India Hockey Team: ಭಾರತ ಹಾಕಿ ತಂಡಕ್ಕೆ ಭವ್ಯ ಸ್ವಾಗತ

ಪ್ಯಾರಿಸ್ ಒಲಿಂಪಿಕ್ಸ್​ನಲ್ಲಿ ಕಂಚಿನ ಪದಕ ಗೆದ್ದು ತವರಿಗೆ ಹಿಂತಿರುಗಿರುವ ಭಾರತ ಹಾಕಿ ತಂಡಕ್ಕೆ ಭವ್ಯ ಸ್ವಾಗತ ಕೋರಲಾಗಿದೆ. ಪ್ಯಾರಿಸ್​​ನಿಂದ ನವದೆಹಲಿಯ ಇಂದಿರಾ ಗಾಂಧಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಬಂದಿಳಿದ ಭಾರತೀಯ ಹಾಕಿ ಪಡೆಯನ್ನು ಹೂವಿನ ಹಾರದೊಂದಿಗೆ ಸ್ವಾಗತಿಸಲಾಯಿತು. ಇನ್ನು ಆಟಗಾರರು ವಿಮಾನ ನಿಲ್ದಾಣದ ಹೊರಗೆ ಬರುತ್ತಿದ್ದಂತೆ ಡೋಲು ಬಜಾನಾ ಶುರು ಮಾಡಲಾಗಿದ್ದು, ಈ ವೇಳೆ ಕೆಲ ಆಟಗಾರರು ಭಾಂಗ್ರಾ ನೃತ್ಯದೊಂದಿಗೆ ಸಂಭ್ರಮಿಸಿದರು. ಇದೇ ವೇಳೆ ವಿಮಾನ ನಿಲ್ದಾಣದ ಬಳಿ ನೆರೆದಿದ್ದ ಪ್ರೇಕ್ಷಕರು ಕೂಡ ಭಾರತೀಯ ಆಟಗಾರರನ್ನು ಹುರಿದುಂಬಿಸಿದರು. ಇದೀಗ ಸಂಭ್ರಮದ ವಿಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ.

Our Heroes are back!

Current mood: 🥳🎊🕺🏻🥁#BronzeMedalists #BackHome #HockeyIndia pic.twitter.com/MA78WcZS7q

— Hockey India (@TheHockeyIndia) August 10, 2024

ಪ್ಯಾರಿಸ್ ಒಲಿಂಪಿಕ್ಸ್​ನಲ್ಲಿ ಅತ್ಯದ್ಭುತ ಪ್ರದರ್ಶನ ನೀಡಿದ್ದ ಭಾರತೀಯ ಹಾಕಿ ತಂಡ ಸ್ಪೇನ್ ತಂಡವನ್ನು 2-1 ಅಂತರದಿಂದ ಮಣಿಸಿ ಕಂಚಿನ ಪದಕ ಗೆದ್ದುಕೊಂಡಿದೆ. ವಿಶೇಷ ಎಂದರೆ ಇದು ಒಲಿಂಪಿಕ್ಸ್​ನಲ್ಲಿ ಭಾರತ ಹಾಕಿ ತಂಡದ 13ನೇ ಪದಕವಾಗಿದೆ. ಹಾಗೆಯೇ 1972ರ ನಂತರ ಇದೇ ಮೊದಲ ಬಾರಿಗೆ ಭಾರತ ಹಾಕಿ ತಂಡವು ಒಲಿಂಪಿಕ್ಸ್‌ನಲ್ಲಿ ಸತತ ಎರಡನೇ ಪದಕ ಗೆದ್ದುಕೊಂಡಿದೆ.

ಇದನ್ನೂ ಓದಿ: Aman Sehrawat: ಒಲಿಂಪಿಕ್ಸ್​ನಲ್ಲಿ ಹೊಸ ಇತಿಹಾಸ ಬರೆದ ಅಮನ್ ಸೆಹ್ರಾವತ್

ಭಾರತೀಯ ಹಾಕಿ ತಂಡವು ಒಲಿಂಪಿಕ್ಸ್​ನಲ್ಲಿ ಮೊದಲ ಬಾರಿಗೆ ಪದಕ ಗೆದ್ದಿದ್ದು 1928 ರಲ್ಲಿ. ಅಲ್ಲಿಂದ ಶುರುವಾದ ಪದಕ ಬೇಟೆ ಇದೀಗ ಪ್ಯಾರಿಸ್ ಒಲಿಂಪಿಕ್ಸ್​ ವರೆಗೂ ಬಂದು ನಿಂತಿದೆ. ಅದರಲ್ಲೂ ಕಳೆದ ಬಾರಿ ಕಂಚಿನ ಪದಕ ಗೆದ್ದಿದ್ದ ಟೀಮ್ ಇಂಡಿಯಾ ಈ ಬಾರಿ ಕೂಡ ಮೂರನೇ ಸ್ಥಾನ ಕಾಯ್ದುಕೊಳ್ಳುವಲ್ಲಿ ಯಶಸ್ವಿಯಾಗಿದ್ದಾರೆ. ಈ ಮೂಲಕ ಬ್ಯಾಕ್ ಟು ಬ್ಯಾಕ್ ಕಂಚಿನ ಪದಕವನ್ನು ಗೆದ್ದುಕೊಂಡಿದೆ.

ಒಲಿಂಪಿಕ್ಸ್​ನಲ್ಲಿ​ ಭಾರತೀಯ ಹಾಕಿ ತಂಡದ ಸಾಧನೆ:

• ಚಿನ್ನ – ಪುರುಷರ ಹಾಕಿ – ಆಮ್​ಸ್ಟರ್​ಡ್ಯಾಮ್ 1928
• ಚಿನ್ನ – ಪುರುಷರ ಹಾಕಿ – ಲಾಸ್ ಏಂಜಲೀಸ್ 1932
• ಚಿನ್ನ – ಪುರುಷರ ಹಾಕಿ – ಬರ್ಲಿನ್ 1936
• ಚಿನ್ನ – ಪುರುಷರ ಹಾಕಿ – ಲಂಡನ್ 1948
• ಚಿನ್ನ – ಪುರುಷರ ಹಾಕಿ – ಹೆಲ್ಸಿಂಕಿ 1952
• ಚಿನ್ನ – ಪುರುಷರ ಹಾಕಿ – ಮೆಲ್ಬೋರ್ನ್ 1956
• ಬೆಳ್ಳಿ- ಪುರುಷರ ಹಾಕಿ – ರೋಮ್ 1960
• ಚಿನ್ನ – ಪುರುಷರ ಹಾಕಿ – ಟೋಕಿಯೋ 1964
• ಕಂಚು – ಪುರುಷರ ಹಾಕಿ – ಮೆಕ್ಸಿಕೋ ಸಿಟಿ 1968
• ಕಂಚು – ಪುರುಷರ ಹಾಕಿ – ಮ್ಯೂನಿಚ್ 1972
• ಚಿನ್ನ – ಪುರುಷರ ಹಾಕಿ – ಮಾಸ್ಕೋ 1980
• ಕಂಚು – ಪುರುಷರ ಹಾಕಿ – ಟೋಕಿಯೋ 2020
• ಕಂಚು – ಪುರುಷರ ಹಾಕಿ – ಪ್ಯಾರಿಸ್ 2024

Published On - 2:03 pm, Sat, 10 August 24