ದೇಶದಲ್ಲಿ ಹೆಚ್ಚಿದ ವಾರ್ಷಿಕ ಅಂತರ್ಜಲ ಮರುಪೂರಣ: ವರದಿ ಬಿಡುಗಡೆ ಮಾಡಿದ ಕೇಂದ್ರ ಜಲ ಶಕ್ತಿ ಸಚಿವ ಶೇಖಾವತ್

ನವದೆಹಲಿ, ಡಿಸೆಂಬರ್ 1: ದೇಶದಲ್ಲಿ ವಾರ್ಷಿಕ ಅಂತರ್ಜಲ ಮರುಪೂರಣ ಹೆಚ್ಚಾಗಿರುವುದು ಕೇಂದ್ರ ಸರ್ಕಾರ ಬಿಡುಗಡೆ ಮಾಡಿದ ‘ಸಕ್ರಿಯ ಅಂತರ್ಜಲ ಸಂಪನ್ಮೂಲಗಳ ಮೌಲ್ಯಮಾಪನ (Dynamic Ground Water Resource Assessment Report 2023) ವರದಿ’ಯಿಂದ ತಿಳಿದುಬಂದಿದೆ. ಕೇಂದ್ರ ಜಲ ಶಕ್ತಿ ಸಚಿವ ಗಜೇಂದ್ರ ಸಿಂಗ್ ಶೇಖಾವತ್ (Gajendra Singh Shekhawat) ಅವರು ಶುಕ್ರವಾರ ವರದಿ ಬಿಡುಗಡೆ ಮಾಡಿದರು. ಈ ವರದಿಯನ್ನು ಕೇಂದ್ರೀಯ ಅಂತರ್ಜಲ ಮಂಡಳಿ (CGWB) ಮತ್ತು ರಾಜ್ಯಗಳು, ಕೇಂದ್ರಾಡಳಿತ ಪ್ರದೇಶಗಳು ಜಂಟಿಯಾಗಿ ನಡೆಸಿದ ಮೌಲ್ಯಮಾಪನದಿಂದ ಸಿದ್ಧಪಡಿಸಲಾಗಿದೆ.

2023 ರ ಮೌಲ್ಯಮಾಪನ ವರದಿಯ ಪ್ರಕಾರ, ಇಡೀ ದೇಶಕ್ಕೆ ಒಟ್ಟು ವಾರ್ಷಿಕ ಅಂತರ್ಜಲ ಮರುಪೂರಣವು 449.08 ಶತಕೋಟಿ ಘನ ಮೀಟರ್ (BCM / ಬಿಲಿಯನ್ ಕ್ಯೂಬಿಕ್ ಮೀಟರ್) ಆಗಿದೆ. ಇದು ಹಿಂದಿನ ವರ್ಷಕ್ಕೆ (2022) ಹೋಲಿಸಿದರೆ 11.48 ಬಿಸಿಎಂ ಹೆಚ್ಚಳವನ್ನು ತೋರಿಸಿದೆ. ಇಡೀ ದೇಶದಲ್ಲಿ ವಾರ್ಷಿಕ ಅಂತರ್ಜಲ ಹೊರತೆಗೆಯುವಿಕೆ 241.34 ಬಿಸಿಎಂ ಆಗಿದೆ. ಇದಲ್ಲದೆ, ದೇಶದಲ್ಲಿ ಒಟ್ಟು 6,553 ಮೌಲ್ಯಮಾಪನ ಘಟಕಗಳಲ್ಲಿ, 736 ಘಟಕಗಳನ್ನು ‘ಅತಿಯಾಗಿ ಬಳಸಿಕೊಳ್ಳುವ’ ಘಟಕಗಳಾಗಿ ವರ್ಗೀಕರಿಸಲಾಗಿದೆ ಎಂದು ವರದಿಯ ಬಗ್ಗೆ ಜಲಶಕ್ತಿ ಸಚಿವಾಲಯದ ಪ್ರಕಟಣೆ ತಿಳಿಸಿದೆ.

