ದಿ ಹಂಡ್ರೆಡ್ ಲೀಗ್ನಲ್ಲಿ ಪಾಕ್ ಆಟಗಾರರು ಅನ್ಸೋಲ್ಡ್; ಐಪಿಎಲ್ ಫ್ರಾಂಚೈಸಿಗಳ ಮೇಲೆ ಕೇಳಿಬಂತು ಆರೋಪ
The Hundred 2025 Draft: 2025ರ ದಿ ಹಂಡ್ರೆಡ್ ಲೀಗ್ನ ಆಟಗಾರರ ಡ್ರಾಫ್ಟ್‌ನಲ್ಲಿ ಯಾವುದೇ ಪಾಕಿಸ್ತಾನಿ ಆಟಗಾರ ಆಯ್ಕೆಯಾಗಿಲ್ಲ. ಪುರುಷರ ಮತ್ತು ಮಹಿಳೆಯರ ವಿಭಾಗದಲ್ಲಿ ನೋಂದಾಯಿಸಿಕೊಂಡಿದ್ದ 45ಕ್ಕೂ ಹೆಚ್ಚು ಪಾಕಿಸ್ತಾನಿ ಆಟಗಾರರು ಯಾವುದೇ ತಂಡದಿಂದ ಆಯ್ಕೆಯಾಗದೆ ಉಳಿದಿದ್ದಾರೆ. ಐಪಿಎಲ್ ಫ್ರಾಂಚೈಸಿಗಳ ಹೂಡಿಕೆಯಿಂದಾಗಿ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ ಎಂಬ ಅನುಮಾನವಿದೆ. SA20 ಲೀಗ್ನಲ್ಲೂ ಇದೇ ರೀತಿಯ ಪರಿಸ್ಥಿತಿ ಇದೆ. ಈ ಘಟನೆಯು ಪಾಕಿಸ್ತಾನ ಕ್ರಿಕೆಟ್ ಅಭಿಮಾನಿಗಳಲ್ಲಿ ನಿರಾಶೆಯನ್ನುಂಟು ಮಾಡಿದೆ.
Updated on:Mar 13, 2025 | 3:52 PM
ದಿ ಹಂಡ್ರೆಡ್ (The Hundred) ಲೀಗ್ನ ಡ್ರಾಫ್ಟ್ ಸಿದ್ಧವಾಗಿದೆ. ಅಚ್ಚರಿಯ ಸಂಗತಿಯೆಂದರೆ ಈ ಇಂಗ್ಲಿಷ್ ಲೀಗ್ನಲ್ಲಿ ಒಬ್ಬನೇ ಒಬ್ಬ ಪಾಕಿಸ್ತಾನಿ (Pakistan) ಆಟಗಾರನೂ ಮಾರಾಟವಾಗಿಲ್ಲ. ದಿ ಹಂಡ್ರೆಡ್ ಲೀಗ್ಗೆ 45 ಆಟಗಾರರು ತಮ್ಮ ಹೆಸರುಗಳನ್ನು ನೋಂದಾಯಿಸಿಕೊಂಡಿದ್ದರು. ಆದರೆ ಒಂದೇ ಒಂದು ತಂಡವೂ ಅವರನ್ನು ಖರೀದಿಸುವ ಮನಸು ಮಾಡಿಲ್ಲ. ನಸೀಮ್ ಶಾ, ಶಾದಾಬ್ ಖಾನ್, ಹಸನ್ ಅಲಿ, ಶಾನ್ ಮಸೂದ್, ಸೈಮ್ ಅಯೂಬ್ ಅವರಂತಹ ಆಟಗಾರರು ದಿ ಹಂಡ್ರೆಡ್‌ನಲ್ಲಿ ಆಡಲು ಬಯಸಿದ್ದರು. ಆದರೆ ಯಾವ ಫ್ರಾಂಚೈಸಿಯೂ ಅವರನ್ನು ಖರೀದಿಸಿಲ್ಲ. ಪುರುಷ ಕ್ರಿಕೆಟಿಗರು ಮಾತ್ರವಲ್ಲ, ಮಹಿಳೆಯರ ದಿ ಹಂಡ್ರೆಡ್ ಲೀಗ್ನ ಡ್ರಾಫ್ಟ್‌ನಲ್ಲಿದ್ದ ಐವರು ಪಾಕಿಸ್ತಾನಿ ಮಹಿಳಾ ಆಟಗಾರ್ತಿಯರು ಸಹ ಖರೀದಿಯಾಗಿಲ್ಲ. ಈ ಸುದ್ದಿ ಪಾಕಿಸ್ತಾನ ಕ್ರಿಕೆಟ್ ಅಭಿಮಾನಿಗಳಿಗೆ ತುಂಬಾ ನಿರಾಶೆಯನ್ನುಂಟು ಮಾಡಿದೆ.
