ಭಾರತದಲ್ಲಿ ಕೊರೊನಾ ಲಸಿಕೆ 3ನೇ ಡೋಸ್​ಗಾಗಿ ಕಾರ್ಬೆವ್ಯಾಕ್ಸ್​ ಬಳಕೆ?-3ನೇ ಹಂತದ ಕ್ಲಿನಕಲ್​ ಪ್ರಯೋಗಕ್ಕೆ ಡಿಸಿಜಿಐ ಅನುಮೋದನೆ

ದೇಶದಲ್ಲಿ ಜನವರಿ 10ರಿಂದ ಆಯ್ದ ವರ್ಗದ ಜನರಿಗೆ ಕೊರೊನಾ ಲಸಿಕೆ ಬೂಸ್ಟರ್ ಡೋಸ್​  ನೀಡುವುದಾಗಿ ಪ್ರಧಾನಿ ಮೋದಿ ಘೋಷಣೆ ಮಾಡಿದ ಬೆನ್ನಲ್ಲೆ, ಅದಕ್ಕೆ ಸಂಬಂಧಪಟ್ಟ ಪ್ರಕ್ರಿಯೆಗಳು ಪ್ರಾರಂಭವಾಗಿವೆ. ಜ.10ರಿಂದ ಆರೋಗ್ಯ ಕಾರ್ಯಕರ್ತರು ಮತ್ತು 60 ವರ್ಷ ಮೇಲ್ಪಟ್ಟು ಇತರ ರೋಗಗಳಿಂದ ಬಳಲುತ್ತಿರುವವರಿಗೆ ಕೊಡಲಾಗುವ ಮೂರನೇ ಡೋಸ್​ ಲಸಿಕೆ, ಇಷ್ಟು ದಿನ ಕೊಟ್ಟ ಕೊವಿಶೀಲ್ಡ್​ ಮತ್ತು ಕೊವ್ಯಾಕ್ಸಿನ್​ ಆಗಿರುವುದಿಲ್ಲ ಎಂದೂ ಸ್ಪಷ್ಟಪಡಿಸಲಾಗಿದೆ. ಆದರೆ ಬೂಸ್ಟರ್​ ಡೋಸ್ ಆಗಿ ಯಾವ ಲಸಿಕೆಯನ್ನು ನೀಡಲಾಗುತ್ತದೆ ಎಂಬ ಬಗ್ಗೆ ಇನ್ನೂ ಕೇಂದ್ರ ಸರ್ಕಾರ ಮಾಹಿತಿ ಇಲ್ಲ. ಹೀಗಿರುವಾಗ ಇತ್ತೀಚೆಗಷ್ಟೇ ಭಾರತದಲ್ಲಿ ತುರ್ತು ಬಳಕೆಗೆ ಕೇಂದ್ರ ಆರೋಗ್ಯ ಇಲಾಖೆಯಿಂದ ಅನುಮೋದನೆ ಪಡೆದ, ಕಾರ್ಬೆವ್ಯಾಕ್ಸ್ (Corbevax-ಸ್ವದೇಶಿ ಲಸಿಕೆ) ಲಸಿಕೆಯನ್ನು 3 ನೇ ಡೋಸ್ ಆಗಿ ಬಳಸುವ ಸಂಬಂಧ 3ನೇ ಹಂತದ ಕ್ಲಿನಿಕಲ್​ ಟ್ರಯಲ್​ ನಡೆಸುವಂತೆ, ಅದರ ತಯಾರಿಕಾ ಕಂಪನಿ  ಹೈದರಾಬಾದ್ ಮೂಲದ ಬಯೋಲಾಜಿಕಲ್​ ಇ ಗೆ  ಭಾರತೀಯ ಔಷಧ ನಿಯಂತ್ರಣಾ ಪ್ರಾಧಿಕಾರ (DCGI-Drug Controller General of India) ತಿಳಿಸಿದೆ. 

