ಬಜೆಟ್ ಮುನ್ನ 200 ಅಂಕಗಳಷ್ಟು ಏರಿದ ಸೆನ್ಸೆಕ್ಸ್; ಒಟ್ಟಾರೆ ಹಸಿರುಬಣ್ಣದಲ್ಲಿ ಷೇರುಪೇಟೆ

ಮುಂಬೈ, ಫೆಬ್ರುವರಿ 1: ಇವತ್ತು ಬಜೆಟ್ ಮಂಡನೆ ಇರುವ ಪ್ರಯುಕ್ತ, ಶನಿವಾರವಾದರೂ ಷೇರು ಮಾರುಕಟ್ಟೆ ಕಾರ್ಯ ನಿರ್ವಹಿಸುತ್ತಿದೆ. ಬಜೆಟ್​ನ ಬಿಸಿಯಲ್ಲಿ ಟ್ರೇಡಿಂಗ್ ಮಾಡಲು ಇವತ್ತು ಅವಕಾಶ ಸಿಕ್ಕಿದೆ. ಬಜೆಟ್​ನಲ್ಲಿ ಹಲವು ಸುಧಾರಣಾ ಕ್ರಮಗಳು ಜಾರಿಯಾಗುವ ಆಶಾಭಾವನೆಯಲ್ಲಿ ಷೇರು ಮಾರುಕಟ್ಟೆ ಬೆಳಗ್ಗೆಯೇ ಗರಿಗೆದರಿ ನಿಂತಿದೆ. ಬೆಳಗ್ಗೆ 11 ಗಂಟೆಗೆ ಬಜೆಟ್ ಪ್ರಸ್ತುತಿ ನಡೆಯುತ್ತದೆ. ಬೆಳಗ್ಗೆ 9ಕ್ಕೆ ಆರಂಭವಾದ ಮಾರುಕಟ್ಟೆ 10 ಗಂಟೆಯಷ್ಟರಲ್ಲಿ ಉತ್ತಮವಾಗಿ ಏರಿಕೆ ಕಂಡಿತ್ತು. ಬಿಎಸ್​ಇ ಸೆನ್ಸೆಕ್ಸ್ 200 ಅಂಕಗಳಷ್ಟು ಹೆಚ್ಚಳ ಕಂಡಿತು. ನಿಫ್ಟಿ ಕೂಡ 70 ಅಂಕಗಳಷ್ಟು ಏರಿಕೆ ಕಂಡಿತು.

ಬಾಂಬೆ ಸ್ಟಾಕ್ ಎಕ್ಸ್​ಚೇಂಜ್​ನ ಪ್ರಮುಖ ಸೂಚ್ಯಂಕವಾದ ಸೆನ್ಸೆಕ್ಸ್ ಸೇರಿದಂತೆ ಹೆಚ್ಚಿನ ಇಂಡೆಕ್ಸ್​ಗಳು ಇಂದು ಶನಿವಾರ ಪಾಸಿಟಿವ್​ನಲ್ಲಿ ಇವೆ.

ನ್ಯಾಷನಲ್ ಸ್ಟಾಕ್ ಎಕ್ಸ್​ಚೇಂಜ್​ನಲ್ಲೂ ನಿಫ್ಟಿ 50 ಸೇರಿದಂತೆ ಹೆಚ್ಚಿನ ಸೂಚ್ಯಂಕಗಳು ಹಸಿರು ಬಣ್ಣದಲ್ಲೇ ಇವೆ. ಐಟಿ, ಆಯಿಲ್ ಅಂಡ್ ಗ್ಯಾಸ್ ಇತ್ಯಾದಿ ಬೆರಳೆಣಿಕೆಯಷ್ಟು ಇಂಡೆಕ್ಸ್​ಗಳು ಮಾತ್ರವೇ ತುಸು ಹಿನ್ನಡೆ ಕಂಡಿವೆ. ಉಳಿದಂತೆ ಎಲ್ಲಾ ನಿಫ್ಟಿ ಇಂಡೆಕ್ಸ್​ಗಳು ಪಾಸಿಟಿವ್ ಇವೆ. ನಿಫ್ಟಿ ಸ್ಮಾಲ್​ಕ್ಯಾಪ್ 100 ಇಂಡೆಕ್ಸ್ ಬಹುತೇಕ ಶೇ. 1ರಷ್ಟು ಏರಿಕೆ ಕಂಡಿದೆ. ನಿಫ್ಟಿ ಮಿಡ್​ಕ್ಯಾಪ್ 100, ನಿಫ್ಟಿ ನೆಕ್ಸ್ಟ್ 50, ನಿಫ್ಟಿ ಸ್ಮಾಲ್​ಕ್ಯಾಪ್ 50, ನಿಫ್ಟಿ ರಿಯಾಲ್ಟಿ ಸೂಚ್ಯಂಕಗಳು 0.70 ಪ್ರತಿಶತಕ್ಕಿಂತ ಹೆಚ್ಚಿನ ಮಟ್ಟದ ಏರಿಕೆ ಕಂಡಿರುವುದು ಗಮನಾರ್ಹ.

