ರಹಸ್ಯ ವಿದೇಶಿ ಪ್ರವಾಸ ಬಿಟ್ಟು ಭಾರತದಲ್ಲಿ ಹೆಚ್ಚು ಸಮಯ ಕಳೆಯಿರಿ: ರಾಹುಲ್​ಗೆ 7 ಸಲಹೆಗಳ ಕೊಟ್ಟ ಕಿರಣ್ ರಿಜಿಜು

ನವದೆಹಲಿ, ನವೆಂಬರ್ 05: ಪ್ರಧಾನಿ ನರೇಂದ್ರ ಮೋದಿಯವರೊಂದಿಗೆ ಬಹಿರಂಗ ಚರ್ಚೆ ನಡೆಸುವಂತೆ ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಸವಾಲು ಹಾಕುತ್ತಿದ್ದಾರೆ. ಈ ವಿಚಾರವಾಗಿ ಬಿಜೆಪಿ ಮತ್ತು ಕಾಂಗ್ರೆಸ್ ನಾಯಕರ ನಡುವೆ ಮಾತಿನ ಸಮರ ಜೋರಾಗಿದೆ. ಇದೀಗ ಕೇಂದ್ರ ಸಂಸದೀಯ ವ್ಯವಹಾರಗಳ ಸಚಿವ ಕಿರಣ್ ರಿಜಿಜು ರಾಹುಲ್ ಗಾಂಧಿಗೆ ಏಳು ಸಲಹೆಗಳನ್ನು ನೀಡಿದ್ದಾರೆ. ಕಾಂಗ್ರೆಸ್ ಹೆಚ್ಚು ಸಂಸದರನ್ನು ಗೆಲ್ಲಬೇಕಾದರೆ ರಾಹುಲ್ ಗಾಂಧಿ ಭಾರತದಲ್ಲಿ ಹೆಚ್ಚು ಸಮಯ ಕಳೆಯಬೇಕು, ವಿದೇಶ ಪ್ರವಾಸವನ್ನು ಕಡಿಮೆ ಮಾಡಬೇಕು ಮತ್ತು ಸಂಸತ್ತಿನ ಕಲಾಪಕ್ಕೆ ಹೆಚ್ಚಿನ ಮಹತ್ವವನ್ನು ನೀಡಬೇಕು ಎಂದು ಹೇಳಿದ್ದಾರೆ.

ರಾಹುಲ್ ಗಾಂಧಿಗೆ ರಿಜಿಜು ನೀಡಿದ 7 ಸಲಹೆಗಳೇನು?

ನವೆಂಬರ್ 4ರಂದು ಸಾಮಾಜಿಕ ಜಾಲತಾಣ ಎಕ್ಸ್‌ನಲ್ಲಿ ಪೋಸ್ಟ್ ಮಾಡಿರುವ ಕಿರಣ್ ರಿಜಿಜು, ಕಾಂಗ್ರೆಸ್ ಹೆಚ್ಚು ಸಂಸದರನ್ನು ಗೆಲ್ಲಬೇಕಾದರೆ ರಾಹುಲ್ ಗಾಂಧಿ ಈ ಏಳು ಅಂಶಗಳನ್ನು ಪಾಲಿಸಬೇಕು ಎಂದು ವ್ಯಂಗ್ಯವಾಡಿದ್ದಾರೆ.

1. ಭಾರತದಲ್ಲಿ ಹೆಚ್ಚು ಸಮಯ ಕಳೆಯಿರಿ: ಆಗಾಗ ವಿದೇಶಕ್ಕೆ ಹೋಗುವುದನ್ನು ಮತ್ತು ರಹಸ್ಯ ವಿದೇಶಿ ಪ್ರವಾಸಗಳನ್ನು ನಿಲ್ಲಿಸಿ.

