Elon Musk: 19 ಲಕ್ಷ ಕೋಟಿ ರೂ. ಆಸ್ತಿಯ ವಿಶ್ವದ ನಂಬರ್ 1 ಶ್ರೀಮಂತನಿಗೆ ಈಗ ಟ್ವಿಟ್ಟರ್ ಖರೀದಿಗೆ 3.28 ಲಕ್ಷ ಕೋಟಿ ರೂ. ಹೊಂದಿಸುವ ಚಿಂತೆ
ಎಲಾನ್ ಮಸ್ಕ್ ಅವರು ಟ್ವಿಟ್ಟರ್ ಕಂಪೆನಿ ಷೇರು ಖರೀದಿಗೆ ಮುಂದಾಗಿದ್ದು ಅದಕ್ಕಾಗಿ 43 ಬಿಲಿಯನ್ ಯುಎಸ್ಡಿ ಹೇಗೆ ಹೊಂದಿಸುತ್ತಾರೆ ಎಂಬ ಚರ್ಚೆ ಚಾಲ್ತಿಯಲ್ಲಿದೆ.
Updated on:Apr 15, 2022 | 3:59 PM
ವಿಶ್ವದ ನಂಬರ್ 1 ಶ್ರೀಮಂತ ಎನಿಸಿಕೊಂಡಿರುವ ವ್ಯಕ್ತಿಗೂ 4300 ಕೋಟಿ ಅಮೆರಿಕನ್ ಡಾಲರ್ ಅಂದರೆ ಭಾರೀ ಮೊತ್ತವೇ. ಭಾರತದ ರೂಪಾಯಿ ಲೆಕ್ಕದಲ್ಲಿ ಇದೆಷ್ಟು ಗೊತ್ತಾ? ಇವತ್ತಿಗೆ 3,28,079.25 ಕೋಟಿ ಆಗುತ್ತದೆ. ಈಗ ಹೇಳಲು ಹೊರಟಿರುವುದು ಎಲಾನ್ ಮಸ್ಕ್ (Elon Musk) ಮತ್ತು ಅವರು ಮುಂದಿಟ್ಟಿರುವ ಟ್ವಿಟ್ಟರ್ ಇಂಕ್. ಖರೀದಿ ಪ್ರಸ್ತಾವದ ಬಗ್ಗೆ. ಒಟ್ಟು 25,006 ಕೋಟಿ ಅಮೆರಿಕನ್ ಡಾಲರ್ನಷ್ಟು ಆಸ್ತಿ ಇರುವ ಕುಳ ಎಲಾನ್ ಮಸ್ಕ್, ಪೂರ್ತಿ ನಗದು ಪಾವತಿಸಿ ಟ್ವಿಟ್ಟರ್ ಇಂಕ್ ಖರೀದಿಸುವ ಬಗ್ಗೆ ಆಫರ್ ಕೊಟ್ಟಿದ್ದಾರೆ. ಇಷ್ಟು ಮೊತ್ತ ಅಂದರೆ, ಅವರ ಒಟ್ಟಾರೆ ಆಸ್ತಿಯ ಆರನೇ ಒಂದು ಭಾಗದಷ್ಟಾಗುತ್ತದೆ. 25 ಸಾವಿರ ಕೋಟಿ ಅಮೆರಿಕನ್ ಡಾಲರ್ ಆಸ್ತಿ ಮಸ್ಕ್ಗೆ ಇರುವುದೇನೋ ನಿಜ. ಅದು ಬಹುತೇಕ ಇರುವುದು ಟೆಸ್ಲಾ ಕಂಪೆನಿಯ ಷೇರು ರೂಪದಲ್ಲಿ. ಕಳೆದ ಎರಡು ವರ್ಷದಲ್ಲಿ ಟೆಸ್ಲಾ ಷೇರಿನ ಬೆಲೆ ಭಾರೀ ಪ್ರಮಾಣದಲ್ಲಿ ಏರಿಕೆ ಆಗಿದ್ದು, ಬ್ಲೂಮ್ಬರ್ಗ್ ಬಿಲಿಯನೇರ್ ಸೂಚ್ಯಂಕದಲ್ಲಿ ನಂಬರ್ 1 ಸ್ಥಾನದಲ್ಲಿ ನಿಂತಿದ್ದಾರೆ.
