ಒಮಿಕ್ರಾನ್​ ವಿರುದ್ಧ ಹೋರಾಟಕ್ಕೆ ಕೊವಿಡ್ 19 ಲಸಿಕೆ ಬೂಸ್ಟರ್​ ಡೋಸ್​ ಅಗತ್ಯ?-ಡಿ.7ಕ್ಕೆ ವಿಶ್ವ ಆರೋಗ್ಯ ಸಂಸ್ಥೆ ಸಭೆ

ವಿಶ್ವಕ್ಕೀಗ ಒಮ್ರಿಕಾನ್ (Omicron variant)​ ಭೀತಿ ಆವರಿಸಿದೆ. ದಕ್ಷಿಣ ಆಫ್ರಿಕಾದಲ್ಲಿ ಮೊದಲು ಕಾಣಿಸಿಕೊಂಡ ವೈರಸ್​ ಇದೀಗ 38ಕ್ಕೂ ಹೆಚ್ಚು ರಾಷ್ಟ್ರಗಳಿಗೆ ವ್ಯಾಪಿಸಿದೆ. ಈ ಮಧ್ಯೆ ಈಗಾಗಲೇ ಕೊಡುತ್ತಿರುವ ಕೊರೊನಾ ಲಸಿಕೆಯ ಡೋಸ್​ ಪ್ರಮಾಣ ಒಮಿಕ್ರಾನ್​ ವಿರುದ್ಧ ಹೋರಾಡಬಲ್ಲದಾ? ಅಥವಾ ಬೂಸ್ಟರ್​ ಡೋಸ್ ಬೇಕಾಗುತ್ತದೆಯಾ ಎಂಬುದು ಬಹುವಾಗಿ ಚರ್ಚೆಯಾಗುತ್ತಿರುವ ವಿಚಾರ. ಇನ್ನೂ ಈ ಬಗ್ಗೆ ಆರೋಗ್ಯ ತಜ್ಞರೂ ಕೂಡ ನಿಖರವಾಗಿ ಏನನ್ನೂ ಹೇಳುತ್ತಿಲ್ಲ.  ಹೀಗಾಗಿ ಒಮ್ರಿಕಾನ್​ ವಿರುದ್ಧ ರಕ್ಷಣೆಗೆ ಕೊವಿಡ್​ 19 ಲಸಿಕೆಗಳ ಬೂಸ್ಟರ್​ ಡೋಸ್​​ಗಳ ಅಗತ್ಯ ಮತ್ತು ಅದರ ಶಿಫಾರಸ್ಸುಗಳ ಬಗ್ಗೆ ಚರ್ಚಿಸಲು ವಿಶ್ವ ಆರೋಗ್ಯ ಸಂಸ್ಥೆ (World Health Organisation)ಯ ಕಾರ್ಯತಂತ್ರದ ಸಲಹೆಗಾರರ ಗುಂಪು (SAGE) ಡಿಸೆಂಬರ್​ 7ರಂದು ಸಭೆ ನಡೆಸಲಿದೆ. 

ಈಗ ಕೊರೊನಾ ಲಸಿಕೆ ಅಭಿಯಾನ ಜಾಗತಿಕವಾಗಿದೆ. ಕೆಲವು ದೇಶಗಳಲ್ಲಿ ಒಂದೇ ಡೋಸ್​ನ ಲಸಿಕೆ ನೀಡಲಾಗುತ್ತಿದ್ದರೆ, ಭಾರತ ಸೇರಿ ಒಂದಷ್ಟು ರಾಷ್ಟ್ರಗಳಲ್ಲಿ ಎರಡು ಡೋಸ್​ಗಳ ಲಸಿಕೆ ಕೊಡಲಾಗುತ್ತಿದೆ. ಸದ್ಯಕ್ಕಂತೂ ಬೂಸ್ಟರ್​ ಡೋಸ್​​ಗಳ ಅಗತ್ಯವಿದೆ ಎಂಬುದಕ್ಕೆ ಯಾವುದೇ ಪುರಾವೆಗಳೂ ಸಿಗುತ್ತಿಲ್ಲ ಎಂದು ಆರೋಗ್ಯ ತಜ್ಞರು ಹೇಳಿದ್ದರು. ಹಾಗೇ, ಡಬ್ಲ್ಯೂಎಚ್​ಒಗೂ ಕೂಡ ಅನಿರ್ದಷ್ಟತೆಯೇ ಇತ್ತು. ಆದರೆ ಈಗ ಹರಡುತ್ತಿರುವ ಹೊಸ ಸೋಂಕು ಒಮಿಕ್ರಾನ್​ ವಿರುದ್ಧ ರೋಗ ನಿರೋಧಕ ಶಕ್ತಿ ಹೆಚ್ಚಿಸಲು ಬೂಸ್ಟರ್ ಡೋಸ್​ಗಳು ಬೇಕಾಗುತ್ತವಾ ಎಂಬ ಚರ್ಚೆ ವ್ಯಾಪಕವಾಗಿ ನಡೆಯುತ್ತಿದೆ.  ಅದರ ಬೆನ್ನಲ್ಲೇ ಡಬ್ಲ್ಯೂಎಚ್​ಒ ಡಿ.7ಕ್ಕೆ ಸಭೆ ನಡೆಸಲಿದ್ದು, ನಂತರವಷ್ಟೇ ಬೂಸ್ಟರ್​ ಡೋಸ್​ಗಳ ಬಗ್ಗೆ ಒಂದು ನಿಖರತೆ ಸಿಗಲಿದೆ.

