ನೇಪಾಳದ ನೂತನ ಪ್ರಧಾನಿಯಾಗಿ ಪುಷ್ಪ ಕಮಲ್ ದಹಾಲ್ ಪ್ರಚಂಡ ಪ್ರಮಾಣ ವಚನ

ಕಠ್ಮಂಡು: ಮಾಜಿ ಮಾವೋವಾದಿ ನಾಯಕ ಪುಷ್ಪ ಕಮಲ್ ದಹಾಲ್ “ಪ್ರಚಂಡ” (Pushpa Kamal Dahal Prachanda) ಅವರು ನೇಪಾಳದ (Nepal) ಪ್ರಧಾನಿಯಾಗಿ ಮೂರನೇ ಬಾರಿಗೆ ಪ್ರಮಾಣ ವಚನ ಸ್ವೀಕರಿಸಿದರು. ಅಧ್ಯಕ್ಷೆ ಬಿದ್ಯಾ ದೇವಿ ಭಂಡಾರಿ ಪ್ರಚಂಡ ಅವರನ್ನು ಭಾನುವಾರ ಹೊಸ ಪ್ರಧಾನ ಮಂತ್ರಿಯಾಗಿ ನೇಮಕ ಮಾಡಿದ್ದರು. ಶೀತಲ್ ನಿವಾಸದಲ್ಲಿ ನಡೆದ ಅಧಿಕೃತ ಸಮಾರಂಭದಲ್ಲಿ ಅಧ್ಯಕ್ಷೆ ಭಂಡಾರಿ ಅವರು 68 ವರ್ಷದ ಪ್ರಚಂಡ ಅವರಿಗೆ ಪ್ರಮಾಣ ವಚನ ಬೋಧಿಸಿದರು. 275 ಸದಸ್ಯರ ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್‌ನಲ್ಲಿ 169 ಸದಸ್ಯರ ಬೆಂಬಲವನ್ನು ತೋರಿಸುವ ಪತ್ರವನ್ನು ಅಧ್ಯಕ್ಷರಿಗೆ ಸಲ್ಲಿಸಿದ ಒಂದು ದಿನದ ನಂತರ ಪ್ರಚಂಡ ನೇಪಾಳದ ಪ್ರಧಾನಿಯಾಗಿ (Nepal PM) ಪ್ರಮಾಣವಚನ ಸ್ವೀಕರಿಸಿದರು. ಸಿಪಿಎನ್- ಮಾವೋವಾದಿ ಸಂಘಟನೆ ಶಾಂತಿಯುತ ರಾಜಕೀಯವನ್ನು ಅಳವಡಿಸಿಕೊಂಡಾಗ, ದಶಕದ ಸಶಸ್ತ್ರ ದಂಗೆಯನ್ನು ಕೊನೆಗೊಳಿಸಿ ಮುಖ್ಯವಾಹಿನಿಯ ರಾಜಕೀಯಕ್ಕೆ ಸೇರುವ ಮೊದಲು ಪ್ರಚಂಡ ಒಂದು ದಶಕಕ್ಕೂ ಹೆಚ್ಚು ಕಾಲ ಭೂಗತರಾಗಿದ್ದರು. ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್‌ನಲ್ಲಿ 89 ಸ್ಥಾನಗಳನ್ನು ಹೊಂದಿರುವ ನೇಪಾಳಿ ಕಾಂಗ್ರೆಸ್ ದೇಶದ ಅತಿದೊಡ್ಡ ಪಕ್ಷವಾಗಿದೆ, ಆದರೆ ಸಿಪಿಎನ್- ಯುಎಂಎಲ್ ಮತ್ತು ಸಿಪಿಎನ್-ಎಂಸಿ ಕ್ರಮವಾಗಿ 78 ಮತ್ತು 32 ಸ್ಥಾನಗಳನ್ನು ಹೊಂದಿವೆ.