ಒಬ್ಬ ಆಟಗಾರನು ಮಾರಾಟವಾಗಲಿಲ್ಲ
2025 ರ ‘ದಿ ಹಂಡ್ರೆಡ್’ ಸೀಸನ್‌ನ ಆಟಗಾರರ ಡ್ರಾಫ್ಟ್‌ನಲ್ಲಿ ಯಾವುದೇ ಪಾಕಿಸ್ತಾನಿ ಆಟಗಾರನಿಗೆ ಸ್ಥಾನ ಸಿಕ್ಕಿಲ್ಲ. ಪುರುಷರ ಡ್ರಾಫ್ಟ್‌ನಲ್ಲಿ ಪಾಕಿಸ್ತಾನದ 45 ಆಟಗಾರರು ನೋಂದಾಯಿಸಿಕೊಂಡಿದ್ದರು, ಆದರೆ ಅವರಲ್ಲಿ ಯಾರನ್ನೂ ತಂಡಗಳು ಆಯ್ಕೆ ಮಾಡಿಲ್ಲ. ಈ ನಿರ್ಧಾರ ಸ್ವಲ್ಪ ಆಶ್ಚರ್ಯಕರವಾಗಿದೆ, ಏಕೆಂದರೆ ಕಳೆದ ಆವೃತ್ತಿಯ ‘ದಿ ಹಂಡ್ರೆಡ್’ ನಲ್ಲಿ ಪಾಕಿಸ್ತಾನಿ ಆಟಗಾರರು ಉತ್ತಮ ಪ್ರದರ್ಶನ ನೀಡಿದ್ದರು. ಒಸಾಮಾ ಮಿರ್, ಹರಿಸ್ ರೌಫ್, ಇಮಾದ್ ವಾಸಿಮ್ ಮತ್ತು ಶಾಹೀನ್ ಅಫ್ರಿದಿಯಂತಹ ಆಟಗಾರರು ಈ ಲೀಗ್ನಲ್ಲಿ ಆಡಿದ್ದರು.
ಐಪಿಎಲ್ ಫ್ರಾಂಚೈಸಿಗಳ ಪ್ರಭಾವ?
