ಮೊಹ್ಸಿನ್ ನಖ್ವಿಗೆ ಕ್ರಿಕೆಟ್​ ಜ್ಞಾನವಿಲ್ಲ… ತಿರುಗಿ ನಿಂತ ಶಾಹಿದ್ ಅಫ್ರಿದಿ

ಏಷ್ಯಾಕಪ್ ವಿವಾದದಿಂದ ಸಖತ್ ಸುದ್ದಿಯಲ್ಲಿರುವ ಪಾಕಿಸ್ತಾನ್ ಕ್ರಿಕೆಟ್ ಮಂಡಳಿ ಅಧ್ಯಕ್ಷ ಮೊಹ್ಸಿನ್ ನಖ್ವಿ ಅವರು ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಬೇಕೆಂದು ಪಾಕ್ ತಂಡದ ಮಾಜಿ ನಾಯಕ ಶಾಹಿದ್ ಅಫ್ರಿದಿ ಆಗ್ರಹಿಸಿದ್ದಾರೆ. ಖಾಸಗಿ ಚಾನೆಲ್​ಗೆ ನೀಡಿದ ಸಂದರ್ಶನದಲ್ಲಿ ಮಾತನಾಡಿದ ಅಫ್ರಿದಿ, ನಖ್ವಿ ಅವರು ಒಂದಾದರೆ ರಾಜಕೀಯದಲ್ಲಿ ಇರಬೇಕು. ಇಲ್ಲಾ ಪಾಕಿಸ್ತಾನ್ ಕ್ರಿಕೆಟ್ ಮಂಡಳಿಯ ಅಧ್ಯಕ್ಷರಾಗಿ ಮುಂದುವರೆಯಬೇಕು. ಎರಡನ್ನೂ ಜೊತೆಯಾಗಿ ತೆಗೆದುಕೊಂಡು ಹೋಗುವುದು ಸರಿಯಲ್ಲ ಎಂದಿದ್ದಾರೆ.

ಏಷ್ಯಾಕಪ್ ಫೈನಲ್​ನಲ್ಲಿ ಟೀಮ್ ಇಂಡಿಯಾಗೆ ಟ್ರೋಫಿ ನೀಡದೇ ಹೊರ ನಡೆದಿರುವ ಮೊಹ್ಸಿನ್ ನಖ್ವಿ ಅವರ ನಡೆಯ ಬಗ್ಗೆ ಏನನ್ನೂ ಪ್ರತಿಕ್ರಿಯಿಸದ ಅಫ್ರಿದಿ, ಪಿಸಿಬಿಯಲ್ಲಿನ ತಮ್ಮ ಸ್ಥಾನದಿಂದ ಅಥವಾ ರಾಜಕೀಯದಲ್ಲಿನ ಅವರ ಪಾತ್ರದಿಂದ ರಾಜೀನಾಮೆ ನೀಡಬೇಕು. ಈ ಎರಡೂ ಪಾತ್ರಗಳಿಗೆ ಪೂರ್ಣ ಗಮನಹರಿಸಬೇಕಾಗುತ್ತದೆ. ಹೀಗಾಗಿ ನಖ್ವಿ ಎರಡು ಹುದ್ದೆಯಲ್ಲಿ ಮುಂದುವರೆಯುವುದು ಸೂಕ್ತವಲ್ಲ ಅಫ್ರಿದಿ ಅಭಿಪ್ರಾಯಪಟ್ಟಿದ್ದಾರೆ.

ನಖ್ವಿ ಸಾಹೇಬರಿಗೆ ನನ್ನ ವಿನಂತಿ ಅಥವಾ ಸಲಹೆ ಏನೆಂದರೆ, ನೀವು ಅಲಂಕರಿಸಿರುವುದು ಎರಡು ಬಹಳ ಮುಖ್ಯವಾದ ಹುದ್ದೆಗಳು. ಈ ಹುದ್ದೆಗಳ ನಿರ್ವಹಣೆಗೆ ಹೆಚ್ಚಿನ ಸಮಯದ ಅಗತ್ಯವಿದೆ. ಪಿಸಿಬಿಯ ಅಧ್ಯಕ್ಷ ಸ್ಥಾನ ಎಂಬುದು ಆಂತರಿಕ ಸಚಿವಾಲಯಕ್ಕಿಂತ ಸಂಪೂರ್ಣವಾಗಿ ಭಿನ್ನವಾದ ಹುದ್ದೆ. ಆದರಿಂದ ಪಾಕಿಸ್ತಾನ್ ಕ್ರಿಕೆಟ್ ಮಂಡಳಿಯ ಅಧ್ಯಕ್ಷ ಸ್ಥಾನವನ್ನು ಪ್ರತ್ಯೇಕವಾಗಿ ಇಡಬೇಕು.