2. ಹಿರಿಯರನ್ನು ಗೌರವಿಸಿ: ಹಿರಿಯ ನಾಯಕರ ಅನುಭವ ಮತ್ತು ಸಲಹೆಗಳಿಂದ ಪಾಠ ಕಲಿಯಿರಿ. ಹಿರಿಯರನ್ನು ಗೌರವಿಸುವುದು ಭಾರತೀಯ ಸಂಪ್ರದಾಯ.

3. ಭಾರತ ವಿರೋಧಿ ವ್ಯಕ್ತಿಗಳಿಂದ ದೂರವಿರಿ: ಭಾರತ ವಿರೋಧಿ ವ್ಯಕ್ತಿಗಳನ್ನು ಭೇಟಿಯಾಗಬೇಡಿ ಮತ್ತು ಅವರ ಕಾರ್ಯಸೂಚಿಯನ್ನು ಪ್ರಚಾರ ಮಾಡಬೇಡಿ.

4. ಬಿಜೆಪಿ ವಿರುದ್ಧದ ದ್ವೇಷ ಬಿಡಿ: ಬಿಜೆಪಿ, ಆರ್‌ಎಸ್‌ಎಸ್ ಮತ್ತು ಪ್ರಧಾನಿ ಮೋದಿ ವಿರುದ್ಧದ ದ್ವೇಷವನ್ನು ಬಿಟ್ಟು, ಬಿಜೆಪಿಯನ್ನು ರಾಜಕೀಯ ಎದುರಾಳಿಯಾಗಿ ನೋಡಿ; ಶತ್ರುವಾಗಿ ಅಲ್ಲ.

5. ಸಂಸತ್ತಿಗೆ ಹೆಚ್ಚಿನ ಮಹತ್ವ ನೀಡಿ: ಸಂಸತ್ತಿನ ಕಲಾಪದಲ್ಲಿ ಗಂಭೀರವಾಗಿ ಭಾಗವಹಿಸಿ. ಪಕ್ಷದ ಸಂಸದರು ಚರ್ಚೆಗಳಲ್ಲಿ ಪಾಲ್ಗೊಳ್ಳಲು ಅವಕಾಶ ಮಾಡಿಕೊಡಿ.

6. ಸಂವಿಧಾನಕ್ಕೆ ಗೌರವ ನೀಡಿ: ಭಾರತದ ಸಂವಿಧಾನ ಮತ್ತು ಸಾಂವಿಧಾನಿಕ ಸಂಸ್ಥೆಗಳನ್ನು ಗೌರವಿಸಿ.

7. ಕುಟುಂಬ ರಾಜಕಾರಣಕ್ಕೆ ಕಡಿವಾಣ ಹಾಕಿ: ಕಾಂಗ್ರೆಸ್ ಪಕ್ಷದೊಳಗೆ ಪ್ರಜಾಪ್ರಭುತ್ವ ವ್ಯವಸ್ಥೆ ಇರಲಿ. ಕುಟುಂಬ ಆಧಾರಿತ ರಾಜಕಾರಣವನ್ನು ಕೊನೆಗೊಳಿಸಿ.

ಇದನ್ನೂ ಓದಿ:

‘ಸುಳ್ಳು ಹೇಳಿ ನಂಬಿಸಬೇಡಿ, ವಿದೇಶಿ ನೆರವಿನಿಂದಲೇ ನೀವು ಪ್ರಧಾನಿಯಾಗಿದ್ದು’; ಮೋದಿ ಕುರಿತು ರಾಹುಲ್ ಗಾಂಧಿ ಆರೋಪ

