ರೇವತಿ ಅದ್ವೈತಿಯಿಂದ ಹಿಡಿದು ಸುಂದರ್ ಪಿಚೈವರೆಗೆ ಜಾಗತಿಕ ದೈತ್ಯ ಸಂಸ್ಥೆಗಳ ಚುಕ್ಕಾಣಿ ಹಿಡಿದ ಭಾರತೀಯರು; ಈಗ ಕುನಾಲ್ ಹೊಸ ಸೇರ್ಪಡೆ

ಅಮೆರಿಕದ ಬೃಹತ್ ತಂತ್ರಜ್ಞಾನ ಮತ್ತು ಬಹುರಾಷ್ಟ್ರೀಯ ಕಂಪನಿಗಳನ್ನು ಮುನ್ನಡೆಸುತ್ತಿರುವ ಭಾರತೀಯ ಮೂಲದ ಸಿಇಒಗಳ (CEOs) ಸಂಖ್ಯೆ ವರ್ಷದಿಂದ ವರ್ಷಕ್ಕೆ ಹೆಚ್ಚಾಗುತ್ತಿದೆ. ಜಾಗತಿಕ ಮಟ್ಟದಲ್ಲಿ ಭಾರತೀಯರ ನಾಯಕತ್ವ, ನಿರ್ವಹಣಾ ಕೌಶಲ್ಯ ಮತ್ತು ತಂತ್ರಜ್ಞಾನದ ಮೇಲಿನ ಹಿಡಿತಕ್ಕೆ ಇದು ಸಾಕ್ಷಿಯಾಗಿದೆ. ಇತ್ತೀಚೆಗಷ್ಟೇ (ಜೂನ್ 2026) ‘ಕ್ರೆಡ್’ (CRED) ಸಂಸ್ಥಾಪಕ ಕುನಾಲ್ ಶಾ ಅವರು ವಾಟ್ಸಾಪ್‌ನ (WhatsApp) ಗ್ಲೋಬಲ್ ಹೆಡ್ ಆಗಿ ನೇಮಕಗೊಂಡಿರುವುದು ಈ ಪಟ್ಟಿಗೆ ಹೊಸ ಮತ್ತು ಅತಿದೊಡ್ಡ ಸೇರ್ಪಡೆಯಾಗಿದೆ.

ವಿಶ್ವದ ಪ್ರಮುಖ ಕಂಪನಿಗಳನ್ನು ಮುನ್ನಡೆಸುತ್ತಿರುವ ಪ್ರಭಾವಿ ಭಾರತೀಯ ಮೂಲದ ನಾಯಕರ ಪಟ್ಟಿ ಇಲ್ಲಿದೆ.

• ಸತ್ಯ ನಾಡೆಳ್ಲ, ಮೈಕ್ರೋಸಾಫ್ಟ್ : ಹೈದರಾಬಾದ್ ಮೂಲದ ಸತ್ಯ ನಾಡೆಲ್ಲ (Satya Nadella) ಅವರು 2014ರಿಂದ ಮೈಕ್ರೋಸಾಫ್ಟ್‌ನ ಸಿಇಒ ಆಗಿದ್ದಾರೆ. ಕ್ಲೌಡ್ ಕಂಪ್ಯೂಟಿಂಗ್ ಮತ್ತು ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (AI) ಕ್ಷೇತ್ರದಲ್ಲಿ ಮೈಕ್ರೋಸಾಫ್ಟ್ ಅನ್ನು ಉತ್ತುಂಗಕ್ಕೇರಿಸಿದ ಕೀರ್ತಿ ಇವರದ್ದು.
• ಸುಂದರ್ ಪಿಚೈ, ಆಲ್ಫಾಬೆಟ್ / ಗೂಗಲ್: ತಮಿಳುನಾಡಿನ ಮಧುರೈನಲ್ಲಿ ಜನಿಸಿದ ಸುಂದರ್ ಪಿಚೈ (Sundar Pichai) ಅವರು 2015ರಲ್ಲಿ ಗೂಗಲ್ (Google) ಸಿಇಒ ಆಗಿ, ನಂತರ ಮಾತೃಸಂಸ್ಥೆ ಆಲ್ಫಾಬೆಟ್‌ಗೂ (Alphabet) ಸಿಇಒ ಆದರು. ಗೂಗಲ್ ಕ್ರೋಮ್, ಆಂಡ್ರಾಯ್ಡ್ ಸೇರಿದಂತೆ ಹಲವು ಪ್ರಮುಖ ಉತ್ಪನ್ನಗಳ ಯಶಸ್ಸಿನ ರೂವಾರಿ ಇವರು.