ನೀವು ತೆಗೆದುಕೊಳ್ಳುವ ಒಂದು ದೊಡ್ಡ ನಿರ್ಧಾರವು ಪಾಕಿಸ್ತಾನ್ ಕ್ರಿಕೆಟ್​ಗೆ ಉಪಯುಕ್ತವಾಗಲಿದೆ. ಹೀಗಾಗಿ ಸಾಧ್ಯವಾದಷ್ಟು ಬೇಗ ದೊಡ್ಡ ನಿರ್ಧಾರ ತೆಗೆದುಕೊಳ್ಳಬೇಕು. ಏಕೆಂದರೆ ಪಾಕಿಸ್ತಾನ ಕ್ರಿಕೆಟ್‌ಗೆ ವಿಶೇಷ ಗಮನ ಮತ್ತು ಸಮಯ ಬೇಕು… ನಖ್ವಿ ಸಂಪೂರ್ಣವಾಗಿ ಸಲಹೆಗಾರರನ್ನು ಅವಲಂಭಿಸಿ ಕಾರ್ಯನಿರ್ವಹಿಸಲು ಸಾಧ್ಯವಿಲ್ಲ ಶಾಹಿದ್ ಅಫ್ರಿದಿ ಹೇಳಿದ್ದಾರೆ.

ಇದೇ ವೇಳೆ ಮೊಹ್ಸಿನ್ ನಖ್ವಿ ಅವರಿಗೆ ಕ್ರಿಕೆಟ್ ಬಗ್ಗೆ ಹೆಚ್ಚಿನ ಜ್ಞಾನವಿಲ್ಲ ಎಂದಿರುವ ಅಫ್ರಿದಿ,  ಪಾಕಿಸ್ತಾನ್ ಕ್ರಿಕೆಟ್ ಮಂಡಳಿಯ ಬೆಳವಣಿಗೆ ಮತ್ತು ಉತ್ತಮ ಫಲಿತಾಂಶಕ್ಕಾಗಿ ಜ್ಞಾನವಿರುವ ಜನರನ್ನು ಅಧ್ಯಕ್ಷರನ್ನಾಗಿ ನೇಮಿಸಬೇಕು ಎಂದು ಆಗ್ರಹಿಸಿದ್ದಾರೆ.

ಇದರ ಹೊರತಾಗಿ ಸದಾ ಸಲಹೆಗಾರರನ್ನು ಅವಲಂಭಿಸಿ ಕ್ರಿಕೆಟ್ ಮಂಡಳಿಯನ್ನು ನಡೆಸಲು ಸಾಧ್ಯವಿಲ್ಲ. ಹೀಗಾಗಿ ಮೊಹ್ಸಿನ್ ನಖ್ವಿ ಅವರು ಒಂದಾದರೆ ಪಾಕ್ ಸರ್ಕಾರದ ಸಚಿವರಾಗಿ ಮುಂದುವರೆಯಬೇಕು. ಇಲ್ಲಾ, ಪಾಕಿಸ್ತಾನ್ ಕ್ರಿಕೆಟ್ ಮಂಡಳಿಯ ಅಧ್ಯಕ್ಷರಾಗಿ ಕಾರ್ಯ ನಿರ್ವಹಿಸಬೇಕು. ಇದರ ಹೊರತಾಗಿ ಎರಡು ಹುದ್ದೆಗಳಲ್ಲಿ ಮುಂದುವರೆಯುವುದು ಸೂಕ್ತವಲ್ಲ ಎಂದು ಶಾಹಿದ್ ಅಫ್ರಿದಿ ಹೇಳಿದ್ದಾರೆ.

ಇದನ್ನೂ ಓದಿ: 15 ವರ್ಷಗಳ ಬಳಿಕ ದಿಗ್ಗಜರಿಲ್ಲದೇ ಕಣಕ್ಕಿಳಿದ ಟೀಮ್ ಇಂಡಿಯಾ

ಇತ್ತ ಶಾಹಿದ್ ಅಫ್ರಿದಿಯ ಹೇಳಿಕೆಯ ಹೊರತಾಗಿಯೂ ಮೊಹ್ಸಿನ್ ನಖ್ವಿ ಅವರು ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡುವ ಸಾಧ್ಯತೆಯಿಲ್ಲ. ಏಕೆಂದರೆ ನಖ್ವಿ ಪಾಕಿಸ್ತಾನ್ ಸರ್ಕಾರದ ಆಂತರಿಕ ವ್ಯವಹಾರಗಳ ಸಚಿವರಾಗಿಯೇ ಪಿಸಿಬಿ ಹುದ್ದೆಯನ್ನು ಅಲಂಕರಿಸಿದ್ದರು. ಈ ಹುದ್ದೆಯೊಂದಿಗೆ ಏಷ್ಯನ್ ಕ್ರಿಕೆಟ್ ಕೌನ್ಸಿಲ್​ನ ಮುಖ್ಯಸ್ಥರಾಗಿಯೂ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಹೀಗಾಗಿ ಪಾಕ್ ತಂಡದ ಮಾಜಿ ನಾಯಕನ ಸಲಹೆ ಕಾರಣ ನಖ್ವಿ ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡುವ ಯಾವುದೇ ಸಾಧ್ಯತೆಯಿಲ್ಲ.

Published On - 10:53 am, Thu, 2 October 25