ಸಂಸತ್ತಿನ ಹಳೆಯ ವಿಡಿಯೋ ಹಂಚಿಕೊಂಡ ರಿಜಿಜು

ಇಷ್ಟಕ್ಕೇ ನಿಲ್ಲದ ರಿಜಿಜು, ಸಂಸತ್ತಿನಲ್ಲಿ ತಾವು ಮಾತನಾಡುತ್ತಿದ್ದಾಗ ವಿರೋಧ ಪಕ್ಷದ ಸಂಸದರು ಸದನದಿಂದ ಹೊರನಡೆದ ಹಳೆಯ ವಿಡಿಯೋವನ್ನೂ ಎಕ್ಸ್‌ನಲ್ಲಿ ಹಂಚಿಕೊಂಡಿದ್ದಾರೆ. ಸಂಸತ್ತು ಚರ್ಚೆ ಮತ್ತು ಸಂವಾದಕ್ಕೆಂದೇ ಇರುವ ವೇದಿಕೆ. ಆದರೆ ಪ್ರಜಾಪ್ರಭುತ್ವ ಮತ್ತು ಚರ್ಚೆಯಲ್ಲಿ ನಂಬಿಕೆ ಇಲ್ಲದವರೇ ಈಗ ಬಹಿರಂಗ ಚರ್ಚೆಯ ಬಗ್ಗೆ ಮಾತನಾಡುತ್ತಿದ್ದಾರೆ ಎಂದು ಅವರು ಟೀಕಿಸಿದ್ದಾರೆ. ಸದನದಲ್ಲಿ ಚರ್ಚೆಗೆ ಅವಕಾಶವಿದ್ದಾಗ ವಿರೋಧ ಪಕ್ಷದ ಸದಸ್ಯರು ಹೊರನಡೆದರೆ, ಈಗ ಪ್ರಧಾನಿ ಜೊತೆ ಚರ್ಚೆಗೆ ಏಕೆ ಒತ್ತಾಯಿಸುತ್ತಿದ್ದಾರೆ ಎಂಬುದು ರಿಜಿಜು ಅವರ ಪ್ರಶ್ನೆಯಾಗಿದೆ.

ರಾಹುಲ್ ಗಾಂಧಿ ಮೋದಿ ಅವರಿಗೆ ಹಾಕಿದ ಸವಾಲೇನು?

ಇದಕ್ಕೂ ಮೊದಲು ರಾಹುಲ್ ಗಾಂಧಿ ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಬಹಿರಂಗ ಚರ್ಚೆಗೆ ಆಹ್ವಾನ ನೀಡಿದ್ದರು. ದೇಶದ ಆರ್ಥಿಕ ವ್ಯವಸ್ಥೆ, ಭಾರತ-ಅಮೆರಿಕ ವ್ಯಾಪಾರ ಒಪ್ಪಂದ, ಅದಾನಿ ಪ್ರಕರಣ ಮತ್ತು ವಿದೇಶಿ ಪ್ರಭಾವದ ಆರೋಪಗಳ ಬಗ್ಗೆ ಚರ್ಚೆಯಾಗಬೇಕು ಎಂದು ಒತ್ತಾಯಿಸಿದ್ದರು.

ನವೆಂಬರ್ 4ರಂದು ಪಂಜಾಬ್‌ನ ಸಂಗ್ರೂರ್‌ನಲ್ಲಿ ನಡೆದ ಕಾಂಗ್ರೆಸ್ ಸಮಾವೇಶದಲ್ಲಿ ಮಾತನಾಡಿದ ರಾಹುಲ್ ಗಾಂಧಿ, ಪ್ರಧಾನಿ ಮೋದಿ ತಮ್ಮೊಂದಿಗೆ ಚರ್ಚೆಗೆ ಬಂದರೆ ಐದು ನಿಮಿಷಗಳಲ್ಲಿ ಅವರನ್ನು ‘ದೇಶದ್ರೋಹಿ’ ಎಂದು ಸಾಬೀತುಪಡಿಸುವುದಾಗಿ ಹೇಳಿಕೊಂಡಿದ್ದರು. ಇದು ರಾಹುಲ್ ಗಾಂಧಿ ಮಾಡಿರುವ ರಾಜಕೀಯ ಆರೋಪ ಮತ್ತು ಸವಾಲು.

