ಅದ್ಭುತ ಪ್ರದರ್ಶನ ನೀಡಿದ ಕಲಾಧರ ಜಯಲಕ್ಷ್ಮೀ; ಅಪಾರ ಮೆಚ್ಚುಗೆ ಗಳಿಸಿದ ಶನಿದೇವ ಗೀತನೃತ್ಯ

ಭಾರತೀಯ ಸಂಸ್ಕೃತಿಯಲ್ಲಿ ದೇವರ ಆರಾಧನೆಗೆಂದು ಇರುವ ಪಥಗಳ ಸಂಖ್ಯೆ ಅಗಣ್ಯ. ವ್ರತ, ಹೋಮ, ಧ್ಯಾನ, ಜಪ, ಮುಂತಾದವುಗಳಂತೆ ನಾಟ್ಯವೂ ಒಂದು ಪೂಜಾ ವಿಧಾನ ಅಂತಾನೇ ಹೇಳಬಹುದು. ಈ ನೃತ್ಯದ ಮೂಲಕ ಪೂಜೆಯನ್ನು ಸಲ್ಲಿಸುವಾಗ ನರ್ತಕರು ತಾವು ಮಾತ್ರ ಭಕ್ತಿಯಲ್ಲಿ ಮುಳುಗುವುದಲ್ಲದೆ ಪ್ರೇಕ್ಷಕರನ್ನೂ ಭಾವುಕರನ್ನಾಗಿಸುತ್ತಾರೆ. ಅದೇ ರೀತಿ ಪ್ರೇಕ್ಷಕ ವರ್ಗದವರನ್ನು ತಲ್ಲೀನಗೊಳಿಸುವುದರಲ್ಲಿ ಕೈಲಾಸ ಕಲಾಧರ ಸಂಸ್ಥೆಯ ವತಿಯಿಂದ ಪ್ರದರ್ಶನಗೊಂಡ "ಸೂರ್ಯಪುತ್ರ ಶನಿದೇವ" ನೃತ್ಯ ನಾಟಕವು ಸಾಕ್ಷಿಯಾಯಿತು. ತಮ್ಮ ವಿನೂತನ ಪ್ರಸ್ತುತಿಗಳಿಂದ ಮನೆ ಮಾತಾಗಿರುವ ಕೈಲಾಸ ಕಲಾಧರ ಕಲ್ಚರಲ್ ಅಂಡ್‌ ಚಾರಿಟೆಬಲ್ ಟ್ರಸ್ಟ್ ಇದುವರೆಗೆ ಅನೇಕ ನೃತ್ಯ ನಾಟಕಗಳನ್ನು ನಾನಾ ವೇದಿಕೆಗಳಲ್ಲಿ ಪ್ರಸ್ತುತಪಡಿಸಿದೆ. ಅಂತೆಯೇ ಏಪ್ರಿಲ್ 19 ರಂದು ಸಂಸ್ಥೆಯ ವತಿಯಿಂದ ಬೆಂಗಳೂರಿನ ರವೀಂದ್ರ ಕಲಾಕ್ಷೇತ್ರದಲ್ಲಿ ಡಾ. ಕೆ. ಜಯಲಕ್ಷ್ಮೀ ಜಿತೇಂದ್ರ ಭಾಗವತ್ ಅವರ ಸಾರಥ್ಯದಲ್ಲಿ ಶನೇಶ್ವರ ಸ್ವಾಮಿ ಕುರಿತಾದ ನೃತ್ಯ ನಾಟಕ ಪ್ರದರ್ಶಿಸಲಾಯಿತು.