137 ವರ್ಷಗಳಲ್ಲಿ ಒಮ್ಮೆ ಮಾತ್ರ… ಭಾರತದ ಗೆಲುವು ಬಹುತೇಕ ಖಚಿತ

ಭಾರತ ಮತ್ತು ಇಂಗ್ಲೆಂಡ್ ನಡುವಣ ಮೂರನೇ ಟೆಸ್ಟ್ ಪಂದ್ಯವು ಐದನೇ ದಿನದಾಟಕ್ಕೆ ಕಾಲಿಟ್ಟಿದೆ. ಐದನೇ ದಿನದಾಟದಲ್ಲಿ ಟೀಮ್ ಇಂಢಿಯಾ ಮುಂದೆ 135 ರನ್​ಗಳ ಗುರಿಯಿದ್ದರೆ, ಇಂಗ್ಲೆಂಡ್ ತಂಡಕ್ಕೆ ಗೆಲ್ಲಲು 6 ವಿಕೆಟ್​ಗಳ ಅವಶ್ಯತೆಯಿದೆ. ಹೀಗಾಗಿ ಅಂತಿಮ ದಿನದಾಟದಲ್ಲಿ ಉಭಯ ತಂಡಗಳಿಂದ ಭರ್ಜರಿ ಪೈಪೋಟಿಯನ್ನು ನಿರೀಕ್ಷಿಸಬಹುದು. ಇದಕ್ಕೂ ಮುನ್ನ ಈ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟ್ ಮಾಡಿದ ಇಂಗ್ಲೆಂಡ್ ತಂಡವು ಪ್ರಥಮ ಇನಿಂಗ್ಸ್​ನಲ್ಲಿ 387 ರನ್​ ಕಲೆಹಾಕಿತು. ಇದಕ್ಕುತ್ತರವಾಗಿ ಪ್ರಥಮ ಇನಿಂಗ್ಸ್ ಆಡಿದ ಟೀಮ್ ಇಂಡಿಯಾ ಕೂಡ 387 ರನ್​ಗಳಿಸಲು ಶಕ್ತರಾದರು.

ಇತ್ತ ಯಾವುದೇ ಮುನ್ನಡೆಯಿಲ್ಲದೆ ದ್ವಿತೀಯ ಇನಿಂಗ್ಸ್ ಆರಂಭಿಸಿದ ಇಂಗ್ಲೆಂಡ್ ತಂಡವನ್ನು 192 ರನ್​ಗಳಿಗೆ ಆಲೌಟ್ ಮಾಡುವಲ್ಲಿ ಟೀಮ್ ಇಂಡಿಯಾ ಬೌಲರ್​ಗಳು ಯಶಸ್ವಿಯಾಗಿದ್ದಾರೆ. ಅದರಲ್ಲೂ ವಾಷಿಂಗ್ಟನ್ ಸುಂದರ್ 12.1 ಓವರ್​ಗಳಲ್ಲಿ ಕೇವಲ 22 ರನ್ ನೀಡಿ 4 ವಿಕೆಟ್ ಕಬಳಿಸಿ ಮಿಂಚಿದರು. ಅದರಂತೆ ದ್ವಿತೀಯ ಇನಿಂಗ್ಸ್​ನಲ್ಲಿ ಟೀಮ್ ಇಂಡಿಯಾ 193 ರನ್​ಗಳ ಗುರಿ ಪಡೆಯಿತು.

ಈ ಸಾಧಾರಣ ಸವಾಲನ್ನು ಬೆನ್ನತ್ತಲು ಶುರು ಮಾಡಿದ ಟೀಮ್ ಇಂಡಿಯಾ ನಾಲ್ಕನೇ ದಿನದಾಟದ ಅಂತ್ಯದ ವೇಳೆ 4 ವಿಕೆಟ್ ಕಳೆದುಕೊಂಡಿದೆ. ಯಶಸ್ವಿ ಜೈಸ್ವಾಲ್ (0), ಕರುಣ್ ನಾಯರ್ (14), ಶುಭ್​ಮನ್ ಗಿಲ್ (6) ಹಾಗೂ ಆಕಾಶ್ ದೀಪ್ (1) ಈಗಾಗಲೇ ವಿಕೆಟ್ ಒಪ್ಪಿಸಿದ್ದು, ಭಾರತ ತಂಡವು ದ್ವಿತೀಯ ಇನಿಂಗ್ಸ್​ನಲ್ಲಿ 4 ವಿಕೆಟ್ ನಷ್ಟಕ್ಕೆ 58 ರನ್​ ಕಲೆಹಾಕಿದೆ.

