The Hundred: 14 ಎಸೆತಗಳಲ್ಲಿ 44 ರನ್: ಜಾನಿ ಬೈರ್ಸ್ಟೋವ್ ಅಬ್ಬರಕ್ಕೆ ನಲುಗಿದ ಎದುರಾಳಿ ತಂಡ
Jonny Bairstow: ಸದ್ಯ ಉತ್ತಮ ಫಾರ್ಮ್ನಲ್ಲಿರುವ ಜಾನಿ ಬೈರ್ಸ್ಟೋವ್ ಭಾರತದ ವಿರುದ್ದದ ಟೆಸ್ಟ್ ಸರಣಿಯಲ್ಲೂ ಸ್ಥಾನ ಪಡೆದಿದ್ದಾರೆ. ಆಗಸ್ಟ್ 4 ರಿಂದ ಶುರುವಾಗಲಿರುವ ಐದು ಪಂದ್ಯಗಳ ಟೆಸ್ಟ್ ಸರಣಿಗಾಗಿ ಬೈರ್ಸ್ಟೋವ್ ಶೀಘ್ರದಲ್ಲೇ ಇಂಗ್ಲೆಂಡ್ ತಂಡವನ್ನು ಕೂಡಿಕೊಳ್ಳಲಿದ್ದಾರೆ.
Updated on:Jul 28, 2021 | 3:49 PM
ದಿ ಹಂಡ್ರೆಡ್ ಲೀಗ್ (The Hundred) ನಲ್ಲಿ ಬ್ಯಾಟರ್ಗಳ ಅಬ್ಬರ ಮುಂದುವರೆದಿದೆ. ಮಂಗಳವಾರ ನಡೆದ ವೆಲ್ಷ್ ಫೈರ್ (Welsh Fire) ಹಾಗೂ ಸರ್ದನ್ ಬ್ರೇವ್ ನಡುವಣ ಪಂದ್ಯವು ರೋಚಕ ಹೋರಾಟಕ್ಕೆ ಸಾಕ್ಷಿಯಾಗಿತ್ತು. 100 ಎಸೆತಗಳ ಈ ಪಂದ್ಯದಲ್ಲಿ ಟಾಸ್ ಗೆದ್ದ ಬ್ರೇವ್ ತಂಡದ ನಾಯಕ ಜೇಮ್ಸ್ ವಿನ್ಸ್ ಬೌಲಿಂಗ್ ಆಯ್ದುಕೊಂಡರು. ಅದರಂತೆ ಇನಿಂಗ್ಸ್ ಆರಂಭಿಸಿದ ವೆಲ್ಫ್ ಫೈರ್ ತಂಡದ ನಾಯಕ ಜಾನಿ ಬೈರ್ಸ್ಟೋವ್ (Jonny Bairstow) ಹಾಗೂ ಟಾಮ್ ಬಾಂಟನ್ ಸ್ಪೋಟಕ ಆರಂಭ ಒದಗಿಸಿದರು. ಮೊದಲ ವಿಕೆಟ್ಗೆ 43 ರನ್ಗಳ ಜೊತೆಯಾಟವಾಡಿದ ಈ ಜೋಡಿ ಉತ್ತಮ ಮೊತ್ತಕ್ಕಾಗಿ ಭದ್ರ ಬುನಾದಿ ಹಾಕಿಕೊಟ್ಟರು. ಇದೇ ವೇಳೆ ಬಾಂಟನ್ (31) ಜಾಕ್ ಎನ್ಟೊಟ್ ಎಸೆತದಲ್ಲಿ ಕ್ಲೀನ್ ಬೌಲ್ಡ್ ಆಗಿ ಹೊರನಡೆದರು.
ಈ ವೇಳೆ ಕ್ರೀಸ್ಗೆ ಆಗಮಿಸಿದ ಡಕ್ಕೆಟ್, ಜಾನಿ ಬೈರ್ಸ್ಟೋವ್ಗೆ ಉತ್ತಮ ಸಾಥ್ ನೀಡಿದರು. ಪರಿಣಾಮ ಒಂದೆಡೆ ಬೈರ್ ಸ್ಟೋವ್ ಅಬ್ಬರಿಸಲಾರಂಭಿಸಿದರು. ಮೊದಲ 25 ಎಸೆತಗಳಲ್ಲಿ 26 ರನ್ ಮಾತ್ರಗಳಿಸಿದ್ದ ಬೈರ್ಸ್ಟೋವ್ ಉಳಿದ 14 ಎಸೆತಗಳಲ್ಲಿ 44 ರನ್ ಸಿಡಿಸಿದರು. ಅದರಂತೆ 39 ಎಸೆತಗಳಲ್ಲಿ 72 ರನ್ ಬಾರಿಸಿದರು. ಈ ಸ್ಪೋಟಕ ಇನಿಂಗ್ಸ್ನಲ್ಲಿ 5 ಭರ್ಜರಿ ಸಿಕ್ಸರ್ ಹಾಗೂ ಐದು ಬೌಂಡರಿಗಳು ಮೂಡಿಬಂದಿತ್ತು. ಇನ್ನೊಂದೆಡೆ ಡಕ್ಕೆಟ್ (53) ಕೂಡ ಅರ್ಧಶತಕ ಬಾರಿಸುವುದರೊಂದಿಗೆ ವೆಲ್ಷ್ ಫೈರ್ ತಂಡದ ಮೊತ್ತವು 100 ಎಸೆತಗಳಿಗೆ 4 ವಿಕೆಟ್ ನಷ್ಟದೊಂದಿಗೆ 164 ಕ್ಕೆ ಬಂದು ನಿಂತಿತು.