ಭಾರತದಲ್ಲೂ ಕೂಡ ಕೊರೊನಾ ಲಸಿಕೆ ಬೂಸ್ಟರ್​ ಡೋಸ್​ಗಳ ನೀಡಿಕೆ ಬಗ್ಗೆ ಚರ್ಚೆ ನೀಡುತ್ತಿದೆ. ಆದರೆ ಇದುವರೆಗೆ ಬೂಸ್ಟರ್​ ಡೋಸ್​ ನೀಡಿಕೆಯ ಅಗತ್ಯ ಕಂಡುಬಂದಿಲ್ಲ ಎಂದು ನೀತಿ ಆಯೋಗದ ಸದಸ್ಯ ವಿ.ಕೆ.ಪೌಲ್ ಸೇರಿ ವಿವಿಧ ಪ್ರಮುಖ ಆರೋಗ್ಯ ತಜ್ಞರು ಹೇಳಿದ್ದರು. ಆದರೆ ದೇಶದಲ್ಲಿ 40 ವರ್ಷ ಮೇಲ್ಪಟ್ಟವರಿಗೆ ಕೊವಿಡ್​ 19 ಲಸಿಕೆ ಬೂಸ್ಟರ್ ಡೋಸ್​ ನೀಡುವ ಬಗ್ಗೆ ಪರಿಗಣಿಸಬೇಕು ಎಂದು ಭಾರತೀಯ SARS-CoV-2 ಜೀನೋಮಿಕ್ಸ್ ಕನ್ಸೋರ್ಟಿಯಂ (ಜಿನೋಮ್​ ಸಿಕ್ವೆನ್ಸಿಂಗ್​​ನ್ನು ಕೈಗೊಳ್ಳುವ ಪ್ರಯೋಗಾಲಯಗಳ ಒಕ್ಕೂಟ-ಐಎನ್​​ಎಸ್​ಎಸಿಒಜಿ) ಹೇಳಿದೆ.  ಹಾಗೊಮ್ಮೆ ವಿಶ್ವ ಆರೋಗ್ಯ ಸಂಸ್ಥೆಯ ಸಭೆಯ ಬಳಿಕ ಪ್ರತಿಯೊಬ್ಬರೂ ಬೂಸ್ಟರ್ ಡೋಸ್ ಅಥವಾ ಮೂರನೇ ಡೋಸ್​ ಲಸಿಕೆ ಪಡೆಯಬೇಕು ಎಂದು ಹೇಳಿದರೆ, ನಮ್ಮ ದೇಶದಲ್ಲೂ ಕೂಡ ಸರ್ಕಾರಗಳು ಮುಂದಿನ ಕ್ರಮದ ಬಗ್ಗೆ ಚರ್ಚಿಸಲಿವೆ.

ಇದನ್ನೂ ಓದಿ:  ನಾಪತ್ತೆಯಾಗಿದ್ದ ದಕ್ಷಿಣ ಆಫ್ರಿಕಾ ಪ್ರಯಾಣಿಕರನ್ನು ಪತ್ತೆ ಮಾಡಿದ ಬಿಬಿಎಂಪಿ