ಪತ್ನಿ ಸುನಂದಾ ಪುಷ್ಕರ್​ ಸಾವಿನ ಪ್ರಕರಣದಿಂದ ಬಚಾವ್​ ಆದ ಶಶಿ ತರೂರ್​; ಆರೋಪ ಮುಕ್ತ ಎಂದು ತೀರ್ಪು ನೀಡಿದ ದೆಹಲಿ ಕೋರ್ಟ್​

2014ರ ಜನವರಿಯಲ್ಲಿ ದೆಹಲಿಯ ಪಂಚತಾರಾ ಹೋಟೆಲ್​​ನ ಕೋಣೆಯಲ್ಲಿ ಶವವಾಗಿ ಪತ್ತೆಯಾಗಿದ್ದ ಸುನಂದಾ ಪುಷ್ಕರ್ (Sunanda Pushkar )​​ ಪ್ರಕರಣದಲ್ಲಿ ಕಾಂಗ್ರೆಸ್​ ನಾಯಕ ಶಶಿ ತರೂರ್  (Shashi Tharoor)ಇದೀಗ ಆರೋಪ ಮುಕ್ತರಾಗಿದ್ದಾರೆ. ಅವರನ್ನು ಆರೋಪ ಮುಕ್ತಗೊಳಿಸಿ ದೆಹಲಿ ಕೋರ್ಟ್​ ತೀರ್ಪು ನೀಡಿದೆ. ಪತ್ನಿ ​​​ಸುನಂದಾ ಪುಷ್ಕರ್​ ಆತ್ಮಹತ್ಯೆಗೆ ಕಾಂಗ್ರೆಸ್ ನಾಯಕ ಶಶಿ ತರೂರ್​ ಕುಮ್ಮಕ್ಕು ನೀಡಿದ್ದಾರೆ ಎಂಬ ಆರೋಪದಡಿ ದೆಹಲಿ ಪೊಲೀಸರು ಅವರ ವಿರುದ್ಧ, ಸೆಕ್ಷನ್​ 498 ಎ (ಮಹಿಳೆಯು ತನ್ನ ಪತಿ ಅಥವಾ ಪತಿಯ ಸಂಬಂಧಿಗಳಿಂದ ಕ್ರೌರ್ಯಕ್ಕೆ ಒಳಗಾಗುವುದು), ಸೆಕ್ಷನ್​ 306 ( ಆತ್ಮಹತ್ಯೆಗೆ ಕುಮ್ಮಕ್ಕು) ಸೇರಿ ವಿವಿಧ ಕಾಯ್ದೆಯಡಿ ಪ್ರಕರಣ ದಾಖಲಿಸಿದ್ದರು.  ಮಾಜಿ ಕೇಂದ್ರ ಸಚಿವರೂ ಆಗಿರುವ ಶಶಿ ತರೂರ್​ ಜಾಮೀನು ಆಧಾರದ ಮೇಲೆ ಜೈಲಿನಿಂದ ಹೊರಗಿದ್ದರು.  ಈ ಸಂಬಂಧ ಕೋರ್ಟ್​​ನಲ್ಲಿ ವಿಚಾರಣೆ ನಡೆಯುತ್ತಿತ್ತು. ಇಂದು ತರೂರ್​ ದೋಷಮುಕ್ತರೆಂದು ಕೋರ್ಟ್ ತೀರ್ಪು ನೀಡಿದೆ. ಬರೋಬ್ಬರಿ ಏಳೂವರೆ ವರ್ಷದ ಹಿಂಸೆ ಕೊನೆಗೊಂಡಿದೆ ಎಂದು ಹೇಳಿರುವ ಶಶಿ ತರೂರ್​, ಕೋರ್ಟ್​ಗೆ ಧನ್ಯವಾದ ಸಲ್ಲಿಸಿದ್ದಾರೆ.

ಸುನಂದಾ ಪುಷ್ಕರ್​ ಶವ 2014ರ ಜನವರಿಯಲ್ಲಿ ಪಂಚತಾರಾ ಹೋಟೆಲ್​​ ಕೋಣೆಯಲ್ಲಿ ಪತ್ತೆಯಾದಾಗ ಮೊದಲು ದೆಹಲಿ ಪೊಲೀಸರು ಅಪರಿಚಿತ ವ್ಯಕ್ತಿಯೊಬ್ಬರ ವಿರುದ್ಧ, 2015ರ ಆಗಸ್ಟ್​ 1ರಂದು ಎಫ್​ಐಆರ್​ ದಾಖಲಿಸಿದ್ದರು. ಅದಾದ ನಂತರ ಶಶಿ ತರೂರ್​ ವಿರುದ್ಧ ಪ್ರಕರಣ ದಾಖಲಾಯಿತು. ಇದು ಕೊಲೆ ಎಂದೇ ದೆಹಲಿ ಪೋಲೀಸರು ತನಿಖೆ ಶುರು ಮಾಡಿದ್ದರು.  ಸುನಂದಾ ಪುಷ್ಕರ್​ ಪೋಸ್ಟ್​ ಮಾರ್ಟಮ್​​ನಲ್ಲಿ ಸಾವಿಗೆ ವಿಷ ಕಾರಣವೆಂದು ಹೇಳಲಾಗಿದೆ. ಹಾಗೇ, ಅವರ ಮೈಮೇಲೆ ಗಾಯಗಳಿರುವುದು ಪೂರ್ವ ಮರಣೋತ್ತರ ಪರೀಕ್ಷೆಯಲ್ಲಿ ಗೊತ್ತಾಗಿದೆ. ಅದರಲ್ಲೂ 12 ಗಾಯಗಳು ನಾಲ್ಕು ದಿನಗಳ ಹಳೆಯದು ಎಂದು ಕೋರ್ಟ್​ಗೆ ಹೆಚ್ಚುವರಿ ಪಬ್ಲಿಕ್​ ಪ್ರಾಸಿಕ್ಯೂಟರ್​ ಅತುಲ್​ ಕುಮಾರ್​ ಶ್ರೀವಾಸ್ತವ್​ ವರದಿ ಸಲ್ಲಿಸಿದ್ದರು.

