ಮೈಸೂರು ಅರಮನೆಯಲ್ಲಿ ಕನ್ನಡಾಂಬೆಗೆ ನಿತ್ಯವೂ ಪೂಜೆ: ಅರ್ಚಕರು ಹೇಳಿದ್ದೇನು ಕೇಳಿ

ಕನ್ನಡ ರಾಜ್ಯೋತ್ಸವ ಸಾಂಸ್ಕೃತಿಕ ನಗರಿ ಮೈಸೂರಿನಲ್ಲಿರುವ ಅಪರೂಪದ ಕನ್ನಡಾಂಬೆ ಭುವನೇಶ್ವರಿ ದೇಗುಲವು ಈ ಆಚರಣೆಗೆ ವಿಶೇಷ ಮಹತ್ವ ನೀಡಿದೆ. 1951ರಲ್ಲಿ ಮೈಸೂರು ಮಹಾರಾಜ ಜಯಚಾಮರಾಜೇಂದ್ರ ಒಡೆಯರ್ ಅವರು ಅರಮನೆಯ ಆವರಣದಲ್ಲಿ ಕನ್ನಡಾಂಬೆಗಾಗಿಯೇ ಈ ದೇಗುಲವನ್ನು ನಿರ್ಮಿಸಿದರು. ಅರಮನೆಯ ಸುತ್ತಲಿನ ಕೋಟೆ ಆಂಜನೇಯ, ಕೋಟೆ ಗಣಪತಿ, ಕೋಟೆ ಮಾರಮ್ಮ, ವೇಣುಗೋಪಾಲ ಸ್ವಾಮಿ ಮುಂತಾದ ಅನೇಕ ದೇಗುಲಗಳ ಸಾಲಿಗೆ ಈ ಭುವನೇಶ್ವರಿ ದೇಗುಲವೂ ಸೇರಿದೆ. ಇಲ್ಲಿ ಕನ್ನಡಾಂಬೆ ಭುವನೇಶ್ವರಿಗೆ ಪ್ರತಿನಿತ್ಯವೂ ಪೂಜೆಗಳು ಮತ್ತು ಅಭಿಷೇಕಗಳು ನಡೆಯುತ್ತವೆ. ಪ್ರಖ್ಯಾತ ಶಿಲ್ಪಿ ಸಿದ್ದಲಿಂಗಸ್ವಾಮಿಗಳು ಅತ್ಯಾಕರ್ಷಕವಾಗಿ ಕೆತ್ತಿರುವ ಕನ್ನಡಾಂಬೆಯ ವಿಗ್ರಹವು ಇಲ್ಲಿ ಮೂಲ ದೇವತೆಯಾಗಿದೆ. ದೇಗುಲದಲ್ಲಿ ಸೂರ್ಯ, ಮಹಾವಿಷ್ಣು, ಮಹೇಶ್ವರ, ರಾಜರಾಜೇಶ್ವರಿ, ಚಾಮುಂಡೇಶ್ವರಿ, ಮತ್ತು ಗಣಪತಿಯಂತಹ ಇತರ ವಿಗ್ರಹಗಳಿದ್ದರೂ, ಕನ್ನಡಾಂಬೆ ಭುವನೇಶ್ವರಿಗೇ ಇಲ್ಲಿ ಅಗ್ರಪೂಜೆ ಸಲ್ಲುತ್ತದೆ. ಕನ್ನಡಾಂಬೆಗೆ ನವೆಂಬರ್‌ನಲ್ಲಿ ಮಾತ್ರವಲ್ಲದೆ, ಪ್ರತಿನಿತ್ಯವೂ ಪೂಜೆಗಳು ನಡೆಯಬೇಕು ಎಂಬ ಮಹಾರಾಜರ ದೂರದೃಷ್ಟಿಯಿಂದ ಈ ದೇಗುಲ ನಿರ್ಮಾಣಗೊಂಡಿದೆ. ವಿಜಯದಶಮಿ ಮೆರವಣಿಗೆಯ ನಂತರ ಬನ್ನಿ ಪೂಜೆಯ ಸಂಪ್ರದಾಯವೂ ಈ ದೇಗುಲದ ಬನ್ನಿ ವೃಕ್ಷದಲ್ಲೇ ಮುಂದುವರಿದಿದೆ. ಹೀಗಾಗಿ ಮೈಸೂರಿನ ಕನ್ನಡಾಂಬೆ ದೇಗುಲ ರಾಜ್ಯೋತ್ಸವಕ್ಕೆ ವಿಶಿಷ್ಟ ಕಳೆ ನೀಡುತ್ತದೆ.

ಮತ್ತಷ್ಟು ವಿಡಿಯೋ ಸುದ್ದಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