‘ರೋಹಿತ್ ಶರ್ಮಾ ಔಟ್’…! ಫೈನಲ್ ಪಂದ್ಯಕ್ಕೂ ಮುನ್ನ ಟೀಂ ಇಂಡಿಯಾ ಅಭಿಮಾನಿಗಳಲ್ಲಿ ಹೆಚ್ಚಿದ ಆತಂಕ
Rohit Sharma's ICC Final Record: ರೋಹಿತ್ ಶರ್ಮಾ ಅವರ ಐಸಿಸಿ ಫೈನಲ್‌ಗಳಲ್ಲಿನ ಕಳಪೆ ದಾಖಲೆ ಭಾರತೀಯ ಅಭಿಮಾನಿಗಳಲ್ಲಿ ಆತಂಕವನ್ನು ಹುಟ್ಟುಹಾಕಿದೆ. ಆರು ಫೈನಲ್ಗಳಲ್ಲಿ ಕೇವಲ 124 ರನ್ ಮಾತ್ರ ಗಳಿಸಿದ್ದಾರೆ. ಈ ಚಾಂಪಿಯನ್ಸ್ ಟ್ರೋಫಿಯಲ್ಲೂ ಅವರ ಪ್ರದರ್ಶನ ನಿರಾಶಾದಾಯಕವಾಗಿದೆ. ನ್ಯೂಜಿಲೆಂಡ್ ವಿರುದ್ಧದ ಫೈನಲ್‌ನಲ್ಲಿ ರೋಹಿತ್ ಅವರ ಪ್ರದರ್ಶನ ಭಾರತದ ಗೆಲುವಿಗೆ ನಿರ್ಣಾಯಕವಾಗಲಿದೆ.
Updated on:Mar 07, 2025 | 7:23 PM
‘ರೋಹಿತ್ ಶರ್ಮಾ ಔಟ್’… ಯಾವುದೇ ಐಸಿಸಿ (ICC) ಟೂರ್ನಮೆಂಟ್‌ನ ಫೈನಲ್ ಪಂದ್ಯ ನಡೆದಾಗಲೆಲ್ಲಾ, ಈ ಮಾತುಗಳು ಕಾಮೆಂಟರಿಯಲ್ಲಿ ಬಹಳ ಬೇಗ ಕೇಳಿಬರುತ್ತವೆ. ಮಾರ್ಚ್ 9, ಭಾನುವಾರ ನ್ಯೂಜಿಲೆಂಡ್ ವಿರುದ್ಧದ ಚಾಂಪಿಯನ್ಸ್ ಟ್ರೋಫಿ (Champions Trophy 2025) ಫೈನಲ್‌ನಲ್ಲಿ ಪ್ರತಿಯೊಬ್ಬ ಭಾರತೀಯ ಅಭಿಮಾನಿಯೂ ಈ ಒಂದು ಹೇಳಿಕೆ ವೀಕ್ಷಕ ವಿವರಣೆಗಾರರಿಂದ ಬರಲೇಬಾರದು ಎಂಬ ಬೇಡಿಕೆಯೊಂದಿಗೆಯೇ ಪಂದ್ಯಕ್ಕೆ ಸಿದ್ಧರಾಗಲಿದ್ದಾರೆ. ವಾಸ್ತವವಾಗಿ ಅಭಿಮಾನಿಗಳ ಈ ಆತಂಕಕ್ಕೆ ಐಸಿಸಿಯ ಫೈನಲ್ ಪಂದ್ಯಗಳಲ್ಲಿ ರೋಹಿತ್ ಶರ್ಮಾ (Rohit Sharma) ಅವರ ಪ್ರದರ್ಶನ ಪ್ರಮುಖ ಕಾರಣವಾಗಿದೆ.
ದುಬೈ ಅಂತರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ನಡೆಯಲಿರುವ ಈ ಪ್ರಶಸ್ತಿ ಪಂದ್ಯದಲ್ಲಿ, ಇದುವರೆಗಿನ ಪ್ರದರ್ಶನದ ಆಧಾರದ ಮೇಲೆ ಟೀಂ ಇಂಡಿಯಾವನ್ನು ಈ ಪ್ರಶಸ್ತಿಗಾಗಿ ಪ್ರಮುಖ ಸ್ಪರ್ಧಿ ಎಂದು ಪರಿಗಣಿಸಲಾಗುತ್ತಿದೆ. ಆದಾಗ್ಯೂ, ನ್ಯೂಜಿಲೆಂಡ್ ಕೂಡ ಪಂದ್ಯಾವಳಿಯಾದ್ಯಂತ ಅದ್ಭುತ ಪ್ರದರ್ಶನ ನೀಡಿದೆ. ಅಲ್ಲದೆ, ನ್ಯೂಜಿಲೆಂಡ್ ವಿರುದ್ಧದ ಫೈನಲ್ಗಳಲ್ಲಿ ಭಾರತದ ದಾಖಲೆಯೂ ಉತ್ತಮವಾಗಿಲ್ಲ. ಅಂದರೆ ಸ್ಪರ್ಧೆ ಪೈಪೋಟಿಯಿಂದ ಕೂಡಿರುವುದರಲ್ಲಿ ಯಾವುದೇ ಅನುಮಾನವಿಲ್ಲ.
