ಭಾರತಕ್ಕೆ ಶೀಘ್ರ ಮತ್ತೊಂದು ಲಸಿಕೆ: ಕೊವಾವ್ಯಾಕ್ಸ್​ ಲಸಿಕೆ ಉತ್ಪಾದನೆ ಆರಂಭಿಸಿದ ಪುಣೆಯ ಸೆರಮ್ ಇನ್​ಸ್ಟಿಟ್ಯೂಟ್

ಕೊವಿಡ್ ಸೋಂಕಿನ ವಿರುದ್ಧ ನೀಡುವ ಲಸಿಕೆ ಕೊವಿಶೀಲ್ಡ್​ ಉತ್ಪಾದಿಸುತ್ತಿರುವ ಪುಣೆಯ ಸೇರಮ್ ಇನ್​ಸ್ಟಿಟ್ಯೂಟ್​ ಆಫ್ ಇಂಡಿಯಾ (Serum Institute of India – SII) ಶುಕ್ರವಾರ ಇದೇ ಮೊದಲ ಬಾರಿಗೆ ಕೊವಾವ್ಯಾಕ್ಸ್​ ಲಸಿಕೆ ಉತ್ಪಾದಿಸಿದೆ ಎಂದು ಕಂಪನಿಯ ಮುಖ್ಯಸ್ಥ ಅದಾರ್ ಪೂನಾವಾಲ ಶುಕ್ರವಾರ ಹೇಳಿದ್ದಾರೆ. ಕೊವಾವ್ಯಾಕ್ಸ್​ನ ಮೊದಲ ಬ್ಯಾಚ್ ಲಸಿಕೆಗಳನ್ನು ಉತ್ಪಾದಿಸಿದ ತಮ್ಮ ಸಹೋದ್ಯೋಗಿಗಳನ್ನು ಅವರು ಅಭಿನಂದಿಸಿದ್ದಾರೆ. ನೊವಾವ್ಯಾಕ್ಸ್ ಅಭಿವೃದ್ಧಿಪಡಿಸಿರುವ ಕೊವಾವ್ಯಾಕ್ಸ್​​ ಲಸಿಕೆಗಳ ಮೊದಲ ವ್ಯಾಚ್​ ಉತ್ಪಾದನೆಯಾಗುತ್ತಿರುವುದು ಖುಷಿಯ ವಿಚಾರ. ಈ ಲಸಿಕೆಯು 18 ವರ್ಷಕ್ಕಿಂತ ಕಡಿಮೆ ವಯೋಮಾನದ ನಮ್ಮ ಭವಿಷ್ಯದ ತಲೆಮಾರನ್ನು ಕಾಪಾಡುವ ದೊಡ್ಡ ಸಾಮರ್ಥ್ಯ ಹೊಂದಿದೆ ಎಂದು ಪೂನಾವಾಲ ಟ್ವೀಟ್​ ಮಾಡಿದ್ದಾರೆ.

ಮುಂದಿನ ಸೆಪ್ಟೆಂಬರ್​ ಹೊತ್ತಿಗೆ ಭಾರತದಲ್ಲಿ ಕೊವಾವ್ಯಾಕ್ಸ್​ ಬಿಡುಗಡೆ ಮಾಡುವುದಾಗಿ ಸೆರಮ್ ಇನ್​ಸ್ಟಿಟ್ಯೂಟ್​ ಆಫ್ ಇಂಡಿಯಾ ಘೋಷಿಸಿದೆ. ಈ ಲಸಿಕೆಯು ಅಮೆರಿಕದ ನೊವಾವ್ಯಾಕ್ಸ್​ ಸಂಸ್ಥೆಯ ಅಭಿವೃದ್ಧಿಪಡಿಸಿರುವ ಕೊವಿಡ್-19 ಲಸಿಕೆಯ ತಂತ್ರಜ್ಞಾನವನ್ನು ಆಧರಿಸಿದೆ. ಮಕ್ಕಳಿಗೆ ಲಸಿಕೆ ನೀಡಿ, ಸಂಶೋಧನೆ ನಡೆಸುವ ಪ್ರಕ್ರಿಯೆ ಮುಂದಿನ ತಿಂಗಳಿನಿಂದ ಆರಂಭವಾಗಲಿದೆ ಎಂದು ಸೆರಮ್ ಇನ್​ಸ್ಟಿಟ್ಯೂಟ್ ಹೇಳಿದೆ.

