ಇಲ್ಲಿ ಮೀನು ತಿನ್ನಬೇಕಾ, ಹಾಗಿದ್ರೆ ನೀವೇ ಗಾಳ ಹಾಕಿ! ತಾಳ್ಮೆಯ ಫಲ ಎಂದೂ ರುಚಿ
Self Fishing : ನಿನ್ನ ಮೀನು ನೀನೇ ಹಿಡೀ, ಮೀನಿನೊಂದಿಗೆ ಫೋಟೋ ಹೊಡೀ, ಖುಷಿಗೆ ಹಲಗೆಯನ್ನೂ ಹೊಡಿ, ಟೇಬಲ್ಗೆ ಮೀನೂಟ ಬರುವ ತನಕ ಹರಟೆ ಹೊಡೀ; ನಡೀರಿ ಜಪಾನಿಗೆ ಹೀಗೇ ಇಲ್ಲೇ...
Updated on:Nov 01, 2022 | 11:31 AM
Viral Video : ನೀವು ಮೀನುಪ್ರಿಯರಾಗಿದ್ದರೆ, ಹೋದಲ್ಲೆಲ್ಲ ರುಚಿಯಾದ ಮೀನು ಎಲ್ಲಿ ಸಿಗುತ್ತದೆ ಎಂದು ಹುಡುಕಿಕೊಂಡು ಹೋಗುತ್ತೀರಿ. ಆದರೆ, ರುಚಿಯ ಜೊತೆಗೆ ನೆನಪಲ್ಲಿ ಉಳಿಯುವಂಥ ಒಂದು ಅನುಭವವೂ ಬೇಕು ಎಂದರೆ ಜಪಾನ್ನಲ್ಲಿರುವ ಈ ರೆಸ್ಟೋರೆಂಟ್ಗೆ ಭೇಟಿ ಕೊಡಬೇಕು. ಈ ರೆಸ್ಟೋರೆಂಟ್ನಲ್ಲಿ ನೀವೇ ನಿಮಗೆ ಬೇಕಾದ ಮೀನು ಹಿಡಿಯಬಹುದು. ಹಾಗಂತ ಅಡುಗೆಯನ್ನೂ ನೀವೇ ಮಾಡಬೇಕಿಲ್ಲ. ಆದರೆ ನಾನು ಹಿಡಿದ ಮೀನು! ಎನ್ನುವ ಮಜಾ ಇರುತ್ತದಲ್ಲ ಅದು ಖಂಡಿತ ನಿಮಗೆ ಸಿಗುತ್ತದೆ. ನೋಡಿ ಈ ವಿಡಿಯೋ.
ಒಸಾಕಾದಲ್ಲಿರುವ ಝೌವೊ ಫಿಶಿಂಗ್ ರೆಸ್ಟೋರೆಂಟ್ನ ವಿಡಿಯೋ ಇದು. ಗ್ರಾಹಕರು ತಮಗೆ ಬೇಕಾದ ಮೀನುಗಳಿಗೆ ಗಾಳ ಹಾಕಿ ಹಿಡಿಯಬಹುದು. ಅದಕ್ಕೆ ಬೇಕಾದ ಸಹಾಯವನ್ನು ರೆಸ್ಟೋರೆಂಟ್ ಸಿಬ್ಬಂದಿ ಮಾಡುತ್ತದೆ. ನೀವು ಮೀನು ಹಿಡಿದ ಸಂಭ್ರಮಕ್ಕೆ ಮೀನಿನ ಜೊತೆ ಫೋಟೋ ತೆಗೆದುಕೊಡಲಾಗುತ್ತದೆ ಮತ್ತು ಡ್ರಮ್ ಬಾರಿಸಿ ಸಂಭ್ರಮಿಸಲಾಗುತ್ತದೆ. ನಂತರ ನೀವು ಹಿಡಿದ ಮೀನು ಅಡುಗೆಮನೆಗೆ ಹೋಗುತ್ತದೆ. ನಂತರ ನಿಮ್ಮ ಟೇಬಲ್ಗೆ ಅದು ಖಾದ್ಯವಾಗಿ ತಯಾರಾಗಿ ಬರುವ ತನಕ ನೀವು ಕಾಯಬೇಕು. ಕಾಯುವಿಕೆಯಲ್ಲಿಯೇ ರುಚಿ ಅಡಗಿರುವುದು! ಅಂದರೆ ಈ ರೆಸ್ಟೋರೆಂಟ್ನಲ್ಲಿ ನಿಮಗೊಂದು ಆಹ್ಲಾದಕರ ಅನುಭವ ಬೇಕೆಂದರೆ ಸಾಕಷ್ಟು ತಾಳ್ಮೆ ಬೇಕು.