135 ರನ್​ಗಳ ಗುರಿ:

ಐದನೇ ದಿನದಾಟದಲ್ಲಿ ಟೀಮ್ ಇಂಡಿಯಾ ಮುಂದಿರುವುದು 135 ರನ್​ಗಳ ಗುರಿ. ಈ ಗುರಿ ಬೆನ್ನತ್ತಲು ಕ್ರೀಸ್​ನಲ್ಲಿ ಕೆಎಲ್ ರಾಹುಲ್ (33) ಇದ್ದು, ಅವರೊಂದಿಗೆ ರಿಷಭ್ ಪಂತ್, ರವೀಂದ್ರ ಜಡೇಜಾ, ನಿತೀಶ್ ಕುಮಾರ್ ರೆಡ್ಡಿ ಹಾಗೂ ವಾಷಿಂಗ್ಟನ್ ಸುಂದರ್ ಬ್ಯಾಟರ್​ಗಳಾಗಿ ಕಣಕ್ಕಿಳಿಯಲು ಸಿದ್ಧರಾಗಿದ್ದಾರೆ. ಹೀಗಾಗಿ ಅಂತಿಮ ದಿನದಾಟದಲ್ಲಿ ಭಾರತದ ಪಾಲಿಗೆ 135 ರನ್​ಗಳು ಗುರಿ ಕಷ್ಟವೇನಲ್ಲ.

137 ವರ್ಷಗಳ ಇತಿಹಾಸ:

ಲಾರ್ಡ್ಸ್​ ಮೈದಾನದಲ್ಲಿ ಕೊನೆಯ ಇನಿಂಗ್ಸ್​ನಲ್ಲಿ 150 ರನ್​ಗಳಿಗಿಂತ ಕಡಿಮೆ ಸ್ಕೋರ್​ಗಳಿಸಿ ಒಂದು ತಂಡ ಮಾತ್ರ ಗೆಲುವು ದಾಖಲಿಸಿದೆ. ಅದು ಆಸ್ಟ್ರೇಲಿಯಾ. ಈ ಗೆಲುವು ದಕ್ಕಿರುವುದು 1888 ರಲ್ಲಿ. ಅಂದರೆ 137 ವರ್ಷಗಳ ಹಿಂದೆ ಆಸ್ಟ್ರೇಲಿಯಾ ತಂಡವು ಇಂಗ್ಲೆಂಡ್ ವಿರುದ್ಧ 124 ರನ್​ಗಳನ್ನು ರಕ್ಷಿಸಿಕೊಂಡು, ಗೆಲುವು ದಾಖಲಿಸಿತ್ತು.

ಇದಾದ ಬಳಿಕ ಯಾವುದೇ ತಂಡ 150 ಕ್ಕಿಂತ ಕಡಿಮೆ ಸ್ಕೋರ್​ ಅನ್ನು ನಿಯಂತ್ರಿಸಿ ಗೆಲುವು ದಕ್ಕಿಸಿಕೊಂಡಿಲ್ಲ. ಇದರ ನಡುವೆ 1955 ರಲ್ಲಿ ಇಂಗ್ಲೆಂಡ್ ತಂಡವು ಸೌತ್ ಆಫ್ರಿಕಾ ತಂಡವನ್ನು 183 ರನ್‌ಗಳ ಗುರಿ ಬೆನ್ನಟ್ಟದಂತೆ ತಡೆದು ಗೆಲುವು ದಾಖಲಿಸಿದ ಇತಿಹಾಸ ಇದೆ. 

ಅಂದರೆ ಇಲ್ಲಿ 200 ಕ್ಕಿಂತ ಕಡಿಮೆ ಸ್ಕೋರ್​ ಅನ್ನು ನಿಯಂತ್ರಿಸಿ ಗೆಲುವು ದಾಖಲಿಸಿರುವುದು ಕೇವಲ 2 ಬಾರಿ ಮಾತ್ರ. ಹೀಗಾಗಿ ನಾಲ್ಕನೇ ಇನಿಂಗ್ಸ್​ನಲ್ಲಿ ಬ್ಯಾಟಿಂಗ್ ಮಾಡುವ ತಂಡಕ್ಕೆ ಗೆಲ್ಲಲು ಉತ್ತಮ ಅವಕಾಶವಿದೆ.