#PushpaKamalDahal ‘Prachanda’ takes oath as New PM of #Nepal, sworn in by President Bidya Devi Bhandari at Sheetal Niwas, Kathmandu. pic.twitter.com/lndOV0M897

— All India Radio News (@airnewsalerts) December 26, 2022

ಪ್ರಚಂಡ ಬಹುಮತದೊಂದಿಗೆ ಪ್ರಧಾನ ಮಂತ್ರಿ ಸ್ಥಾನವನ್ನು ಪಡೆದುಕೊಂಡ ನಂತರ, ಈಗ ಸಂವಿಧಾನದ 76 (4) ವಿಧಿ ಪ್ರಕಾರ ಕೆಳಮನೆಯಿಂದ 30 ದಿನಗಳಲ್ಲಿ ವಿಶ್ವಾಸ ಮತವನ್ನು ಗೆಲ್ಲಬೇಕಾಗುತ್ತದೆ.

ಡಿಸೆಂಬರ್ 11, 1954 ರಂದು ಪೋಖರಾ ಬಳಿಯ ಕಸ್ಕಿ ಜಿಲ್ಲೆಯ ಧಿಕುರ್ಪೋಖಾರಿಯಲ್ಲಿ ಜನಿಸಿದ ಪ್ರಚಂಡ ಅವರು ಸುಮಾರು 13 ವರ್ಷಗಳ ಕಾಲ ಭೂಗತರಾಗಿದ್ದರು. ಸಿಪಿಎನ್-ಮಾವೋವಾದಿಗಳು ಶಾಂತಿಯುತ ರಾಜಕೀಯವನ್ನು ಅಳವಡಿಸಿಕೊಂಡಾಗ ದಶಕದ ಸಶಸ್ತ್ರ ದಂಗೆಯನ್ನು ಕೊನೆಗೊಳಿಸಿ ಅವರು ಮುಖ್ಯವಾಹಿನಿಯ ರಾಜಕೀಯಕ್ಕೆ ಸೇರಿದರು. ಅವರು 1996 ರಿಂದ 2006 ರವರೆಗೆ ದಶಕದ ಸಶಸ್ತ್ರ ಹೋರಾಟವನ್ನು ಮುನ್ನಡೆಸಿದರು, ಇದು ಅಂತಿಮವಾಗಿ ನವೆಂಬರ್ 2006 ರಲ್ಲಿ ಸಮಗ್ರ ಶಾಂತಿ ಒಪ್ಪಂದಕ್ಕೆ ಸಹಿ ಹಾಕುವುದರೊಂದಿಗೆ ಕೊನೆಗೊಂಡಿತು. ಇದಕ್ಕೂ ಮೊದಲು ಮಾಜಿ ಪ್ರಧಾನಿ ಒಲಿ ಅವರ ನಿವಾಸದಲ್ಲಿ ನಿರ್ಣಾಯಕ ಸಭೆ ನಡೆದಿತ್ತು. ಅಲ್ಲಿ ಸಿಪಿಎನ್-ಮಾವೋವಾದಿ ಕೇಂದ್ರ ಮತ್ತು ಇತರ ಸಣ್ಣ ಪಕ್ಷಗಳು ‘ಪ್ರಚಂಡ’ ನೇತೃತ್ವದಲ್ಲಿ ಸರ್ಕಾರ ರಚಿಸಲು ಒಪ್ಪಿಕೊಂಡವು.

