ಏಕಾಏಕಿ ಟಿಬೆಟ್ಗೆ ಭೇಟಿ ನೀಡಿದ ಚೀನಾ ಅಧ್ಯಕ್ಷ; ಷಿ ಜಿನ್ಪಿಂಗ್ರ ಈ 3 ದಿನಗಳ ಪ್ರವಾಸದಿಂದ ಭಾರತಕ್ಕೆ ಅಪಾಯ ಎಂದ ಅಮೆರಿಕ ಸಂಸದ
ಕಳೆದ ವಾರ ಚೀನಾದ ಸರ್ವಾಧಿಕಾರಿ ಕ್ಸಿ ಜಿನ್ಪಿಂಗ್ ಭಾರತದ ಗಡಿ ಸಮೀಪ ಇರುವ ಟಿಬೆಟ್ಗೆ ಭೇಟಿ ಕೊಟ್ಟಿದ್ದರು. ನನಗೆ ಗೊತ್ತಿರುವ ಪ್ರಕಾರ ಕಳೆದ 30ವರ್ಷಗಳಲ್ಲಿ ಚೀನಾದ ಅಧ್ಯಕ್ಷರಾದವರು ಟಿಬೆಟ್ಗೆ ಭೇಟಿ ಕೊಟ್ಟಿದ್ದು ಎಂದು ಅಮೆರಿಕ ಸಂಸದ ಹೇಳಿದ್ದಾರೆ.
Updated on:Jul 27, 2021 | 2:43 PM
ವಾಷಿಂಗ್ಟನ್: ಚೀನಾ ಅಧ್ಯಕ್ಷ ಷಿ ಜಿನ್ಪಿಂಗ್ (Xi Jinping) ಅವರ ಕಳೆದ ವಾರದ ಟಿಬೆಟ್ ಭೇಟಿ ಭಾರತಕ್ಕೆ ಅಪಾಯ ತಂದೊಡ್ಡಬಹುದು ಎಂದು ಅಮೆರಿಕ (America)ದ ಜನಪ್ರತಿನಿಧಿಯೊಬ್ಬರು ಹೇಳಿದ್ದಾರೆ. ಅಲ್ಲದೆ, ಅಮೆರಿಕ ಅಧ್ಯಕ್ಷ ಜೋ ಬೈಡನ್ (Jeo Biden) ಚೀನಾದ ಮುನ್ನುಗ್ಗುವಿಕೆಯನ್ನು ತಡೆಗಟ್ಟಲು ಯಾವ ಪ್ರಯತ್ನವನ್ನೂ ಮಾಡುತ್ತಿಲ್ಲ ಎಂದು ಆರೋಪಿಸಿದ್ದಾರೆ. ಚೀನಾ ಅಧ್ಯಕ್ಷ ಕಳೆದ ಬುಧವಾರದಿಂದ ಮೂರು ದಿನ ಟಿಬೆಟ್ನ ನ್ಯಿಂಗ್ಚೀ ಪ್ರವಾಸ ಕೈಗೊಂಡಿದ್ದರು. ಈ ಪ್ರದೇಶ ಅರುಣಾಚಲ ಪ್ರದೇಶದಿಂದ ತುಂಬ ಸನಿಹದಲ್ಲಿದೆ. ಚೀನಾ ಅಧ್ಯಕ್ಷ (Chinese President)ರು ಪ್ರವಾಸದ ಬಗ್ಗೆ ಮುಂಚಿತವಾಗಿ ಯಾವುದೇ ಘೋಷಣೆ ಮಾಡದೆ ಇರುವುದು ಈಗ ಹಲವು ಅನುಮಾನಗಳಿಗೆ ಕಾರಣವಾಗಿದೆ. ಇನ್ನು ಚೀನಾ ಕಮ್ಯೂನಿಸ್ಟ್ ಪಕ್ಷದ ಪ್ರಧಾನ ಕಾರ್ಯದರ್ಶಿಯೂ ಆಗಿರುವ ಕ್ಸಿ ಜಿನ್ಪಿಂಗ್, ಟಿಬೆಟ್ನ ಮಿಲಿಟರಿ ಕಮಾಂಡ್ ಅಧಿಕಾರಿಗಳನ್ನು ಭೇಟಿಯಾಗಿ, ಪ್ರಾದೇಶಿಕವಾಗಿ ನಡೆಯುತ್ತಿರುವ ಅಭಿವೃದ್ಧಿ ಕಾರ್ಯಗಳ ಪರಿಶೀಲನೆ ಮಾಡಿದ್ದಾರೆ.
