ಬ್ರಿಟನ್​ನಲ್ಲಿ ದಿಕ್ಕಾಪಾಲಾಗುತ್ತಿದೆ ‘ಬೇಬಿ ಬೂಮರ್ಸ್’ ಆಸ್ತಿ; ಇದು ಪಿತ್ರಾರ್ಜಿತ ಆಸ್ತಿ ತೆರಿಗೆ ತಂದ ಫಜೀತಿ

ಲಂಡನ್, ಮೇ 20: ಪಿತ್ರಾರ್ಜಿತ ಆಸ್ತಿ ತೆರಿಗೆ (inheritance tax) ಕಟ್ಟಲು ಸಾಧ್ಯವಾಗದೇ ಬೇಬಿ ಬೂಮರ್​ಗಳ (Baby boomers) ಮನೆ, ಜಮೀನು ಇತ್ಯಾದಿಗಳು ಈಗ ಮಾರಾಟಕ್ಕೆ ಹೋಗುತ್ತಿವೆ. ಬ್ರಿಟನ್​ನಲ್ಲಿ ಈಗ ಭಾರೀ ಪ್ರಮಾಣದಲ್ಲಿ ಆಸ್ತಿಗಳು ಹರಾಜಾಗಲು ಕಾಯುತ್ತಿವೆ ಎನ್ನುವಂತಹ ವರದಿಯೊಂದು ದಿ ಟೆಲಿಗ್ರಾಫ್ ಪತ್ರಿಕೆಯಲ್ಲಿ ಬಂದಿದೆ. ಇಲ್ಲಿ ಬೇಬಿ ಬೂಮರ್ ಎಂದರೆ 1946ರಿಂದ 1964ರೊಳಗೆ ಜನಿಸಿದವರು. ಇವರು ಸಂಪಾದಿಸಿದ ಆಸ್ತಿಯನ್ನು ಅನುಭವಿಸಲು ಅವರ ತಲೆಮಾರಿನವರಿಗೆ ಸಾಧ್ಯವಾಗುತ್ತಿಲ್ಲವಂತೆ. ಬ್ರಿಟನ್​ನ ಈ ಬೇಬಿ ಬೂಮರ್​ಗಳು ತಮ್ಮ ಮುಂದಿನ ತಲೆಮಾರಿನವರಿಗೆ ಬಿಟ್ಟು ಹೋಗಿರುವ ಅಥವಾ ಹೋಲಿರುವ ಆಸ್ತಿ ಮೌಲ್ಯ 1.2 ಟ್ರಿಲಿಯನ್ ಪೌಂಡ್. ಅಂದರೆ, ಹೆಚ್ಚೂಕಡಿಮೆ 120 ಲಕ್ಷ ಕೋಟಿ ರುಪಾಯಿ ಮೌಲ್ಯದ ಆಸ್ತಿ.

ವಿಪರ್ಯಾಸ ಎಂದರೆ, ಬ್ರಿಟನ್​ನಲ್ಲಿ ಈಗ ಶ್ರೀಮಂತರ ಸಂಖ್ಯೆ ಗಣನೀಯವಾಗಿ ಕಡಿಮೆ ಆಗುತ್ತಿದೆ. ಪಿತ್ರಾರ್ಜಿತ ಆಸ್ತಿ ಪಡೆಯಲು ಅಲ್ಲಿ ಭಾರೀ ತೆರಿಗೆ ಕಟ್ಟಬೇಕು. ಅಷ್ಟು ತೆರಿಗೆ ಹಣ ಕಟ್ಟಲೂ ಇವತ್ತಿನ ತಲೆಮಾರಿನವರಿಗೆ ಸಾಧ್ಯವಾಗುತ್ತಿಲ್ಲ. ಅಪ್ಪ ಹಾಕಿದ ಆಲದ ಮರದಿಂದ ಇವರಿಗೆ ನೆರಳೂ ಸಿಗದಂತಾಗಿದೆ.

