ಕೂದಲು ಉದುರಿಹೋಯ್ತು, ಈಗ ಉಗುರುಗಳನ್ನು ಕಳೆದುಕೊಳ್ಳುತ್ತಿದ್ದಾರೆ ಈ ಜಿಲ್ಲೆಯ ಜನ, ನಿಗೂಢ ಕಾಯಿಲೆ

ಬುಲ್ದಾನಾ, ಏಪ್ರಿಲ್ 18: ಕೆಲವು ತಿಂಗಳ ಹಿಂದೆ ಮಹಾರಾಷ್ಟ್ರದ ಬುಲ್ದಾನಾ ಜಿಲ್ಲೆಯ ಜನರಲ್ಲಿ ಕೂದಲು ಉದುರುವಿಕೆ(Hairfall) ಸಮಸ್ಯೆ ಕಾಣಿಸಿಕೊಂಡಿತ್ತು. ಸುಮಾರು 18 ಹಳ್ಳಿಗಳ 200ಕ್ಕೂ ಹೆಚ್ಚು ಜನರಲ್ಲಿ ಈ ಸಮಸ್ಯೆ ಕಂಡುಬಂದಿತ್ತು. ಈಗ ಮತ್ತೊಂದು ಸಮಸ್ಯೆ ಎದುರಾಗಿದೆ. ಐಸಿಎಂಆರ್ ತಂಡವು ಈ ಹಳ್ಳಿಗಳನ್ನು ತಲುಪಿ ವಿಭಿನ್ನ ಮಾದರಿಗಳನ್ನು ಸಂಗ್ರಹಿಸಿತ್ತು. ಕೂದಲು ಉದುರುವಿಕೆ ಸಮಸ್ಯೆ ಪ್ರಾರಂಭವಾದ ಅದೇ ಹಳ್ಳಿಯಲ್ಲಿ, ಈಗ ಕೂದಲು ಉದುರಿದವರಲ್ಲಿ 10-12 ಜನರ ಉಗುರುಗಳಿಗೆ ಕೂಡ ಹಾನಿಯಾಗಿದೆ ಎನ್ನುವ ಮಾಹಿತಿ ಲಭ್ಯವಾಗಿದೆ.

ಉಗುರುಗಳು ಹಾನಿಗೊಳಗಾಗಿ ಉದುರಿ ಹೋಗುತ್ತಿರುವ ಬಗ್ಗೆ ಗ್ರಾಮಸ್ಥರು ಕಳವಳ ವ್ಯಕ್ತಪಡಿಸಿದ್ದಾರೆ. ಗ್ರಾಮದ ಮುಖ್ಯಸ್ಥರು ಜಿಲ್ಲಾಡಳಿತಕ್ಕೆ ಮಾಹಿತಿ ನೀಡಿದರು, ನಂತರ ಜಿಲ್ಲಾ ಆರೋಗ್ಯ ಇಲಾಖೆಯ ಕೆಲವು ನೌಕರರು ಅಲ್ಲಿಗೆ ತಲುಪಿ ರಕ್ತದ ಮಾದರಿಗಳನ್ನು ತೆಗೆದುಕೊಂಡು ಹೋಗಿದ್ದಾರೆ.

ದೇಹದಲ್ಲಿ ಸೆಲೆನಿಯಮ್ ಮಟ್ಟ ಹೆಚ್ಚಾಗುವುದೇ ಕೂದಲು ಮತ್ತು ಉಗುರು ಉದುರುವಿಕೆಗೆ ಕಾರಣ ಎಂದು ಆರೋಗ್ಯ ಅಧಿಕಾರಿಗಳು ಪ್ರಾಥಮಿಕ ತನಿಖೆಯಲ್ಲಿ ತಿಳಿಸಿದ್ದಾರೆ. ಕೂದಲು ಉದುರುವಿಕೆಯ ನಂತರ, ಉಗುರುಗಳಿಗೆ ಹಾನಿಯಾಗುವುದು ಆರೋಗ್ಯ ಇಲಾಖೆಗೆ ಮತ್ತೆ ಸವಾಲಾಗಿ ಪರಿಣಮಿಸಿದೆ.

