ಭಾರತದ ವಿರುದ್ಧದ ಟೆಸ್ಟ್​ ಸರಣಿಗೆ ಬಲಿಷ್ಠ ನ್ಯೂಝಿಲೆಂಡ್ ತಂಡ ಪ್ರಕಟ

ಭಾರತ ವಿರುದ್ಧ ನವೆಂಬರ್ 19 ರಿಂದ ಆರಂಭವಾಗಲಿರುವ ಎರಡು ಪಂದ್ಯಗಳ ಪ್ರತಿಷ್ಠಿತ ಟೆಸ್ಟ್ ಸರಣಿಗಾಗಿ 14 ಸದಸ್ಯರ ಬಲಿಷ್ಠ ನ್ಯೂಝಿಲೆಂಡ್ ತಂಡವನ್ನು ಪ್ರಕಟಿಸಲಾಗಿದೆ. ಈ ತಂಡವನ್ನು ಟಾಮ್ ಲ್ಯಾಥಮ್ ಮುನ್ನಡೆಸಲಿದ್ದಾರೆ. ಇನ್ನು ಈ ತಂಡದಲ್ಲಿ ಸ್ಟಾರ್ ಆಟಗಾರರಾದ ರಚಿನ್ ರವೀಂದ್ರ ಮತ್ತು ಡೆವೊನ್ ಕಾನ್ವೇ ತಂಡದಲ್ಲಿ ಸ್ಥಾನ ಪಡೆದಿದ್ದಾರಾದರೂ, ಗಾಯದ ಸಮಸ್ಯೆಯಿಂದ ಬಳಲುತ್ತಿರುವುದರಿಂದ ಮೊದಲ ಟೆಸ್ಟ್ ಪಂದ್ಯದ ಒಳಗಾಗಿ ತಮ್ಮ ಸಂಪೂರ್ಣ ಫಿಟ್ನೆಸ್ ಸಾಬೀತುಪಡಿಸಬೇಕಾದ ಅನಿವಾರ್ಯತೆಯಲ್ಲಿದ್ದಾರೆ.

ಮೂವರು ಗಾಯಾಳು:

ಸೆಪ್ಟೆಂಬರ್‌ನಲ್ಲಿ ನಡೆದ ಜಾಹೀರಾತು ಚಿತ್ರೀಕರಣದ ವೇಳೆ ಬಲ ಹೆಗಲ ಮೂಳೆ ಜಾರಿ ಗಾಯಗೊಂಡಿದ್ದರಿಂದ ರಚಿನ್ ರವೀಂದ್ರ ಅವರು ಭಾರತ ವಿರುದ್ಧದ ಸೀಮಿತ ಓವರ್‌ಗಳ ಸರಣಿಯಿಂದ ಹೊರಗುಳಿದಿದ್ದರು.

ಇನ್ನು ತರಬೇತಿಯ ವೇಳೆ ಸಹ ಆಟಗಾರ ಮ್ಯಾಟ್ ಹೆನ್ರಿ ಅವರೊಂದಿಗೆ ಡಿಕ್ಕಿ ಹೊಡೆದು ತಲೆಗೆ ಬಲವಾದ ಪೆಟ್ಟು ಮಾಡಿಕೊಂಡಿದ್ದ ಡೆವೊನ್ ಕಾನ್ವೇ ಹಾಗೂ ಮಂಡಿರಜ್ಜು ಗಾಯಕ್ಕೆ ತುತ್ತಾಗಿರುವ ವಿಕೆಟ್ ಕೀಪರ್ ಟಾಮ್ ಬ್ಲಂಡೆಲ್ ಸದ್ಯ ಗುಣಮುಖರಾಗುತ್ತಿದ್ದಾರೆ. ಈ ಮೂವರೂ ವೆಲ್ಲಿಂಗ್ಟನ್‌ನಲ್ಲಿ ನಡೆಯಲಿರುವ ಮೊದಲ ಪಂದ್ಯಕ್ಕೆ ಲಭ್ಯರಿರುವ ವಿಶ್ವಾಸವನ್ನು ಮಂಡಳಿ ವ್ಯಕ್ತಪಡಿಸಿದೆ.

ಮೊದಲ ಟೆಸ್ಟ್ ಸರಣಿ:

ಇತ್ತೀಚೆಗಷ್ಟೇ ಇಂಗ್ಲೆಂಡ್ ಪ್ರವಾಸದ ಮಧ್ಯದಲ್ಲೇ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ನಿವೃತ್ತಿ ಘೋಷಿಸಿದ ದಿಗ್ಗಜ ಬ್ಯಾಟರ್ ಕೇನ್ ವಿಲಿಯಮ್ಸನ್ ಅವರ ಅನುಪಸ್ಥಿತಿಯಲ್ಲಿ ನ್ಯೂಝಿಲೆಂಡ್ ತಂಡ ಕಣಕ್ಕಿಳಿಯುತ್ತಿರುವ ಮೊದಲ ಟೆಸ್ಟ್ ಸರಣಿ ಇದಾಗಿದೆ.