ಆದರೆ ಶಶಿ ತರೂರ್​ ಪರ ಹಿರಿಯ ವಕೀಲ ವಿಕಾಸ್​ ಪಾಹ್ವಾ ಇದನ್ನು ಅಲ್ಲಗಳೆದಿದ್ದರು. ಸುನಂದಾ ಪುಷ್ಕರ್​ ಹತ್ಯೆಯಾಗಿದ್ದಾರೋ..ಆತ್ಮಹತ್ಯೆ ಮಾಡಿಕೊಂಡಿದ್ದಾರೋ ಎಂಬುದಕ್ಕೆ ಸರಿಯಾದ ದಾಖಲೆಗಳಿಲ್ಲ. ಯಾವುದೇ ಸ್ಪಷ್ಟತೆಯೇ ಸಿಗುತ್ತಿಲ್ಲ ಎಂದೇ ವಾದಿಸಿದ್ದರು.

ಸುನಂದಾ ಪುಷ್ಕರ್​ ಸಾವಿನ ಬೆನ್ನಲ್ಲೇ ಟ್ವೀಟ್ ಮಾಡಿದ್ದ ಸುಬ್ರಹ್ಮಣಿಯನ್​ ಸ್ವಾಮಿ ಕೂಡ, ಅವರ ಸಾವು ಸಹಜವಲ್ಲ.. ರಷ್ಯಾದ ವಿಷ ನೀಡಿ ಕೊಲೆ ಮಾಡಲಾಗಿದೆ ಎಂದು ಹೇಳಿದ್ದರು. ದೆಹಲಿ ಪೊಲೀಸರ ವಾದವೂ ಅದೇ ಆಗಿತ್ತು. ಅದಕ್ಕೆ ಪೂರಕವೆಂಬತೆ ಸುನಂದಾ ಪುಷ್ಕರ್ ಮೈಮೇಲೆ ಇದ್ದ 12 ಗಾಯಗಳು ಇಂಜೆಕ್ಷನ್​​ನಿಂದ ಆಗಿದ್ದು ಎನ್ನಲಾಗಿತ್ತು. ಸತ್ತಾಗ ದೇಹದಿಂದ ದುರ್ಗಂಧ ಬರುತ್ತಿತ್ತು. ಈ ಎಲ್ಲ ವರದಿಗಳನ್ನೂ ಪೊಲೀಸರು ಕೋರ್ಟ್​ಗೆ ಸಲ್ಲಿಸಿದ್ದರು. ಕೋರ್ಟ್​ ತೀರ್ಪು ಏನು? ಪ್ರಕರಣದ ವಿಚಾರಣೆ ನಡೆಸಿದ ದೆಹಲಿ ಕೋರ್ಟ್ ವಿಶೇಷ ನ್ಯಾಯಾಧೀಶೆ ಗೀತಾಂಜಲಿ ಗೋಯೆಲ್, ಶಶಿ ತರೂರ್​ ಅವರನ್ನು ಆರೋಪ ಮುಕ್ತಗೊಳಿಸಿ ಇಂದು ಆದೇಶ ಹೊರಡಿಸಿದರು. ಕೋರ್ಟ್ ಕೇಳಿರುವ ಬಾಂಡ್​ಗಳನ್ನು ಒದಗಿಸುವಂತೆ ಕೇಳಿದ್ದಾರೆ. ತೀರ್ಪು ಬರುತ್ತಿದ್ದಂತೆ ಶಶಿ ತರೂರ್​ ಸಮಾಧಾನದ ನಿಟ್ಟುಸಿರು ಬಿಟ್ಟಿದ್ದಾರೆ. ಈ ಏಳೂವರೆ ವರ್ಷದ ಹಿಂಸೆ ಅಂತ್ಯಗೊಂಡಿದೆ. ನಾನು ಕೋರ್ಟ್​​ ತೀರ್ಪನ್ನು ನಿಜಕ್ಕೂ ಶ್ಲಾಘಿಸುತ್ತೇನೆ ಎಂದಿದ್ದಾರೆ.

ಇದನ್ನೂ ಓದಿ: ಅಫ್ಘಾನಿಸ್ತಾನದ ವಿದ್ಯಾರ್ಥಿಗಳಿಗೆ ಅಗತ್ಯ ನೆರವು ನೀಡುತ್ತೇವೆ; ಪೊಲೀಸ್ ಆಯುಕ್ತ ಕಮಲ್ ಪಂತ್

ಪಾಕ್ ಸ್ವಾತಂತ್ರ್ಯ ದಿನದಂದು ನೂರಾರು ಮಂದಿ ಹಲ್ಲೆ ನಡೆಸಿ ಬಟ್ಟೆ ಹರಿದು ಹಾಕಿದರು: ಮಹಿಳಾ ಟಿಕ್ ಟಾಕರ್ ದೂರು

Published On - 11:22 am, Wed, 18 August 21