ಕಾರ್ಬೆವ್ಯಾಕ್ಸ್ ಲಸಿಕೆ ಬಗ್ಗೆ ವಿಸ್ತೃತ ಪರಿಶೀಲನೆ ಮತ್ತು ಚರ್ಚೆಯ ಬಳಿಕ ಕೊವಿಡ್​ 19 ವಿಷಯ ತಜ್ಞರ ಸಮಿತಿ, ಈ ವ್ಯಾಕ್ಸಿನ್​ ಮೂರನೇ ಹಂತದ ಕ್ಲಿನಿಕಲ್​  ಟ್ರಯಲ್​ಗೆ ಅನುಮೋದನೆ ನೀಡುವಂತೆ ಶಿಫಾರಸ್ಸು ಮಾಡಿತ್ತು ಎಂದು ಮೂಲಗಳು ತಿಳಿಸಿವೆ. ಬಯಾಲಾಜಿಕಲ್​ ಇ ಕಂಪನಿ ಕಾರ್ಬೆವ್ಯಾಕ್ಸ್ ಲಸಿಕೆ ಸಂಬಂಧ ನೀಡಿದ್ದ ಡಾಟಾಗಳನ್ನು ಪರಿಶೀಲಿಸಲು ವಿಷಯ ತಜ್ಞರ ಸಮಿತಿ ಡಿಸೆಂಬರ್​ 10ರಂದು ಸಭೆ ನಡೆಸಿತ್ತು. ಅದಾದ ಬಳಿಕ ಮೂರನೇ ಡೋಸ್​ ಘೋಷಣೆ ನಂತರ ಮತ್ತೊಮ್ಮೆ ಈ ಕಂಪನಿ ಪರಿಷ್ಕೃತ ಡಾಟಾವನ್ನು ಸಲ್ಲಿಸಿ, ಕಾರ್ಬೆವ್ಯಾಕ್ಸ್ ಮೂರನೇ ಹಂತದ ಪ್ರಯೋಗ ನಡೆಸಲು ಮನವಿ ಮಾಡಿತ್ತು. ಇದೀಗ 3ನೇ ಡೋಸ್​​ ಆಗಿ ಬಳಸಬಹುದಾ ಎಂಬುದನ್ನು ಪರಿಶೀಲಿಸಲು ಮೂರನೇ ಹಂತದ ಕ್ಲಿನಿಕಲ್​ ಪ್ರಯೋಗಕ್ಕೆ ಡಿಸಿಜಿಐ ಅನುಮೋದನೆ ಸಿಕ್ಕಿದೆ.

ಕೊವಿಶೀಲ್ಡ್​, ಕೊವ್ಯಾಕ್ಸಿನ್​ಗಳಂತೆ ಇದೂ ಕೂಡ ಭಾರತದಲ್ಲೇ ತಯಾರಾದ ಲಸಿಕೆ. ಆದರೆ ಇದು ಭಾರತದ ಮೊದಲ ಪ್ರೊಟಿನ್​ ಉಪಘಟಕ ಲಸಿಕೆಯಾಗಿದೆ. ಭಾರತದಲ್ಲಿ ತುರ್ತು ಬಳಕೆಗೆ ಅನುಮೋದನೆ ಸಿಕ್ಕ ಬೆನ್ನಲ್ಲೇ , ಬಯಾಲಾಜಿಕಲ್ ಇ ಕಂಪನಿ, ಜಾಗತಿಕವಾಗಿಯೂ 1 ಬಿಲಿಯನ್ ಡೋಸ್​ಗಳ ಪೂರೈಕೆಗೆ ಯೋಜನೆ ರೂಪಿಸಿಕೊಂಡಿದೆ ಎನ್ನಲಾಗಿದೆ. ಇದೂ ಸಹ ಎರಡು ಡೋಸ್​ಗಳ ಲಸಿಕೆಯೇ ಆಗಿದೆ. ಇನ್ನು ಜನವರಿ 10ರಿಂದ ಬೂಸ್ಟರ್ ಡೋಸ್​ಗಳನ್ನು ನೀಡಲು ಕೇಂದ್ರ ಸರ್ಕಾರ ನಿರ್ಧಾರ ಮಾಡಿದ್ದು, ಎರಡನೇ ಡೋಸ್​ ಪಡೆದು 9 ತಿಂಗಳು ಕಳೆದ ಅರ್ಹ ಫಲಾನುಭವಿಗಳು ಮೂರನೇ ಡೋಸ್ ಪಡೆಯಬಹುದಾಗಿದೆ.

ಇದನ್ನೂ ಓದಿ: ಹೊಸ ವರ್ಷಕ್ಕೆ ಗೋವಾದಲ್ಲಿ ಪಾರ್ಟಿ ಮಾಡೋ ಪ್ಲಾನ್ ಇದೆಯಾ?; ಹೊಸ ಕೊವಿಡ್ ನಿಯಮಗಳು ಹೀಗಿವೆ