ಒಂದೇ ದಿನದಲ್ಲಿ ಗೂಗಲ್ ಷೇರು ಪ್ರಪಾತಕ್ಕೆ; ಭಾರತದ ಮೂರು ಅಗ್ರಮಾನ್ಯ ಕಂಪನಿಗಳ ಒಟ್ಟು ಸಂಪತ್ತಿಗೆ ಸಮ ಈ ಕುಸಿತ

ವಾಷಿಂಗ್ಟನ್, ಅಕ್ಟೋಬರ್ 30: ವಿಶ್ವದ ಪ್ರಮುಖ ತಂತ್ರಜ್ಞಾನ ಕಂಪನಿ ಎನಿಸಿದ ಗೂಗಲ್​ನ ಮಾತೃ ಸಂಸ್ಥೆಯಾದ ಆಲ್ಫಬೆಟ್ ಷೇರು ಮಾರುಕಟ್ಟೆಯಲ್ಲಿ ತೀವ್ರ ಹಿಂಜರಿತ ಅನುಭವಿಸಿದೆ. ಒಂದೇ ದಿನದಲ್ಲಿ ಆಲ್ಫಬೆಟ್​ನ ಷೇರುಬೆಲೆ ಶೇ. 13ರಷ್ಟು ಕುಸಿತವಾಗಿದೆ. ಇದು ಅದರ ಒಂದು ದಿನದ ಗರಿಷ್ಠ ಕುಸಿತ ಎನಿಸಿದೆ. ಅದರ ಮಾರುಕಟ್ಟೆ ಬಂಡವಾಳದಲ್ಲಿ 500 ಬಿಲಿಯನ್ ಡಾಲರ್​ನಷ್ಟು ಮೌಲ್ಯದ ಸಂಪತ್ತು ಒಂದೇ ದಿನದಲ್ಲಿ ಕರಗಿಹೋಗಿದೆ. ಆಲ್ಫಬೆಟ್​ನ ಹೂಡಿಕೆದಾರರು ಕಂಗಾಲಾಗಿದ್ದಾರೆ.

ಭಾರತದ ಮೂರು ಅತಿದೊಡ್ಡ ಕಂಪನಿಗಳ ಒಟ್ಟು ಸಂಪತ್ತಿಗೆ ಸಮನಾದಷ್ಟು ಕುಸಿತ

ಗೂಗಲ್​ನ ಮಾತೃ ಸಂಸ್ಥೆಗೆ ಒಂದೇ ಟ್ರೇಡಿಂಗ್ ಸೆಷನ್​ನಲ್ಲಿ 500 ಬಿಲಿಯನ್ ಡಾಲರ್ ಮಾರ್ಕೆಟ್ ಕ್ಯಾಪ್ ನಶಿಸಿದೆ. ಷೇರುಸಂಪತ್ತಿಯಲ್ಲಿ ಭಾರತದ ಟಾಪ್-3 ಕಂಪನಿಗಳೆನಿಸಿದ ರಿಲಯನ್ಸ್ ಇಂಡಸ್ಟ್ರೀಸ್, ಜಿಯೋ ಪ್ಲಾಟ್​ಫಾರ್ಮ್ಸ್ ಮತ್ತು ಭಾರ್ತಿ ಏರ್ಟೆಲ್​ನ ಒಟ್ಟೂ ಮಾರ್ಕೆಟ್ ಕ್ಯಾಪ್ 450 ಬಿಲಿಯನ್ ಡಾಲರ್ ಕೂಡ ದಾಟುವುದಿಲ್ಲ. ಅಂದರೆ, ಗೂಗಲ್ ಕಂಡ ಒಂದು ದಿನದ ಕುಸಿತ ಅದೆಷ್ಟು ದೊಡ್ಡದಿರಬಹುದು ಎಂದು ಅಂದಾಜಿಸಬಹುದು. ಆಲ್ಫಬೆಟ್​ನ ಒಂದು ಷೇರು ಬೆಲೆ 282 ಡಾಲರ್ ಇದೆ. ಅಂದರೆ, ಸುಮಾರು 29,000 ರೂಪಾಯಿ ಇದೆ.

ಇದನ್ನೂ ಓದಿ: ಭಾರತದಲ್ಲಿ 12 ವರ್ಷದಲ್ಲಿ ಬಡತನದಿಂದ ಹೊರಬಂದ 50 ಕೋಟಿ ಜನರು; ದೇಶದಲ್ಲೀಗ ಕಡುಬಡತನ ಗಣನೀಯ ಇಳಿಕೆ

ಆಲ್ಫಬೆಟ್ ಷೇರು ಕುಸಿತ ಯಾಕೆ?