ವಾಸ್ತವವಾಗಿ ಈ ವರ್ಷ ‘ದಿ ಹಂಡ್ರೆಡ್’ ನಲ್ಲಿ ದೊಡ್ಡ ಬದಲಾವಣೆಯಾಗಿದೆ. ಇಂಗ್ಲೆಂಡ್ ಮತ್ತು ವೇಲ್ಸ್ ಕ್ರಿಕೆಟ್ ಮಂಡಳಿ (ECB) ಫ್ರಾಂಚೈಸಿಗಳಲ್ಲಿ ಹೂಡಿಕೆ ಮಾಡಲು ಹೊರಗಿನವರಿಗೆ ಆಹ್ವಾನ ನೀಡಿತ್ತು. ಆ ಪ್ರಕಾರ, ಲೀಗ್ನಲ್ಲಿ ಆಡುತ್ತಿರುವ 8 ತಂಡಗಳ ಪೈಕಿ, ನಾಲ್ಕು ತಂಡಗಳಲ್ಲಿ ಐಪಿಎಲ್ ಫ್ರಾಂಚೈಸಿಗಳು ಹೂಡಿಕೆ ಮಾಡಿವೆ. ಹೀಗಾಗಿ ಐಪಿಎಲ್ ಫ್ರಾಂಚೈಸಿಗಳು ಪಾಕಿಸ್ತಾನ ಆಟಗಾರರನ್ನು ಖರೀದಿಸದಂತೆ ತಡೆದಿವೆ ಎಂಬ ಆರೋಪ ಕೇಳಿಬರುತ್ತಿದೆ. ಆದರೆ ಇಲ್ಲಿರುವ ದೊಡ್ಡ ಪ್ರಶ್ನೆಯೆಂದರೆ, ಐಪಿಎಲ್ ತಂಡಗಳ ಒಡೆತನದಲ್ಲಿಲ್ಲದ ಇತರ ನಾಲ್ಕು ತಂಡಗಳು ಪಾಕಿಸ್ತಾನಿ ಆಟಗಾರರನ್ನು ಏಕೆ ಖರೀದಿಸಲಿಲ್ಲ ಎಂಬುದು.
ಇದನ್ನೂ ಓದಿ: Champions Trophy 2025: ಒಂದು ಪಂದ್ಯವನ್ನು ಗೆಲ್ಲದ ಪಾಕಿಸ್ತಾನಕ್ಕೆ ಸಿಕ್ಕಿದ್ದು ಎಷ್ಟು ಕೋಟಿ?
SA20 ಲೀಗ್ನಲ್ಲೂ ಇದೆ ಕತೆ
ದಕ್ಷಿಣ ಆಫ್ರಿಕಾದ SA20 ಲೀಗ್‌ನಲ್ಲಿರುವ ಎಲ್ಲಾ ಆರು ತಂಡಗಳು ಸಹ ಐಪಿಎಲ್ ಫ್ರಾಂಚೈಸಿಗಳ ಒಡೆತನದಲ್ಲಿವೆ. ಈ ಲೀಗ್ನಲ್ಲೂ ಇಲ್ಲಿಯವರೆಗೆ ಒಬ್ಬ ಪಾಕಿಸ್ತಾನಿ ಆಟಗಾರನೂ ಈ ಲೀಗ್ನಲ್ಲಿ ಸ್ಥಾನ ಪಡೆದಿಲ್ಲ. ‘ದಿ ಹಂಡ್ರೆಡ್’ ನಲ್ಲಿ ಐಪಿಎಲ್ ಫ್ರಾಂಚೈಸಿಗಳು ಹೂಡಿಕೆ ಮಾಡಿದ ನಂತರ, ಪಾಕಿಸ್ತಾನಿ ಆಟಗಾರರ ಮೇಲೆ ನಿಷೇಧ ಹೇರಬಹುದೆಂಬ ಭಯವಿತ್ತು. ಆದಾಗ್ಯೂ, ಪಾಕಿಸ್ತಾನಿ ಆಟಗಾರರ ಭಾಗವಹಿಸುವಿಕೆಯ ಮೇಲೆ ಯಾವುದೇ ಪರಿಣಾಮ ಬೀರುವುದಿಲ್ಲ ಎಂದು ಇಸಿಬಿ ಅಧ್ಯಕ್ಷ ರಿಚರ್ಡ್ ಗೌಲ್ಡ್ ಕಳೆದ ತಿಂಗಳು ಸ್ಪಷ್ಟಪಡಿಸಿದ್ದರು. ಆದರೆ ಡ್ರಾಫ್ಟ್ ನಂತರ, ಈಗ ಪಾಕಿಸ್ತಾನಿ ಅಭಿಮಾನಿಗಳು ಈ ಬಗ್ಗೆ ಪ್ರಶ್ನೆಗಳನ್ನು ಎತ್ತುತ್ತಿದ್ದಾರೆ.
ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 3:50 pm, Thu, 13 March 25