ಇದನ್ನೂ ಓದಿ: ಚ್ಯಾಟ್ ಜಿಪಿಟಿಯಲ್ಲಿ ಕೇಳಬಾರದ ಒಂದು ಪ್ರಶ್ನೆ ಯಾವುದು? ಸಿಇಒ ಸ್ಯಾಮ್ ಆಲ್ಟ್​ಮ್ಯಾನ್ ಉತ್ತರ ಕೇಳಿ

• ಕುನಾಲ್ ಶಾ , ವಾಟ್ಸಾಪ್: ಇದು ಇತ್ತೀಚಿನ ಅತಿದೊಡ್ಡ ಬೆಳವಣಿಗೆಯಾಗಿದೆ. ಮೆಟಾ (Meta) ಸಂಸ್ಥೆಯು ಭಾರತೀಯ ಫಿನ್‌ಟೆಕ್ ಸಂಸ್ಥೆ ‘ಕ್ರೆಡ್’ (CRED) ನಲ್ಲಿ $900 ಮಿಲಿಯನ್ ಹೂಡಿಕೆ ಮಾಡಿದ ಬೆನ್ನಲ್ಲೇ, ಅದರ ಸಂಸ್ಥಾಪಕ ಕುನಾಲ್ ಶಾ ಅವರನ್ನು ವಾಟ್ಸಾಪ್‌ನ ಗ್ಲೋಬಲ್ ಹೆಡ್ ಆಗಿ ನೇಮಿಸಿದೆ. ವಿಲ್ ಕ್ಯಾತ್‌ಕಾರ್ಟ್ (Will Cathcart) ಅವರ ಸ್ಥಾನಕ್ಕೆ ಬಂದಿರುವ ಕುನಾಲ್ ಶಾ, ವಾಟ್ಸಾಪ್ ಮುನ್ನಡೆಸುತ್ತಿರುವ ಮೊದಲ ಭಾರತೀಯ ನಾಯಕ ಎನಿಸಿಕೊಂಡಿದ್ದಾರೆ.
• ಅರವಿಂದ್ ಕೃಷ್ಣ, ಐಬಿಎಂ: ಆಂಧ್ರಪ್ರದೇಶ ಮೂಲದ ಅರವಿಂದ್ ಕೃಷ್ಣ ಅವರು 2020ರಿಂದ ಐಬಿಎಂ ಸಂಸ್ಥೆಯ ಸಿಇಒ ಆಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ ಮತ್ತು ಹೈಬ್ರಿಡ್ ಕ್ಲೌಡ್ ತಂತ್ರಜ್ಞಾನದಲ್ಲಿ 100 ವರ್ಷಕ್ಕೂ ಹಳೆಯದಾದ ಈ ಕಂಪನಿಯನ್ನು ಹೊಸ ದಿಕ್ಕಿನಲ್ಲಿ ಮುನ್ನಡೆಸುತ್ತಿದ್ದಾರೆ.
• ನೀಲ್ ಮೋಹನ್, ಯೂಟ್ಯೂಬ್: ಲಕ್ನೋದಲ್ಲಿ ಜನಿಸಿದ ನೀಲ್ ಮೋಹನ್ (Neil Mohan) 2023ರಲ್ಲಿ ವಿಶ್ವದ ಅತಿ ದೊಡ್ಡ ವಿಡಿಯೋ ಪ್ಲಾಟ್‌ಫಾರ್ಮ್ ಯೂಟ್ಯೂಬ್‌ನ ಸಿಇಒ ಆಗಿ ಅಧಿಕಾರ ವಹಿಸಿಕೊಂಡರು. ಗೂಗಲ್‌ನ ಜಾಹೀರಾತು ವಿಭಾಗ ಮತ್ತು ಯೂಟ್ಯೂಬ್ ಶಾರ್ಟ್ಸ್ (YouTube Shorts) ಯಶಸ್ಸಿನಲ್ಲಿ ಇವರದ್ದು ಪ್ರಮುಖ ಪಾತ್ರ.