ಸರದಿ ಆಧಾರದ ಮೇಲೆ ಸರ್ಕಾರವನ್ನು ಮುನ್ನಡೆಸಲು ಪ್ರಚಂಡ ಮತ್ತು ಓಲಿ ನಡುವೆ ಒಪ್ಪಂದ ಉಂಟಾಗಿದೆ. ಒಲಿ ಅವರ ಬೇಡಿಕೆಯಂತೆ ಮೊದಲ ಅವಕಾಶದಲ್ಲಿ ಪ್ರಚಂಡ ಅವರನ್ನು ಪ್ರಧಾನಿ ಮಾಡಲು ಒಪ್ಪಿಕೊಂಡರು. ಅತಿದೊಡ್ಡ ಪಕ್ಷವಾಗಿ ನೇಪಾಳಿ ಕಾಂಗ್ರೆಸ್ ಅಧ್ಯಕ್ಷರ ಗಡುವಿನೊಳಗೆ ಸಂವಿಧಾನದ 76 (2) ನೇ ವಿಧಿಯ ಪ್ರಕಾರ ತನ್ನ ನಾಯಕತ್ವದಲ್ಲಿ ಸರ್ಕಾರವನ್ನು ರಚಿಸಲು ವಿಫಲವಾಗಿದೆ. ಈಗ, 165 ಶಾಸಕರ ಬೆಂಬಲದೊಂದಿಗೆ ಪ್ರಚಂಡ ನೇತೃತ್ವದಲ್ಲಿ ಹೊಸ ಸರ್ಕಾರವನ್ನು ರಚಿಸಲು ಸಿಪಿಎನ್-ಯುಎಂಎಲ್ ಉಪಕ್ರಮವನ್ನು ತೆಗೆದುಕೊಂಡಿದೆ ಎಂದು ಸಿಪಿಎನ್-ಯುಎಂಎಲ್ ಪ್ರಧಾನ ಕಾರ್ಯದರ್ಶಿ ಶಂಕರ್ ಪೋಖರೆಲ್ ಸಭೆಯ ನಂತರ ಸುದ್ದಿಗಾರರಿಗೆ ತಿಳಿಸಿದರು.

ಇದನ್ನೂ ಓದಿ: Twitter Data: ಸುಂದರ್ ಪಿಚೈ, ಸಲ್ಮಾನ್ ಖಾನ್ ಸೇರಿ 40 ಕೋಟಿ ಟ್ವಿಟರ್ ಬಳಕೆದಾರರ ವೈಯಕ್ತಿಕ ವಿವರ ಡಾರ್ಕ್​ವೆಬ್​ನಲ್ಲಿ ಮಾರಾಟಕ್ಕೆ; ವರದಿ

ಹಿಂದಿನ ದಿನದಲ್ಲಿ ಪ್ರಧಾನ ಮಂತ್ರಿ ಮತ್ತು ನೇಪಾಳಿ ಕಾಂಗ್ರೆಸ್ ಅಧ್ಯಕ್ಷ ಶೇರ್ ಬಹದ್ದೂರ್ ದೇವುಬಾ ಅವರು ಪ್ರಧಾನಿಯಾಗಲು ಮೊದಲ ಸುತ್ತಿನ ಪ್ರಯತ್ನವನ್ನು ತಿರಸ್ಕರಿಸಿದ ನಂತರ ನೇಪಾಳಿ ಕಾಂಗ್ರೆಸ್ ನೇತೃತ್ವದ ಐದು ಪಕ್ಷಗಳ ಮೈತ್ರಿಯಿಂದ ಪ್ರಚಂಡ ಹೊರನಡೆದರು. ದೇವುಬಾ ಮತ್ತು ಪ್ರಚಂಡ ಈ ಹಿಂದೆ ಹೊಸ ಸರ್ಕಾರವನ್ನು ಸರದಿಯ ಆಧಾರದ ಮೇಲೆ ಮುನ್ನಡೆಸಲು ಮೌನವಾದ ತಿಳುವಳಿಕೆಯನ್ನು ತಲುಪಿದ್ದರು.