ಮೌಲ್ಯಮಾಪನದಿಂದ ಸಂಗ್ರಹಿಸಿದ ಮಾಹಿತಿಯ ವಿವರವಾದ ವಿಶ್ಲೇಷಣೆಯು ಅಂತರ್ಜಲ ಮರುಪೂರಣದಲ್ಲಿ ಹೆಚ್ಚಳವನ್ನು ತೋರಿಸಿದೆ. ಇದು ಮುಖ್ಯವಾಗಿ ಕಾಲುವೆಯ ಸೋರಿಕೆಯಿಂದ ಮರುಪೂರಣ ಹೆಚ್ಚಳ, ನೀರಾವರಿ ನೀರಿನ ಹರಿವುಗಳನ್ನು ಹಿಂತೆಗೆದುಕೊಳ್ಳುವುದು ಮತ್ತು ಜಲಮೂಲಗಳು, ತೊಟ್ಟಿಗಳು ಮತ್ತು ಜಲಸಂರಕ್ಷಣಾ ರಚನೆಗಳಿಂದ ಮರುಪೂರಣಗೊಳಿಸುವಿಕೆಗೆ ಕಾರಣವಾಗಿದೆ. ಇಷ್ಟೇ ಅಲ್ಲದೆ, ಈ ವರ್ಷದ ವಿಶ್ಲೇಷಣೆಯು 2022 ರ ಮೌಲ್ಯಮಾಪನ ದತ್ತಾಂಶಕ್ಕೆ ಹೋಲಿಸಿದರೆ ದೇಶದಲ್ಲಿ 226 ಮೌಲ್ಯಮಾಪನ ಘಟಕಗಳಲ್ಲಿ ಅಂತರ್ಜಲ ಸ್ಥಿತಿಯಲ್ಲಿ ಸುಧಾರಣೆಯನ್ನು ತೋರಿಸಿದೆ. ಇದಲ್ಲದೆ, ಅತಿಯಾದ ಬಳಕೆಯ ಘಟಕಗಳ ಸಂಖ್ಯೆಯಲ್ಲಿ ಒಟ್ಟಾರೆ ಕಡಿತ ಮತ್ತು ಅಂತರ್ಜಲ ಶೋಷಣೆಯ ಮಟ್ಟದಲ್ಲಿನ ಕಡಿತವನ್ನು ಸಹ ಗಮನಿಸಲಾಗಿದೆ ಎಂದು ವರದಿ ತಿಳಿಸಿದೆ.

ಇದನ್ನೂ ಓದಿ: ಇಸ್ರೇಲ್-ಪ್ಯಾಲೆಸ್ತೀನ್ ಸಂಘರ್ಷ; ತ್ವರಿತ ಮತ್ತು ಸಶಕ್ತ ನಿರ್ಣಯ ಬೆಂಬಲಿಸುವುದಾಗಿ ಹೇಳಿದ ಭಾರತ

ವರದಿ ಬಿಡುಗಡೆಯ ಸಂದರ್ಭದಲ್ಲಿ ಜಲಶಕ್ತಿ ಸಚಿವಾಲಯದ ಜಲಸಂಪನ್ಮೂಲ, ನದಿ ಅಭಿವೃದ್ಧಿ ಮತ್ತು ಗಂಗಾ ಪುನರುಜ್ಜೀವನ ಇಲಾಖೆಯ ಕಾರ್ಯದರ್ಶಿ ದೇಬಶ್ರೀ ಮುಖರ್ಜಿ, ಕುಡಿಯುವ ನೀರು ಮತ್ತು ನೈರ್ಮಲ್ಯ ಇಲಾಖೆ ಕಾರ್ಯದರ್ಶಿ ವಿನಿ ಮಹಾಜನ್, ಜಲ ಶಕ್ತಿ ಸಚಿವಾಲಯದ ಜಂಟಿ ಕಾರ್ಯದರ್ಶಿ (ಆಡಳಿತ, IC&GW) ಸುಬೋಧ್ ಯಾದವ್ ಮತ್ತಿತರರು ಉಪಸ್ಥಿತರಿದ್ದರು ಎಂದು ಸಚಿವಾಲಯ ತಿಳಿಸಿದೆ.

ಮತ್ತಷ್ಟು ವಿದೇಶ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