• ಶಂತನು ನಾರಾಯಣ್, ಅಡೋಬ್: ಹೈದರಾಬಾದ್‌ನಲ್ಲಿ ಬೆಳೆದ ಶಂತನು ನಾರಾಯಣ್ (Shantanu Narayen) ಅವರು 2007ರಿಂದ ಅಡೋಬ್ ಸಂಸ್ಥೆಯ ಸಿಇಒ ಆಗಿದ್ದಾರೆ. ಸಾಫ್ಟ್‌ವೇರ್ ಕ್ಷೇತ್ರದಿಂದ ಕ್ಲೌಡ್-ಆಧಾರಿತ ಚಂದಾದಾರಿಕೆ (Subscription) ಮಾದರಿಗೆ ಅಡೋಬ್ ಅನ್ನು ಬದಲಾಯಿಸಿ ಕಂಪನಿಯ ಆದಾಯವನ್ನು ಹೆಚ್ಚಿಸಿದ ಶ್ರೇಯಸ್ಸು ಇವರದ್ದು.
• ನಿಕೇಶ್ ಅರೋರಾ, ಪಾಲೋ ಆಲ್ಟೊ ನೆಟ್‌ವರ್ಕ್ಸ್: ನಿಕೇಶ್ ಅರೋರಾ (Nikesh Arora) ಸೈಬರ್ ಸೆಕ್ಯುರಿಟಿ ಕ್ಷೇತ್ರದ ದೈತ್ಯ ಕಂಪನಿಯಾದ ಪಾಲೋ ಆಲ್ಟೊ ನೆಟ್‌ವರ್ಕ್ಸ್‌ನ (Palo Alto Networks) ಸಿಇಒ ಆಗಿ 2018ರಿಂದ ಕಾರ್ಯನಿರ್ವಹಿಸುತ್ತಿದ್ದಾರೆ. ಇವರು ವಿಶ್ವದ ಅತಿ ಹೆಚ್ಚು ಸಂಭಾವನೆ ಪಡೆಯುವ ಟೆಕ್ ಸಿಇಒಗಳಲ್ಲಿ ಒಬ್ಬರೆಂದು ಗುರುತಿಸಿಕೊಂಡಿದ್ದಾರೆ.
• ರೇವತಿ ಅದ್ವೈತಿ, ಫ್ಲೆಕ್ಸ್ (Flex): ರೇವತಿ ಅದ್ವೈತಿ (Revathi Advaithi) ಜಾಗತಿಕ ಉತ್ಪಾದನೆ ಮತ್ತು ಸಪ್ಲೈ ಚೈನ್ ಕಂಪನಿಯಾದ ಫ್ಲೆಕ್ಸ್‌ನ ಸಿಇಒ ಆಗಿ 2019ರಲ್ಲಿ ನೇಮಕಗೊಂಡರು. ಕಾರ್ಪೊರೇಟ್ ಜಗತ್ತಿನಲ್ಲಿ, ಅದರಲ್ಲೂ ಉತ್ಪಾದನಾ ವಲಯದಲ್ಲಿ ಭಾರತೀಯ ಮಹಿಳಾ ನಾಯಕತ್ವದ ಅತ್ಯುತ್ತಮ ಉದಾಹರಣೆ ಇವರಾಗಿದ್ದಾರೆ.