ಬಿಎಸ್​ಇನಲ್ಲೂ ಸ್ಮಾಲ್​ಕ್ಯಾಪ್ ಸೂಚ್ಯಂಕ ಶೇ. 0.80ರಷ್ಟು ಹೆಚ್ಚಳ ಕಂಡಿದೆ. ಬಿಎಸ್​ಇ ಇಂಡಸ್ಟ್ರಿಯಲ್ಸ್ ಸೂಚ್ಯಂಕವಂತೂ ಶೇ. 1.32ರಷ್ಟು ಏರಿಕೆ ಕಂಡಿತು. ಬಿಎಸ್​ಇನಲ್ಲಿ ಐಟಿ ಸ್ಟಾಕ್​​ಗಳು ಪಾಸಿಟಿವ್ ಇವೆ. ಬಿಎಸ್​ಇ ಯುಟಿಲಿಟೀಸ್ ಸೂಚ್ಯಂಕ ಕೂಡ ಶೇ 1ಕ್ಕಿಂತ ಹೆಚ್ಚಿನ ಪ್ರಮಾಣದಲ್ಲಿ ಹೆಚ್ಚಳ ಕಂಡಿದೆ.

ಇದನ್ನೂ ಓದಿ: ಫೆ. 1ರ ಬಳಿಕ ಮಾರುಕಟ್ಟೆ ಕುಸಿಯುತ್ತದಾ? ಬಜೆಟ್​ನಲ್ಲಿ ಸಂಭಾವ್ಯ ಘೋಷಣೆಗಳಿವು…

ನಿಫ್ಟಿ 50ಯಲ್ಲಿ ಅತಿಹೆಚ್ಚಳ ಕಾಣುತ್ತಿರುವ ಐದು ಷೇರುಗಳು (ಬೆಳಗ್ಗೆ 10:30ಕ್ಕೆ)

• ಎಲ್ ಅಂಡ್ ಟಿ: ಶೇ. 10.87
• ಮಹೀಂದ್ರ ಅಂಡ್ ಮಹೀಂದ್ರ: ಶೇ. 8.66
• ಬಿಇಎಲ್: ಶೇ. 8.46
• ಅಲ್ಟ್ರಾಟೆಕ್ ಸಿಮೆಂಟ್: ಶೇ. 4.84
• ಇನ್ಫೋಸಿಸ್: ಶೇ. 4.59

ನಿಫ್ಟಿ50ಯಲ್ಲಿ ಕುಸಿಯುತ್ತಿರುವ ಷೇರುಗಳು

• ಟೈಟಾನ್ ಕಂಪನಿ: ಶೇ. 5.22 ಕುಸಿತ
• ನೆಸ್ಲೆ: ಶೇ. 3.96 ಕುಸಿತ
• ಐಟಿಸಿ: ಶೇ. 2.89 ಕುಸಿತ
• ಗ್ರಾಸಿಂ ಇಂಡಸ್ಟ್ರೀಸ್: ಶೇ. 2.21 ಕುಸಿತ
• ಎಚ್​ಸಿಎಲ್ ಟೆಕ್: ಶೇ. 1.73 ಕುಸಿತ

ಬಜೆಟ್ ಲೈವ್ ಅಪ್​ಡೇಟ್ಸ್​ಗೆ ಇಲ್ಲಿ ಕ್ಲಿಕ್ ಮಾಡಿ

ಇನ್ನಷ್ಟು ಬಜೆಟ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