ಬ್ರಿಟನ್​ನಲ್ಲಿ ಎಷ್ಟಿದೆ ಪಿತ್ರಾರ್ಜಿತ ಆಸ್ತಿ ತೆರಿಗೆ?

ಪಿತ್ರಾರ್ಜಿತ ಆಸ್ತಿ ತೆರಿಗೆ ಅಥವಾ ಇನ್​ಹೆರಿಟೆನ್ಸ್ ಟ್ಯಾಕ್ಸ್ ಎಂಬುದು ಒಬ್ಬ ವ್ಯಕ್ತಿ ಸತ್ತ ಬಳಿಕ ಅವರ ಆಸ್ತಿಯನ್ನು ಮುಂದಿನ ತಲೆಮಾರಿನವರಿಗೆ ವರ್ಗಾಯಿಸುವಾಗ ವಿಧಿಸಲಾಗುವ ತೆರಿಗೆಯಾಗಿದೆ. ಭಾರತದಲ್ಲೂ ಕೆಲ ದಶಕಗಳ ಕಾಲ ಇನ್​ಹೆರಿಟೆನ್ಸ್ ಟ್ಯಾಕ್ಸ್ ಇತ್ತು. ಅಮೆರಿಕದಲ್ಲಿ ಎಸ್ಟೇಟ್ ಟ್ಯಾಕ್ಸ್ ಎಂದಿದೆ.

ಇದನ್ನೂ ಓದಿ: ಬ್ರಿಟನ್ ದೊರೆ ಚಾರ್ಲ್ಸ್​ಗಿಂತಲೂ ಹೆಚ್ಚು ಶ್ರೀಮಂತರಾದ ಪ್ರಧಾನಿ ರಿಷಿ ಸುನಕ್, ಅಕ್ಷತಾ ಮೂರ್ತಿ ಕುಟುಂಬ

ಆಸ್ತಿ ಮುಂದಿನ ತಲೆಮಾರಿನವರಿಗೆ ವರ್ಗಾವಣೆ ಆಗುವಾಗ ಅದರ ಇಂದಿನ ಮಾರುಕಟ್ಟೆ ಮೌಲ್ಯ 3,25,000 ಪೌಂಡ್​ನಷ್ಟಿದ್ದರೆ ತೆರಿಗೆ ಕಟ್ಟಬೇಕಿಲ್ಲ. ಅದಕ್ಕೂ ಹೆಚ್ಚಿನ ಮೌಲ್ಯದ ಆಸ್ತಿಗೆ ಶೇ. 40ರಷ್ಟು ಇನ್​ಹೆರಿಟೆನ್ಸ್ ಟ್ಯಾಕ್ಸ್ ಕಟ್ಟಬೇಕಾಗುತ್ತದೆ. ಅಂದರೆ ಸುಮಾರು 35 ಕೋಟಿ ರೂ ಮೇಲ್ಪಟ್ಟ ಮೌಲ್ಯದ ಆಸ್ತಿಯನ್ನು ಪಿತ್ರಾರ್ಜಿತವಾಗಿ ಪಡೆಯಬೇಕೆಂದರೆ ಅದಕ್ಕೆ ಶೇ. 40ರಷ್ಟು ತೆರಿಗೆ ಪಾವತಿಸಬೇಕು.

2020-21ರಲ್ಲಿ ಬ್ರಿಟನ್​ನಲ್ಲಿ ಸಾವನ್ನಪ್ಪಿದವರ ಪೈಕಿ ಶೇ. 3.73ರಷ್ಟು ಜನರ ಆಸ್ತಿಗಳಿಗೆ ಪಿತ್ರಾರ್ಜಿ ಆಸ್ತಿ ತೆರಿಗೆ ಹೇರಲಾಗಿದೆ. 27,000 ಆಸ್ತಿ ವರ್ಗಾವಣೆಯಿಂದ ಸರಕಾರಕ್ಕೆ ಬಂದ ತೆರಿಗೆ ಆದಾಯ 5.76 ಬಿಲಿಯನ್ ಪೌಂಡ್ (ಸುಮಾರು 61,000 ಕೋಟಿ ರೂ) ಎನ್ನಲಾಗಿದೆ.

