ಭಾರತ ಎ ಪರ ತನುಷ್ ಕೋಟ್ಯಾನ್-ಅನ್ಶುಲ್ ದಾಖಲೆಯ ಜೊತೆಯಾಟ

ನಾರ್ಥಂಪ್ಟನ್​ನ ಕೌಂಟಿ ಗ್ರೌಂಡ್​ನಲ್ಲಿ ನಡೆದ ಇಂಗ್ಲೆಂಡ್ ಲಯನ್ಸ್ ವಿರುದ್ಧದ 2ನೇ ಟೆಸ್ಟ್ ಪಂದ್ಯದಲ್ಲಿ ಭಾರತ ಎ ತಂಡ ಭರ್ಜರಿ ಪ್ರದರ್ಶನ ನೀಡಿದೆ. ಈ ಪಂದ್ಯದಲ್ಲಿ ಟಾಸ್ ಗೆದ್ದ ಇಂಗ್ಲೆಂಡ್ ಲಯನ್ಸ್ ತಂಡವು ಬೌಲಿಂಗ್ ಆಯ್ದುಕೊಂಡಿದ್ದರು. ಅದರಂತೆ ಮೊದಲು ಬ್ಯಾಟ್ ಮಾಡಿದ ಭಾರತ ಎ ಪರ ಕೆಎಲ್ ರಾಹುಲ್ 116 ರನ್​ ಬಾರಿಸಿ ಮಿಂಚಿದ್ದರು.

ಇನ್ನು ಮಧ್ಯಮ ಕ್ರಮಾಂಕದಲ್ಲಿ ಧ್ರುವ್ ಜುರೇಲ್ 52 ರನ್​ಗಳ ಕೊಡುಗೆ ನೀಡಿದ್ದರು. ಈ ಶತಕ ಮತ್ತು ಅರ್ಧಶತಕಗಳ ನೆರವಿನೊಂದಿಗೆ ಭಾರತ ಎ ತಂಡವು ಮೊದಲ ಇನಿಂಗ್ಸ್​ನಲ್ಲಿ 348 ರನ್ ಕಲೆಹಾಕಿತು. ಇದಕ್ಕುತ್ತರವಾಗಿ ಮೊದಲ ಇನಿಂಗ್ಸ್ ಆರಂಭಿಸಿದ ಇಂಗ್ಲೆಂಡ್ ಲಯನ್ಸ್ ತಂಡವು 327 ರನ್​ ಕಲೆಹಾಕಿ ಅಲ್ಪ ಹಿನ್ನಡೆ ಅನುಭವಿಸಿತು.

ದ್ವಿತೀಯ ಇನಿಂಗ್ಸ್​:

21 ರನ್​ಗಳ ಮುನ್ನಡೆಯೊಂದಿಗೆ ದ್ವಿತೀಯ ಇನಿಂಗ್ಸ್ ಆರಂಭಿಸಿದ ಭಾರತ ಎ ತಂಡಕ್ಕೆ ಮತ್ತೊಮ್ಮೆ ಕೆಎಲ್ ರಾಹುಲ್ ಉತ್ತಮ ಆರಂಭ ಒದಗಿಸಿದರು. 64 ಎಸೆತಗಳನ್ನು ಎದುರಿಸಿದ ರಾಹುಲ್ 9 ಫೋರ್​ಗಳೊಂದಿಗೆ 52 ರನ್ ಬಾರಿಸಿ ವಿಕೆಟ್ ಒಪ್ಪಿಸಿದರು. ಇನ್ನು ಮೂರನೇ ಕ್ರಮಾಂಕದಲ್ಲಿ ಬ್ಯಾಟ್ ಬೀಸಿದ ಅಭಿಮನ್ಯು ಈಶ್ವರನ್ 80 ರನ್​ಗಳ ಭರ್ಜರಿ ಇನಿಂಗ್ಸ್ ಆಡಿದರು.

ಇದಾಗ್ಯೂ 268 ರನ್​ ಕಲೆಹಾಕುವಷ್ಟರಲ್ಲಿ ಭಾರತ ಎ ತಂಡವು 7 ವಿಕೆಟ್​ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತು. ಈ ಹಂತದಲ್ಲಿ ಜೊತೆಗೂಡಿದ ತನುಷ್ ಕೋಟ್ಯಾನ್ ಹಾಗೂ ಅನ್ಶುಲ್ ಕಂಬೋಜ್ ಭರ್ಜರಿ ಬ್ಯಾಟಿಂಗ್ ಪ್ರದರ್ಶಿಸಿದರು.

ದಾಖಲೆಯ ಜೊತೆಯಾಟ:

8ನೇ ವಿಕೆಟ್​ಗೆ ಜೊತೆಗೂಡಿದ ತನುಷ್ ಕೋಟ್ಯಾನ್ ಹಾಗೂ ಅನ್ಶುಲ್ ಕಂಬೋಜ್ ಭಾರತ ಎ ತಂಡಕ್ಕೆ ಆಸರೆಯಾಗಿ ನಿಂತರು. ಪರಿಣಾಮ ಎಂಟನೇ ವಿಕೆಟ್​ಗೆ 149 ರನ್​​ಗಳು ಮೂಡಿಬಂತು. ಇದು ಭಾರತ ಎ ಪರ 8ನೇ ವಿಕೆಟ್​ಗೆ ಮೂಡಿಬಂದ ಅತ್ಯಧಿಕ ರನ್​ಗಳ ಮೊತೆಯಾಟ ಎಂಬುದು ವಿಶೇಷ.