ಈ ಟ್ವಿಟ್ಟರ್ ಇಂಕ್. ಖರೀದಿ ಅಂದುಕೊಂಡಷ್ಟು ನೇರವಾಗಿಲ್ಲ. ಆದರೆ ಮಸ್ಕ್ ಅವರಿಗೆ ಹಣಕಾಸು ಒಟ್ಟುಗೂಡಿಸುವುದಕ್ಕೆ ನಾನಾ ಮಾರ್ಗಗಳಿವೆ. ಅದರಲ್ಲಿ ಒಂದು, ತಮ್ಮ ಟೆಸ್ಲಾ ಷೇರುಗಳ ಮಾರಾಟ ಮಾಡುವುದು. ಇನ್ನು ಸಾಲ ಪಡೆದು, ಖರೀದಿಸುವುದು. ಹೊರಗಿನ ಸಹಭಾಗಿಗಳನ್ನು ಜತೆಗೂಡಿಸಿಕೊಳ್ಳುವುದು. 50 ವರ್ಷದ ಮಸ್ಕ್ ಬಳಿ ಸದ್ಯಕ್ಕೆ 300 ಕೋಟಿ ಯುಎಸ್ಡಿ ನಗದು ಅಥವಾ ಅದಕ್ಕೆ ಸಮನಾದದ್ದು ಲಿಕ್ವಿಡ್ ಆಸ್ತಿ ಇದೆ. ಅದು ಕೂಡ ಈಚೆಗೆ ಟ್ವಿಟ್ಟರ್ನ ಶೇ 9.1ರಷ್ಟು ಪಾಲನ್ನು 260 ಕೋಟಿ ಡಾಲರ್ಗೆ ಖರೀದಿ ಮಾಡಿದ ನಂತರ ಉಳಿದಿರುವ ಮೊತ್ತ ಇದು ಎಂದು ಬ್ಲೂಮ್ಬರ್ಗ್ ಲೆಕ್ಕಾಚಾರ ಮುಂದಿಟ್ಟಿದೆ.
ಟ್ವಿಟ್ಟರ್ನ ಬಾಕಿ ಷೇರನ್ನು ಖರೀದಿಸಲು ಹೆಚ್ಚುವರಿಯಾಗಿ 3600 ಕೋಟಿ ಯುಎಸ್ಡಿ ನಗದು ಅಗತ್ಯ. ಅದಕ್ಕಾಗಿ 3.65 ಕೋಟಿ ಟೆಸ್ಲಾ ಷೇರನ್ನು ಅಥವಾ ಮಸ್ಕ್ ಪಾಲಿನ ಶೇ 20ಕ್ಕೂ ಹೆಚ್ಚು ಪಾಲನ್ನು ಮಾರಾಟ ಮಾಡಬೇಕಾಗುತ್ತದೆ. ಒಂದು ವೇಳೆ ಅಷ್ಟು ದೊಡ್ಡ ಪ್ರಮಾಣದ ಷೇರುಗಳನ್ನು ಮಾರಾಟ ಮಾಡಿದರೆ ಕಂಪೆನಿಯ ಷೇರುಗಳ ಬೆಲೆ ಕುಸಿಯುತ್ತದೆ. ಇನ್ನು ಮತ್ತೊಂದು ಆಯ್ಕೆ ಏನೆಂದರೆ, ಟೆಸ್ಲಾ ಮತ್ತು ಸ್ಪೇಸ್ಎಕ್ಸ್ನಲ್ಲಿನ ಷೇರಿನ ಪಾಲಿನ ಆಧಾರದ ಮೇಲೆ ಸಾಲವನ್ನು ಮಾಡಬಹುದು.
