಿನಲ್ಲಿ ನಡೆದ ಸೇನಾ ವಿಮಾನ ಅಪಘಾತದಲ್ಲಿ (Army Helicopter Crash) ಮೃತಪಟ್ಟ ಬ್ರಿಗೇಡಿಯರ್​ ಎಲ್​.ಎಸ್​.ಲಿಡ್ಡರ್ (Brigadier Lidder)​ ಕುಟುಂಬಕ್ಕೆ 50 ಲಕ್ಷ ರೂಪಾಯಿ ಆರ್ಥಿಕ ನೆರವು ನೀಡಲು ಸರ್ಕಾರದಿಂದ ಅನುಮೋದನೆ ನೀಡಲಾಗಿದೆ ಎಂದು ಹರ್ಯಾಣ ಮುಖ್ಯಮಂತ್ರಿ ಮನೋಹರ್ ಲಾಲ್​ ಖಟ್ಟರ್​ ಹೇಳಿದ್ದಾರೆ. ಕುಟುಂಬಕ್ಕೆ 50 ಲಕ್ಷ ರೂಪಾಯಿ ಆರ್ಥಿಕ ನೆರವು ನೀಡುವ ಜತೆ, ಅವರ ಕುಟುಂಬದ ಒಬ್ಬರಿಗೆ ಸರ್ಕಾರಿ ಕೆಲಸ ನೀಡಲಾಗುವುದು ಎಂದೂ ಮಾಹಿತಿ ನೀಡಿದ್ದಾರೆ. ಹಾಗೇ, ಬ್ರಿಗೇಡಿಯರ್​ ಲಿಡ್ಡರ್​ ಅಕಾಲಿಕ ನಿಧನದಿಂದ ಅವರ ಕುಟುಂಬ ಮತ್ತು ದೇಶಕ್ಕೆ ದೊಡ್ಡ ನಷ್ಟವಾಗಿದೆ ಎಂದು ಹೇಳಿದ್ದಾರೆ. ಸೈನಿಕ್ ಮತ್ತು ಅರ್ಧ ಸೈನಿಕ್​ ಬಲ್​​ ಆರ್ಥಿಕ ನೆರವು ನೀತಿಯಡಿ, ಮೃತ ಲಿಡ್ಡರ್​ ಕುಟುಂಬಕ್ಕೆ ಹಣಕಾಸು ನೆರವು ಮತ್ತು ಸರ್ಕಾರಿ ಉದ್ಯೋಗ ನೀಡಲಾಗುವುದು. ಈ ನೀತಿಯಡಿ ಬ್ರಿಗೇಡಿಯರ್​ ಲಿಡ್ಡರ್​ ಅವರು ತಾತ್ಕಾಲಿಕ ಯುದ್ಧದ ಕಾರಣದಿಂದ ಮೃತಪಟ್ಟಿದ್ದಾರೆ ಎಂದೇ ಪರಿಗಣಿಸಲಾಗಿದೆ ಎಂದು ಮುಖ್ಯಮಂತ್ರಿ ಹೇಳಿದ್ದಾರೆ.

