ಹೊಸ ತಲೆಮಾರಿನ ಯುದ್ಧವಿಮಾನ ನಿರ್ಮಾಣಕ್ಕೆ ಜೊತೆಯಾದ ಬಿಇಎಲ್ ಮತ್ತು ಎಲ್ ಅಂಡ್ ಟಿ

ನವದೆಹಲಿ, ಸೆಪ್ಟೆಂಬರ್ 24: ಐದನೇ ತಲೆಮಾರಿನ ಯುದ್ಧವಿಮಾನಗಳನ್ನು (Fifth Gen Fighter Jets) ನಿರ್ಮಾಣ ಮಾಡುವ ಭಾರತೀಯ ವಾಯುಪಡೆಯ (Indian Air Force) ಪ್ರಯತ್ನಕ್ಕೆ ಕಾರ್ಪೊರೇಟ್ ವಲಯದಿಂದ ಉತ್ತಮ ಸ್ಪಂದನೆ ಸಿಗುತ್ತಿದೆ. ಎಎಂಸಿಎ ಯೋಜನೆಯಲ್ಲಿ (AMCA project) ಪಾಲ್ಗೊಳ್ಳಲು ಸರ್ಕಾರದ ಎಕ್ಸ್​ಪ್ರೆಸ್ ಆಫ್ ಇಂಟರೆಸ್ಟ್ (EoI- Express of Interest) ಆಹ್ವಾನಿಸಿದೆ. ಎಚ್​ಎಎಲ್ ಈ ನಿಟ್ಟಿನಲ್ಲಿ ಪ್ರಯತ್ನ ನಡೆಸುತ್ತಿದೆ. ಇದರ ಬೆನ್ನಲ್ಲೇ ಎಲ್ ಅಂಡ್ ಟಿ ಮತ್ತು ಬಿಇಎಲ್ ಸಂಸ್ಥೆಗಳು ಜಂಟಿಯಾಗಿ ಈ ಯೋಜನೆಗೆ ಪ್ರಯತ್ನಿಸಲು ಹೊರಟಿವೆ.

ಈಗಾಗಲೇ ಪ್ರಮುಖ ಡಿಫೆನ್ಸ್ ಪ್ರಾಜೆಕ್ಟ್​ಗಳನ್ನು ಕೈಗೊಂಡು ಗಮನ ಸೆಳೆದಿರುವ ಬೆಂಗಳೂರು ಮೂಲದ ಭಾರತ್ ಎಲೆಕ್ಟ್ರಾನಿಕ್ಸ್ ಲಿಮಿಟೆಡ್ ಮತ್ತು ಪ್ರಮುಖ ಎಂಜಿನಿಯರಿಂಗ್ ಕಂಪನಿಯಾದ ಎಲ್ ಅಂಡ್ ಟಿ ಜೊತೆಗಾಗಿ ಕನ್ಸಾರ್ಟಿಯಂ ಮಾಡಿಕೊಂಡಿವೆ. ಈ ಎರಡೂ ಕಂಪನಿಗಳು ಎಲ್​ಸಿಎ ಯುದ್ಧವಿಮಾನಗಳ ತಯಾರಿಕೆಯಲ್ಲಿ ಅನುಭವ ಹೊಂದಿವೆ. ಭಾರತದ ಮಹತ್ವಾಕಾಂಕ್ಷಿ ಎಎಂಸಿಎ ಪ್ರಾಜೆಕ್ಟ್​ನಲ್ಲಿ ಈ ಗುಂಪು ಮಹತ್ತರ ಪಾತ್ರ ವಹಿಸಬಹುದು.

ಇದನ್ನೂ ಓದಿ: ಆಫ್ರಿಕಾದಲ್ಲಿ ಭಾರತದ ಮೊದಲ ಡಿಫೆನ್ಸ್ ತಯಾರಿಕಾ ಘಟಕ; ಮೊರಾಕ್ಕೋಕ್ಕೆ ರಕ್ಷಣಾ ಸಚಿವರ ಐತಿಹಾಸಿಕ ಭೇಟಿ

ಎಚ್​ಎಎಲ್ ಜೊತೆ ಸೇರಲು 28 ಕಂಪನಿಗಳ ಆಸಕ್ತಿ

ಎಎಂಸಿಎ ಯೋಜನೆಯಲ್ಲಿ ಪಾಲ್ಗೊಳ್ಳಲು ಎಚ್ಎಎಲ್ ಸಿದ್ಧವಿದೆ. ಆದರೆ, ಯೋಜನೆಗೆ ರೂಪಿಸಲಾಗಿರುವ ಕೆಲ ನಿಯಮಗಳಿಂದಾಗಿ ಎಚ್​ಎಎಲ್ ಏಕಾಂಗಿಯಾಗಿ ಈ ಪ್ರಾಜೆಕ್ಟ್​ನಲ್ಲಿ ಪಾಲ್ಗೊಳ್ಳಲು ಸಾಧ್ಯವಾಗುವುದಿಲ್ಲ. ಹೀಗಾಗಿ, ಸಹ-ಕಂಪನಿ ಅಥವಾ ಕಂಪನಿಗಳ ಅಗತ್ಯ ಇದೆ. ಬರೋಬ್ಬರಿ 28 ಖಾಸಗಿ ಕಂಪನಿಗಳು ಎಚ್​ಎಎಲ್ ಜೊತೆ ನಿಲ್ಲಲು ಸಿದ್ಧವಾಗಿವೆ.

ಇವುಗಳ ಪೈಕಿ ಒಂದು ಅಥವಾ ಎರಡು ಕಂಪನಿಗಳ ಜೊತೆ ಸೇರಿಕೊಂಡು ಕನ್ಸಾರ್ಟಿಯಂ ರಚಿಸಲು ಎಚ್​ಎಎಲ್ ನಿರ್ಧರಿಸಿದೆ. ಈ 28 ಕಂಪನಿಗಳ ಪೈಕಿ ಆ 1-2 ಕಂಪನಿಗಳನ್ನು ಶಾರ್ಟ್​ಲಿಸ್ಟ್ ಮಾಡುವ ಕೆಲಸ ನಡೆಯುತ್ತಿದೆ. ಅದಕ್ಕಾಗಿ ಎಚ್​ಎಎಲ್ ಒಂದು ಸಮಿತಿ ರಚಿಸಿದೆ.

ಇದನ್ನೂ ಓದಿ: ಭಾರತದ 15 ವರ್ಷದ ಭರ್ಜರಿ ಡಿಫೆನ್ಸ್ ಪ್ಲಾನ್; ಯುದ್ಧವೆಂದರೆ ಬಾಹ್ಯಾಕಾಶಕ್ಕೂ ಸೈ, ಎಐಗೂ ಸೈ

ಕನ್ಸಾರ್ಟಿಯಂ ರಚಿಸಿ ಎಎಂಸಿಎ ಪ್ರೋಗ್ರಾಮ್​ಗೆ ಇಒಐ ಸಲ್ಲಿಸಲು ಸೆಪ್ಟೆಂಬರ್ 30 ಡೆಡ್​ಲೈನ್ ನಿಗದಿ ಮಾಡಲಾಗಿದೆ. ಅಷ್ಟರೊಳಗೆ ಎಚ್​ಎಎಲ್ ತನ್ನ ಜೊತೆಗಾರ ಕಂಪನಿಗಳೊಂದಿಗೆ ಕನ್ಸಾರ್ಟಿಯಂ ರಚಿಸಿ, ಇಒಐ ಸಲ್ಲಿಸಬೇಕಾಗುತ್ತದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