“ಇದು ಪ್ರತಿಕೂಲವಾದ ಸ್ವಾಧೀನದ ಪರಿಣಾಮ ಆಗಿದ್ದು, ಗಂಭೀರ ಪ್ರಮಾಣದ ನಗದು ವೆಚ್ಚ ಆಗಲಿದೆ,” ಎಂದು ಮಿರಾಬೌಡ್ ಈಕ್ವಿಟಿ ರೀಸರ್ಚ್‌ನ ಟಿಎಂಟಿ ಸಂಶೋಧನೆ ಮುಖ್ಯಸ್ಥ ನೀಲ್ ಕ್ಯಾಂಪ್ಲಿಂಗ್ ಹೇಳಿದ್ದಾರೆ. “ಟೆಸ್ಲಾ ಸ್ಟಾಕ್‌ನ ಉತ್ತಮವಾದ ಪ್ರಮಾಣವನ್ನು ಅವರು ಹಣಕ್ಕಾಗಿ ಮಾರಾಟ ಮಾಡಬೇಕಾಗುತ್ತದೆ, ಅಥವಾ ಅದರ ವಿರುದ್ಧ ಬೃಹತ್ ಸಾಲವನ್ನು ನೀಡಬೇಕಾಗುತ್ತದೆ.”
ಸಾಲದ ಮಿತಿಗಳು ಆದರೆ, ವಿಶ್ವದ ಅತ್ಯಂತ ಶ್ರೀಮಂತ ವ್ಯಕ್ತಿಗೆ ಸಹ ಮಿತಿಗಳಿವೆ: ಬ್ಲೂಮ್ಬರ್ಗ್ ಸೂಚ್ಯಂಕ ಅಂದಾಜಿನ ಪ್ರಕಾರ, ತನ್ನ ಷೇರುಗಳ ವಿರುದ್ಧ ಈಗಾಗಲೇ ಸುಮಾರು 20 ಶತಕೋಟಿ ಡಾಲರ್ ಸಾಲವನ್ನು ಮಸ್ಕ್ ಪಡೆದಿದ್ದಾರೆ ಎಂದು ಅಂದಾಜಿಸಿದೆ. ಸುಮಾರು ಯುಎಸ್ಡಿ 35 ಶತಕೋಟಿ ಅನ್ನು ಉಳಿದಿರುವ ಎರಡು ಹೋಲ್ಡಿಂಗ್ನಲ್ಲಿ ತೆಗೆದುಕೊಳ್ಳಬಹುದು. “ಮಸ್ಕ್‌ನ ‘ಅತ್ಯುತ್ತಮ ಮತ್ತು ಅಂತಿಮ’ ಯುಎಸ್ಡಿ 43 ಬಿಲಿಯನ್ ನಾನ್-ಬೈಂಡಿಂಗ್ ಆಫರ್ ಹಣಕಾಸಿನ ಪೂರ್ಣಗೊಳಿಸುವಿಕೆ ಸೇರಿದಂತೆ ಹಲವಾರು ಷರತ್ತುಗಳನ್ನು ಹೊಂದಿದೆ. ಇದು ಯಶಸ್ಸಿನ ಕಡಿಮೆ ಸಂಭವನೀಯತೆಯನ್ನು ನೀಡುತ್ತದೆ ಎಂದು ನಂಬುವುದಾಗಿ,” ಬ್ಲೂಮ್ಬರ್ಗ್ ಇಂಟೆಲಿಜೆನ್ಸ್ ಹಿರಿಯ ಕ್ರೆಡಿಟ್ ವಿಶ್ಲೇಷಕ ರಾಬರ್ಟ್ ಸ್ಕಿಫ್‌ಮನ್ ಗುರುವಾರ ವರದಿಯಲ್ಲಿ ತಿಳಿಸಿದ್ದಾರೆ.