ಆಲ್ಫಬೆಟ್ ಸಂಸ್ಥೆಯ ತ್ರೈಮಾಸಿಕ ಆದಾಯ ವರದಿ ನಿನ್ನೆ ಬಿಡುಗಡೆ ಆಗಿದೆ. ನಿರೀಕ್ಷೆಗಿಂತ ಕಡಿಮೆ ಆದಾಯ ಬಂದಿರುವುದು ಹೂಡಿಕೆದಾರರಿಗೆ ತಳಮಳ ತಂದಿದೆ. ಆಲ್ಫಬೆಟ್​ನ ಪ್ರಮುಖ ಆದಾಯ ಮೂಲದ ಕಂಪನಿ ಎಂದರೆ ಗೂಗಲ್. ಈ ಗೂಗಲ್​ನ ಪ್ರಮುಖ ಆದಾಯಮೂಲ ಅದರ ಸರ್ಚ್ ಎಂಜಿನ್. ಗೂಗಲ್ ಸರ್ಚ್​ನ ಆದಾಯ 65 ಬಿಲಿಯನ್ ಡಾಲರ್ ಇರಬಹುದು ಎನ್ನುವ ನಿರೀಕ್ಷೆ ಇತ್ತು. ಆದರೆ 63 ಬಿಲಿಯನ್ ಡಾಲರ್ ಮಾತ್ರವೇ ಆದಾಯ ಬಂದಿದೆ ಎನ್ನುವುದು ಆತಂಕಕ್ಕೆ ಕಾರಣ.

ಗಾಯದ ಮೇಲೆ ಬರೆ ಎಳೆದಂತೆ ಆಲ್ಫಬೆಟ್​ನ ಫ್ರೀ ಕ್ಯಾಷ್ ಫ್ಲೋ ಈ ಕ್ವಾರ್ಟರ್​ನಲ್ಲಿ ನೆಗಟಿವ್ ಆಗಿದೆ. ಡಾಟಾ ಸೆಂಟರ್​ಗಳು, ಚಿಪ್​ಗಳು ಹಾಗು ಇತರ ಇನ್​ಫ್ರಾಸ್ಟ್ರಕ್ಚರ್ ನಿರ್ಮಾಣದ ಮೇಲೆ ಗೂಗಲ್ ಭಾರೀ ವೆಚ್ಚ ಮಾಡಿರುವುದು ಅದರ ಹಣವನ್ನು ಬರಿದು ಮಾಡಿದೆ. ಅಷ್ಟು ಹೂಡಿಕೆ ಮಾಡಿದರೂ ಆದಾಯ ಹೆಚ್ಚದೇ ಇರುವುದು ಹೂಡಿಕೆದಾರರಿಗೆ ಹೆಚ್ಚಿನ ಆತಂಕ ತಂದಿರಬಹುದು.

ಇದನ್ನೂ ಓದಿ: ಎಐ ಎಫೆಕ್ಟ್; 10 ಮಂದಿಯ ಕೆಲಸ ಒಬ್ಬನಿಂದಲೇ ಸಾಧ್ಯ; ಭವಿಷ್ಯದ ವಾಸ್ತವ ಬಿಚ್ಚಿಟ್ಟ ಜೋಹೋ ಸಂಸ್ಥಾಪಕ ಶ್ರೀಧರ್ ವೆಂಬು

ಆಲ್ಫಬೆಟ್​ಗೆ ಪಾಸಿಟಿವ್ ಸಂಗತಿ ಎಂದರೆ ಅದರ ಕ್ಲೌಡ್ ಬ್ಯುಸಿನೆಸ್ ಉತ್ತಮ ಸಾಧನೆ ಮಾಡಿದೆ. ಗೂಗಲ್ ಕ್ಲೌಡ್​ನಿಂದ ಬಂದ ಆದಾಯ ಎರಡು ಪಟ್ಟು ಹೆಚ್ಚಾಗಿ 30 ಬಿಲಿಯನ್ ಡಾಲರ್ ದಾಟಿದೆ. ಇನ್ನು, ಅದರ ಜೆಮಿನೈ ಎಐ ಆ್ಯಪ್​ನ ಸಕ್ರಿಯ ಬಳಕೆದಾರರ ಸಂಖ್ಯೆ 100 ಕೋಟಿಯ ಮೈಲಿಗಲ್ಲು ದಾಟಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