Apple CEO Salary: ಆಪಲ್ ಕಂಪೆನಿ ಸಿಇಒ ಟಿಮ್ ಕುಕ್ ವೇತನ ಎಷ್ಟು ನೂರು ಕೋಟಿ ಗೊತ್ತಾ?

Apple CEO Salary: ಆಪಲ್ ಕಂಪೆನಿ ಸಿಇಒ ಟಿಮ್ ಕುಕ್ ವೇತನ ಎಷ್ಟು ನೂರು ಕೋಟಿ ಗೊತ್ತಾ?
ಟಿಮ್ ಕುಕ್ (ಸಂಗ್ರಹ ಚಿತ್ರ)

ಮಾರುಕಟ್ಟೆ ಬಂಡವಾಳ ಮೌಲ್ಯದ ದೃಷ್ಟಿಯಿಂದ ಜಗತ್ತಿನ ನಂಬರ್ 1 ಕಂಪೆನಿಯಾದ ಆಪಲ್ ಸಿಇಒ 2021ರಲ್ಲಿ ಪಡೆದ ವೇತನ ಎಷ್ಟು ಗೊತ್ತಾ? ಇವತ್ತಿನ ಡಾಲರ್​ ಲೆಕ್ಕಕ್ಕೆ 733.58 ಕೋಟಿ ರೂಪಾಯಿಗೆ ಸಮ. ಸಂಬಳ, ಸವಲತ್ತು, ಸೌಕರ್ಯ ಇವುಗಳ ಮಾಹಿತಿ ಇಲ್ಲಿದೆ.

TV9kannada Web Team

| Edited By: Srinivas Mata

Jan 07, 2022 | 12:59 PM

ವಿಶ್ವದ ಅತಿ ದೊಡ್ಡ ಟೆಕ್​ ಕಂಪೆನಿಯಾದ ಆಪಲ್​ನ ಸಿಇಒ ಟಿಮ್ ಕುಕ್ ಅವರು ವಿಶ್ವದಲ್ಲೇ ಅತಿ ಹೆಚ್ಚು ವೇತನ ಪಡೆಯುವಂಥ ಸಿಇಒಗಳಲ್ಲಿ ಒಬ್ಬರು. ಆ ಕಂಪೆನಿಯ ಹಣಕಾಸು ವರ್ಷ ಸೆಪ್ಟೆಂಬರ್​ನಿಂದ ಶುರುವಾಗಿ, ಅದರ ಮುಂದಿನ ಆಗಸ್ಟ್​ ತನಕ ಇರುತ್ತದೆ. ಕಳೆದ ಹಣಕಾಸು ವರ್ಷದಲ್ಲಿ, ಅಂದರೆ 2020ರ ಸೆಪ್ಟೆಂಬರ್​ನಿಂದ 2021ರ ಆಗಸ್ಟ್​ ತನಕದ ಹಣಕಾಸು ವರ್ಷದಲ್ಲಿ ಆಪಲ್ ಕಂಪೆನಿಯೇ ತಿಳಿಸಿರುವ ಪ್ರಕಾರ ಟಿಮ್ ಕುಕ್ ಅವರಿಗೆ ಎಷ್ಟು ವೇತನ ಸಂದಾಯ ಆಗಿದೆ ಗೊತ್ತೆ? ಜನವರಿ 6ನೇ ತಾರೀಕಿನಂದು ಎಸ್​ಇಸಿ ಫೈಲಿಂಗ್​ನಲ್ಲಿ ತಿಳಿಸಿರುವಂತೆ 9.87 ಕೋಟಿ ಅಮೆರಿಕನ್ ಡಾಲರ್ (98.73 ಮಿಲಿಯನ್ ಯುಎಸ್​ಡಿ) ವೇತನ ರೂಪದಲ್ಲಿ ಪಾವತಿಸಲಾಗಿದೆ. ಇಷ್ಟು ಮೊತ್ತವನ್ನು ಭಾರತದ ರೂಪಾಯಿ ಲೆಕ್ಕದಲ್ಲಿ ಇವತ್ತಿಗೆ ಲೆಕ್ಕಾಚಾರ ಹಾಕಿ ಹೇಳುವುದಾದರೆ, 733.58 ಕೋಟಿ ಆಗುತ್ತದೆ. ಇದರಲ್ಲಿ ಸಂಬಳ ಹಾಗೂ ಸವಲತ್ತು ಮತ್ತು ಇತರ ಬೆನಿಫಿಟ್​ಗಳು ಸಹ ಒಳಗೊಂಡಿವೆ. ಯಾವುದಕ್ಕೆ ಎಷ್ಟು ಪಾವತಿಸಲಾಗಿದೆ ಎಂಬ ಬಗ್ಗೆ ವಿವರವಾದ ಮಾಹಿತಿ ಇಲ್ಲಿದೆ.

