Bharti Airtel: ತಿಂಗಳ ಕನಿಷ್ಠ ರಿಚಾರ್ಜ್ ದರ 155 ರೂ.ಗೆ ಹೆಚ್ಚಿಸಿದ ಏರ್​ಟೆಲ್; ದೇಶಾದ್ಯಂತ ಜಾರಿ ಸಾಧ್ಯತೆ

ನವದೆಹಲಿ: ಹರಿಯಾಣ ಮತ್ತು ಒಡಿಶಾ ವಲಯಗಳಲ್ಲಿ 28 ದಿನಗಳ ಅವಧಿಯ ಕನಿಷ್ಠ ರಿಚಾರ್ಜ್ (Minimum Recharge) ದರವನ್ನು ಭಾರ್ತಿ ಏರ್​ಟೆಲ್ (Bharti Airtel) ಶೇಕಡಾ 57ರಷ್ಟು ಹೆಚ್ಚಿಸಿದ್ದು, 155 ರೂ. ನಿಗದಿಪಡಿಸಿದೆ. ಕಂಪನಿಯ ವೆಬ್​ಸೈಟ್​ನಲ್ಲಿ ಈ ಕುರಿತು ಮಾಹಿತಿ ನೀಡಲಾಗಿದೆ. ಕಂಪನಿಯು ಪ್ರಾಯೋಗಿಕವಾಗಿ ಈ ಪ್ಲಾನ್ ಅನ್ನು ಹರಿಯಾಣ ಮತ್ತು ಒಡಿಶಾಗಳಲ್ಲಿ ಜಾರಿಗೊಳಿಸಿದ್ದು, ಮುಂದಿನ ಕೆಲ ದಿನಗಳಲ್ಲಿ ದೇಶದಾದ್ಯಂತ ವಿಸ್ತರಿಸುವ ಸಾಧ್ಯತೆ ಇದೆ ಎಂದು ಬೆಳವಣಿಗೆಗಳ ಬಗ್ಗೆ ನಿಕಟ ಮಾಹಿತಿಯುಳ್ಳ ಮೂಲಗಳು ತಿಳಿಸಿವೆ.

99 ರೂ. ಮೊತ್ತದ ಕನಿಷ್ಠ ರಿಚಾರ್ಜ್ ದರವನ್ನು ಏರ್​ಟೆಲ್ ಸ್ಥಗಿತಗೊಳಿಸಿದೆ. ಈ ಯೋಜನೆಯಡಿ 200 ಎಂಬಿ ಡೇಟಾ, ಸೆಕೆಂಡ್​ಗೆ 2.5 ರೂ. ನಂತೆ ಕರೆ ಸೌಲಭ್ಯ ದೊರೆಯುತ್ತಿತ್ತು. ಇದರ ಬದಲು ಈಗ ಹರಿಯಾಣ ಹಾಗೂ ಒಡಿಶಾದಲ್ಲಿ 155 ರೂ.ಗೆ 28 ದಿನಗಳ ವ್ಯಾಲಿಡಿಟಿ, 1 ಜಿಬಿ ಡೇಟಾ, ಅನಿಯಮಿತ ಕರೆ ಹಾಗೂ 300 ಎಸ್ಎಂಎಸ್ ಸೌಲಭ್ಯ ಇರುವ ಪ್ಲಾನ್ ಅನ್ನು ಪರಿಚಯಿಸಿದೆ.

155 ರೂ.ಗಿಂತ ಕಡಿಮೆ ಮೊತ್ತದ ಎಲ್ಲ ಪ್ಲಾನ್​ಗಳ ರದ್ದು ಸಾಧ್ಯತೆ

ಇದನ್ನೂ ಓದಿ

ಯುಪಿಐ ಮೂಲಕ ಎಟಿಎಂನಿಂದ ಹಣ ವಿತ್​ಡ್ರಾ ಮಾಡುವುದು ಹೇಗೆ? ಇಲ್ಲಿದೆ ಪೂರ್ಣ ಮಾಹಿತಿ

ಇ-ಕಾಮರ್ಸ್ ವೆಬ್​​ಸೈಟ್​ಗಳಲ್ಲಿ ನಕಲಿ ರಿವ್ಯೂಗೆ ಬೀಳಲಿದೆ ಕಡಿವಾಣ; ಶೀಘ್ರದಲ್ಲೇ ಬರಲಿದೆ ನಿಯಮ

It Jobs; ಐಟಿ ಕ್ಷೇತ್ರದಲ್ಲಿ ಉದ್ಯೋಗ ಹುಡುಕುತ್ತಿದ್ದೀರಾ? ಶೀಘ್ರದಲ್ಲೇ ನಿಮಗಿದೆ ಸಿಹಿ ಸುದ್ದಿ

ಡಿಜಿಟಲ್ ಪಾವತಿಗೆ ಶುಲ್ಕ: ರಿಸರ್ವ್ ಬ್ಯಾಂಕ್ ಜೊತೆಗೆ ಮಾತುಕತೆ ಆರಂಭಿಸಿದ ಪೇಮೆಂಟ್ಸ್ ಕಾರ್ಪೊರೇಷನ್

