IND vs ENG: ರಣತಂತ್ರ… ಟೀಮ್ ಇಂಡಿಯಾ ವಿರುದ್ಧ ನಾಲ್ವರು ಸ್ಫೋಟಕ ದಾಂಡಿಗರು

ಭಾರತದ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯಕ್ಕೆ ಇಂಗ್ಲೆಂಡ್ ಬಲಿಷ್ಠ ಪ್ಲೇಯಿಂಗ್ ಇಲೆವೆನ್ ಹೆಸರಿಸಿದೆ. ಈ ಪ್ಲೇಯಿಂಗ್ ಇಲೆವೆನ್ ನಲ್ಲಿ ನಾಲ್ವರು ಸ್ಫೋಟಕ ದಾಂಡಿಗರು ಕಾಣಿಸಿಕೊಂಡಿದ್ದಾರೆ. ಹೀಗಾಗಿ ಟೀಮ್ ಇಂಡಿಯಾ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯಕ್ಕಾಗಿ ಇಂಗ್ಲೆಂಡ್ ಆಕ್ರಮಣಕಾರಿ ರಣತಂತ್ರ ರೂಪಿಸಿರುವುದು ಸ್ಪಷ್ಟ.

ಏಕೆಂದರೆ ಕಳೆದ ಕೆಲ ವರ್ಷಗಳಿಂದ ಇಂಗ್ಲೆಂಡ್ ‘ಬಾಝ್ ಬಾಲ್’ ಹೆಸರಿನಲ್ಲಿ ಆಕ್ರಮಣಕಾರಿ ಟೆಸ್ಟ್ ಕ್ರಿಕೆಟ್​ಗೆ ಒತ್ತು ನೀಡುತ್ತಾ ಬಂದಿದೆ. ಇದನ್ನು ಭಾರತದ ವಿರುದ್ಧದ ಸರಣಿಯಲ್ಲೂ ಮುಂದುವರೆಸಲು ನಿರ್ಧರಿಸಲಾಗಿದೆ. ಅದರಂತೆ ಇದೀಗ ಆಡುವ ಬಳಗದಲ್ಲಿ ಹೊಡಿಬಡಿ ದಾಂಡಿಗರಿಗೆ ಒತ್ತು ನೀಡಲಾಗಿದೆ.

ಇಲ್ಲಿ ಆರಂಭಿಕರಾಗಿ ಕಣಕ್ಕಿಳಿಯುತ್ತಿರುವುದು ಝಾಕ್ ಕ್ರಾಲಿ ಹಾಗೂ ಬೆನ್ ಡಕೆಟ್. ಕ್ರಾಲಿ ಬಲಗೈ ದಾಂಡಿಗನಾದರೆ, ಡಕೆಟ್ ಎಡಗೈ ಬ್ಯಾಟರ್. ಇಬ್ಬರೂ ಸಹ ಸಿಡಿಲಬ್ಬರದ ಬ್ಯಾಟಿಂಗ್​ಗೆ ಹೆಸರುವಾಸಿ. ಅದರಲ್ಲೂ ಇಬ್ಬರು 5.56 ಸರಾಸರಿಯಲ್ಲಿ ರನ್ ಪೇರಿಸಿದ ದಾಖಲೆ ಹೊಂದಿದ್ದಾರೆ.

ಅಂದರೆ ಈ ಜೋಡಿ ಆರಂಭಿಕರಾಗಿ ಕಣಕ್ಕಿಳಿದಾಗ ಪ್ರತಿ ಓವರ್‌ನಲ್ಲಿ 5.56 ಸರಾಸರಿಯಲ್ಲಿ ರನ್ ಗಳಿಸಿದ್ದಾರೆ. ಹೀಗಾಗಿಯೇ ಟೀಮ್ ಇಂಡಿಯಾ ಬೌಲರ್ ಗಳಿಗೆ ಕ್ರಾಲಿ – ಡಕೆಟ್ ಅಬ್ಬರವನ್ನು ತಡೆಯುವುದೇ ದೊಡ್ಡ ಸವಾಲು.