– ಸಂಬಳ: 30 ಲಕ್ಷ ಯುಎಸ್​ಡಿ – ಆಪಲ್​ನ ಹಣಕಾಸು ಹಾಗೂ ಪರಿಸರ ಸುಸ್ಥಿರ ಗುರಿಯನ್ನು ತಲುಪಿದ್ದಕ್ಕಾಗಿ 1.2 ಕೋಟಿ ಯುಎಸ್​ಡಿ ಬೋನಸ್ – ಇತರ ಕಾಂಪೆನ್ಸೇಷನ್ 13.9 ಲಕ್ಷ ಯುಎಸ್​ಡಿ (ವೈಯಕ್ತಿಕ ವಿಮಾನ ಪ್ರಯಾಣ 712,488 ಡಾಲರ್, ಸೆಕ್ಯೂರಿಟಿ 630,630 ಡಾಲರ್, 401 (k) ಪ್ಲಾನ್​ಗೆ ಕೊಡುಗೆಯಾಗಿ 17,400 ಯುಎಸ್​ಡಿ, ಜೀವ ವಿಮಾ ಪ್ರೀಮಿಯಂಗಳು 2964 ಡಾಲರ್ ಮತ್ತು ರಜಾ ದಿನದ ನಗದು 23,077 ಡಾಲರ್) – 8.23 ಕೋಟಿ ಡಾಲರ್ ಮೌಲ್ಯದ ಸ್ಟಾಕ್​ಗಳು

ಈ ದಶಕವು ಆಪಲ್ ಕಂಪೆನಿಗೆ ದಾಖಲಾರ್ಹವಾದದ್ದು. 2021ರಲ್ಲಿ ಕುಕ್​ ಅವರಿಗೆ ಈಕ್ವಿಟಿ ಷೇರು ದೊರೆತಿದೆ. 2011ರಲ್ಲಿ ಅವರು ಸಿಇಒ ಆಗಿ ಪದೋನ್ನತಿ ಪಡೆದ ನಂತರ ಮೊದಲ ಬಾರಿಗೆ ಇದನ್ನು ಪಡೆದಿದ್ದಾರೆ ಎಂದು ಫೈಲಿಂಗ್​ನಲ್ಲಿ ತಿಳಿಸಲಾಗಿದೆ. ಆಪಲ್​ನ ಗಾತ್ರ, ಪರ್ಫಾರ್ಮೆನ್ಸ್, ಸಿಇಒ ಆಗಿ ಕುಕ್ ಅವರು ಪಾತ್ರ ಹಾಗೂ ಪರ್ಫಾರ್ಮೆನ್ಸ್ ಗಮನಿಸಿ ಈ ಸ್ಟಾಕ್ ಅವಾರ್ಡ್ ನೀಡಲಾಗಿದೆ ಎಂದು ಆಪಲ್ ಕಂಪೆನಿ ಹೇಳಿದೆ. ಅಂದಹಾಗೆ, 3 ಲಕ್ಷ ಕೋಟಿ ಅಮೆರಿಕನ್ ಡಾಲರ್ ಮಾರುಕಟ್ಟೆ ಬಂಡವಾಳ ಮೌಲ್ಯವನ್ನು ತಲುಪಿದ ಜಗತ್ತಿನ ಮೊದಲ ಕಂಪೆನಿಯಾಗಿ ಆಪಲ್ ಹೊರಹೊಮ್ಮಿತು.

ಅಚ್ಚರಿಯ ಸಂಗತಿ ಏನೆಂದರೆ, ಇಷ್ಟು ದೊಡ್ಡ ಮೊತ್ತದ ವೇತನ ಪಡೆದುಕೊಂಡ ಹೊರತಾಗಿಯೂ ಅಮೆರಿಕದಲ್ಲಿ ಅತಿ ಹೆಚ್ಚು ವೇತನ ಪಡೆದ ಸಿಇಒಗಳ ಪಟ್ಟಿಯಲ್ಲಿ ಟಿಮ್​ ಕುಕ್​ಗೆ ಎಂಟನೇ ಸ್ಥಾನ ಎಂದು 2021ರ ಆಗಸ್ಟ್​ನಲ್ಲಿ ಬ್ಲೂಮ್​ಬರ್ಗ್ ಬಿಡುಗಡೆ ಮಾಡಿದ ವರದಿಯಲ್ಲಿ ತಿಳಿದುಬಂದಿದೆ.​

ಇದನ್ನೂ ಓದಿ: Apple Inc Market Cap: 3 ಟ್ರಿಲಿಯನ್ ಯುಎಸ್​ಡಿ ಮಾರುಕಟ್ಟೆ ಬಂಡವಾಳ ಮೌಲ್ಯ ಮುಟ್ಟಿದ ಮೊದಲ ಕಂಪೆನಿ ಆಪಲ್

Follow us on

Related Stories

Most Read Stories

Click on your DTH Provider to Add TV9 Kannada