ಲಿಡ್ಡರ್​ ಅವರು ಹರ್ಯಾಣದ ಪಂಚಕುಲಾ ನಿವಾಸಿ. ಡಿಸೆಂಬರ್​ 8ರಂದು ತಮಿಳುನಾಡಿನ ಕೂನೂರು ಬಳಿ ಭಾರತೀಯ ವಾಯುಪಡೆ ಹೆಲಿಕಾಪ್ಟರ್​ ಪತನವಾಗಿ ಮೃತಪಟ್ಟ 14 ಮಂದಿಯಲ್ಲಿ ಇವರೂ ಒಬ್ಬರು. ಈ ಸೇನಾ ವಿಮಾನ ದುರಂತದಲ್ಲಿ ಭಾರತದ ಪ್ರಥಮ ಸಿಡಿಎಸ್​ ಬಿಪಿನ್​ ಜನರಲ್​ ರಾವತ್​ ಮತ್ತು ಅವರ ಪತ್ನಿ ಮಧುಲಿಕಾ ರಾವತ್​ ಕೂಡ ಮೃತಪಟ್ಟಿದ್ದಾರೆ. ಅಂದು ನಡೆದ ಅಪಘಾತದ ತನಿಖೆಯನ್ನು ಭಾರತೀಯ ಸೇನೆಯ ಮೂರು ವಲಯಗಳ ಮುಖ್ಯ ಅಧಿಕಾರಿಗಳನ್ನೊಳಗೊಂಡ ಸಮಿತಿ ನಡೆಸಿತ್ತು. ಅದರ ವರದಿ ಹೊರಬಿದ್ದಿದ್ದು, ಸೇನಾ ಹೆಲಿಕಾಪ್ಟರ್​ ದುರಂತಕ್ಕೆ ತಾಂತ್ರಿಕ ದೋಷ ಕಾರಣವಲ್ಲ. ಮೋಡ ಅಡ್ಡಬಂದು, ಹವಾಮಾನದಲ್ಲಿ ಆಕಸ್ಮಿಕವಾಗಿ ಆದ ಬದಲಾವಣೆಯೇ ಮುಖ್ಯ ಕಾರಣ ಎಂದು ಹೇಳಲಾಗಿದೆ. ಆದರೆ ಅಂದು ಸಿಡಿಎಸ್​ ರಾವತ್​ ಮತ್ತು ಇತರ 13 ಅಧಿಕಾರಿಗಳ ಸಾವು ದೇಶಕ್ಕೇ ಶಾಕ್​ ನೀಡಿತ್ತು.

ತಮಿಳುನಾಡಿನ ವೆಲ್ಲಿಂಗ್ಟನ್​​ನಲ್ಲಿರುವ ಮಿಲಿಟರಿ ಕಾಲೇಜಿನಲ್ಲಿ ಉಪನ್ಯಾಸ ನೀಡಲು ಜನರಲ್​ ಬಿಪಿನ್​ ರಾವತ್​ ತೆರಳುತ್ತಿದ್ದರು. ಅವರೊಂದಿಗೆ ಪತ್ನಿ ಮಧುಲಿಕಾ ಸೇರಿ ಸೇನೆಯ ಇತರ ಉನ್ನತ ಅಧಿಕಾರಿಗಳು ಇದ್ದರು. ಆದರೆ ಕೂನೂರಿನ ಬಳಿಯ ನೀಲಗಿರಿ ಅರಣ್ಯದಲ್ಲಿ ಹೆಲಿಕಾಪ್ಟರ್​ ಪತನಗೊಂಡು ಸ್ಫೋಟಗೊಂಡಿತ್ತು. ಅಂದು ವಾಯುಸೇನೆ ಗ್ರೂಪ್​ ಕ್ಯಾಪ್ಟನ್​ ವರುಣ್​ ಸಿಂಗ್​ ಒಬ್ಬರು ಬದುಕುಳಿದಿದ್ದರು. ಆದರೆ ಅವರೂ ಕೂಡ ಡಿಸೆಂಬರ್​ 15ರಂದು ಮೃತಪಟ್ಟಿದ್ದಾರೆ. ಈ ಮೂಲಕ ಅಂದು ಸೇನಾ ಹೆಲಿಕಾಪ್ಟರ್​​ನಲ್ಲಿದ್ದ 14 ಜನರೂ ಮೃತಪಟ್ಟಿದ್ದರು.

ಇದನ್ನೂ ಓದಿ: ಕಾಟನ್ ಮಾರುಕಟ್ಟೆಯನ್ನು ಲೀಜ್​ದಾರರಿಗೆ ಮಾರಾಟ ಮಾಡಲು ನಗರಸಭೆ ತೀರ್ಮಾನ; ಸಬ್ ಲೀಜ್​ದಾರರ ಕಡೆಗಣನೆ ಆಕ್ರೋಶ

Published On - 9:01 am, Sat, 15 January 22

Click on your DTH Provider to Add TV9 Kannada