ಈಚಿನ ದಿನಗಳಲ್ಲಿ ಕಂಡುಬರುತ್ತಿರುವ ಕೊರೊನಾ ವೈರಾಣುಗಳ ಹೊಸಹೊಸ ಪ್ರಭೇದಗಳ ವಿರುದ್ಧ ನೊವಾವ್ಯಾಕ್ಸ್​ ಪ್ರಬಲ ಪ್ರತಿರೋಧ ಶಕ್ತಿಯನ್ನು ಹೊಂದಿದೆ. ಈ ವಿಚಾರವನ್ನು ನೊವಾವ್ಯಾಕ್ಸ್​ ಸ್ವತಃ ಘೋಷಿಸಿದೆ. ದೊಡ್ಡಮಟ್ಟದ ಟ್ರಯಲ್​ನಲ್ಲಿ ಈ ವಿಚಾರ ಸಾಬೀತಾಗಿದೆ ಎಂದು ಜೂನ್ 14ರಂದು ಪ್ರಕಟವಾದ ವರದಿಯಲ್ಲಿ ಕಂಪನಿಯು ಹೇಳಿದೆ.

ಕೊರೊನಾ ಸೋಂಕಿನ ವಿರುದ್ಧದ ಹೋರಾಟದಲ್ಲಿ ಅಮೆರಿಕ 4ನೇ ಲಸಿಕೆಯಾಗಿ ನೊವಾವ್ಯಾಕ್ಸ್​ ಲಸಿಕೆಯನ್ನು ಬಳಕೆಗೆ ಅಂಗೀಕರಿಸಿತ್ತು. ಹೊಸಹೊಸ ರೂಪಾಂತರಗಳ ವಿರುದ್ಧ ನೊವಾವ್ಯಾಕ್ಸ್​ ಶೇ 93ರಷ್ಟು ಪರಿಣಾಮಕಾರಿ ಎಂದು ಸಂಶೋಧನಾ ವರದಿಗಳು ಹೇಳಿದ್ದವು. ನೊವಾವ್ಯಾಕ್ಸ್​ ಅಭಿವೃದ್ಧಿಪಡಿಸಿರುವ ಲಸಿಕೆಯು ಕಾರ್ಯಕ್ಷಮತೆಯು ಫಿಝರ್ ಮತ್ತು ಸ್ಪುಟ್ನಿಕ್ ಲಸಿಕೆಗಳಿಗೆ ಸಮಾನವಾಗಿದೆ. ವೈರಲ್ ವೆಕ್ಟಾರ್ ತಂತ್ರಜ್ಞಾನ ಬಳಸಿ ಈ ಲಸಿಕೆಗಳನ್ನು ಅಭಿವೃದ್ಧಿಪಡಿಸಲಾಗಿದೆ.

ಭಾರತದ ಆರೋಗ್ಯ ಸಚಿವಾಲಯವು ಸಹ ನೊವಾವ್ಯಾಕ್ಸ್​ ಲಸಿಕೆಯ ಬಗ್ಗೆ ಒಳ್ಳೆಯ ಅಭಿಪ್ರಾಯ ಹೊಂದಿದೆ. ನೊವಾವ್ಯಾಕ್ಸ್​ ಲಸಿಕೆ ವಿತರಣೆಯನ್ನೂ ಭಾರತವು ತನ್ನ ಲಸಿಕಾಕರಣ ಯೋಜನೆಯ ಭಾಗವಾಗಿಸಿಕೊಳ್ಳಲಿದೆ ಎಂದು ನೀತಿ ಆಯೋಗದ ಸದಸ್ಯ ವಿ.ಕೆ.ಪೌಲ್ ಜೂನ್ 17ರಂದು ಹೇಳಿದ್ದರು.

(SII manufactures first batch of Covavax vaccine; Poonawalla congratulates team)

ಇದನ್ನೂ ಓದಿ: Delta Plus Variant: ಡೆಲ್ಟಾ ಪ್ಲಸ್​ ವಿರುದ್ಧ ಯಾವ ಕಂಪೆನಿಯ ಕೊರೊನಾ ಲಸಿಕೆ ಹೆಚ್ಚು ಪರಿಣಾಮಕಾರಿ?

ಇದನ್ನೂ ಓದಿ: ಡೆಲ್ಟಾ ಪ್ಲಸ್ ವೈರಸ್ ವಿರುದ್ಧ ಕೊವಿಶೀಲ್ಡ್ ಲಸಿಕೆ ಹೆಚ್ಚು ಪರಿಣಾಮಕಾರಿಯಲ್ಲ: ಲ್ಯಾನ್ಸೆಟ್ ವರದಿ