ಇದಕ್ಕೂ ಮುನ್ನ 2010 ರಲ್ಲಿ ವೆಸ್ಟ್ ಇಂಡೀಸ್ ‘ಎ’ ವಿರುದ್ಧ ಭಾರತ ಎ ತಂಡದ ಪರ ಕಣಕ್ಕಿಳಿದ ಚೇತೇಶ್ವರ ಪೂಜಾರ ಮತ್ತು ಜಸ್ಕರನ್ ದೀಪ್ ಸಿಂಗ್ ಬಟ್ಟರ್ 137 ರನ್‌ಗಳ ಜೊತೆಯಾಟವಾಡಿರುವುದು ಈ ಹಿಂದಿನ ದಾಖಲೆಯಾಗಿತ್ತು.

ಇದೀಗ 149 ರನ್​ಗಳ ಜೊತೆಯಾಟದೊಂದಿಗೆ ತನುಷ್ ಕೋಟ್ಯಾನ್ ಹಾಗೂ ಅನ್ಶುಲ್ ಕಂಬೋಜ್ ಭಾರತ ಎ ಪರ ಹೊಸ ಇತಿಹಾಸ ನಿರ್ಮಿಸಿದ್ದಾರೆ. ಈ ಜೊತೆಯಾಟದ ನಡುವೆ ತನುಷ್ 108 ಎಸೆತಗಳಲ್ಲಿ 1 ಸಿಕ್ಸ್ ಹಾಗೂ 10 ಫೋರ್​ಗಳೊಂದಿಗೆ 90 ರನ್ ಬಾರಿಸಿ ಅಜೇಯರಾಗಿ ಉಳಿದರೆ, ಅನ್ಶುಲ್ ಕಂಬೋಜ್ ಅಜೇಯ 51 ರನ್ ಬಾರಿಸಿದರು.

ಈ ಮೂಲಕ ಭಾರತ ಎ ತಂಡವು 7 ವಿಕೆಟ್ ನಷ್ಟಕ್ಕೆ 417 ರನ್​ಗಳಿಸಿ ದ್ವಿತೀಯ ಇನಿಂಗ್ಸ್​ ಅನ್ನು ಡಿಕ್ಲೇರ್ ಮಾಡಿಕೊಂಡಿದೆ. ಇದರ ಬೆನ್ನಲ್ಲೇ ದ್ವಿತೀಯ ಇನಿಂಗ್ಸ್ ಆರಂಭಿಸಿರುವ ಇಂಗ್ಲೆಂಡ್ ಲಯನ್ಸ್ ತಂಡವು 32 ರನ್​ಗಳಿಗೆ 3 ವಿಕೆಟ್ ಕಳೆದುಕೊಂಡಿತು. ಇದರೊಂದಿಗೆ ಈ ಪಂದ್ಯದ ದಿನದಾಟ ಮುಕ್ತಾಯಗೊಂಡಿದ್ದು, ಭಾರತ ಎ ಹಾಗೂ ಇಂಗ್ಲೆಂಡ್ ಲಯನ್ಸ್ ನಡುವಣ ದ್ವಿತೀಯ ಟೆಸ್ಟ್ ಪಂದ್ಯ ಕೂಡ ಡ್ರಾನಲ್ಲಿ ಅಂತ್ಯಗೊಂಡಿದೆ.

ಭಾರತ ಎ ಪ್ಲೇಯಿಂಗ್ 11: ಯಶಸ್ವಿ ಜೈಸ್ವಾಲ್ , ಕೆಎಲ್ ರಾಹುಲ್ , ಅಭಿಮನ್ಯು ಈಶ್ವರನ್ (ನಾಯಕ) , ಕರುಣ್ ನಾಯರ್ , ಧ್ರುವ್ ಜುರೆಲ್ ( ​​ವಿಕೆಟ್ ಕೀಪರ್ ) , ನಿತೀಶ್ ಕುಮಾರ್ ರೆಡ್ಡಿ , ಶಾರ್ದೂಲ್ ಠಾಕೂರ್ , ತನುಷ್ ಕೋಟ್ಯಾನ್ , ಅನ್ಶುಲ್ ಕಂಬೋಜ್ , ತುಷಾರ್ ದೇಶಪಾಂಡೆ , ಖಲೀಲ್ ಅಹ್ಮದ್.

ಇದನ್ನೂ ಓದಿ: ಐಪಿಎಲ್​ನ 3 ತಂಡಗಳು ಬ್ಯಾನ್, 2 ಟೀಮ್​​ಗಳು ಕ್ಯಾನ್ಸಲ್

ಇಂಗ್ಲೆಂಡ್ ಲಯನ್ಸ್ ಪ್ಲೇಯಿಂಗ್ 11: ಟಾಮ್ ಹೈನ್ಸ್ , ಬೆನ್ ಮೆಕಿನ್ನಿ , ಎಮಿಲಿಯೊ ಗೇ , ಜೋರ್ಡಾನ್ ಕಾಕ್ಸ್ , ಜೇಮ್ಸ್ ರೆವ್ (ನಾಯಕ) , ಮ್ಯಾಕ್ಸ್ ಹೋಲ್ಡನ್ , ಜಾರ್ಜ್ ಹಿಲ್ , ಕ್ರಿಸ್ ವೋಕ್ಸ್ , ಫರ್ಹಾನ್ ಅಹ್ಮದ್ , ಜೋಶ್ ಟಂಗ್ , ಎಡ್ವರ್ಡ್ ಜ್ಯಾಕ್.