ಇದನ್ನೂ ಓದಿ: ಒರಾಕಲ್​ನಲ್ಲಿ ಒಂದು ವರ್ಷದಲ್ಲಿ ಕೆಲಸ ಕಳೆದುಕೊಂಡ 21,000 ಉದ್ಯೋಗಿಗಳು; ಎಐನಲ್ಲಿ ಹೂಡಿಕೆ ಮಾಡಲಿರುವ ಐಟಿ ದಿಗ್ಗಜ

• ಸಂಜಯ್ ಮೆಹ್ರೋತ್ರಾ, ಮೈಕ್ರಾನ್ ಟೆಕ್ನಾಲಜಿ: ಕಾನ್ಪುರದಲ್ಲಿ ಜನಿಸಿದ ಸಂಜಯ್ ಮೆಹ್ರೋತ್ರಾ (Sanjay Mehrotra) ಅವರು 2017ರಿಂದ ಅಮೆರಿಕದ ಪ್ರಮುಖ ಸೆಮಿಕಂಡಕ್ಟರ್ ಮತ್ತು ಮೆಮೊರಿ ಚಿಪ್ ಉತ್ಪಾದನಾ ಕಂಪನಿಯಾದ ಮೈಕ್ರಾನ್‌ನ (Micron Technology) ಸಿಇಒ ಆಗಿದ್ದಾರೆ. ಈ ಹಿಂದೆ ಇವರು ಸ್ಯಾನ್‌ಡಿಸ್ಕ್ (SanDisk) ಕಂಪನಿಯ ಸಹ-ಸಂಸ್ಥಾಪಕರಾಗಿದ್ದರು.
• ಜಯಶ್ರೀ ಉಲ್ಲಾಳ್, ಅರಿಸ್ಟಾ ನೆಟ್‌ವರ್ಕ್ಸ್: ಲಂಡನ್‌ನಲ್ಲಿ ಜನಿಸಿ ದೆಹಲಿಯಲ್ಲಿ ಬೆಳೆದ ಜಯಶ್ರೀ ಉಲ್ಲಾಳ್ (Jayshree Ullal) ಅವರು 2008ರಿಂದ ಕ್ಲೌಡ್ ನೆಟ್‌ವರ್ಕಿಂಗ್ ಕಂಪನಿ ಅರಿಸ್ಟಾ ನೆಟ್‌ವರ್ಕ್ಸ್‌ನ (Arista Networks) ಸಿಇಒ ಆಗಿದ್ದಾರೆ. ಇವರು ಸಿಲಿಕಾನ್ ವ್ಯಾಲಿಯಲ್ಲಿ ಅತ್ಯಂತ ಪ್ರಭಾವಿ ಮಹಿಳೆಯರಲ್ಲೊಬ್ಬರಾಗಿದ್ದು, ಸ್ವಯಂ-ನಿರ್ಮಿತ ಬಿಲಿಯನೇರ್ (Self-made billionaire) ಆಗಿದ್ದಾರೆ.
• ರಾಜ್ ಸುಬ್ರಮಣಿಯಂ, ಫೆಡ್ಎಕ್ಸ್: ಕೇರಳದ ತಿರುವನಂತಪುರಂ ಮೂಲದ ರಾಜ್ ಸುಬ್ರಮಣಿಯಂ (Raj Subramaniam) ಅವರು 2022ರಲ್ಲಿ ವಿಶ್ವದ ಅತಿದೊಡ್ಡ ಕೊರಿಯರ್ ಮತ್ತು ಲಾಜಿಸ್ಟಿಕ್ಸ್ ಕಂಪನಿಯಾದ ಫೆಡ್ಎಕ್ಸ್‌ನ (FedEx) ಸಿಇಒ ಆಗಿ ಅಧಿಕಾರ ವಹಿಸಿಕೊಂಡರು. ಮೂರು ದಶಕಗಳಿಗೂ ಹೆಚ್ಚು ಕಾಲದಿಂದ ಅದೇ ಕಂಪನಿಯಲ್ಲಿ ಸೇವೆ ಸಲ್ಲಿಸುತ್ತಿದ್ದಾರೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