ಐಸಿಸಿ ಫೈನಲ್ಗಳಲ್ಲಿ ಕಳಪೆ ದಾಖಲೆ
ಅಂತಹ ಪರಿಸ್ಥಿತಿಯಲ್ಲಿ, ಟೀಂ ಇಂಡಿಯಾ ಈ ಫೈನಲ್ ಗೆಲ್ಲಬೇಕಾದರೆ, ಪ್ರತಿಯೊಬ್ಬ ಆಟಗಾರನಿಂದಲೂ ಅಮೋಘ ಪ್ರದರ್ಶನ ಬೇಕಾಗುತ್ತದೆ. ವಿಶೇಷವಾಗಿ ನಾಯಕ ರೋಹಿತ್ ಶರ್ಮಾ ಅವರ ನಾಯಕತ್ವ ಮತ್ತು ಬ್ಯಾಟಿಂಗ್‌ನಲ್ಲಿ ಅವರ ಸ್ಫೋಟಕ ಪ್ರದರ್ಶನ ತಂಡಕ್ಕೆ ಅತ್ಯಗತ್ಯವಾಗಿರುತ್ತದೆ. ಆದರೆ ಐಸಿಸಿ ಫೈನಲ್ಗಳಲ್ಲಿ ರೋಹಿತ್ ಅವರ ಹಿಂದಿನ ದಾಖಲೆ ಅಭಿಮಾನಿಗಳಲ್ಲಿ ಆತಂಕ ಮೂಡಿಸಿದೆ.
ಟೀಂ ಇಂಡಿಯಾದ ‘ಹಿಟ್‌ಮ್ಯಾನ್’ ಐಸಿಸಿ ಟೂರ್ನಮೆಂಟ್‌ಗಳ ಇತಿಹಾಸದಲ್ಲಿ ಏಕದಿನ ವಿಶ್ವಕಪ್, ಟಿ20 ವಿಶ್ವಕಪ್ ಮತ್ತು ಚಾಂಪಿಯನ್ಸ್ ಟ್ರೋಫಿಯಂತಹ 6 ಫೈನಲ್‌ಗಳನ್ನು ಆಡಿದ್ದಾರೆ ಆದರೆ ಈ 6 ಇನ್ನಿಂಗ್ಸ್‌ಗಳಲ್ಲಿ ಅವರು ಕೇವಲ 124 ರನ್‌ಗಳನ್ನು ಮಾತ್ರ ಕಲೆಹಾಕಿದ್ದಾರೆ. ಒಂದು ಶತಕದ ಬಗ್ಗೆ ಮರೆತುಬಿಡಿ, ಅವರ ಬ್ಯಾಟ್‌ನಿಂದ ಅರ್ಧಶತಕ ಕೂಡ ಬಂದಿಲ್ಲ. ಇದರ ಜೊತೆಗೆ ಒಂದು ಪಂದ್ಯದಲ್ಲಿ ರೋಹಿತ್ಗೆ ಖಾತೆ ತೆರೆಯಲು ಸಾಧ್ಯವಾಗಲಿಲ್ಲ.
ಇದನ್ನೂ ಓದಿ: 6-5=1..; 2017 ರಿಂದ ಐಸಿಸಿ ಟೂರ್ನಿಗಳಲ್ಲಿ ಭಾರತದ ಪ್ರದರ್ಶನ ಹೇಗಿದೆ?
ಈ ಟೂರ್ನಿಯಲ್ಲೂ ಸಪ್ಪೆ ಪ್ರದರ್ಶನ
ಇದಕ್ಕೆ ಪೂರಕವಾಗಿ ಈ ಬಾರಿಯ ಚಾಂಪಿಯನ್ಸ್ ಟ್ರೋಫಿಯಲ್ಲಿಯೂ ಅವರ ಪ್ರದರ್ಶನ ವಿಶೇಷವೇನೂ ಆಗಿಲ್ಲ. ಬಾಂಗ್ಲಾದೇಶ ವಿರುದ್ಧದ ಮೊದಲ ಪಂದ್ಯದಲ್ಲಿ ವೇಗವಾಗಿ 41 ರನ್ ಗಳಿಸಿದ್ದ ರೋಹಿತ್, ಆ ನಂತರ ಯಾವುದೇ ದೊಡ್ಡ ಇನ್ನಿಂಗ್ಸ್ ಆಡಲು ಸಾಧ್ಯವಾಗಿಲ್ಲ. ಪಂದ್ಯಾವಳಿಯ 4 ಇನ್ನಿಂಗ್ಸ್‌ಗಳಲ್ಲಿ ಅವರ ಬ್ಯಾಟ್‌ನಿಂದ ಕೇವಲ 104 ರನ್‌ಗಳು ಬಂದಿವೆ. ಇಂತಹ ಸನ್ನಿವೇಶದಲ್ಲಿ, ಈ ಫೈನಲ್‌ನಲ್ಲಿಯೂ ರೋಹಿತ್ ಎಡವಿದರೆ, ತಂಡ ಹಿನ್ನಡೆ ಅನುಭವಿಸುವುದರಲ್ಲಿ ಯಾವುದೇ ಅನುಮಾನವಿಲ್ಲ.
ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 7:22 pm, Fri, 7 March 25