ಅದರಲ್ಲೂ ಈಗ ಟೀಮ್ ಇಂಡಿಯಾ ಮುಂದಿರುವುದು ಕೇವಲ 135 ರನ್​ಗಳ ಗುರಿ ಮಾತ್ರ. ಇತ್ತ ಟೀಮ್ ಇಂಡಿಯಾ ಪರ ಐವರು ಬ್ಯಾಟರ್​ಗಳು ಬ್ಯಾಟ್ ಬೀಸಲಿದ್ದಾರೆ. ಹೀಗಾಗಿ ಭಾರತ ತಂಡವು ಕೊನೆಯ ದಿನದಾಟದಲ್ಲಿ 135 ರನ್​ಗಳನ್ನು ಚೇಸ್ ಮಾಡುವುದು ಬಹುತೇಕ ಖಚಿತ ಎನ್ನಬಹುದು.

ಕೆಲ್ ರಾಹುಲ್ ಇನಿಂಗ್ಸ್ ನಿರ್ಣಾಯಕ:

ಇನ್ನು ಭಾರತ ತಂಡವು 135 ರನ್​ಗಳ ಗುರಿಯನ್ನು ಬೆನ್ನತ್ತುವಲ್ಲಿ ಕೆಎಲ್ ರಾಹುಲ್ ಅವರ ಇನಿಂಗ್ಸ್ ನಿರ್ಣಾಯಕ ಪಾತ್ರವಹಿಸಲಿದೆ. ಏಕೆಂದರೆ ಮೊದಲ ಇನಿಂಗ್ಸ್​ನಲ್ಲಿ ಶತಕ ಸಿಡಿಸಿರುವ ರಾಹುಲ್, ಇದೀಗ 33 ರನ್​ಗಳೊಂದಿಗೆ ಅಜೇಯರಾಗಿ ಉಳಿದಿದ್ದಾರೆ. ಹೀಗಾಗಿ ಐದನೇ ದಿನದಾಟದಲ್ಲಿ ಅವರ ಇನಿಂಗ್ಸ್​ ಪಂದ್ಯದ ಫಲಿತಾಂಶದ ಮೇಲೆ ನಿರ್ನಾಯಕ ಪಾತ್ರವಹಿಸಲಿದೆ.

ಇದನ್ನೂ ಓದಿ: T20 World Cup 2026: ಟಿ20 ವಿಶ್ವಕಪ್​ಗೆ 15 ತಂಡಗಳು ಎಂಟ್ರಿ

ಒಂದೆಡೆ ಕೆಎಲ್ ರಾಹುಲ್ ಕ್ರೀಸ್ ಕಚ್ಚಿ ನಿಂತರೆ, ಮತ್ತೊಂದೆಡೆ ರಿಷಭ್ ಪಂತ್ ಸ್ಪೋಟಕ ಬ್ಯಾಟಿಂಗ್​ನೊಂದಿಗೆ ರನ್​ ಗತಿ ಹೆಚ್ಚಿಸಲಿದ್ದಾರೆ. ಈ ಮೂಲಕ 135 ರನ್​​ಗಳ ಗುರಿಯ ಒತ್ತಡವನ್ನು ಟೀಮ್ ಇಂಡಿಯಾ ಐದನೇ ದಿನದಾಟದ ಮೊದಲ ಸೆಷನ್​ನಲ್ಲೇ ತೊಡೆದು ಹಾಕಬಹುದು. ಹೀಗಾಗಿ ಅಂತಿಮ ದಿನದಾಟದಲ್ಲಿ ಕೆಎಲ್ ರಾಹುಲ್ ಕ್ರೀಸ್ ಕಚ್ಚಿ ನಿಲ್ಲಬೇಕಾದ ಅನಿವಾರ್ಯತೆ ಕೂಡ ಟೀಮ್ ಇಂಡಿಯಾ ಮುಂದಿದೆ.