ಭಾನುವಾರ ಬೆಳಗ್ಗೆ ಪಿಎಂ ಹೌಸ್‌ನಲ್ಲಿ ಪ್ರಚಂಡ ಅವರೊಂದಿಗೆ ಮಾತುಕತೆ ನಡೆಸಿದಾಗ, ನೇಪಾಳಿ ಕಾಂಗ್ರೆಸ್ ಅಧ್ಯಕ್ಷ ಮತ್ತು ಪ್ರಧಾನ ಮಂತ್ರಿಯ ಎರಡೂ ಪ್ರಮುಖ ಹುದ್ದೆಗಳಿಗೆ ಹಕ್ಕು ಸಾಧಿಸಿತ್ತು, ಇದನ್ನು ಪ್ರಚಂಡ ತಿರಸ್ಕರಿಸಿದರು ಮಾತುಕತೆ ವಿಫಲವಾಗಿದೆ ಎಂದು ಮಾವೋವಾದಿ ಮೂಲಗಳು ತಿಳಿಸಿವೆ.

ಎನ್‌ಸಿ ಮಾವೋವಾದಿ ಪಕ್ಷಕ್ಕೆ ಸ್ಪೀಕರ್ ಹುದ್ದೆಯನ್ನು ನೀಡಿತು, ಅದನ್ನು ಪ್ರಚಂಡ ತಿರಸ್ಕರಿಸಿದರು. “ದೇವುಬಾ ಮತ್ತು ಪ್ರಚಂಡ ನಡುವಿನ ಕೊನೆಯ ಕ್ಷಣದ ಮಾತುಕತೆ ಒಪ್ಪಂದ ಮಾಡಿಕೊಳ್ಳಲು ವಿಫಲವಾದ ಕಾರಣ ಮೈತ್ರಿ ಮುರಿದುಬಿದ್ದಿದೆ” ಎಂದು ಶಾ ಹೇಳಿರುವುದಾಗಿ ಪಿಟಿಐ ವರದಿ ಮಾಡಿದೆ.

ಪ್ರಧಾನ ಮಂತ್ರಿ ದೇವುಬಾ ಅವರೊಂದಿಗಿನ ಮಾತುಕತೆ ವಿಫಲವಾದ ನಂತರ, ಪ್ರಚಂಡ ಅವರು ಪ್ರಧಾನ ಮಂತ್ರಿಯಾಗಲು ಬೆಂಬಲವನ್ನು ಪಡೆಯಲು ಸಿಪಿಎನ್-ಯುಎಂಎಲ್ ಅಧ್ಯಕ್ಷ ಓಲಿ ಅವರ ಖಾಸಗಿ ನಿವಾಸವನ್ನು ತಲುಪಿದರು. ಅವರೊಂದಿಗೆ ಇತರ ಸಣ್ಣ ಪಕ್ಷಗಳ ನಾಯಕರು ಸೇರಿಕೊಂಡರು.

275 ಸದಸ್ಯರ ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್‌ನಲ್ಲಿ ಯಾವುದೇ ಪಕ್ಷವು ಸರ್ಕಾರ ರಚಿಸಲು 138 ಸ್ಥಾನಗಳನ್ನು ಹೊಂದಿಲ್ಲ. ಸದನದಲ್ಲಿ, ಸಿಪಿಎನ್ (ಯುನಿಫೈಡ್ ಸೋಷಿಯಲಿಸ್ಟ್) 10 ಸ್ಥಾನಗಳನ್ನು ಹೊಂದಿದೆ, ಲೋಕತಾಂತ್ರಿಕ ಸಮಾಜವಾದಿ ಪಕ್ಷ (ಎಲ್‌ಎಸ್‌ಪಿ) ನಾಲ್ಕು ಮತ್ತು ರಾಷ್ಟ್ರೀಯ ಜನಮೋರ್ಚಾ ಮತ್ತು ನೇಪಾಳ ಕಾರ್ಮಿಕರು ಮತ್ತು ರೈತ ಪಕ್ಷಗಳು ತಲಾ ಒಂದು ಸ್ಥಾನವನ್ನು ಹೊಂದಿವೆ. ಕೆಳಮನೆಯಲ್ಲಿ ಐವರು ಸ್ವತಂತ್ರ ಸದಸ್ಯರಿದ್ದಾರೆ.

ಮತ್ತಷ್ಟು ವಿದೇಶ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ

Published On - 6:52 pm, Mon, 26 December 22