IND vs SA: ವೆಂಕಟೇಶ್ ಅಯ್ಯರ್ ಬೌಲ್ ಮಾಡದಿರಲು ಇದುವೇ ಕಾರಣ..!
IND vs SA: ಆರನೇ ಬೌಲರ್ಗೆ ಹೆಚ್ಚಿನ ಪ್ರಾಮುಖ್ಯತೆ ಇದ್ದು, ವೆಂಕಟೇಶ್ ಅದರಲ್ಲಿ ಪ್ರಮುಖ ಪಾತ್ರ ವಹಿಸಲಿದ್ದಾರೆ ಎಂದು ಏಕದಿನ ಸರಣಿ ಆರಂಭಕ್ಕೆ ಒಂದು ದಿನ ಮೊದಲು ನಾಯಕ ರಾಹುಲ್ ಸುದ್ದಿಗೋಷ್ಠಿಯಲ್ಲಿ ಹೇಳಿದ್ದರು.
Updated on:Jan 20, 2022 | 5:39 PM
ಹೊಸ ವರ್ಷ 2022 ರಲ್ಲಿ ಮೊದಲ ಗೆಲುವಿಗಾಗಿ ಟೀಮ್ ಇಂಡಿಯಾ ಇನ್ನೂ ಎದುರು ನೋಡುತ್ತಿದೆ. ಈ ವರ್ಷದ ಆರಂಭದಲ್ಲಿ ದಕ್ಷಿಣ ಆಫ್ರಿಕಾ ಪ್ರವಾಸದಲ್ಲಿ ಟೀಮ್ ಇಂಡಿಯಾ ಸತತ ಎರಡು ಟೆಸ್ಟ್ ಪಂದ್ಯಗಳನ್ನು ಕಳೆದುಕೊಂಡಿತು. ಏಕದಿನ ಸರಣಿಯ ಮೊದಲ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ 31 ರನ್ಗಳಿಂದ ಭಾರತವನ್ನು ಸೋಲಿಸಿತು. ನಾಯಕ ರೋಹಿತ್ ಶರ್ಮಾ ಅನುಪಸ್ಥಿತಿಯಲ್ಲಿ, ಹಂಗಾಮಿ ನಾಯಕ ಕೆಎಲ್ ರಾಹುಲ್ ತಂಡದ ಜವಾಬ್ದಾರಿಯನ್ನು ವಹಿಸಿಕೊಂಡಿದ್ದರು. ಆದರೆ ರಾಹುಲ್ ಬ್ಯಾಟ್ ಮತ್ತು ನಾಯಕತ್ವದಲ್ಲಿ ಪ್ರಭಾವ ಬೀರಲು ವಿಫಲರಾದರು. ವಿಶೇಷವಾಗಿ ಬೌಲಿಂಗ್ ಸಮಯದಲ್ಲಿ, ಅವರ ನಿರ್ಧಾರಗಳು ಎಲ್ಲರನ್ನು ಆಶ್ಚರ್ಯಗೊಳಿಸಿದವು. ಅದರಲ್ಲಿ ಅತ್ಯಂತ ಆಶ್ಚರ್ಯಕರವೆಂದರೆ ಹೊಸ ಆಲ್ ರೌಂಡರ್ ವೆಂಕಟೇಶ್ ಅಯ್ಯರ್ಗೆ ಬೌಲಿಂಗ್ ನೀಡದಿರುವುದು. ರಾಹುಲ್ ಯಾಕೆ ಈ ನಿರ್ಧಾರ ಕೈಗೊಂಡಿದ್ದಾರೆ ಎಂಬುದಕ್ಕೆ ತಂಡದ ಸ್ಟಾರ್ ಓಪನರ್ ಶಿಖರ್ ಧವನ್ ಉತ್ತರ ನೀಡಿದ್ದಾರೆ.
ಕಳೆದ ವರ್ಷ ನ್ಯೂಜಿಲೆಂಡ್ ವಿರುದ್ಧ ಟಿ20 ಅಂತರಾಷ್ಟ್ರೀಯ ಕ್ರಿಕೆಟ್ಗೆ ಪದಾರ್ಪಣೆ ಮಾಡಿದ್ದ ಎಡಗೈ ಬ್ಯಾಟ್ಸ್ಮನ್ ಮತ್ತು ಬಲಗೈ ಮಧ್ಯಮ ವೇಗಿ ವೆಂಕಟೇಶ್ ಅಯ್ಯರ್ಗೆ ಮೊದಲ ಏಕದಿನ ಪಂದ್ಯಕ್ಕೆ ಪದಾರ್ಪಣೆ ಮಾಡುವ ಅವಕಾಶ ನೀಡಲಾಯಿತು. ಇದು ಯುವ ಆಲ್ರೌಂಡರ್ಗೆ ವಿಶೇಷವಾಗಿರಲಿಲ್ಲ. ಕೇವಲ 2 ರನ್ ಗಳಿಸಿ ಔಟ್ ಆಗಿದ್ದರು. ಇನ್ನು ಬೌಲಿಂಗ್ಗೆ ಅವಕಾಶ ಸಿಕ್ಕಿರಲಿಲ್ಲ.