ಈ ಬಗ್ಗೆ ಮಾತನಾಡಿದ ಅಮೆರಿಕ ರಿಪಬ್ಲಿಕನ್ ಪಕ್ಷದ ಸಂಸದ ಡೆವಿನ್ ನುನ್ಸ್, ಕಳೆದ ವಾರ ಚೀನಾದ ಸರ್ವಾಧಿಕಾರಿ ಷಿ ಜಿನ್ಪಿಂಗ್ ಭಾರತದ ಗಡಿ ಸಮೀಪ ಇರುವ ಟಿಬೆಟ್ಗೆ ಭೇಟಿ ಕೊಟ್ಟಿದ್ದರು. ನನಗೆ ಗೊತ್ತಿರುವ ಪ್ರಕಾರ ಕಳೆದ 30ವರ್ಷಗಳಲ್ಲಿ ಚೀನಾದ ಅಧ್ಯಕ್ಷರಾದವರು ಟಿಬೆಟ್ಗೆ ಭೇಟಿ ಕೊಟ್ಟಿದ್ದು ಇದೇ ಮೊದಲು. ಖಂಡಿತ ಅವರ ಭೇಟಿ ಭಾರತಕ್ಕೆ ಅಪಾಯದ ಬೆದರಿಕೆಯಾಗಲಿದೆ. ಇನ್ನು ಈ ಪ್ರದೇಶದಲ್ಲಿ ಬ್ರಹ್ಮಪುತ್ರಾ ನದಿಗೆ (ಈ ನದಿಗೆ ಟಿಬೆಟಿಯನ್ ಭಾಷೆಯಲ್ಲಿ ಯಾರ್ಲುಂಗ್ ತ್ಸಾಂಗ್ಪೋ ಎಂದು ಕರೆಯುತ್ತಾರೆ) ಅಣೆಕಟ್ಟು ಕಟ್ಟುವ ದೊಡ್ಡ ಯೋಜನೆಯನ್ನು ಚೀನಾ ಹಾಕಿಕೊಂಡಿದ್ದು, ಇದರಿಂದ ಭಾರತಕ್ಕೆ ತೊಂದರೆಯಾಗುವ ಸಾಧ್ಯತೆ ಹೆಚ್ಚಾಗಿದೆ ಎಂದು ಹೇಳಿದ್ದಾರೆ.
ಷಿ ಜಿನ್ಪಿಂಗ್ ಅವರು ನ್ಯಿಂಗ್ ಚೀಗೆ ಭೇಟಿ ನೀಡಿದ್ದಾಗ, ಬ್ರಹ್ಮಪುತ್ರಾ ನದಿಯ ಜಲಾನಯನ ಪ್ರದೇಶದಲ್ಲಿನ ಪರಿಸರ ಸಂರಕ್ಷಣೆಯನ್ನು ಪರಿಶೀಲಿಸುವ ಸಲುವಾಗಿ ನ್ಯಾಂಗ್ ನದಿಯ ಸೇತುವೆ ಬಳಿಯೂ ತೆರಳಿದ್ದರು. ಟಿಬೆಟ್ ಬಳಿ ಬ್ರಹ್ಮಪುತ್ರಾ ನದಿಗೆ, 14ನೇ ಪಂಚವಾರ್ಷಿಕ ಯೋಜನೆಯಡಿ ದೊಡ್ಡದಾದ ಅಣೆಕಟ್ಟು ನಿರ್ಮಾಣಕ್ಕೆ ಚೀನಾ ಈ ವರ್ಷ ಅನುಮೋದನೆ ನೀಡಿದ್ದು, ಇದರಿಂದ ಭಾರತ ಮತ್ತು ಬಾಂಗ್ಲಾದೇಶಗಳಿಗೆ ಸಹಜವಾಗಿಯೇ ಕಳವಳ ಉಂಟಾಗಿದೆ. ಅದರಲ್ಲೂ ಕಳೆದ ವಾರ ಷಿ ಜಿನ್ಪಿಂಗ್ ಟಿಬೆಟ್ಗೆ ಭೇಟಿ ಕೊಟ್ಟಿದ್ದು ಇನ್ನಷ್ಟು ಕುತೂಹಲಕ್ಕೆ ಕಾರಣವಾಗಿದೆ. ಇದರ ಬಗ್ಗೆ ನುನ್ಸ್ ಅಸಮಾಧಾನ ವ್ಯಕ್ತಪಡಿಸಿದ್ದು, ಚೀನಾದ ಸರಹದ್ದು ದಾಟುವಿಕೆಯ ಪ್ರವೃತ್ತಿ ಹೆಚ್ಚುತ್ತಿದೆ. ಅದನ್ನು ನಿಯಂತ್ರಿಸಬೇಕು. ಆದರೆ ಅಮೆರಿಕ ಅಧ್ಯಕ್ಷ ಜೋ ಬೈಡನ್ ಕೂಡ ಗಮನ ಹರಿಸುತ್ತಿಲ್ಲ ಎಂದಿದ್ದಾರೆ.
ಇದನ್ನೂ ಓದಿ: ವೇಟ್ಲಿಫ್ಟಿಂಗ್ ಮಾಡಿದ ಪುಟ್ಟ ಬಾಲಕಿ! ಮೀರಾಬಾಯಿ ಚಾನು ಅವರ ಪ್ರತಿಕ್ರಿಯೆ ಏನಿತ್ತು ನೋಡಿ
Chinese President Xi Jinping Tibet Visit is threat to India Says US Lawmaker
Published On - 12:40 pm, Tue, 27 July 21