155 ರೂ.ಗಿಂತ ಕಡಿಮೆ ಮೊತ್ತದ ಎಲ್ಲ ಪ್ಲಾನ್​ಗಳನ್ನು ಏರ್​ಟೆಲ್ ಶೀಘ್ರದಲ್ಲೇ ರದ್ದುಪಡಿಸು ಸಾಧ್ಯತೆ ಇದೆ. ತಿಂಗಳ ಪ್ಲಾನ್​ನೊಂದಿಗೆ ಎಸ್​ಎಂಎಸ್​ ಬೇಕಿದ್ದರೂ ಗ್ರಾಹಕರು 155 ರೂ. ರಿಚಾರ್ಜ್ ಮಾಡಬೇಕಾಗಬಹುದು ಎಂದು ಮೂಲಗಳು ತಿಳಿಸಿವೆ. ಈ ಕುರಿತು ಪ್ರತಿಕ್ರಿಯೆ ಕೋರಿ ‘ಪಿಟಿಐ’ ಸುದ್ದಿಸಂಸ್ಥೆಯು ಭಾರ್ತಿ ಏರ್​ಟೆಲ್​ಗೆ ಇ-ಮೇಲ್ ಸಂದೇಶ ಕಳುಹಿಸಿದ್ದು, ಇನ್ನಷ್ಟೇ ಉತ್ತರ ದೊರೆಯಬೇಕಿದೆ.

ಪರೀಕ್ಷಾರ್ಥವಾಗಿ ಏರ್​ಟೆಲ್ ಹರಿಯಾಣ ಮತ್ತು ಒಡಿಶಾದಲ್ಲಿ ಹೊಸ ಪ್ಲಾನ್ ಪರಿಚಯಿಸಿದೆ. ಈ ರಾಜ್ಯಗಳಲ್ಲಿ ಗ್ರಾಹಕರಿಂದ ಯಾವ ರೀತಿಯ ಪ್ರತಿಕ್ರಿಯೆ ವ್ಯಕ್ತವಾಗುತ್ತದೆ ಎಂಬುದನ್ನು ನೋಡಿಕೊಂಡು ಮುಂದಿನ ನಿರ್ಧಾರ ಕೈಗೊಳ್ಳುವ ತಂತ್ರಗಾರಿಕೆ ಕಂಪನಿಯದ್ದು ಎಂಬುದಾಗಿ ಹೂಡಿಕೆ ಸಲಹಾ ಸಂಸ್ಥೆ ಐಸಿಐಸಿಐ ಸೆಕ್ಯುರಿಟೀಸ್ ಹೇಳಿದೆ.

99 ರೂ. ಪ್ಲಾನ್​ನಲ್ಲಿ 99 ರೂ. ಟಾಕ್​ಟೈಮ್, 200 ಎಂಬಿ ಡೇಟಾ 28 ದಿನಗಳ ಅವಧಿಗೆ ಲಭ್ಯವಿದ್ದವು. ಇದೀಗ 155 ರೂ. ಪ್ಲಾನ್​ನಲ್ಲಿ 1 ಜಿಬಿ ಡೇಟಾ ಜತೆಗೆ 300 ಎಸ್​​ಎಂಎಸ್ ಸಿಗಲಿವೆ. ಇದರೊಂದಿಗೆ ಕನಿಷ್ಠ ರಿಚಾರ್ಜ್ ದರದಲ್ಲಿ ಶೇಕಡಾ 57ರಷ್ಟು ಹೆಚ್ಚಳ ಮಾಡಿದಂತಾಗಿದೆ ಎಂದು ಐಸಿಐಸಿಐ ಸೆಕ್ಯುರಿಟೀಸ್​ನ ವಿಶ್ಲೇಷಕ ಸಂಜೇಶ್ ಜೈನ್ ಹಾಗೂ ಆಕಾಶ್ ಕುಮಾರ್ ಹೇಳಿದ್ದಾರೆ.

ಇದೇ ಮೊದಲಲ್ಲ

ಈ ಹಿಂದೆ ಕೂಡ ಏರ್​ಟೆಲ್ ಇಂಥದ್ದೇ ಮಾದರಿ ಅನುಸರಿಸಿತ್ತು. ಕನಿಷ್ಠ ರಿಚಾರ್ಜ್ ದರವನ್ನು ಆಯ್ದ ವಲಯಗಳಲ್ಲಿ 79 ರೂ.ನಿಂದ 99 ರೂ.ಗೆ ಹೆಚ್ಚಿಸಿತ್ತು. ಬಳಿಕ ದೇಶದಾದ್ಯಂತ ಅನುಷ್ಠಾನಗೊಳಿಸಿತ್ತು. ಸದ್ಯದ ಮಾರುಕಟ್ಟೆ ಪರಿಸ್ಥಿತಿಯಲ್ಲಿ ಟಾರಿಫ್ ಹೆಚ್ಚಳಕ್ಕೆ ಮುಂದಾದ ಮೊದಲ ಕಂಪನಿ ಏರ್​ಟೆಲ್. ಇದಕ್ಕೆ ಉಳಿದ ಕಂಪನಿಗಳ ಪ್ರತಿಕ್ರಿಯೆ ಹೇಗಿರುತ್ತದೆ ಎಂಬುದನ್ನು ಕಾದುನೋಡಬೇಕಿದೆ. ನಿರೀಕ್ಷಿತ ಬೆಂಬಲ ಸಿಗದೇ ಹೋದಲ್ಲಿ ಏರ್​ಟೆಲ್ ಮತ್ತೆ ಕನಿಷ್ಠ ರಿಚಾರ್ಜ್ ದರವಾದ 99 ರೂ. ಪ್ಲಾನ್​ ಅನ್ನು ಮರುಸ್ಥಾಪಿಸುವ ಸಾಧ್ಯತೆ ಇದೆ ಎಂದು ಐಸಿಐಸಿಐ ಸೆಕ್ಯುರಿಟೀಸ್ ಹೇಳಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿ ಓದಲು ಇಲ್ಲಿ ಕ್ಲಿಕ್ ಮಾಡಿ