ಪೋಸ್ಟ್​

ನಿರ್ಮಲಾ ಸೀತಾರಾಮನ್ ಕೂಡ ತಿರುಗೇಟು

ರಾಹುಲ್ ಗಾಂಧಿಯವರ ಬಹಿರಂಗ ಚರ್ಚೆಯ ಸವಾಲಿಗೆ ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಕೂಡ ಪ್ರತಿಕ್ರಿಯಿಸಿದ್ದಾರೆ. ಪ್ರಶ್ನೆಗಳನ್ನು ಕೇಳುವುದಷ್ಟೇ ಸಾಕಾಗುವುದಿಲ್ಲ, ಸರ್ಕಾರದ ಉತ್ತರವನ್ನು ಕೇಳುವ ತಾಳ್ಮೆಯೂ ಇರಬೇಕು ಎಂದು ಅವರು ಹೇಳಿದ್ದಾರೆ. ಸಂಸತ್ತಿನಲ್ಲಿ ಚರ್ಚೆ ನಡೆಯುವಾಗ ವಿರೋಧ ಪಕ್ಷದ ಸದಸ್ಯರು ಹೊರನಡೆದಿರುವುದನ್ನು ಉಲ್ಲೇಖಿಸಿ, ಸಂಸತ್ತೇ ಚರ್ಚೆಗೆ ಸೂಕ್ತ ವೇದಿಕೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.

ರಾಜಕೀಯ ವಾಗ್ವಾದಕ್ಕೆ ಕಾರಣವೇನು?

ಇತ್ತೀಚೆಗೆ ಪ್ರಧಾನಿ ಮೋದಿ ವಿರೋಧ ಪಕ್ಷಗಳ ವಿರುದ್ಧ ವಾಗ್ದಾಳಿ ನಡೆಸಿ, ಕೆಲವು ಶಕ್ತಿಗಳು ವಿದೇಶಿ ಬೆಂಬಲದೊಂದಿಗೆ ದೇಶದಲ್ಲಿ ಸುಳ್ಳು ಸುದ್ದಿಗಳನ್ನು ಹರಡುತ್ತಿವೆ ಮತ್ತು ಅಸ್ಥಿರತೆ ಸೃಷ್ಟಿಸಲು ಪ್ರಯತ್ನಿಸುತ್ತಿವೆ ಎಂದು ಆರೋಪಿಸಿದ್ದರು.

ಇದಕ್ಕೆ ಪ್ರತಿಕ್ರಿಯಿಸಿದ್ದ ರಾಹುಲ್ ಗಾಂಧಿ, ಮೋದಿ ವಿದೇಶಿ ನೆರವಿನಿಂದಲೇ ಅಧಿಕಾರಕ್ಕೆ ಬಂದಿದ್ದಾರೆ ಎಂದು ಆರೋಪಿಸಿ ಬಹಿರಂಗ ಚರ್ಚೆಗೆ ಆಹ್ವಾನಿಸಿದ್ದರು. ಈ ಹೇಳಿಕೆಗಳಿಗೆ ಬಿಜೆಪಿ ನಾಯಕರು ತೀವ್ರ ವಿರೋಧ ವ್ಯಕ್ತಪಡಿಸಿದ್ದಾರೆ. ಹೀಗಾಗಿ ವಿದೇಶಿ ಸಂಪರ್ಕ, ದೇಶದ ಹಿತಾಸಕ್ತಿ ಮತ್ತು ಸಂಸತ್ತಿನ ಚರ್ಚೆಯ ವಿಚಾರಗಳು ಈಗ ಬಿಜೆಪಿ-ಕಾಂಗ್ರೆಸ್ ನಡುವಿನ ಪ್ರಮುಖ ರಾಜಕೀಯ ಸಂಘರ್ಷವಾಗಿ ಮಾರ್ಪಟ್ಟಿವೆ.

ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