ಬೇಬಿ ಬೂಮರ್​ಗಳ ಕಥೆ ಏನು?

ಬ್ರಿಟನ್​ನಲ್ಲಿರುವ ಪಿತ್ರಾರ್ಜಿತ ಆಸ್ತಿ ತೆರಿಗೆ ಮಧ್ಯಮ ವರ್ಗ ಮತ್ತು ಕೆಳ ಮಧ್ಯಮ ವರ್ಗದವರಿಗೆ ಹೆಚ್ಚು ತಲೆನೋವಾಗಿಲ್ಲ. ಆದರೆ ಬೇಬಿ ಬೂಮರ್​ಗಳ ಸಂತಾನದವರಿಗೆ ಇದು ತಲೆನೋವಾಗಿದೆ. 1946ರಿಂದ 1964ರವರೆಗೆ ಜನಿಸಿದವರನ್ನು ಬೇಬಿ ಬೂಮರ್​ಗಳೆನ್ನುತ್ತಾರೆ. ತಲೆಮಾರಿನವರು ಸಾಮಾನ್ಯವಾಗಿ ಭೂ ಆಸ್ತಿ ಮಾಡುವ ಸ್ವಭಾವದವರಾಗಿದ್ದರು. ಹಣದ ಬದಲು ಈ ರೀತಿಯ ಸಾಕಷ್ಟು ಆಸ್ತಿಪಾಸ್ತಿಗಳನ್ನು ಮಾಡಿರುತ್ತಾರೆ. ಆಗ ಇವರು ಕೂಡಿಟ್ಟ ಈ ಆಸ್ತಿಯ ಈಗಿನ ಮಾರುಕಟ್ಟೆ ಮೌಲ್ಯ ಬಹಳ ಹೆಚ್ಚಿದೆ.

ಇದನ್ನೂ ಓದಿ: ಸಮಾಜವಾದಿ ಸೋಗಿನಲ್ಲಿ 4 ವರ್ಷ ಕಾಲ ಆದಾಯ ತೆರಿಗೆಯನ್ನು ಶೇ 97.5 ಕ್ಕೆ ಏರಿಸಿದ್ದ ಪ್ರಧಾನಿ ಇಂದಿರಾ! ಏನಾಯ್ತು ಆಗ?

ಈ ಬೇಬಿ ಬೂಮರ್​ಗಳು ಸಾವನ್ನಪ್ಪಿದ ಬಳಿಕ ಅವರ ಈ ದುಬಾರಿ ಮೌಲ್ಯದ ಆಸ್ತಿಯನ್ನು ಮಕ್ಕಳು ಪಡೆಯಬೇಕಾದರೆ ಶೇ. 40ರಷ್ಟು ತೆರಿಗೆ ಕಟ್ಟಬೇಕಾಗುತ್ತದೆ. ಇವತ್ತಿನ ಆರ್ಥಿಕ ದುಸ್ಥಿತಿಯಲ್ಲಿ ಇದು ಕಷ್ಟವಾಗುತ್ತಿದೆ. ಅಂತೆಯೇ ಬೇಬಿ ಬೂಮರ್​ಗಳ ಅಪಾರ ಮೌಲ್ಯದ ಆಸ್ತಿ ಈಗ ಮಾರಾಟಕ್ಕೆ ಹೋಗುವುದು ಅನಿವಾರ್ಯ ಎನ್ನುವಂತಾಗಿದೆ ಎಂದು ಟೆಲಿಗ್ರಾಫ್ ವರದಿ ಹೇಳುತ್ತದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