ನೆಟ್ಟಿಗರು ಇದನ್ನು ನೋಡಿ ಖುಷಿಪಟ್ಟಿದ್ದಾರೆ. ರೆಸ್ಟೋರೆಂಟ್ನ ಒಳಾಂಗಣ ವಿನ್ಯಾಸ ಮತ್ತು ಈ ಪರಿಕಲ್ಪನೆ ಬಹಳ ಆಕರ್ಷಕವಾಗಿದೆ ಎಂದಿದ್ದಾರೆ. ಜೊತೆಗೆ ಒಂದು ಊಟಕ್ಕೆ ಎಷ್ಟು ಹಣ ತೆರಬೇಕು ಎಂದೂ ಕೇಳಿದ್ದಾರೆ. ತಾವು ಭೇಟಿಕೊಡಬೇಕಿರುವ ಪಟ್ಟಿಯಲ್ಲಿ ಈ ರೆಸ್ಟೋರೆಂಟ್ನ ಹೆಸರನ್ನೂ ಸೇರಿಸಿಕೊಂಡಿದ್ದಾರೆ. ನನ್ನ ಮಕ್ಕಳು ಫಿಷಿಂಗ್ಗೆ ಕರೆದಕೊಂಡು ಹೋಗೆಂದು ಪದೇಪದೇ ಕೇಳುತ್ತಿರುತ್ತಾರೆ. ಈಗ ಈ ಜಾಗ ಸಿಕ್ಕಿತು. ಎಂದಿದ್ದಾರೆ ಒಬ್ಬರು. ಜಪಾನಿನ ಇನ್ನೊಂದು ರೆಸ್ಟೋರೆಂಟ್ನಲ್ಲಿ ನಾನಿದನ್ನು ನೋಡಿದ್ದೇನೆ. ಅಲ್ಲಿ ನಾವೇ ಖಾದ್ಯವನ್ನೂ ತಯಾರಿಸಲು ಅವಕಾಶವಿತ್ತು. ಬೆಲೆಯೂ ತಕ್ಕಮಟ್ಟಿಗೆ ಇತ್ತು. ನಾವೆಲ್ಲ ಚೆನ್ನಾಗಿ ಮಜಾ ಮಾಡಿದೆವು ಎಂದಿದ್ದಾರೆ ಮತ್ತೊಬ್ಬರು. ಹಸಿವು ತಡೆದುಕೊಳ್ಳುವವರಿಗೆ ಮಾತ್ರ ಇಂಥ ರೆಸ್ಟೋರೆಂಟ್ ಲಾಯಕ್ಕು, ನನಗಂತೂ ಆಗುವುದಿಲ್ಲಪ್ಪಾ ಎಂದಿದ್ದಾರೆ ಇನ್ನೊಬ್ಬರು.
ನೀವು ಹೋಗ್ತೀರಾ?
ಮತ್ತಷ್ಟು ವೈರಲ್ ವಿಡಿಯೋಗಾಗಿ ಕ್ಲಿಕ್ ಮಾಡಿ
Published On - 11:23 am, Tue, 1 November 22