ಝಾಕ್ ಕ್ರಾಲಿ ಹಾಗೂ ಬೆನ್ ಡಕೆಟ್ ಬಳಿಕ ಕಣಕ್ಕಿಳಿಯಲಿರುವುದು ಒಲೀ ಪೋಪ್ ಹಾಗೂ ಜೋ ರೂಟ್. ಈ ಇಬ್ಬರು ಕ್ರೀಸ್ ಕಚ್ಚಿ ನಿಲ್ಲುವಲ್ಲಿ ನಿಪುಣರು. ಇವರಿಬ್ಬರ ಬಳಿಕ ಬರುವುದು ಹ್ಯಾರಿ ಬ್ರೂಕ್.

ಹ್ಯಾರಿ ಬ್ರೂಕ್ ಕೂಡ ಹೊಡಿಬಡಿ ದಾಂಡಿಗ. ಈವರೆಗೆ 25 ಟೆಸ್ಟ್ ಪಂದ್ಯಗಳನ್ನಾಡಿರುವ ಬ್ರೂಕ್ 2631 ಎಸೆತಗಳಲ್ಲಿ 2339 ರನ್ ಬಾರಿಸಿದ್ದಾರೆ. ಅಂದರೆ ಪ್ರತಿ ಪಂದ್ಯದಲ್ಲಿ 88.91 ರ ಸ್ಟ್ರೈಕ್ ರೇಟ್ ನಲ್ಲಿ ಬ್ಯಾಟ್ ಬೀಸಿದ್ದಾರೆ. ಹೀಗಾಗಿ ಹ್ಯಾರಿ ಬ್ರೂಕ್ ಕ್ರೀಸ್ ನಲ್ಲಿದ್ದರೆ ವೇಗದಲ್ಲಿ ರನ್ ಹರಿದು ಬರಲಿದೆ.

ಬ್ರೂಕ್ ಬಳಿಕ ನಾಯಕ ಬೆನ್ ಸ್ಟೋಕ್ಸ್ ಕಣಕ್ಕಿಳಿಯಲಿದ್ದಾರೆ. ಸ್ಟೋಕ್ಸ್ ಪರಿಸ್ಥಿತಿಗೆ ತಕ್ಕಂತೆ ಬ್ಯಾಟ್ ಬೀಸುವ ದಾಂಡಿಗ. ಹೀಗಾಗಿ ಸ್ಫೋಟಕ ಇನಿಂಗ್ಸ್ ಎದರು ನೋಡಬಹುದು ಅಥವಾ ಕ್ರೀಸ್ ಕಚ್ಚಿ ನಿಂತು ಆಡುವುದನ್ನು ನಿರೀಕ್ಷಿಸಬಹುದು.

ಇನ್ನು 7ನೇ ಕ್ರಮಾಂಕದಲ್ಲಿ ಬ್ಯಾಟ್ ಬೀಸಲಿರುವುದು ಜೇಮಿ ಸ್ಮಿತ್. ವಿಕೆಟ್ ಕೀಪರ್ ಬ್ಯಾಟರ್ ಆಗಿರುವ ಸ್ಮಿತ್ ಸಿಡಿಲಬ್ಬರದ ಬ್ಯಾಟಿಂಗ್​ಗೆ ಫೇಮಸ್. 24 ವರ್ಷದ ಜೇಮಿ ಈವರೆಗೆ 10 ಟೆಸ್ಟ್ ಪಂದ್ಯಗಳನ್ನು ಆಡಿದ್ದು, ಈ ವೇಳೆ 641 ರನ್ ಕಲೆಹಾಕಿದ್ದಾರೆ. ಅಲ್ಲದೆ ಟೆಸ್ ಕ್ರಿಕೆಟ್ ನಲ್ಲಿ 72.42 ಸ್ಟ್ರೈಕ್ ರೇಟ್ ಹೊಂದಿದ್ದಾರೆ. ಹೀಗಾಗಿ ಜೇಮಿ ಸ್ಮಿತ್ ಕಡೆಯಿಂದಲೂ ಸ್ಫೋಟಕ ಬ್ಯಾಟಿಂಗ್ ಅನ್ನು ನಿರೀಕ್ಷಿಸಬಹುದು.

