Dwayne Bravo: ಗೇಲ್, ಎಬಿಡಿ ದಾಖಲೆ ಮುರಿದು ಹೊಸ ಇತಿಹಾಸ ನಿರ್ಮಿಸುವ ವಿಶ್ವಾಸದಲ್ಲಿದೆ ಬ್ರಾವೋ
IPL 2022: ಡ್ವೇನ್ ಬ್ರಾವೋ ಐಪಿಎಲ್‌ನಲ್ಲಿ ತಂಡಗಳ ಪರ ಆಡಿದ್ದಾರೆ. ಮೊದಲ ಮೂರು ಸೀಸನ್‌ಗಳಲ್ಲಿ ಮುಂಬೈ ಇಂಡಿಯನ್ಸ್‌ ತಂಡದಲ್ಲಿದ್ದರು. 2011ರಲ್ಲಿ ಅವರು ಸಿಎಸ್ಕೆ ತಂಡಕ್ಕೆ ಆಯ್ಕೆಯಾಗಿದ್ದರು.
Updated on: Feb 01, 2022 | 9:00 PM
ಐಪಿಎಲ್ 2022 ರ ಮೆಗಾ ಹರಾಜಿನ ಸಿದ್ಧತೆಗಳು ಭರದಿಂದ ಸಾಗಿದೆ. ಮಂಗಳವಾರ ಬಿಸಿಸಿಐ ಈ ಹರಾಜಿಗೆ ಆಟಗಾರರ ಅಂತಿಮ ಪಟ್ಟಿಯನ್ನು ಬಿಡುಗಡೆ ಮಾಡಿದೆ. ಫೆಬ್ರವರಿ 12 ಮತ್ತು 13 ರಂದು ಬೆಂಗಳೂರಿನಲ್ಲಿ ನಡೆಯಲಿರುವ ಹರಾಜಿನಲ್ಲಿ ಒಟ್ಟು 590 ಆಟಗಾರರು ಭಾಗವಹಿಸಲಿದ್ದಾರೆ. ಈ ಪೈಕಿ ಒಟ್ಟು 220 ಆಟಗಾರರು ವಿದೇಶಿ ಪ್ಲೇಯರ್ಸ್. ಅವರಲ್ಲಿ ವೆಸ್ಟ್ ಇಂಡೀಸ್‌ ಆಟಗಾರ ಡ್ವೇನ್ ಬ್ರಾವೋ ಕೂಡ ಒಬ್ಬರು. ಈ ಬಾರಿಯ ಮೆಗಾ ಹರಾಜಿನಲ್ಲಿ ಬ್ರಾವೋ ಬಿಕರಿಯಾದರೆ ಹೊಸ ಇತಿಹಾಸ ನಿರ್ಮಾಣವಾಗಲಿದೆ. ಏಕೆಂದರೆ ಡ್ವೇನ್ ಬ್ರಾವೋ ಐಪಿಎಲ್ 2008 ರಿಂದ 2022 ರವರೆಗೆ ಆಡಿದ ಮೊದಲ ವಿದೇಶಿ ಆಟಗಾರ ಎನಿಸಿಕೊಳ್ಳಲಿದ್ದಾರೆ.
ಅಷ್ಟೇ ಅಲ್ಲದೆ ಎಬಿ ಡಿವಿಲಿಯರ್ಸ್ ಹಾಗೂ ಕ್ರಿಸ್ ಗೇಲ್ ದಾಖಲೆಯನ್ನೂ ಕೂಡ ಬ್ರಾವೋ ಮುರಿಯಲಿದ್ದಾರೆ. ಏಕೆಂದರೆ ಚೊಚ್ಚಲ ಐಪಿಎಲ್ನಿಂದ ಇದುವರೆಗೆ ಎಲ್ಲಾ ಸೀಸನ್ ಆಡಿದ ಆಟಗಾರರ ಪಟ್ಟಿಯಲ್ಲಿ (2008-2021) ಕ್ರಿಸ್ ಗೇಲ್, ಎಬಿ ಡಿವಿಲಿಯರ್ಸ್ ಹಾಗೂ ಡ್ವೇನ್ ಬ್ರಾವೋ ಇದ್ದಾರೆ. ಆದರೆ ಈ ಬಾರಿ ಮೆಗಾ ಹರಾಜಿನಲ್ಲಿ ಗೇಲ್ ಹಾಗೂ ಎಬಿಡಿ ಇಲ್ಲ. ಸದ್ಯ ಮೆಗಾ ಹರಾಜಿನಲ್ಲಿ ಕಾಣಿಸಿಕೊಂಡಿರುವ ಬ್ರಾವೋ ಸೇಲ್ ಆದರೆ 15 ಸೀಸನ್ ಐಪಿಎಲ್ ಆಡಿದ ಮೊದಲ ವಿದೇಶಿ ಆಟಗಾರ ಎಂಬ ದಾಖಲೆ ಬರೆಯಲಿದ್ದಾರೆ.