ಟ್ವಿಟ್ಟರ್ ಷೇರುಗಳು ನ್ಯೂಯಾರ್ಕ್‌ನಲ್ಲಿ ಗುರುವಾರ ಶೇ 1.7ರಷ್ಟು ಕುಸಿದು, ಯುಎಸ್ಡಿ 45.08ಕ್ಕೆ ಮುಕ್ತಾಯವಾಯಿತು. ಮಸ್ಕ್ ಪ್ರತಿ ಷೇರಿಗೆ ಯುಎಸ್ಡಿ 54.20 ಅನ್ನು ನಗದು ರೂಪದಲ್ಲಿ ನೀಡುವ ಆಫರ್ ಕೊಟ್ಟಿದ್ದಾರೆ. ಈ ಮಧ್ಯೆ ಟೆಸ್ಲಾ ಷೇರುಗಳು ಶೇ 3.7ರಷ್ಟು ಕುಸಿದವು. ಕಂಪೆನಿಯ ಇತ್ತೀಚಿನ ಪ್ರಾಕ್ಸಿ ಫೈಲಿಂಗ್ ಪ್ರಕಾರ, ಜೂನ್ 30ರ ಹೊತ್ತಿಗೆ ಮಸ್ಕ್ ತನ್ನ ಶೇ 52ರಷ್ಟು ಟೆಸ್ಲಾ ಷೇರುಗಳನ್ನು ಟಡಮಾನ ಮಾಡಿದ್ದಾರೆ. ಟೆಸ್ಲಾ ನೀತಿಯ ಪ್ರಕಾರ, ಅಡಮಾನ ಮಾಡಿದ ಷೇರುಗಳ ವಿರುದ್ಧ ಸಾಲ ಪಡೆಯಬಹುದಾದ ಗರಿಷ್ಠವು ಅವುಗಳ ಮೌಲ್ಯದ ಶೇ 25ರಷ್ಟು ಆಗಿದೆ.
ಆ ನಂತರ, ಮಸ್ಕ್ ಆಪ್ಷನ್ಗಳನ್ನು ಬಳಸಿಕೊಳ್ಳುವ ಮೂಲಕ ತನ್ನ ಷೇರುಗಳ ಸಂಖ್ಯೆಯನ್ನು ಹೆಚ್ಚಿಸಿದ್ದಾರೆ. ಅವರ 172.6 ಮಿಲಿಯನ್ ಷೇರುಗಳು ಯುಎಸ್ಡಿ 170 ಶತಕೋಟಿ ಮೌಲ್ಯದ್ದಾಗಿದೆ, ಅಂದರೆ ಅವರು ಯುಎಸ್ಡಿ 42.5 ಶತಕೋಟಿಯನ್ನು ಎರವಲು ಪಡೆಯಬಹುದು. 2019ರ ಡಿಸೆಂಬರ್ನಲ್ಲಿ ಮಸ್ಕ್ ಅವರು ತಮ್ಮ ಕೆಲವು ಸ್ಪೇಸ್‌ಎಕ್ಸ್ ಷೇರುಗಳನ್ನು ಸಹ ಅಡಮಾನ ಮಾಡಿದ್ದಾರೆ ಎಂದು ಹೇಳಿದ್ದಾರೆ. ಕಂಪೆನಿಯಲ್ಲಿನ ಅವರ ಶೇ 47ರಷ್ಟು ಪಾಲನ್ನು ಅದರ ಅಕ್ಟೋಬರ್ 2021ರ ಫಂಡಿಂಗ್ ಸುತ್ತಿನ ಆಧಾರದ ಮೇಲೆ ಸುಮಾರು ಯುಎಸ್ಡಿ 47.5 ಶತಕೋಟಿ ಮೌಲ್ಯದ್ದಾಗಿದೆ. ಇದೇ ರೀತಿಯ ಗರಿಷ್ಠ ಸಾಲ-ಮೌಲ್ಯ ಅನುಪಾತವಿದ್ದರೆ ಮಸ್ಕ್ ತನ್ನ SpaceX ಷೇರನ್ನು ಸಂಪೂರ್ಣವಾಗಿ ಅಡಮಾನ ಮಾಡುವ ಮೂಲಕ ಮತ್ತೊಂದು ಯುಎಸ್ಡಿ 12 ಶತಕೋಟಿ ಸಂಗ್ರಹಿಸಬಹುದು.
ಇದನ್ನೂ ಓದಿ: Elon Musk: ಇನ್ನೆರಡು ವರ್ಷದಲ್ಲಿ ಎಲಾನ್ ಮಸ್ಕ್ ಆಸ್ತಿ 1 ಲಕ್ಷ ಕೋಟಿ ಯುಎಸ್ಡಿ, ಅಂದರೆ 76 ಲಕ್ಷ ಕೋಟಿ ರೂ. ಅಂತಿದೆ ಈ ವರದಿ
Published On - 2:32 pm, Fri, 15 April 22