ಪ್ರಸ್ತುತ ಮಾಹಿತಿ ಪ್ರಕಾರ ಮೊದಲ ಟೆಸ್ಟ್ ಪಂದ್ಯ ನಡೆಯಲಿರುವುದು ಬೌಲಿಂಗ್ ಪಿಚ್​ನಲ್ಲಿ. ಅಂದರೆ ಹೆಡಿಂಗ್ಲೆಯಲ್ಲಿ ಬೌಲರ್​ಗಳಿಗೆ ಸಹಕಾರಿಯಾಗುವ ಪಿಚ್ ನಿರ್ಮಿಸಲಾಗಿದೆ ಎಂದು ವರದಿಯಾಗಿದೆ. ಇದಾಗ್ಯೂ ಇಂಗ್ಲೆಂಡ್ ಸ್ಫೋಟಕ ದಾಂಡಿಗರಿಗೆ ಒತ್ತು ನೀಡಿರುವುದರ ಉದ್ದೇಶ ಸ್ಪಷ್ಟ. ಅದರಂತೆ ಇಂಗ್ಲೆಂಡ್, ಟೀಮ್ ಇಂಡಿಯಾ ವಿರುದ್ಧ ಆಕ್ರಮಣಕಾರಿ ಬ್ಯಾಟಿಂಗ್​ ಪ್ರದರ್ಶಿಸಲಿದ್ದಾರೆ.

ಇದಕ್ಕಾಗಿಯೇ ಆರಂಭದಲ್ಲಿ, ಮಧ್ಯಮ ಕ್ರಮಾಂಕದಲ್ಲಿ ಹಾಗೂ ಕೆಳ ಕ್ರಮಾಂಕದಲ್ಲಿ ಸ್ಪೋಟಕ ದಾಂಡಿಗರನ್ನು ಕಣಕ್ಕಿಳಿಸಲು ನಿರ್ಧರಿಸಲಾಗಿದೆ. ಇದರಿಂದ ವೇಗದ ರನ್ ಗತಿಯನ್ನು ಸಮತೋಲನದಲ್ಲಿಡಬಹುದು. ಇಂತಹದೊಂದು ರಣತಂತ್ರದೊಂದಿಗೆ ಕಣಕ್ಕಿಳಿಯಲಿರುವ ಆಂಗ್ಲ ಬ್ಯಾಟರ್​ಗಳನ್ನು ಟೀಮ್ ಇಂಡಿಯಾ ಬೌಲರ್​ಗಳು ನಿಯಂತ್ರಿಸಲಿದ್ದಾರಾ ಕಾದು ನೋಡಬೇಕಿದೆ.

ಇದನ್ನೂ ಓದಿ: ಇಷ್ಟೇನಾ… ನೇಪಾಳ ಆಟಗಾರರು ಪಂದ್ಯವೊಂದಕ್ಕೆ ಪಡೆಯುವ ವೇತನ..!

ಮೊದಲ ಟೆಸ್ಟ್​ಗೆ ಇಂಗ್ಲೆಂಡ್ ಪ್ಲೇಯಿಂಗ್ 11: ಝಾಕ್ ಕ್ರಾಲಿ, ಬೆನ್ ಡಕೆಟ್, ಒಲೀ ಪೋಪ್, ಜೋ ರೂಟ್, ಹ್ಯಾರಿ ಬ್ರೂಕ್, ಬೆನ್ ಸ್ಟೋಕ್ಸ್ (ನಾಯಕ), ಜೇಮಿ, ಕ್ರಿಸ್ ವೋಕ್ಸ್, ಬ್ರೈಡನ್ ಕಾರ್ಸ್, ಜೋಶ್ ಟಂಗ್, ಶೋಯೆಬ್ ಬಶೀರ್.

Published On - 7:24 am, Thu, 19 June 25