ಸಿಎಸ್ಕೆ ಚಾಂಪಿಯನ್ ಬ್ರಾವೋ: ಬ್ರಾವೋ ಕಳೆದ ವರ್ಷ ಐಪಿಎಲ್ ಪ್ರಶಸ್ತಿ ಗೆದ್ದಿದ್ದ ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಭಾಗವಾಗಿದ್ದರು. ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. ಇದಕ್ಕೂ ಮೊದಲು, ಅವರು 2018 ರಲ್ಲಿ ಚಾಂಪಿಯನ್ ಪಟ್ಟ ಅಲಂಕರಿಸಿದ ಸಿಎಸ್ಕೆ ತಂಡದಲ್ಲಿದ್ದರು. ಇನ್ನು ಸಿಎಸ್ಕೆ ತಂಡವು ನಾಲ್ಕು ಬಾರಿ ಚಾಂಪಿಯನ್ ಪಟ್ಟ ಅಲಂಕರಿಸುವಲ್ಲಿ ಬ್ರಾವೋ ಅವರ ಆಲ್ರೌಂಡರ್ ಆಟದ ಕೊಡುಗೆ ಇದೆ. ಇದೀಗ 38ರ ಹರೆಯದ ಬ್ರಾವೋ ಮತ್ತೆ ಸಿಎಸ್ಕೆ ತಂಡದ ಪಾಲಾಗಲಿದ್ದಾರಾ ಕಾದು ನೋಡಬೇಕಿದೆ.
3 ತಂಡಗಳ ಪರ ಆಡಿರುವ ಬ್ರಾವೋ: ಡ್ವೇನ್ ಬ್ರಾವೋ ಐಪಿಎಲ್‌ನಲ್ಲಿ ತಂಡಗಳ ಪರ ಆಡಿದ್ದಾರೆ. ಮೊದಲ ಮೂರು ಸೀಸನ್‌ಗಳಲ್ಲಿ ಮುಂಬೈ ಇಂಡಿಯನ್ಸ್‌ ತಂಡದಲ್ಲಿದ್ದರು. 2011ರಲ್ಲಿ ಅವರು ಸಿಎಸ್ಕೆ ತಂಡಕ್ಕೆ ಆಯ್ಕೆಯಾಗಿದ್ದರು. ಇನ್ನು ಸಿಎಸ್ಕೆ ತಂಡವು ಐಪಿಎಲ್ನಿಂದ ಬ್ಯಾನ್ ಆಗಿದ್ದ ವೇಳೆ ಬ್ರಾವೋ ಗುಜರಾತ್ ಲಯನ್ಸ್‌ ಪರ ಆಡಿದ್ದರು. ಇದಾದ ಬಳಿಕ ಮತ್ತೆ ಸಿಎಸ್ಕೆ ತಂಡಕ್ಕೆ ಮರಳಿದ್ದ ಬ್ರಾವೋ ಮೂರು ಫ್ರಾಂಚೈಸಿಗಳಿಗಾಗಿ ಒಟ್ಟು 151 ಐಪಿಎಲ್ ಪಂದ್ಯಗಳನ್ನು ಆಡಿದ್ದಾರೆ. ಈ ವೇಳೆ 1537 ರನ್ ಮತ್ತು 167 ವಿಕೆಟ್ ಪಡೆದಿದ್ದಾರೆ.
ಇದನ್ನೂ ಓದಿ: IPL 2022 Auction: ಐಪಿಎಲ್ ಮೆಗಾ ಹರಾಜು ಪಟ್ಟಿಯಲ್ಲಿ 17 ವರ್ಷದ ಆಟಗಾರ..!
ಇದನ್ನೂ ಓದಿ: IPL 2022 auction: ಮೆಗಾ ಹರಾಜಿನಲ್ಲಿ ಕಾಣಿಸಿಕೊಳ್ಳಲಿರುವ 590 ಆಟಗಾರರ ಹೆಸರು ಇಲ್ಲಿದೆ
ಇದನ್ನೂ ಓದಿ: IPL 2022: ಮೆಗಾ ಹರಾಜಿನಲ್ಲಿ 590 ಆಟಗಾರರು: ಯಾವ ದೇಶದಿಂದ ಎಷ್ಟು ಆಟಗಾರರು? ಇಲ್ಲಿದೆ ಸಂಪೂರ್ಣ ಪಟ್ಟಿ
ಇದನ್ನೂ ಓದಿ: Jason Holder: ಡಬಲ್ ಹ್ಯಾಟ್ರಿಕ್ ಪಡೆದು ವಿಶ್ವ ದಾಖಲೆ ನಿರ್ಮಿಸಿದ ಜೇಸನ್ ಹೋಲ್ಡರ್
(Dwayne Bravo can be the only overseas player to be a part in all 15 IPL seasons)