ಇದರೊಂದಿಗೆ ತಂಡದ ಬ್ಯಾಟಿಂಗ್ ವಿಭಾಗಕ್ಕೆ ಹೊಸ ಬಲ ತುಂಬಲು ಮಾಜಿ ಕೀಪರ್ ಬಿಜೆ ವಾಟ್ಲಿಂಗ್ ಅವರು ಹೊಸ ಬ್ಯಾಟಿಂಗ್ ಕೋಚ್ ಆಗಿ ತಂಡವನ್ನು ಸೇರಿಕೊಳ್ಳಲಿದ್ದಾರೆ. ಬೌಲಿಂಗ್ ವಿಭಾಗದಲ್ಲಿ ಜೇಕಬ್ ಡಫಿ ಪಿತೃತ್ವ ರಜೆಯ ಬಳಿಕ ಮರಳಿ ತಂಡ ಸೇರಿದ್ದರೆ, ಬೆನ್ ಸಿಯರ್ಸ್, ಝಾಕ್ ಫೌಲ್ಕ್ಸ್ ಮತ್ತು ವಿಲಿಯಂ ಒರೋಕ್ ಗಾಯ ಹಾಗೂ ವರ್ಕ್‌ಲೋಡ್ ಮ್ಯಾನೇಜ್‌ಮೆಂಟ್ ಕಾರಣದಿಂದ ಹೊರಗುಳಿದಿದ್ದಾರೆ. ಅದರಂತೆ ಭಾರತದ ವಿರುದ್ಧದ ಟೆಸ್ಟ್ ಸರಣಿಗೆ ನ್ಯೂಝಿಲೆಂಡ್ ತಂಡ ಈ ಕೆಳಗಿನಂತಿದೆ…

•  ಟಾಮ್ ಲ್ಯಾಥಮ್ (ನಾಯಕ)
• ಟಾಮ್ ಬ್ಲಂಡೆಲ್ (ವಿಕೆಟ್ ಕೀಪರ್)
• ಡೆವೊನ್ ಕಾನ್ವೇ
•  ರಚಿನ್ ರವೀಂದ್ರ
•  ಡ್ಯಾರಿಲ್ ಮಿಚೆಲ್
•  ಹೆನ್ರಿ ನಿಕೋಲ್ಸ್
•  ವಿಲ್ ಯಂಗ್
• ಗ್ಲೆನ್ ಫಿಲಿಪ್ಸ್
•  ಮಿಚೆಲ್ ಸ್ಯಾಂಟ್ನರ್
• ಮ್ಯಾಟ್ ಹೆನ್ರಿ
•  ಕೈಲ್ ಜೇಮಿಸನ್
•  ಜೇಕಬ್ ಡಫಿ
• ನಾಥನ್ ಸ್ಮಿತ್
•  ಬ್ಲೇರ್ ಟಿಕ್ನರ್

WTC ದೃಷ್ಟಿಯಿಂದ ಮಹತ್ವದ ಸರಣಿ:

ಭಾರತದಲ್ಲೇ ಭಾರತ ತಂಡವನ್ನು 3-0 ಅಂತರದಿಂದ ವೈಟ್‌ವಾಶ್ ಮಾಡಿ ಐತಿಹಾಸಿಕ ಸಾಧನೆ ಮಾಡಿದ್ದ ಕೀವಿಸ್ ಪಡೆಗೆ, ಈ ಬಾರಿ ತವರಿನ ಸರಣಿ ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ ಫೈನಲ್ ತಲುಪಲು ಅತ್ಯಂತ ನಿರ್ಣಾಯಕವಾಗಿದೆ. ಸದ್ಯ ಡಬ್ಲ್ಯುಟಿಸಿ ಅಂಕಪಟ್ಟಿಯಲ್ಲಿ ನ್ಯೂಝಿಲೆಂಡ್ ದ್ವಿತೀಯ ಸ್ಥಾನದಲ್ಲಿದ್ದರೆ, ಭಾರತ ತಂಡ ನಾಲ್ಕನೇ ಸ್ಥಾನದಲ್ಲಿದೆ. ಫೈನಲ್ ರೇಸ್‌ನಲ್ಲಿ ಉಳಿಯಲು ಉಭಯ ತಂಡಗಳಿಗೂ ಈ ಸರಣಿ ಅತ್ಯಂತ ಕಠಿಣ ಸವಾಲಾಗಿದೆ.

ಇದನ್ನೂ ಓದಿ: 12 ತಂಡಗಳ ಟೂರ್ನಿ… ಐಪಿಎಲ್ 2028ಕ್ಕೆ ಮತ್ತೆ 2 ತಂಡಗಳ ಸೇರ್ಪಡೆ!

ಪಂದ್ಯಗಳ ವೇಳಾಪಟ್ಟಿ:

1. ಮೊದಲ ಟೆಸ್ಟ್: ನವೆಂಬರ್ 19–23, ಸೆಲ್ಲೋ ಬೇಸಿನ್ ರಿಸರ್ವ್, ವೆಲ್ಲಿಂಗ್ಟನ್.
2.  ಎರಡನೇ ಟೆಸ್ಟ್: ನವೆಂಬರ್ 27–ಡಿಸೆಂಬರ್ 2, ಹ್ಯಾಗ್ಲಿ ಓವಲ್, ಕ್ರೈಸ್ಟ್‌ಚರ್ಚ್.