ಟೀಮ್ ಇಂಡಿಯಾ ಸೋಲಿನ ಬಳಿಕ ಈ ಒಂದು ಪ್ರಶ್ನೆ ಮೂಡಿಬಂತು. ವರ್ಚುವಲ್ ಪತ್ರಿಕಾಗೋಷ್ಠಿಯಲ್ಲಿ ಶಿಖರ್ ಧವನ್ ಅವರ ಮುಂದೆ ಈ ಪ್ರಶ್ನೆಯನ್ನು ಕೇಳಲಾಯಿತು. ಪಿಚ್ನಿಂದ ಸ್ಪಿನ್ನರ್ಗಳು ಪಡೆಯುತ್ತಿರುವ ಸಹಾಯದಿಂದಾಗಿ ವೆಂಕಟೇಶ್ ಅವರನ್ನು ಬಳಸಲಾಗಿಲ್ಲ ಎಂದು ಧವನ್ ಸಮಜಾಯಿಷಿ ನೀಡಿದ್ದಾರೆ. ವಿಕೆಟ್ ತಿರುವು ಪಡೆಯುತ್ತಿದ್ದರಿಂದ ಮತ್ತು ಸ್ಪಿನ್ನರ್ಗಳು ಉತ್ತಮವಾಗಿ ಕಾರ್ಯನಿರ್ವಹಿಸುತ್ತಿದ್ದರಿಂದ ವೆಂಕಟೇಶ್ ಅಯ್ಯರ್ ಅವರನ್ನು ಬೌಲಿಂಗ್ಗೆ ಆಯ್ಕೆ ಮಾಡಿಲ್ಲ ಎಂದು ಶಿಖರ್ ಧವನ್ ಹೇಳಿದರು.
ಇದಕ್ಕೂ ಮುನ್ನ, ಆರನೇ ಬೌಲರ್ಗೆ ಹೆಚ್ಚಿನ ಪ್ರಾಮುಖ್ಯತೆ ಇದ್ದು, ವೆಂಕಟೇಶ್ ಅದರಲ್ಲಿ ಪ್ರಮುಖ ಪಾತ್ರ ವಹಿಸಲಿದ್ದಾರೆ ಎಂದು ಏಕದಿನ ಸರಣಿ ಆರಂಭಕ್ಕೆ ಒಂದು ದಿನ ಮೊದಲು ನಾಯಕ ರಾಹುಲ್ ಸುದ್ದಿಗೋಷ್ಠಿಯಲ್ಲಿ ಹೇಳಿದ್ದರು. ಆದರೆ, ಮೊದಲ ಪಂದ್ಯದಲ್ಲಿ ಹಾಗಾಗಲಿಲ್ಲ. ಭಾರತ ಕೇವಲ 68 ರನ್ಗಳಿಗೆ ದಕ್ಷಿಣ ಆಫ್ರಿಕಾದ 3 ವಿಕೆಟ್ಗಳನ್ನು ಕಬಳಿಸಿತು. ಆದರೆ ಅದರ ನಂತರ ಟೆಂಬಾ ಬವುಮಾ ಮತ್ತು ರಾಸಿ ವ್ಯಾನ್ ಡೆರ್ ಡಸ್ಸೆನ್ ನಾಲ್ಕನೇ ವಿಕೆಟ್ಗೆ 204 ರನ್ಗಳ ಜೊತೆಯಾಟವನ್ನು ನಡೆಸಿದರು. ಭಾರತದ ವೇಗಿ ಮತ್ತು ಸ್ಪಿನ್ನರ್ ಜೋಡಿಯನ್ನು ಮುರಿಯಲು ವಿಫಲರಾದರು ಮತ್ತು ಇದು ಪಂದ್ಯದ ಫಲಿತಾಂಶದ ಮೇಲೆ ಪರಿಣಾಮ ಬೀರಿತು.
ಇದನ್ನೂ ಓದಿ: ICC Mens ODI Team: ಐಸಿಸಿ ಏಕದಿನ ತಂಡ ಪ್ರಕಟ: ಟೀಮ್ ಇಂಡಿಯಾದ ಆಟಗಾರರಿಗಿಲ್ಲ ಸ್ಥಾನ
ಇದನ್ನೂ ಓದಿ: IPL 2022: ಹೊಸ ಎರಡು ತಂಡಗಳು ಆಯ್ಕೆ ಮಾಡಿದ 6 ಆಟಗಾರರು ಇವರೇ..!
(IND vs SA: Shikhar Dhawan reveals the reason why Indian Team didn’t use Venkateh Iyer for Bowling in 1st ODI)
Published On - 5:38 pm, Thu, 20 January 22
