T20 World Cup 2026 Result

ಅಂತಾರಾಷ್ಟ್ರೀಯ ಕ್ರಿಕೆಟ್ ಮಂಡಳಿ 2007 ರಲ್ಲಿ ಟಿ20 ವಿಶ್ವಕಪ್ ಅನ್ನು ಪರಿಚಯಿಸಿತು. ಏಕದಿನ ವಿಶ್ವಕಪ್‌ನಂತೆ, ಇದೀಗ ಟಿ20 ವಿಶ್ವಕಪ್ ಕೂಡ ಪ್ರತಿಷ್ಠೆಯ ಕಣವಾಗಿ ಮಾರ್ಪಟ್ಟಿದೆ. ವಿಶೇಷ ಎಂದರೆ ಟಿ20 ವಿಶ್ವಕಪ್​ ಆಗಮನದ ಬಳಿಕವೇ ಕ್ರಿಕೆಟ್​ನಲ್ಲಿ ಹಲವು ನಿಯಮಗಳು ಜಾರಿಯಾದವು. ಟಿ20 ವಿಶ್ವಕಪ್​ನ ಆರಂಭದಲ್ಲಿ ಪಂದ್ಯ ಟೈ ಆದರೆ, ಫಲಿತಾಂಶ ನಿರ್ಧರಿಸಲು ಟೈ-ಬ್ರೇಕರ್ ನಿಯಮವನ್ನು ಪರಿಚಯಿಸಲಾಯಿತು. ಮೊದಲ ಆವೃತ್ತಿಯಲ್ಲಿ ಪಂದ್ಯ ಟೈ ಆದರೆ 'ಬಾಲ್ ಔಟ್' ಎಂಬ ನಿಯಮವಿತ್ತು. ಇದಾದ ಬಳಿಕ ಅದನ್ನು 'ಸೂಪರ್ ಓವರ್'ಗೆ ಬದಲಿಸಲಾಯಿತು. ಇದೀಗ ಮಳೆ ಅಥವಾ ಇತರೆ ಕಾರಣಗಳಿಂದ ಪಂದ್ಯಕ್ಕೆ ಅಡಚಣೆಯಾದರೆ, ಫಲಿತಾಂಶ ನಿರ್ಧರಿಸಲು ಕನಿಷ್ಠ 5-5 ಓವರ್‌ಗಳ ಪಂದ್ಯವಾಡುವುದು ಕಡ್ಡಾಯಗೊಳಿಸಲಾಗಿದೆ. ಇದಾಗ್ಯೂ ಪಂದ್ಯ ಆಯೋಜನೆಗೊಳ್ಳದಿದ್ದರೆ, ಪಂದ್ಯ ರದ್ದುಗೊಳಿಸಿ ಉಭಯ ತಂಡಗಳಿಗೆ ಅಂಕಗಳನ್ನು ಹಂಚಲಾಗುತ್ತದೆ. ಇನ್ನು ಫೈನಲ್ ಪಂದ್ಯಕ್ಕೆ ವರುಣ ಅಡ್ಡಿಪಡಿಸಿದರೆ ಅಥವಾ ಇನ್ಯಾವುದೇ ಕಾರಣದಿಂದ ನಿಗದಿತ ದಿನ ಅಥವಾ ಮೀಸಲು ದಿನದಂದು ಪಂದ್ಯವಾಡಲು ಸಾಧ್ಯವಾಗದಿದ್ದರೆ, ಎರಡೂ ತಂಡಗಳನ್ನು ಜಂಟಿ ಚಾಂಪಿಯನ್ ಎಂದು ಘೋಷಿಸಲಾಗುತ್ತದೆ.