ಮತ್ತಷ್ಟು ಓದಿ: ಕೂದಲು ಉದುರಿಸಿ ತಲೆ ಬೋಳು ಮಾಡುವ ಹೊಸ ವೈರಸ್​? ಮಹಾರಾಷ್ಟ್ರ ಜನರು ಹೈರಾಣ

ಕೂದಲು ಉದುರುವಿಕೆಯ ಸುದ್ದಿಯ ನಂತರ, ಐಸಿಎಂಆರ್ ತಂಡವು ಅಲ್ಲಿಗೆ ತಲುಪಿ ರೋಗಿಗಳ ಕೂದಲು ಮತ್ತು ಇತರ ಮಾದರಿಗಳನ್ನು ಪರೀಕ್ಷೆಗೆ ತೆಗೆದುಕೊಂಡಿತು, ಆದರೆ ಐಸಿಎಂಆರ್ ವರದಿ ಇನ್ನೂ ಬಂದಿಲ್ಲ.
ಕೂದಲು ಉದುರುವಿಕೆ ವಿದ್ಯಮಾನದ ಹಿಂದಿನ ಕಾರಣ ದೇಹದಲ್ಲಿ ಸೆಲೆನಿಯಂ ಮಟ್ಟ ಹೆಚ್ಚಿರುವುದು ಎಂದು ಹೇಳಲಾಗಿತ್ತು. ಈಗ ಮತ್ತೆ ಅದೇ ಬಲಿಪಶುಗಳ ಉಗುರುಗಳು ಹಾನಿಗೊಳಗಾಗುತ್ತಿವೆ ಮತ್ತು ಬೀಳುತ್ತಿವೆ.

ಇದಕ್ಕೆ ಕಾರಣ ತನಿಖೆಯ ನಂತರವೇ ತಿಳಿದುಬರಲಿದೆ. ಗ್ರಾಮದ ಸರಪಂಚ್ ರಾಮ್ ಥಾರ್ಕರ್ ಮಾತನಾಡಿ, ಕಳೆದ ಕೆಲವು ದಿನಗಳಿಂದ ಜನರಲ್ಲಿ ಕೂದಲು ಉದುರುವಿಕೆ ಸಮಸ್ಯೆ ಹೆಚ್ಚಾಗಿತ್ತು. ಈಗ ಉಗುರುಗಳು ಬಿರುಕು ಬಿಡುತ್ತಿವೆ. ಈ ಮಾಹಿತಿಯನ್ನು ಜಿಲ್ಲಾ ಅಧಿಕಾರಿ, ಜಿಲ್ಲಾ ಆರೋಗ್ಯ ಅಧಿಕಾರಿ ಮತ್ತು ಆಯುಷ್ ಸಚಿವ ಪ್ರತಾಪ್‌ರಾವ್ ಜಾಧವ್ ಅವರಿಗೆ ನೀಡಲಾಗಿದೆ. ಜಿಲ್ಲಾಡಳಿತದಿಂದ ಆರೋಗ್ಯ ಇಲಾಖೆಯ ತಂಡವೊಂದು ಬಂದು ತನಿಖೆ ನಡೆಸಿದೆ ಎಂದಿದ್ದಾರೆ.

ಗ್ರಾಮ ಮತ್ತು ಸುತ್ತಮುತ್ತಲಿನ ಪ್ರದೇಶಗಳಲ್ಲಿ 30 ಕ್ಕೂ ಹೆಚ್ಚು ಜನರ ಉಗುರುಗಳಿಗೆ ಹಾನಿಯಾಗಿದೆ ಎಂದು ಜಿಲ್ಲಾ ಆರೋಗ್ಯ ಅಧಿಕಾರಿ ಪ್ರಶಾಂತ್ ತಂಗಡೆ ತಿಳಿಸಿದ್ದಾರೆ. ಕೆಲವು ಜನರ ರಕ್ತದ ಮಾದರಿಗಳನ್ನು ತೆಗೆದುಕೊಳ್ಳಲಾಗಿದೆ. ಮಾದರಿಗಳನ್ನು ಪರೀಕ್ಷೆಗಾಗಿ ಅಕೋಲಾ ಪ್ರಯೋಗಾಲಯಕ್ಕೆ ಕಳುಹಿಸಲಾಗುವುದು.

ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