ಈ ಸವಾಲಿನ ಮೊತ್ತವನ್ನು ಬೆನ್ನತ್ತಿದ ಸದರ್ನ್ ಬ್ರೇವ್ ತಂಡಕ್ಕೆ ಕ್ವಿಂಟನ್ ಡಿಕಾಕ್ ಹಾಗೂ ಜೇಮ್ಸ್ ವಿನ್ಸ್ ಬಿರುಸಿನ ಆರಂಭ ಒದಗಿಸಿದರು. ಡಿ ಕಾಕ್ 7 ಎಸೆತಗಳಲ್ಲಿ 21 ರನ್ ಬಾರಿಸಿದರೆ ಮತ್ತು ವಿನ್ಸ್ 27 ಎಸೆತಗಳಲ್ಲಿ 40 ರನ್ ಚಚ್ಚಿದರು. ಇದೇ ವೇಳೆ ದಾಳಿಗಿಳಿದ ಜಿಮ್ಮಿ ನೀಶಮ್ (Jimmy Neesham) ಸರ್ದನ್ ಅಬ್ಬರಕ್ಕೆ ಬ್ರೇಕ್ ಹಾಕಿದರು. 20 ಎಸೆತಗಳಲ್ಲಿ ಕೇವಲ 5 ರನ್ ನೀಡಿ ಪ್ರಮುಖ 3 ವಿಕೆಟ್ ಉರುಳಿಸಿದ ನೀಶಮ್ ಸರ್ದನ್ ತಂಡಕ್ಕೆ ಆಘಾತ ನೀಡಿದರು. ಪರಿಣಾಮ ನಿಗದಿತ 100 ಎಸೆತಗಳಲ್ಲಿ ಸರ್ದನ್ ಬ್ರೇವ್ ತಂಡ 147 ರನ್ಗಳಿಸಲಷ್ಟೇ ಶಕ್ತರಾದರು. ಇದರೊಂದಿಗೆ ವೆಲ್ಷ್ ಫೈರ್ ತಂಡವು 18 ರನ್ಗಳ ಭರ್ಜರಿ ಜಯ ಸಾಧಿಸಿತು.
ಸದ್ಯ ಉತ್ತಮ ಫಾರ್ಮ್ನಲ್ಲಿರುವ ಜಾನಿ ಬೈರ್ಸ್ಟೋವ್ ಭಾರತದ ವಿರುದ್ದದ ಟೆಸ್ಟ್ ಸರಣಿಯಲ್ಲೂ ಸ್ಥಾನ ಪಡೆದಿದ್ದಾರೆ. ಆಗಸ್ಟ್ 4 ರಿಂದ ಶುರುವಾಗಲಿರುವ ಐದು ಪಂದ್ಯಗಳ ಟೆಸ್ಟ್ ಸರಣಿಗಾಗಿ ಬೈರ್ಸ್ಟೋವ್ ಶೀಘ್ರದಲ್ಲೇ ಇಂಗ್ಲೆಂಡ್ ತಂಡವನ್ನು ಕೂಡಿಕೊಳ್ಳಲಿದ್ದಾರೆ.
ಭಾರತ ವಿರುದ್ಧದ ಮೊದಲ ಎರಡು ಟೆಸ್ಟ್ ಪಂದ್ಯಗಳಿಗೆ ಇಂಗ್ಲೆಂಡ್ ತಂಡ ಹೀಗಿದೆ:ಜೋ ರೂಟ್, ಜೇಮ್ಸ್ ಆಂಡರ್ಸನ್, ಜಾನಿ ಬೈರ್ಸ್ಟೋವ್, ಡಾಮ್ ಬೆಸ್, ಸ್ಟುವರ್ಟ್ ಬ್ರಾಡ್, ರೋರಿ ಬರ್ನ್ಸ್ , ಜೋಸ್ ಬಟ್ಲರ್, ಝ್ಯಾಕ್ ಕ್ರಾವ್ಲೀ , ಸ್ಯಾಮ್ ಕರ್ರನ್, ಹಸೀಬ್ ಹಮೀದ್, ಡ್ಯಾನ್ ಲಾರೆನ್ಸ್ , ಜಾಕ್ ಲೀಚ್ , ಓಲ್ಲೀ ಪೋಪ್ , ಓಲ್ಲೀ ರಾಬಿನ್ಸನ್, ಡಾಮ್ ಸಿಬ್ಲಿ , ಬೆನ್ ಸ್ಟೋಕ್ಸ್ , ಮಾರ್ಕ್ ವುಡ್.
ಇದನ್ನೂ ಓದಿ: Dhananjay: ಡೇಂಜರಸ್ ಡಾಲಿ ಇಸ್ ಬ್ಯಾಕ್: ಹೊಸ ಚಿತ್ರದ ಬಿಡುಗಡೆ ದಿನಾಂಕ ಘೋಷಣೆ
ಇದನ್ನೂ ಓದಿ: Rahul Dravid: ಶ್ರೀಲಂಕಾ ನಾಯಕನ ಜೊತೆ ರಾಹುಲ್ ದ್ರಾವಿಡ್ ಮಾತನಾಡಿದ್ದೇನು? ಇಲ್ಲಿದೆ ಉತ್ತರ
(The Hundred: Jonny Bairstow heroics power Welsh Fire to victory)
Published On - 3:47 pm, Wed, 28 July 21
